Davidɛ nya Saolo

M’ɔkɔngɔ wɔ Davidɛ ndjaka Gɔliyatɛ, Nkfumi Saolo owilaka owandji wɔ angala wande. Davidɛ alongaka ambandji efula, edjinge akomaka onto wɔ lomo. Winá enkfumɔ wɛ Davidɛ ndakalɔka má mbandji, amato waminaki la watshumbaki ambɔ: ‘Saolo ayakaka nunu, koko Davidɛ amboyaka nunu la nunu!’ Saolo awangaka ndjoka Davidɛ nkandjema ko ahonaka ndooyaka.

Davidɛ ewaki mpoma lɔngɔmbi wɔlɔ efula. Lofu lɔmɔtshi, winá wɔ Davidɛ ndapomelaka Saolo lɔngɔmbi, Saolo oofunaka nkɔnga. Davidɛ inamaka ko nkɔnga djepikamaka l’epele. Masɔ, Saolo ahonaka ndjaka Davidɛ lonkina mbala efula. Ekomo ekomo, Davidɛ alotaka ko atisamaka l’osowe.

Saolo ɔsaka angala 3000 djɛ ntokemba Davidɛ. Lofu lɔmɔtshi, Saolo atingelaka lá wendo wɔ ve, l’edjena kɛ Davidɛ nya anto wande yisámaká. Anto wa Davidɛ woshimelaka lá ntoyi ambɔ: ‘Ɔnɛ ndeke mbamba kɛ wɛ ndjaka Saolo.’ Ko Davidɛ asɛmɛlaka te Saolo ko oowopaka lɔlɛndjɛ l’esendja. Saolo atéwá. Masɔ, Davidɛ okaka nyɛtshi ante apalɛmɛyisa nkfumi kɛsɔnamisá me Yehova. Koko nde atáwolá djɛ ampame yɛnde ndjaka Saolo. Winá wɔ Saolo ndapose má wendo, Davidɛ oweelaka ante, ambokokaka ndooyaka winá wɔ ndowaki mbamba. Saolo atshikitanyɛka ikanyi yɛnde lá nkambo djɛ Davidɛ?

Lako. Saolo akindjɛka mpona Davidɛ djɛ ndoyaka. L’otsho ɔmɔtshi, Davidɛ nya wɔna nkaana kɛnde Abishai wingelaka la mayɛlɛ onkfumɔ lá ká kɛ angala wa Saolo. Kaanga Abinɛrɛ, kanga lolamaki Saolo atshulɔka l’ilɔ. Abishai atepelaka ante: ‘Tombowa mbamba! Ontshike ndoyake.’ Davidɛ okadjimolaka ante: ‘Yehova angoloseyɛ nya Saolo. Ntshɔ tɔshi ngo nkɔnga la iteka yɛnde yɛ washi ndeke totshu.’

Davidɛ ahandaka l’isɔndji y’onkókó djɛ nyɛna ká kɛ Saolo. Ko aweelaka ante: ‘Abinɛrɛ, lamo ngopalamisa nkfumi kɛko? Iteka la nkɔnga djɛ Saolo lampe?’ Saolo alembetelaka djoyi djɛ Davidɛ ko oshimelaka ante: ‘Ombowaka mbamba kɛ ndjaka lemi, koko opandjakisa. Ndjewa ente ongoyala nkfumi k’Isariyɛlɛ.’ Ko Saolo akalɔka tá mvulu kɛnde kɛ lowandji. Koko ape ase nkfumbo ankfumɔ wa Saolo ndeke lotakɔpaki Davidɛ.