Ngidiyɔnɛ ambolonga ase Midiyanɛ

M’ɔkɔngɔ, ase Isariyɛlɛ wapɛyɛka Yehova ɔkɔngɔ lonkina ko watateyɛka ntɛmɔla tondjandjambe t’engolo. L’ilá k’ɛnɔnyi esambele, ase Midiyanɛ wɔngɔlaki anyama y’ase Isariyɛlɛ edjinge watshitaki nkete djɛ l’awedji wawɔ. Djɛ ndota ase Midiyanɛ, ase Isariyɛlɛ wisamaki lá weendo w’ave la l’enkókó. Wawɔndaka Yehova djɛ ndaawikɛ. Djɛko ndeke Yehova atomaka ondjelo le olangala ɔmɔtshi wɔ mpame wɔ yetaka Ngidiyɔnɛ. Ondjelo oshimelaka ante: ‘Yehova ambɔkɔsɔna djɛ wɛ ndjala nanyi mbandji k’okowo.’ Ngidiyɔnɛ opolaka ante: ‘Okokami mbikɛ Isariyɛlɛ ngete mo? Oyɛmi ngo onto w’anyanya.’

Wopo wɔkɔnge Ngidiyɔnɛ ndewe ante Yehova ndeke lombɔɔsɔna nsɔsɔlɔ? Nde alaka wɛsa w’ɛnkɔkɔ lá looko ko ashimelaka Yehova ante: ‘Ntsha la nkɛsɛ, lowonge lɔmbɔnyɔkɛ wɛsa w’ɛnkɔkɔ toko ko looko lopanyɔkisa, langewa ente wɛ nkɔpaka djɛ lemi mbikɛ Isariyɛlɛ.’ La nkɛsɛ, lowonge lɔnyɔkɛka wɛsa w’ɛnkɔkɔ, koko lotányɔkɛ́ looko! Koko masɔ Ngidiyɔnɛ alɔmbaka lonkina djɛ la nkɛsɛ djɛngɔwɔlama, lowonge lɔnghɔnyɔkɛ looko koko lotanyɔkɛke wɛsa. Winá wɔ nkambo djɛsɔ yananghema, Ngidiyɔnɛ ashikikɛka ante nsɔsɔlɔ, Yehova ambɔɔsɔna. Masɔ nde atshumanyɛka angala wande djɛ ntonanyɛ ase Midiyanɛ.

Yehova ashimelaka Ngidiyɔnɛ ante: ‘Langɔpɛyɛ ase Isariyɛlɛ mpongo. Koko ladjikɛnde olekɔ l’angala efula, okoka ndokanela ente ombolonga mbandji má nkfulu kɛko. Djɛko ndeke shimela onto onkfumɔ wolekɔ la wɔma akalɔ tá mbandja.’ Ko angala 22 000 wakalɔka, watshikalaka angala 10 000. Masɔ Yehova oshimelaka lonkina ante: ‘Angala walekɔ ngo efula. Kita nyawɔ tá ndjale, edjinge shimelawɔ wanɔ washi. Ongotshikale ngo nya wanɛ wangɔkɛnghanyɛka djɛ ndenda antonyi winá w’ɔnɔwɔ washi.’ Ngo ampame 300 ndeke lɔkɛnghanyɛki winá wɔ yanɔka washi. Yehova alakaka ante ampame ndambo daambi wasɔ wangolonga angala 135 000 w’ase Midiyanɛ.

L’otsho wɔkɔ, Yehova ashimelaka Ngidiyɔnɛ ante: ‘Winá wombokoka wɔ nanyɛ ase Midiyanɛ!’ Ngidiyɔnɛ apɛyɛka ampame yɛnde aseke l’ambaka yɛ nkekete dj’iwɔ ndjisá ewaya l’eteyi. Aashimelaka ante: ‘Nyondendake, edjinge nyonghonanghe ngo wopo wonanghami lɔ.’ Ngidiyɔnɛ afulaka ntsheke djɛnde, awolaka mbaka kɛnde, akotaka owaya wɔnde, edjinge awelaka la djoyi djɛ wolo ante: ‘Lokfula lɔ mbandji lɔ Yehova la lɔ Ngidiyɔnɛ!’ Ampame 300 yɛkɔ inkfumɔ wananghaka ngo nghɔsɔ. Angala w’ase Midiyanɛ w’okaka wɔma, ko watshanghanaka ntshaa. Wawangaka ndjakana yɔmɛlɛ lá ovungusano wɔsɔ. Mbala kɛnɛ lonkina, Yehova akotshɛka ase Isariyɛlɛ dj’iwɔ ndonga antonyi wawɔ.