Kuvandudza Unyanzvi Hwedu Muushumiri—Kuratidza Vanhu Kuti Chidzidzo cheBhaibheri Chinoitwa Sei Tichishandisa Bhuku raBhaibheri Rinombodzidzisei?

Sei Zvichikosha? Vanhu vakawanda vanogona kusanzwisisa zvatinenge tichireva patinoti tinoitisa zvidzidzo zveBhaibheri tisingabhadharisi. Vanogona kufunga kuti vanofanira kubatana neboka revanhu vanenge vachidzidza, kana kuti kuita kosi vachiita zvekutumirwa mashoko vachipindura. Pane kungobvunza munhu kuti anoda here kudzidza Bhaibheri, wadii kumuratidza kuti chidzidzo chinoitwa sei? Mumaminitsi mashoma, unogona kuratidza munhu kuti kudzidza Bhaibheri kuri nyore uye kuti kunobatsira. Unogona kutoita izvi pasuo chaipo.

Maitirwo Azvo:

Paunenge wapedza kukwazisana nasaimba, mubvunze kana achityira kuti ramangwana rake richange rakadini.
Muudze kuti vanhu vakawanda vari kunetsekawo saizvozvo, uye muratidze peji yezviri mukati mubhuku raBhaibheri Rinombodzidzisei? Mutsanangurire kuti bhuku iri rine zvidzidzo zviri nyore kunzwisisa zvinoratidza zvinodzidziswa neBhaibheri nezveramangwana pamwe nedzimwewo nyaya, uye mubvunze kuti chitsauko chipi chaafarira.
Mutambidze bhuku raBhaibheri Rinombodzidzisei? uye ita kuti aende pachitsauko chaasarudza. Tsanangura kuti mibvunzo iri kwekutanga kwechitsauko inopindurwa mundima dzechitsauko chacho.
Kumbira saimba kuti averenge ndima yokutanga kana achida. Kana apedza, verenga mubvunzo wendima yacho, motsvaga mhinduro yacho mose. Tarisai magwaro anotsigira mhinduro yacho, moakurukura. Muratidze kuti wakamaka sei mhinduro mubhuku rako.
Endai pandima inotevera, asi iye zvino kumbira saimba kuti aedze kupindura mubvunzo wacho asingaiti zvekuverenga.
Mutende, uye ronga kuzodzoka kuti muenderere mberi nechidzidzo chacho.
Kana zvakakodzera, muudze nezvevhidhiyo iri pajw.org inonzi Zvidzidzo zveBhaibheri Zvinoitwa Sei?

Edza Izvi Mwedzi Uno:

Nyengetera kuna Jehovha kuti akomborere zvauri kuedza kuita kuti utange chidzidzo cheBhaibheri.—VaF. 2:13.
Edza kuratidza vanhu kuti chidzidzo cheBhaibheri chinoitwa sei uchishandisa bhuku raBhaibheri Rinombodzidzisei?, kana kuti pose paunobuda muushumiri varatidze kamwe chete kana kupfuura vhidhiyo inonzi Zvidzidzo zveBhaibheri Zvinoitwa Sei?