Djakɔbɔ nya Esawo wambila vu

Yehova alakaka Djakɔbɔ ante angoolama ngo ngete ndalame Abrahama nya Isaka. Djakɔbɔ atshɔka ntintasɛ lá mbandja kɛ yetaka ambɔ Haranɛ, atotshukaka l’eteyi, awotaka wana efula, ole akomaka l’okfudji.

M’ɔkɔngɔ, Yehova ashimelaka Djakɔbɔ ante: ‘Kalɔ tá mbandja kɛnyo.’ Djɛko ndeke Djakɔbɔ nya nkfumbo kɛnde wawangaka lɔkɛndɔ l’otale tá mbandja kɛwɔ. Lá mboka, anto amɔtshi wayɛka ndoshimela Djakɔbɔ ambɔ: ‘Mama kɛko Esawo ayaye nya ampame 400!’ Djakɔbɔ okaka wɔma ante Esawo nkoka ndonanghela nyɛtshi nde nya nkfumbo kɛnde. Nde alɔmbaka Yehova ante: ‘Lambɔkɔwɔnda ombikɛ m’ɛwɔ wɛ mama kɛmi.’ Lofu lɔwɔlamisá, Djakɔbɔ atomelaka Esawo epapɛyɛ, ɛnkɔkɔ, ambodji, angɔmbɛ, akamɛlɔ l’ampunda efula.

L’otsho wɔkɔ, winá wɔ Djakɔbɔ ndayalaka nyɔmɛlɛ, nde ɛnaka ondjelo! Ondjelo wɔkɔ atateyɛka nana mbandji nyande. Wananaka tii la nkɛsɛ. Kaanga ondjelo wɔsɔ ndahotadjɛ Djakɔbɔ, nde atapekɔ. Ondjelo atepelaka ante: ‘Ontshike ntshu.’ Koko, Djakɔbɔ atepelaka ante: ‘Lako, mpangokotshika ntsha otansakola.’

Ekomo ekomo, ondjelo ósakolaka. Win’ɔsɔ, Djakɔbɔ ambewa ante Yehova apangawola djɛ Esawo ndonanghela nyɛtshi.

Lá nkɛsɛ djɛkɔ, Djakɔbɔ atangelaka Esawo ayaye l’ampame 400. Djakɔbɔ ahetaka lá ntondo kɛ nkfumbo kɛnde ko akfusamaka lá ntondo kɛ mama kɛnde mbala esambele. Esawo alotaka te Djakɔbɔ ko avundanaka nyande. Yape kɛkɔ watondjɔka la delo ko wilaka vu l’anteyi kɛwɔ. Okanelɛ ente Yehova ndoke ngete mo má wopo wɔ Djakɔbɔ ndakandola okakasano wɔsɔ?

M’ɔkɔngɔ, Esawo akalɔka takande, Djakɔbɔ koko atshɔka takande. Djakɔbɔ awotaka wana w’ampame 12. Wiina wawɔ wakinɛ: Rubɛnɛ, Simɛyɔnɛ, Lewi, Juda, Danɛ, Nafɛtali, Gadɛ, Ashɛrɛ, Isakarɛ, Zebulunɛ, Yosɛfu la Bejamɛ. Yehova akambaka nya Yosɛfu, wɔna ɔmɔtshi l’anteyi kɛ wana wasɔ djɛ mbikɛ owila wɔnde. Ewa wopo wɔ ndaawikɛ? Ntshɔ tokolenda.