Gkambo gkɔ nke otetakawɔ Atemwe ye Yehova?

Anto efula wakanelake amɔ Atemwe ye Yehova ewɔ nde djína dje etolo ke ndjambe emɔtshi ke bango. Ntshende, embetá deko 2 700, ɛtɔyi ke Ndjambe ke solo awetaki ankambi we nd’eko ante “atemwe” ye nde. (Izaya 43:10-12) Tii lá 1931, yotetaká iso Atemwe nde amɔ Ambeki we Bible. Yako soyé y’osa djína dje Atemwe ye Yehova gkambo gkɔ nke?

Djíná djɛnyɛ́ nkanga loye Ndjambe k’ɛso. Lá ekanda we ntondontondo we Bible wefundamaki l’ɛwɔ, djína dje Ndjambe, Yehova, djɛnamake mbala nunu la nunu. Koko, lá ekadjimwelo efula we Bible, wamimiɛ́ djína dje Yehova, ko wambokitshɛ́ nkombo inkina, te Nkfumi kondo Ndjambe. Ntshende, Ndjambe ke solo ayawisolaka le Moize lá djína dje nd’eko nyomɛlɛ, Yehova. Nyomboosimela ante: “Ɔsɔ nde djína dj’ɛmi itshinda itshinda.” (Eposelo 3:15) Lá wopo ɔkɔsɔ nde nyɛnyɛ́ ante atshikitana la andjambe inkina y’ongolo. Tolekɔ l’osasa dje ndjɔsa djína dj’ekina dje Ndjambe.

Djíná djɛnyɛ́ olemo we yombotopɛyɛ́. Mbanga me Abele, ampame la wamato we gkɔmano wɛnyɛka amo walekɔ atemwe ye Yehova gkambo wayalaka la djawo le nde. Lá deko la deko, Noe, Abrahama, Sara, Moize, Davide, l’anto ankina wayɛka y’ɔtshɔ l’ɔlɔngɔ w’anto wanetawɔ amɔ “denge dj’ekekete dj’atemwe.” (Hebero 11:4–12:1) Ngo te temwe okokande nyɛnyɛ lá tuminanyi ante onto songolo atananghá djoyi, iso koko tɔkɔpa dje ndjewoyɛ solo lá gkambo dje Ndjambe.

Tolandiso nde lokolo le Yeso nyotshike. Bible etake Yeso ante “temwe ke gkɔmano la solo.” (Ndjiso 3:14) Yeso nde nyomɛlɛ ko nyombotepela ante ‘ndjewoyɛka djína dje Ndjambe,’ kankina ante nkindjɛka ‘mpɛyɛ owakiɛ’ lá gkambo dje solo. (Djɔanɛ 17:26; 18:37) Djoko nde ambeki we solo we Kristo walekɔ la dje ndjɔsa la ndjewoyɛ djína dje Ndjambe. Oso alekɔ djoyi motshi naye Atemwe ye Yehova onanghawɔ la wolo dje nkokiɛ.

• Gkambo gkɔ nke Ambeki we Bible yɔsi djína dje Atemwe ye Yehova?

• Ma wíná ɔkɔ nke Yehova nyowange ndjalá l’Atemwe l’anɛ lá looko?

• Oye Temwe ke Yehova keleki na?