Ikanyi yɛ Bible oyɛwɔ mo lá nkambo djɛ lokapo?
Okadjimwelo wɔ Bible
Bible ntokembɛ dj’iso mpɛyɛ l’ɛkɔpa edjinge dj’iso nangha nkambo djɛsɔ la donga djɛ wɔlɔ. Bible nyɛnyɛka djɛ nkapo ndjalaka la wapɔ le onto wokapelawɔ edjinge le onto wokapa. (Woongo 11:25; Luka 6:38) Yeso atepelaka ante: ‘Osasa woyɛ má mpɛyɛ ndeka wɔ mba.’—Elemo 20:35.
Winá wɔkɔnge wɔ nkapo yosasangɛka Ndjambe?
Nkapo nsasangɛka Ndjambe winá wɔpɛyɛso l’ɛkɔpa. Bible ntepelaka ante: ‘Onto l’onto apɛyɛ ngete ndɔlɔngɔsɔlisá m’oloko wɔnde, ape l’eloko epe kana ndotshinda la wolo ladjikɛnde Ndjambe nkɔpaka onto wɔpɛyɛ l’osasa.’—2 Kɔrɛtɔ 9:7.
Nkapo djɛ l’ɛkɔpa alekɔ etenyi ‘k’ɔtɛmwɛlɔ’ wɔ Ndjambe ndáwolaka. (Djakɔbɔ 1:27) Onto wokotshɛ wanɛ walekɔ l’osambo mpɛyɛka Ndjambe lɔwɔ edjinge Ndjambe nyɛnaka ante onto wɔsɔ ambɔsɔmbɛ. (Woongo 19:17) Ndjambe nyɔmɛlɛ angofuta onto wɔkɔ.—Luka 14:12-14.
Winá wɔkɔnge wɔ nkapo yopasasangɛka Ndjambe?
Ntsha onto ambokapa djɛ mpona wapɔ wɔnde nyɔmɛlɛ. Ndjɔmbɔmba:
Djɛ nkamoyɛ anto ankina.—Mateo 6:2.
Djɛ ndokawoyɛ.—Luka 14:12-14.
Djɛ nsomba ewiko.—Yeembo 49:6, 7.
Epapɛyɛ wekembɛ elemo kana djalelo ntona Ndjambe. Ndjɔmbɔmba, topakoke mpɛyɛ onto mfalanga djɛ ntomba etombo wɛ mfalanga, djɛ nnɔ nɔnɔ djɛ wolo kana mvɔ waana. (1 Kɔrɛtɔ 6:9, 10; 2 Kɔrɛtɔ 7:1) Wopo wɔk’ɔmɔ ndeke, apangoyala wɔlɔ nkapela onto wolekɔ l’akoka wa nkamba olemo koko apakɔpɛ nkamba.—2 Tesalɔnikɛ 3:10.
Ntsha nkapo ntoshimba dj’ipa nkotshɛ ehomba w’ase nkfumbo yɛso. Bible ndakanyɛka djɛ ewandji wɛ nkfumbo ladjɛ nkotshɛ ehomba w’ase nkfumbo yɛwɔ. (1 Timɔte 5:8) Apangoyala wɔlɔ djɛ owandji wɔ nkfumbo nkapelaka anto ankina ko ase nkfumbo kɛnde wɛna ndjolo. Wopo wɔk’ɔmɔ ndeke, Yeso apangolaka anto watonaki nkotshɛ ehomba wɛ ambotshi wawɔ wa nkokolo ladjikɛnde watepelaki ambɔ kenkfumɔ kɛ yayalaka la kɛkɔ yayalakande ‘opapɛyɛ wɔ mpɛyɛ Ndjambe.’—Marko 7:9-13.