Tabɛrnaklɛ lá nkambo dj’ɔtɛmwɛlɔ

Winá wɔ Mɔsɛ ndayalaka l’Onkókó wɔ Sinayi, Yehova oshimelaka djɛ nde mpika mvulu kɛ mpɛma ketshikitanyi la inkina, mvulu kɛkɔ nde tabɛrnaklɛ. L’eteyi ndeke ase Isariyɛlɛ yakokaka ndɔɔtɛmɔla. Watáwɛmbaki tabɛrnaklɛ kɛsɔ ndjena nkfumɔ djɛ yotatshɔka.

Yehova atepelaka ante: ‘Shimela anto wapɛyɛ nkete dj’okotshɛwɔ djɛ mpika tabɛrnaklɛ.’ Ase Isariyɛlɛ wapɛyɛka mpawonyi, mfɛsa, konga, mbɔkɔ y’oshinga la dɛngalɛnga nkina. Wapɛyɛka lonkina eshinga wenanghemisá la wɛɛsa, linɛ, mposo yɛ nyama la nkete nkina efula. Wapɛyɛka nkete efula tii Mɔsɛ ndashimela ante: ‘Ambokoka! Nyotapɛyɛke lonkina.’

Ampame l’amato yewaki olemo wɔlɔ efula wakotshɛka l’opikelo wɔ tabɛrnaklɛ. Yehova aapɛyɛka djanya dj’iwɔ nkamba olemo wɔkɔ. Amɔtshi washingaki eshinga, wamamanyɛki ntshendja la wilaki asango l’eteyi. Ankina wasɛlaki ave, wakambaki la mpawonyi la wataki awaya.

Wapikaka tabɛrnaklɛ ngo ngete Yehova ndaashimela. Wananghaka irido imɔtshi yɛ wɔlɔ lombombe djɛ nkapola tabɛrnaklɛ lá ntenyi mpe: Etenyi k’Ekina la Etenyi keleka Ekina. Lá Etenyi keleka Ekina, wilaka onsete w’iseke wɔ yananghe la awaya w’otamba wɔ akazia edjinge la mpawonyi. Lá Etenyi k’Ekina, w’ilaka nkondji djɛ ntala djɛ yananghe la mpawonyi, mɛsa, la etshumbelo kɛ mbele yɛ nsolo mpimbo. Dɔnga dj’ekekete djɛ konga la etshumbelo k’ekekete ndeke loyalaki lá bandja djɛ tabɛrnaklɛ. Onsete w’iseke wavungolaki ase Isariyɛlɛ daka djɛwɔ djɛ ndjala la ntshunamo te Yehova. Ewa iseke yɛsɔ? Oyɛwɔ nde elaka kɛmɔtshi ketshikitanyi.

Yehova asɔnaka Arɔ nya wana wande dj’iwɔ nkambaka ete ngo ankfundji lá tabɛrnaklɛ. Wayalaka ladjɛ namaka tabɛrnaklɛ kɛkɔ ole ndambolaka Yehova elambo l’eteyi. Ngo Arɔ toko ndeke l’ingelaki l’Etenyi keleka Ekina ladjikɛnde nde ayalaki nkfundji k’ekekete. Nde ingelaki l’eteyi mbala kɛmɔ l’ɔnɔnyi djɛ ntɔpɛyɛ olambo lá nkambo djɛ mpekanto yɛnde, y’ase nkfumbo kɛnde, la yɛ owila w’Isariyɛlɛ w’otondo.

Ase Isariyɛlɛ washiyɛka mpika tabɛrnaklɛ m’ɔkɔngɔ w’ɔnɔnyi ɔmɔ w’iwɔ mposa m’Edjipito. Winá wɔsɔ, wambowa edjena kɛ ntɛmɔla Yehova.

Yehova alodjɛka tabɛrnaklɛ kɛsɔ la lomo lɔnde edjinge ananghaka djɛ bonde nyɛnamaka lá djiko. Ilá kenkfumɔ kɛ bonde yatshikalaka lá djiko djɛ tabɛrnaklɛ, ase Isariyɛlɛ watasɛkɔki. Koko winá wɔ bonde djɛkɔ yasɛkɔka, iwɔ wewaki ambɔ winá w’iwɔ nsɛkɔ wombokoka. Iwɔ wapikolaki tabɛrnaklɛ edjinge wakilikaki bonde.