Kuvandudza Unyanzvi Hwedu Muushumiri—Zvatingaita Kana Saimba Atitsamwira

Sei Zvichikosha? Vakawanda vatinosangana navo muushumiri vanotiremekedza. Asi Jesu akaprofita kuti vamwe vanhu vaizotivenga. (Joh. 17:14) Saka hatifaniri kushamisika kana saimba akatitsamwira. Kana izvozvo zvikaitika, zvakanaka kuti tiite zvinofadza Mwari watinomiririra, Jehovha. (VaR. 12:17-21; 1 Pet. 3:15) Izvi zvinogona kuita kuti tisanetsana nasaimba.Izvozvo zvichapawo uchapupu kuna saimba wacho uye kune vanenge vachiona, zvoita kuti vade kuteerera pavanozoshanyirwa nevamwe vedu.—2 VaK. 6:3.

Maitirwo Azvo:

Ramba wakadzikama, uchiratidza ushamwari. Izvozvo zvichabatsira kuti munzwanane. Usagumbuka kana saimba akakutsamwira. (Mup. 7:9) Anogona kunge aine zviri kumunetsa kana kuti unogona kunge wauya panguva yaanga asingatarisiri. Kana asingafariri zvatinoparidza, kakawanda kacho zvinenge zvichikonzerwa nenhema dzaakaudzwa.—2 VaK. 4:4.
Mupindure neunyoro uye neushamwari. (Zvir. 15:1) Wamumutsa akarara kana kuti wasvika ane zvaari kuita here? Kunyange zvazvo tisingakumbiri ruregerero kuti tauya kuzomuparidzira, unogona kukumbira ruregerero kuti wauya panguva yaanga asingatarisiri. Atsamwa nekuti pane nhema dzaakaudzwa nezvedu here? Kana iriyo nyaya yacho unogona kuti: “Ndaona zvakaita kuti mugumbuke. Asi zvinoita sekuti makanzwa zvisirizvo nezvedu. Ndingakuudzai kuti sei ndichidaro here?” Anoramba imwe dzidziso yedu yakadai seyekudzinga kana kuti yeropa here? Unogona kuti: “Zvinonzwisisika. Pane vamwe vakatombobvunzawo mubvunzo uyu. Mungada here kuti ndikuratidzei zvinotaura Bhaibheri nezvenyaya iyi?”
Kana munhu akatoguta nehasha, zvinganaka kuti uende usina kupindura. Kana akati haachadi kuona Zvapupu zvaJehovha pamba pake, unogona kumuvimbisa kuti tichaita zvaakumbira.

Edza Izvi Mwedzi Uno:

Dzidzirai kuita izvi pakunamata kwenyu kwemhuri.
Pamunenge mabva pana saimba ane hasha, taura newauri kushanda naye kuti ndepapi paungavandudza pane zvawaita.