Watákotshɛ́ elaka kɛwɔ

Yehova ashimelaka Mɔsɛ ante: ‘Handa le lemi l’onkókó. Langofuna ɛlɛmbɛ wɛmi lá mpase dj’ave ko langɔkɔpɛyɛ.’ Mɔsɛ ahandaka t’onkókó ko atshikalaka l’eteyi etsho 40. Winá wɔ ndayalaka l’eteyi, Yehova afunaka Ɛlɛmbɛ Djomi lá mpase mpe dj’ave ko apɛyɛka Mɔsɛ.

Etsho emangha m’ɔkɔngɔ, ase Isariyɛlɛ wakanelaka ambɔ Mɔsɛ ambaakadjɛ. Washimelaka Arɔ ambɔ: ‘Tolekɔ la djonyi dj’onto wɔtɔlɔndjɛ. Otonanghele indjandjambe!’ Arɔ atepelaka ante: ‘Nyɔmpɛyɛ mpawonyi yɛnyo.’ Nde alɛlɔlaka mpawonyi yɛkɔ ko ananghaka isakandole yɛ wɔna ngɔmbɛ. Anto watepelaka ambɔ: ‘Wɔna ngɔmbɛ wɔnɛ ndeke Ndjambe kɛso ketoposisá m’Edjipito!’ Wawangaka ntɛmɔla wɔna ngɔmbɛ wɔkɔ edjinge wananghaka fɛtɛ. Nkambo djɛ yananghe djɛsɔ djeyalaka wɔlɔ? Lako, ladjikɛnde anto wasɔ wananghaka elaka ambɔ wangɔtɛmɔlaka ngo Yehova. Koko winá wɔsɔ, wambotshita elaka kɛwɔ.

Yehova ɛnaka nkambo djenanghemaki, ko ashimelaka Mɔsɛ ante: ‘Kita te anto. Iwɔ wambompendola edjinge watɛmɔla indjandambe y’ongolo.’ Mɔsɛ akitaka m’onkókó alawɛmbɛ mpase mpe dj’ave.

Winá wɔ ndakome entshupa la ká, Mɔsɛ okaka anto watshumba. Masɔ aawɛnaka wamina la wakfusamela wɔna ngɔmbɛ. Mɔsɛ onkaka nkɛlɛ efula. Awokelaka mpase djɛkɔ mpe dj’ave lá looko, ko djewodjɛka. Mbala kɛkɔ kɛmɔ, nde atshitaka isakandole yɛkɔ. Masɔ nde opolaka Arɔ ante: ‘Wopo wɔkɔnge anto yombokaawoyɛ djɛ wɛ nangha nkambo djɛ nyɛtshi djɛ nghɔnɛ?’ Arɔ atepelaka ante: ‘Tomalake. Wɛ ndjewaka anto wanɛ wopo w’oyɛwɔ. Wambɔkɔpaka djɛ lemi ndananghela indjandjambe, djɛko ndeke milaki mpawonyi yɛwɔ l’iyɛ ko yomboposɛ wɔna ngɔmbɛ!’ Arɔ atasamba nangha nghɔsɔ. Mɔsɛ akalɔka t’onkókó ko awɔndaka Yehova djɛ nde nyimeyɛ anto.

Yehova imeyɛka waakɔpisá ndɔɔlɛmɛyɛ. Ɔpɛnyi ente ayalaka djonyi ase Isariyɛlɛ nkilika ɛlɔndjɛlɔ kɛ Mɔsɛ?