DJAMBA 18
Wopo ɔkɔ nke okotshɛkiso winaso akristo nde wambowa mbalaka?
République dominicaine
Japon
Haïti
Nde winaso akristo wambowa mbalaka, Atemwe ye Yehova topatshimbatshimbaka dje nyona wopo we ndjaakotshɛ. Ɔsɔ kɛnyɛke ente tolekɔ la ngandji ke solo l’antei k’isoko. (Djɔanɛ 13:34, 35; 1 Djɔanɛ 3:17, 18) Okotshɛkiso winaso wopo ɔkɔ nke?
Topeyɛke mfalanga. L’etsho we ntondo, ndjala ke wolo efula eyalaka lá Yudea wíná ɔmɔtshi. Ko akristo ma ngando ke Antiokia yombotomela winawɔ akristo we Yudea mfalanga dje ndjaakotshɛ. (Elemo 11:27-30) Iso koko nde tomboka amɔ winaso akristo walekɔ l’osako efula l’etena ɛmɔtshi, totomake gkete ma losamvɔ le otshumano w’isoko dje nkoka ndjaakotshɛ lá ndjolo y’iwɔko.—2 Kɔrɛntɔ 8:13-15.
Tokotshɛke lá wopo ononama. Ankɔlɔma wanalekɔ l’etena ke djoyi yomboposa wonake dje ndjewa nde ase otshumano wakokiɛ yankfumo. Iloyi y’anto wanakotshɛka wakoka ndenda olemo we mpɛyɛ anto toma, wasi we nɔ we wɔlɔ, dtshendja dje ndɔta, etena k’anto ndjalá, l’ekanga. Atemwe efula wanewa elemo ɛmɔtshi wenonama watshoke l’ɛkɔpa k’iwɔko yomɛlɛ kankina ko la mfalanga y’iwɔkɔ yɔmɛlɛ, tokamba olemo we nkotshɛ anto, kondo we nonghanyɛ amvulu y’anto la Amvulu y’Onkfumi inambopitana. Gkambo tolekɔ iwoke l’olonghanyelo w’isoko kankina ko tombekelá nkamba esanga, topɛnaka wolo efula dje mba osadju osadju gkete dje nkoka nkotshɛ anto la anto wanakoka nkamba olemo. Kondo okotshɛkisɔ ntondontondo nde “bóto dj’isoko dje lá djawo,” tokotshɛke koko anto ankina, nde wopo olɛkɔ, eyale anto we m’etolo ɛkɔ nke.—Ngalatiya 6:10.
Tokotshɛke anto la alako we Bible la taakeketshɛke lá wengo w’iwɔko. Anto nde djoyi mbaakfuɛla, wayalake la djonyi efula dje mba onto laakeketshɛ. Lá wíná we nghɔsɔ, owakiso wolo nde me Yehova, “Ndjambe keketshɛká anto.” (2 Kɔrɛntɔ 1:3, 4) Toyalake l’osasa nde tosimela anto wanadjika awale alaka we Ndjambe nyɔmbɔpɛyɛ́ lá Bible; tawɛnyɛke pololo ente lako iláá, Onkfumi we Ndjambe wosiyɛ eyakelo enkfumo wenayakalaka ndjolo la djɛmɔ.—Ndjiso 21:4.
Gkambo gkɔ nke Atemwe yopɛnaka wolo efula dje nkotshɛ anto osadju osadju nde djoyi mboposa?
Nde djoyi mbokfuɛla anto, okokiso ndjaakeketshɛ l’alako akɔ nke ma Bible?