Yehova ambokembɛ Elidja

Winá wɔ Jezabɛlɛ ndoke nkambo nkomelisá aprɔfɛtɛ yɛ Bala, nde omalaka efula. Nde atomelaka Elidja losango ante: ‘Lomi, ongovɔ ndaka aprɔfɛtɛ yɛ Bala.’ Elidja okaka wɔma efula ko alotaka t’osowe. Nde alɔmbaka ante: ‘Jehova, mpopangaka nkfulumeyɛ. Ontshike mvu.’ Ladjikɛnde atɛkaka efula, Elidja atshulɔka ilɔ l’anse k’otamba.

Ondjelo ɔmɔtshi owetsholaka ko oshimelaka la ngandji kenkfumɔ ante: ‘Ngandjɔ ndeke lɛka nkete.’ Elidja ɛnaka mampa w’owolongo ládjiko djɛ awanga w’iyɛ la mbilika kɛ washi. Nde alɛka, anɔka ko akalɔka ndjetama. Ondjelo owetsholaka lonkina ko oshimelaka ante: ‘Lɛka nkete. Wɛ ladjɛ mba wolo djɛ nkidjɛ lɔkɛndɔ lɔko.’ Elidja akalɔka ndɛ lonkina. Masɔ nde ananghaka lɔkɛndɔ l’etsho 40, otsho, mbile tii ndakome l’Onkókó wɔ Hɔrɛbɛ. L’eteyi, Elidja ingelaka lá wendo wɔ ve djɛ ntetamá. Koko Jehova asawolaka nyande. Atepelaka ante: ‘Elidja, onanghɛ nge lanɛ?’ Elidja akadjimolaka ante: ‘Ase Isariyɛlɛ wambotshita daka djɛ yakonanghela. Watshitaka ntshumbelo djɛko la wayakaka aprɔfɛtɛ wako. Winá wɔsɔ walohona ndjaka lemi.’

Yehova oshimelaka ante: ‘Posa tokemale l’onkókó.’ Ntondo ntondo, lompopo lɔ wolo lohetaka lá wiso wɔ wendo. Ko masɔ ntshikito djɛ looko nanghemaka edjinge iyɛ iposaka. L’ekomo, Elidja okaka vu dj’efula mboyala ole djoyi mɔtshi djɛ l’anse. Nde adjipaka elongi l’esendja kɛnde ko emalaka lá wiso wɔ wendo. Masɔ Yehova owopolaka ladjikɛnge ndotalote. Elidja okadjimolaka ante: ‘Ngo lemi toko ndeke lombotshikala.’ Koko Yehova oshimelaka ante: ‘Opalekɔ nghɔmɛlɛ. Anto 7000 wákindjɛ́ ntɛmɔla lemi walekɔ l’Isariyɛlɛ. Tshɔka tɔkɔsɔne Elisha ete ngo ɔprɔfɛtɛ l’edjena kɛko.’ Mbala kɛkɔ kɛmɔ, Elidja atshɔka ntonangha kɛnɛ kɛ Yehova ndooshimela. Okanelɛ mo, Yehova angokokotshɛ ntsha ombonangha kɛnɛ k’ɔkɔpande wɛ nangha? Ee, angokokotshɛ! Ntshɔ tolende nkambo mɔtshi mpetisá l’eleko k’ɔhɔ.