Yehova ayalaka la bale ntshitshi te Yɔna

Lá Ninivɛ, ngando kɛmɔtshi k’Asuriya, anto wananghaki akambo wa nyɛtshi lako wopo. Yehova ashimelaka ɔprɔfɛtɛ Yɔna djɛ nde ntshɔ tá Ninivɛ djɛ ntashimela dj’iwɔ ntshikitanyɛ nanghedji djɛwɔ. Koko Yɔna alotaka t’edjena kenkina. Nde apemaka lá masuwa ɔmɔtshi wotatshɔki tá Tarsisɛ djɛ nde ndota otale.

Winá wɔ masuwa yakome l’anteyi kɛ ndjale, lompopo l’ekekete lowangaka, ko ase masuwa wokaka wɔma efula. Walɔmbaka tondjadjambe tɔwɔ ole wopolaka ambɔ: ‘Ladjikɛnge lompopo l’onkfumɔ lɔnɛ?’ Ekomo ekomo, Yɔna ndombaashimela ante: ‘Yomboyɛ nde mɔtɛ wɔmi. Motalote nde lotomo lɔ Yehova ndombontoma. Nyombokele lá ndjale, ko lompopo loshila.’ Ase masuwa watákɔpá ndɔhɔnyɔla tá ndjale, koko nde akindjɛka ndaashimela. Ngo wowokela lá ndjale nde, lompopo yomboshila.

Yɔna akanelaka ante angovɔ. Winá wɔ ndotadjindaka ngo ndjinda lá ndjale, alɔmbɔka Yehova. Manyi Yehova atomaka nse k’ekekete. Nse kɛkɔ kɛmɛnaka Yɔna, koko ketoyaká. Winá wɔ ndayalaka lá nkfundu djɛ nse, Yɔna alɔmbaka ante: ‘Mpakopendolaki lonkina.’ Yehova alamaka Yɔna lá nkfundu djɛ nse l’ilá k’etsho esato ko masɔ atshindaka nse kɛkɔ djɛ ntɔdjɔ Yɔna lá ntshanga.

Ladjɛkɛnde Yehova awikɛka Yɔna, nkambo djɛsɔ djɛnyɛ ente apangontshɔ tá Ninivɛ? Lako. Yehova atomaka Yɔna lonkina ngo t’eteyi. Mbala kɛnɛ, Yɔna alɛmɛyɛka. Nde atshɔka t’eteyi ole atoshimelaka anto wakɔ wa nyɛtshi wasɔ ante: ‘Ambotshikala etsho 40, Ninivɛ kotshitana.’ Masɔ nkambo mɔtshi djɛ ndotakanelaki djenanghemaka, ase Ninivɛ wokaka ko wakadjimolaka eloko. Nkfumi k’ase Ninivɛ ashimelaka anto wande ante: ‘Nyɔlɔmbɛ Ndjambe, edjinge nyokadjimole eloko. Nde nkoka ntimeyɛ, ko ntotshika la lowiko.’ Winá wɔ Yehova ndɛnyi djɛ ase Ninivɛ wambokadjimola eloko, ataayaká lonkina.

Yɔna okaka nkɛlɛ m’ɔtɛ wɔ Yehova ndotatshitá ngando kɛkɔ. Kokanela ndambo: Yehova ayalaka la bale ntshitshi te Yɔna ole owokaka djandji, koko Yɔna atoka ase Ninivɛ djandji. Yɔna aposaka má ngando, atshɔka ntintasɛ l’anse kɛ ntshitshi k’otamba wɔ mɔkɛ ko akowaka elongi. Lako mpeta ilá otamba wɔlɛngɛlaka, ko Yɔna afulanaka la nkɛlɛ. Ko Yehova ooshimelaka ante: ‘Wɛ okiyana djɛ otamba wɔ mɔkɛ ndeka kaanga nkambo djɛ ase Ninivɛ. Lambaawoka nkɛtshi, ndeke momaatshika la lowiko.’ Olakanyelo wɔkɔnge ndakɔpɛ ndɔpɛyɛ? Ase Ninivɛ wayalaki la ntshina efula lá wiso wa Yehova ndeka kaanga otamba wɔkɔnge.