Ndjambe otshikande ndjolo la akambo apɔlɔ la nke?

1. Akambo apɔlɔ yowange mo?

Akambo apɔlɔ yowange lá looko nde lá wíná wɔ Satana nyotepelá ongolo wɔ ntondontondo. Ma bangobango, Satana ayalaki ondjelo wopa l’ɛkɔmɔ, koko “atapikamá lá solo.” (Djɔanɛ 8:44) Ayɛka yoyala la mposɛ kɛ wowile lumu lɔnɛlama ngo la Ndjambe nyɔmɛlɛ. Ko Satana nyombodjimba Eva, womoto wɔ ntondo; nyomboodjimbola djɛ owokele nde ko atshike ndjokela Ndjambe. Adama ko nyɔmbɔlɔnda Eva; nde koko nyombotona ndjokela Ndjambe. Ɔsɔ nde djoyi nambotoyakalá ndjolo la nyoyi.​—Tangá Ewangelo 3:1-6, 19.

Lá winá wɔ Satana nyosɛngɛyɛ́ Eva ante apendole Ndjambe, nyowange nde nyanela onkfumi wɔ Ndjambe nkfulu; nyile nde wamo lá nkambo dj’ekopo kɛ Ndjambe Onaleka-lá-Djiko. Anto efula wambɔlɔndá Satana, wambotoná Ndjambe ndjalá Nkfumi k’iwɔko. M’anko nde Satana nyomboyalá “nkfumi k’andja.”​—Tangá Djɔanɛ 14:30; 1 Djɔanɛ 5:19.

2. Nkete djɛ Ndjambe nyotongé yoyale nde l’ɛkɔmɔ?

Ndjambe nde amonangha olemo wopayalaka l’ɛkɔmɔ. Anto l’andjelo wɛ Ndjambe nyotongé wayalaki la wolo wɔ nkoka ndjokela Ndjambe lá akambo ankfumɔ. (Mvungo K’ɛlɛmbɛ 32:4, 5) Ndjambe atotongaka la wolo we nkoka nsɔna nangha akambo wa wɔlɔ l’akambo apɔlɔ. Wolo ɔkɔ wɔtopɛyɛ mbamba k’iso nyɛnyɛ ngandji te Ndjambe.​—Tangá Djakɔbɔ 1:13-15; 1 Djɔanɛ 5:3.

3. Ndjambe nyombotshiká ndjolo tii lɔko la nke?

Yehova ambotshiká wamo lá nkambo dj’onkfumi wɔ ndeko wokoyala. La nke? Djɛ nyɛnyɛ ante nde epa guvɛrnɛma djɛ ndeko, lako guvernɛma nkina nakoka nanghela anto wɔlɔ. (Losanghanyɛ 7:29; 8:9) Ma mbisa kɛ anto ndjapamela winawɔ deko 6 000, akambo wamɛnama pololo. Lako kondo nkfumi ɛmɔ enambosiyɛ́ ambandji, enanghanangha, yɛngɛyɛ kondo elando.​—Tangá Jɛrɛmi 10:23; Ɔrɔma 9:17.

Onkfumi wɔ Ndjambe wotshikitana la w’anto, nkambo anto wanokela Onkfumi wɔ Ndjambe wawa wɔlɔ efula. (Izaya 48:17, 18) Lako ilá, Yehova okomɛ aguvɛrnɛma ankfumɔ y’anto. Ngo anto wanasɔna amɔ Ndjambe awapamele nde longotshikala lá looko.​—Izaya 11:9.​—Tangá Danyɛlɛ 2:44.

Lenda video Why Does God Allow Suffering?

4. Bale ntshitshi djɛ Ndjambe ɔtɔpɛyɛwɔ mbamba kɛ nangha nke?

Satana atongaka ante lako onto lokoká nkambela Ndjambe la ngandji. Ɔngɔkɔpa nyɔnyɔla Satana l’ongolo ɔkɔsɔ? Okoka ndjɔwɔnyola! Bale ntshitshi djɛ Ndjambe ntɔpɛyɛ mbamba k’iso nyɛnyɛ onkfumi wɔnɛ ɔkɔpaso: wɛ Ndjambe ndo w’anto? Ma djalelo dj’isoko nde okokiso nyɛnyɛ.​—Tangá Djɔbɔ 1:8-12; Woongo 27:11.

5. Okokaso nyɛnyɛ ente tɔmbɔsɔna Ndjambe ayale Nkfumi k’isoko wopo ɔkɔ nke?

Nyɛnyɛ ente tɔmbɔsɔna Ndjambe ayale Nkfumi k’isoko nde nyona etolo kɛ sɔlɔ kɛnɛ kokaná la Bible, Otepela we Ndjambe, la ndjingela l’etolo ɛkɔ. (Djɔanɛ 4:23) Ntona Satana ayale nkfumi k’isoko nde namwɔ otale m’akambo wa pɔlitikɛ la ma ambandji, ngo te Yeso nyonanghaká.​—Tangá Djɔanɛ 17:14.

Satana anangha la wolo djɛ akambo wa ntshamba nsɔnyi la wapitá anto wɛname wɔlɔ lá wiso w’anto. Nde tombotona akambo akɔ, boto la nkɛndɛlɔ wakoka ntotola kondo ntonanyɛ. (1 Pɛtɛlɔ 4:3, 4) Djɔko nde ngo isɔ nsɔna: Tɔngɔkɔpa sɔlɔ nsanghana l’anto wanɛ wakopá Ndjambe? Tɔngɔkɔpa ndjoka alako wɛ ndeko wɛ djanya la ngandji? Nde tombonangha nghɔsɔ, tongotongola Satana lá djoyi na nyotepelá ante l’ekakatano, onto apakoke nkambela Ndjambe lako.​—Tangá 1 Kɔrɛntɔ 6:9, 10; 15:33.

Ngandji kɛ Ndjambe te anto ketokitshɛ awale djɛ iso ndjawola ente solo, ndjolo l’akambo apɔlɔ ingosila. Anto wanɛ wɛnyɛ́ amɔ wawola akambo akɔ wangoyala la lowiko l’itshinda lá looko.​—Tangá Djɔanɛ 3:16.