Yehova ambɔpɛyɛ Samisɔnɛ nkfulu

Ase Isariyɛlɛ efula wawangaka ntɛmɔla tosakandole lonkina, djɛko ndeke Yehova atshikaka djɛ ase Filistiya ndaawapamela. Koko ase Isariyɛlɛ amɔtshi wakindjɛki ngo nkɔpa Yehova. Ɔmɔtshi l’anteyi kɛwɔ nde, Manɔwa. Nde nya wadjɛnde watawotá wana. Lofu lɔmɔtshi, Yehova atomaka ondjelo le wadjɛ Manɔwa. Ondjelo oshimelaka ante: ‘Ongowota wɔna mpame. Nde angotshungola Isariyɛlɛ m’ɛwɔ w’ase Filistiya. Nde angoyala Nazariyɛ.’ Wɛ ndjewaka Anazariyɛ oyɛwɔ wa na? Oyɛwɔ nde enkambi wɛ Yehova wetshikitanyi. Anazariyɛ watopaki akfo.

M’ɔkɔngɔ, wɔna Manɔwa awotshɔka, ndjiina djɛnde nde Samisɔnɛ. Winá wɔ Samisɔnɛ ndafule, Yehova ɔpɛyɛka nkfulu efula. Nde ayakaka kimbwe ngo l’ɛwɔ toko. Lofu lɔmɔtshi, Samisɔnɛ ayakaka ase Filistiya 30 ngo nyɔmɛlɛ ngɛndjɔ. Ase Filistiya wootonaka efula edjinge wawangaka mpona wopo w’okokawɔ ndooyaka. Lofu lɔmɔtshi lɔ Samisɔnɛ ndalale lá Ngaza, ase Filistiya watshɔka ntoopolama lá lokfuke lɔ ngando dj’iwɔ ndooyaka winá wɔ ndongoposa la nkɛsɛ. Koko Samisɔnɛ awetshɔka la kati k’otsho, atshɔka tá lokfuke lɔ ngando ko afumolaka. Nde awɛmbaka lokfuke lɔkɔ l’apɛka tii lá djiko dj’onkókó ɔmɔtshi woyalaki entshupa la Hebrɔnɛ!

M’ɔkɔngɔ, ase Filistiya watshɔka te wadjɛnde Delila ko woshimelaka ambɔ: ‘Tongokofuta mfalanga yɛ kɛngɛlɛ efula ntsha wɛ ntisola iseke yɛ nkfulu kɛ Samisɔnɛ. Tɔkɔpa ndoovunda ko ndoowokela lá lokando.’ Delila akɔpaki mfalanga efula, djɛko ndeke nde awolaka. Má bango, Samisɔnɛ atákɔpá ndooshimela iseke yɛ nkfulu kɛnde. Koko nde ookfudjɛka tii nde ndɔlɛmba, ko ndoowisola iseke yɛnde. Nde oshimelaka ante: ‘Watándjopaká nkfo kaanga lofu ladjikɛnde ndekɔ Nazariyɛ. Ntsha wambondjopa nkfo, mpangoyala la wolo lonkina.’ Samisɔnɛ ananghaka ovunga w’ekekete má ndoshimela nkambo djɛsɔ, ape nsɔsɔlɔ?

Mbala kɛkɔ kɛmɔ, Delila atshɔka ntoshimela ase Filistiya ante: ‘Lambewa iseke yɛnde!’ Nde awetshɛka Samisɔnɛ ilɔ lá mpɛlɔ djɛnde, ko ashimelaka onto ɔmɔtshi djɛ nde ndoowopa nkfo. Delila awelaka ante: ‘Samisɔnɛ, ase Filistiya wamboyɛ!’ Samisɔnɛ awetshɔka, koko atayalá lo wolo lonkina. Ase Filistiya wovundaka, wowolaka wiso, ko wowokelaka tá lokando.

Lofu lɔmɔtshi, doyi doyi dj’ase Filistiya wasanghanaka lá tɛmpɛlɔ kɛ indjandjambe yɛwɔ Dagɔnɛ, ko wawelaki ambɔ: ‘Ndjambe kɛso ambotolambola Samisɔnɛ! Nyoyakale lanɛ! Tolotombe lande ndambo.’ Wowemɛka l’anteyi k’akondji ape, ko wɔwɔlaki. Samisɔnɛ awelaka ante: ‘Ee, Yehova, lambɔkɔwɔnda ɔmpɛyɛ nkfulu kaanga mbala kɛnɛ toko.’ Lá winá wɔsɔ, ko nkfo djɛ Samisɔnɛ mbokalɔ mfula. Nde atshindaka akondji wa tɛmpɛlɔ la nkfulu kɛnde kenkfumɔ. Ko mvulu k’otondo kevutshɛka, keyakaka anto ankfumɔ wayalisá lá tɛmpɛlɔ, ole Samisɔnɛ avɔka.