Poolo nya Timɔte

Timɔte ayalaki wɔnanyɔ w’olangala wɔ l’otshumano wɔ Lustra. Papa kɛnde ndayalaka nde ose Ngirika, ko nyɔ kɛnde ose Juda. Nyɔ kɛnde Enisɛ, nya ndoyi kɛnde k’omoto Loyisɛ walakanyɛki Timɔte akambo wa Yehova ngo m’ilɛngɛ yɛnde.

Winá wɔ Poolo ndakome lá Lustra lá lɔkɛndɔ lɔnde l’ape l’olemo w’ipoposanyɛ, nde ɛnaka djɛ Timɔte akɔpaki wananyɔ edjinge ayalaki entshupa djɛ ndaakotshɛ́. Poolo owetaka djɛ nde ndootshindjeyɛ tá lɔkɛndɔ lɔsɔ. Ndambo ndambo, Poolo akfumbaka Timɔte djɛ nde ndjala nsakodji kɛ wɔlɔ edjinge wetsha wɔ nsɔsɔlɔ wɔ losango lɔ wɔlɔ.

Nyuma k’ekina ketalɔndjɛki Poolo nya Timɔte djena nkfumɔ djɛ yotatshɔka. L’otsho ɔmɔtshi, Poolo ɛnaka mpame kɛmɔtshi oshimela lá ɛnɛlɔ ante, yɛka lá Masɛdwanɛ lokotokotshɛ́. Djɛko ndeke Poolo, Timɔte, Silasɛ, edjinge Luka watshɔka l‘eteyi ntopoposanyɛ ole ntokfumba ntshumano.

Lá Masɛdwanɛ, ngando kɛ Tesalonikɛ, ampame l’amato efula wakomaka Akristo. Koko ase Juda amɔtshi wokaka Poolo nya winande lonkandjema. Iwɔ watshumanyɛka oloyi w’anto, wavundaka wananyɔ amɔtshi, waatɔlaka tá ntondo k’ewandji wɛ ngando, ko washimelaka ewandji wɛkɔ ambɔ: ‘Ampame yɛnɛ walekɔ antonyi y’onkfumi w’Ɔrɔma!’ Lowiko lɔ Poolo nya Timɔte lokomaka lá mbalaka, djɛko ndeke walotaka tá Beroya ngo otsho wɔkɔ.

Ase Beroya wakɔpaki ndjekameyɛ losango lɔ wɔlɔ, edjinge l’eteyi, ase Ngirika l’ase Juda efula wakomaka andjawodji. Koko winá wɔ ase Juda amɔtshi wayisá má Tesalɔnikɛ yoyilaka ovungusano, Poolo atshɔka tá Atɛnɛ. Timɔte nya Silasɛ watshikalaka lá Beroya djɛ nkembɛ wananyɔ wal’eteyi. M’ɔkɔngɔ, Poolo ashimelaka Timɔte djɛ nkalɔ tá Tesalɔnikɛ ntokotshɛ́ wananyɔ wanyɔkwamá l’eteyi. Ndambo k’etsho m’ɔkɔngɔ, Poolo atomaka Timɔte djɛ ntowembola la ntokembɛ ntshumano nkina efula.

Poolo ashimelaka Timɔte ante: ‘Onto onkfumɔ wɔkɔpa nkambela Yehova angɛna ndjolo.’ Timɔte ɛnaka ndjolo la avundamaka nkando m’ɔtɛ wɔ djawo djɛnde. Nde ayalaka l’osasa ladjikɛnde ndjolo yɛsɔ yɔpɛyɛki mbamba kɛ nyɛnyɛ nkɔmano djɛnde te Yehova.

Poolo ashimelaka ase Filipɛ ante: ‘Lambonyotomela Timɔte. Nde angonyolakanyɛ kɛnɛ kesakisola nkɛnda lá nsɔsɔlɔ, edjinge angonyokfumba l’olemo w’ipoposanyɛ.’ Poolo ewaki ante nde nkoka ndjilela Timɔte oloko. Iwɔ wakambaka esanga ete ngo tolongo l’ilá k’ɛnɔnyi efula.