Chii chinonzi Mudzimu Mutsvene?

JESU akambobvunza vadzidzi vake kuti: “Ndibaba vapi pakati penyu, vanoti kana mwanakomana wavo akakumbira hove, vangamutambidza nyoka panzvimbo pehove? Kana kuti akakumbirawo zai, vangamugamuchidza chinyavada here?” (Ruka 11:11, 12) Vana vokuGarireya vaifarira mazai nehove; vaiziva zvokudya zvavaida.

Jesu akataura kuti tinofanira kuramba tichikumbira mudzimu mutsvene, semwana ane nzara ari kukumbira zvokudya. (Ruka 11:9, 13) Kana tikaziva chinonzi mudzimu mutsvene zvichaita kuti tinzwisise kukosha kwaunoita muupenyu hwedu. Saka ngatitangei taongorora zvatinodzidziswa neBhaibheri nezvemudzimu mutsvene.

“Simba roWokumusorosoro”

Magwaro anojekesa kuti mudzimu mutsvene isimba rinoshandiswa naMwari kuita zvaanoda. Ngirozi inonzi Gabrieri payakazivisa Mariya kuti aizova nemwanakomana kunyange aiva mhandara, ngirozi yacho yakamuudza kuti: “Mudzimu mutsvene uchaburukira pauri, uye simba roWokumusorosoro richakufukidza. Saka ichochowo chichaberekwa chichanzi chitsvene, Mwanakomana waMwari.” (Ruka 1:35) Maererano nemashoko aGabrieri, pane kubatana kuripo pakati pomudzimu mutsvene ne“simba roWokumusorosoro.”

Pfungwa yakafanana inowanikawo mune dzimwe ndima muBhaibheri. Muprofita Mika akati: “Ini, ndazara nesimba, nomudzimu waJehovha.” (Mika 3:8) Jesu akavimbisa vadzidzi vake kuti: “Muchagamuchira simba kana mudzimu mutsvene wasvika pamuri.” (Mabasa 1:8) Uye muapostora Pauro akataura nezve“simba romudzimu mutsvene.”—VaRoma 15:13, 19.

Saka, tingagumisei pane zvabva kutaurwa? Pane kunyatsobatana kuripo pakati pomudzimu mutsvene nesimba raMwari. Jehovha anoshandisa mudzimu mutsvene kuratidza simba rake. Zvichitaurwa zviri nyore, mudzimu mutsvene isimba raMwari rinoita basa. Uye simba iri rinoshamisa zvechokwadi! Hatikwanisi kunzwisisa simba raidiwa kusika zvinhu zvose. Achishandisa muprofita Isaya Jehovha akatikurudzira kufungisisa zvinotevera: “Tarirai kumusoro muone. Ndiani akasika zvinhu izvi? Ndiye anobudisa uto razvo maererano nokuwanda kwazvo, anozvishevedza zvose nemazita azvo. Nokuda kwoukuru hwesimba rake guru, zvaainewo simba guru, hapana kana chimwe chete chazvo chinoshayikwa.”—Isaya 40:26.

Saka Bhaibheri rinoratidza kuti nyika yose nokurongeka kwayo zvakavapo nokuda kwe“simba guru” raMwari Wemasimbaose. Zviri pachena kuti simba raMwari rinoita basa iguru, uye simba iroro rakashandiswa kuti tivepo.—Ona bhokisi riri munyaya ino rinoti, “Kushanda Kwomudzimu Mutsvene.”

Jehovha angashandisa mudzimu mutsvene wake pamwero mukuru zvikuru, sepaakasika zvinhu zvose. Asi anogonawo kushandisa simba iri achibatsira vanhu vake vaakasika. Bhaibheri rine mienzaniso yakawanda inoratidza kuti simba raMwari rinoita basa rakasimbisa sei vashumiri vake.

“Mudzimu waJehovha Uri Pandiri”

Ushumiri hwaJesu hunongotiratidza muchidimbu uye zvinokurudzira kuti mudzimu mutsvene waMwari ungasimbisa sei vashumiri vake. Jesu akaudza vanhu vokuNazareta kuti, “Mudzimu waJehovha uri pandiri.” (Ruka 4:18) Chii chakaitwa naJesu achishandisa “simba romudzimu mutsvene”? (Ruka 4:14) Akarapa zvirwere zvemarudzi ose, akanyaradza gungwa rakanga rakatsamwa, akadyisa zviuru zvevanhu nezvingwa zvishomanana nehove, uye akatomutsa vakafa. Muapostora Petro akatsanangura Jesu se“munhu akaratidzwa pachena naMwari . . . nezvishamiso nezviratidzo zvakaitwa naMwari achishandisa iye.”—Mabasa 2:22.

Iye zvino mudzimu mutsvene hausi kuita kuti pave nezvishamiso zvakadaro. Zvisinei, unogona kutiitira zvinhu zvinoshamisa. Jehovha anopa vanamati vake mudzimu mutsvene wake achida, sezvakavimbiswa naJesu. (Ruka 11:13) Saka, muapostora Pauro aigona kutaura kuti: “Ndine simba rokuita zvinhu zvose nokuda kwaiye anondipa simba.” (VaFiripi 4:13) Mudzimu mutsvene ungaitawo basa rakadaro kwauri here? Nyaya inotevera ichapindura mubvunzo iwoyo.

[Bhokisi/Mufananidzo uri papeji 5]

Nei mudzimu mutsvene usiri munhu?

Bhaibheri rinoenzanisa mudzimu mutsvene nemvura. Paaivimbisa vanhu vake kuti aizovakomborera Mwari akati: “Ndichadururira mvura pamunhu ane nyota, uye hova dzinoyerera zvinyoronyoro panzvimbo yakaoma. Ndichadururira mudzimu wangu pavana vako, nechikomborero changu pavazukuru vako.”—Isaya 44:3.

Mwari paanodururira vashumiri vake mudzimu mutsvene wake, ‘vanozara nomudzimu mutsvene,’ kana kuti ‘vanozadzwa nomudzimu mutsvene.’ Jesu, Johani Mubhabhatidzi, Petro, Pauro, Bhanabhasi, uye vamwe vadzidzi vakanga vakaungana pazuva rePendekosti ya33 C.E. vose vanotsanangurwa sevakazara kana kuti vakazadzwa nomudzimu mutsvene.—Ruka 1:15; 4:1; Mabasa 4:8; 9:17; 11:22, 24; 13:9.

Chimbofunga izvi: Munhu ‘angadururirwa’ pavanhu vakawanda vakasiyana-siyana here? Ungati munhu mumwe chete ‘angazadza’ boka rose revanhu here? Izvozvo hazvina musoro. Bhaibheri rinotaura nezvevanhu vakazadzwa nouchenjeri, kunyange nezivo yakarurama nezvimwewo, asi harimbotsananguri munhu seakazadzwa nomumwe munhu.—Eksodho 28:3; Ruka 2:40; VaKorose 1:9.

Shoko rechiGiriki rakashandurwa kuti “mudzimu mutsvene” ndipneuʹma, iro rinopawo pfungwa yesimba risingaoneki. Maererano neExpository Dictionary of New Testament Words, yaVine shoko rokuti pneuʹma “chaizvoizvo rinoreva mhepo . . . uyewo chifemo; asi kunyanya mudzimu uyo kufanana nemhepo isingaoneki, haubatiki uye une simba.”

Saka zvakajeka kuti mudzimu mutsvene hausi munhu.a

[Mashoko Omuzasi]

[Kwazvakatorwa]

Photodisc/SuperStock