WEKELO 22
Wopo wɔkɔnge w’okokɛ nshimela anto ankina losango lɔ wɔlɔ?
Winá wɔ ngoteke akambo wa nsɔsɔlɔ welá Bible, okoka ntepela ente: ‘Onto onkfumɔ ladjɛ ndjewa akambo wasɔ!’ Ee, onto onkfumɔ alekɔ la djonyi djɛ ndjewa akambo wa nsɔsɔlɔ! Koko, mbala imɔtshi okoka ndjoka wɔma djɛ nshimela anto ankina akambo w’ekɛ. Tokolenda wopo w’okokɛ nshiyɛ wɔma wɔsɔ edjinge mbanga mpoposanyɛ losango lɔ wɔlɔ lelá Bible l’osasa onkfumɔ.
1. Wopo wɔkɔnge w’okokɛ nshimela anto w’ewɛ akambo wa ngombeka?
Ambeki wa Yeso watepelaka ambɔ: ‘Iso topangotshika nshimela anto akambo w’isɛnyi la w’isoke.’ (Elemo 4:20) Iwɔ wɔsaki akambo wa nsɔsɔlɔ wiyeke la ntshina efula djɛkondeke iyakɔpaka nshimela anto ankfumɔ akambo wakɔ. Nghɔsɔ ndeke okɛ? Ntsha nghɔsɔ ndeke oyɛwɔ, mbɔkoko hona mbamba y’okokɛ nshimela ase nkfumbo edjinge tolongo tɔko akambo w’ekɛ la ntshunamo nkfumɔ.—Wala Kɔlɔsɛ 4:6.
Topo tɔmɔtshi tɔ mbanga djamba
Winá w’osawolɛ l’ase nkfumbo kɛko, wɛ nkoka ndjingeyɛ djamba djemá Bible má ntepela ente: “Ndjekaka nkambo mɔtshi djɛ djonyi efula lobengo lɔnɛ.”
Walela ilongo yɛko yelekɔ́ l’olando kana la yɛnyi vɛrse djekoka ndookembɛ.
Winá wɔ winako wel’olemo kana welá nkalasa okopolande wopo wohetisa lobengo, nshimelande akambo wangeke má wekelo wɔko wɔ Bible kana lá losanghanyɛ.
Ɛnyɛ winako wopo wɔ ndjingela lá sitɛ kɛso k’Ɛntɛrnɛtɛ kɛ jw.org.
Eta anto ankina djɛ ndjingela lá wekelo wɔko wɔ Bible, kana ɛnyɛwɔ wopo wɔ ndɔmba dj’onto ɔmɔtshi ndoowekɛ Bible má ndodjɛ demandɛ lá jw.org.
2. Ladjikɛnge mpoposanyɛ esanga l’otshumano oyɛwɔ okoma wɔ wɔlɔ?
Ape ngo anto w’iyewaka toko nde ambeki wa Yeso yashimelaká losango lɔ wɔlɔ. Yeso ‘aatomaka ape ape lá ntondo kɛnde t’angando inkfumɔ’ djɛ ntopoposanyɛ. (Luka 10:1) Wopo w’iyalonghanyɛ olemo w’ipoposanyɛ wɔsɔ w’okotshɛka anto efula djɛ mba mbamba kɛ ndjoka losango lɔ wɔlɔ. Lonkina, mpoposanyɛ esanga akotshɛka ambeki djɛ mba osasa lombombe. (Luka 10:17) Opakoke ndawilela okoma wɔ mpoposanyɛ esanga l’otshumano?
TSHIMOLA
Lenda wopo w’okokɛ nyimɛ wɔma edjinge ndjalá l’osasa woyɛ má mpoposanyɛ losango lɔ wɔlɔ.
3. Yehova angoyala esanga lawɛ
Anto amɔtshi nkɔpaka mpoposanyɛ, koko wangokake wɔma wɔ wopo wɔ anto yongáwɔsa edjinge yongelolá lá losango lɔwɔ.
Wɛ ongokake wɔma nshimela anto akambo w’ekɛ? Ladjikɛnge?
Lenda VIDEO, ko masɔ kadjimola lá woopó wɔwɔlamá.
Kɛkɔnge kekotshisá elangala w’Ewakɛ wɛ Yehova wenyi djɛ nyimɛ wɔma?
Wala Izaya 41:10, ko kadjimola lá woopó wɔnɛ:
Ntsha olekɔ la wɔma wɔ mpoposanyɛ, wopo wɔkɔnge lɔlɔmbɔ okokawɔ nkokotshɛ?
Ongewake?
Ewakɛ wɛ Yehova efula wakanelaki ambɔ wapangowa oloko wolo wɔ mpoposanyɛ losango lɔ wɔlɔ. Ndjɔmbɔmba, Sergey, ayawɔsaki etengo onto wopalekɔ́ la ntshina la ɛnaki wolo nsawola l’anto ankina. Koko masɔ, nde ayɛka ndeka Bible. Nde atepela ante: “Kaanga mayalaka la wɔma, ntateyɛka nshimela anto ankina akambo wa mekaka. Nkambo djɛ nkamɔ nde, nshimela anto ankina akambo wemá Bible ankotshɛka djɛ ndáwɔsa ente ndekɔ la ntshina. Lonkina, nkambo djɛsɔ djekembɛka djawo djɛmi.”
4. Yala la dilɛmɛlɔ
Winá w’oshimelɛ anto losango lɔ wɔlɔ, ilá yimba ape ngo la akambo w’otepelɛ koko edjinge lá wopo w’otepelɛ. Wala 2 Timɔte 2:24 edjinge 1 Pɛtɛlɔ 3:15, ko kadjimola lá weepó wɛnɛ:
Wopo wɔkɔnge w’okokɛ nkamba l’avɛrse wanɛ winá woshimelɛ anto ankina akambo wemá Bible?
Nkoka ndjala ko ase nkfumbo kana tolongo tɔko tɔmɔtshi wapawola wayi washimelɛ. Kɛkɔnge k’okokɛ nangha? Ko kɛkɔnge kɛ ngopakoke nangha?
Ladjikɛnge oyɛwɔ wɔlɔ ndjopola weepó la balo l’edjena kɛ ntshinda anto la wolo djɛ ndjawola ngo ikanyi yɛso?
5. Mpoposanyɛ losango lɔ wɔlɔ ndjakalaka osasa
Yehova apɛyɛka Yeso olemo wɔ mpoposanyɛ losango lɔ wɔlɔ. Wopo wɔkɔnge Yeso ndɔsaka olemo wɔsɔ? Wala Djɔanɛ 4:34, ko kadjimola lá weepó wɛnɛ:
Oleelo wɔ wɔlɔ ntokotshɛka djɛ ndjala la lowiko edjinge ntɔpɛyɛka osasa. Ladjikɛnge Yeso ndɛdjɛ nangha ɛkɔpa kɛ Ndjambe, ntepela ente mpoposanyɛ losango lɔ wɔlɔ la oleelo?
Ladjikɛnge mpoposanyɛ losango lɔ wɔlɔ okokawɔ nkɔpɛyɛ osasa?
Alako
Lá losanghanyɛ lɔ l’anteyi kɛ lobengo, funa tokanyi tongokokotshɛ́ djɛ ntateyɛ la djamba.
Sawola nya wetsha wɔko djɛ ndjewa kɛnɛ k’okokɛ nangha djɛ wɛ mbanga mpɛyɛ asawo lá losanghanyɛ lɔ l’anteyi kɛ lobengo. Asawo w’ambeki wangokokotshɛ djɛ wɛ ndawoka ente omboyala l’akoka wa nshimela anto ankina akambo w’ekɛ.
Kamba l’etenyi “Anto efula ntepelaka ambɔ” kana “Onto ɔmɔtshi nkoka nkopola ante” kelá wekelo wɔnɛ djɛ wɛ nsɛsa nkadjimola lá weepó wɛ anto efula olekawɔ ndjopola l’olemo w’ipoposanyɛ.
ANTO WAKOKA NKOPOLA AMBƆ: “Nsango yɛkɔnge?”
Wopo wɔkɔnge w’okokɛ nkamba la mbamba kɛsɔ djɛ ndooshimela akambo wa ngombeka má wekelo wɔko wɔ Bible?
LÁ YOPASƐ
Mpoposanyɛ losango lɔ wɔlɔ le anto ankina ntoyakalaka osasa, edjinge mbanga nangha djoyi djɛsɔ lako wolo efula etengo okanelɛ.
Mvungo
Lamo mpoposanyɛ losango lɔ wɔlɔ le anto ankina?
Wopo wɔkɔnge w’okokɛ nangha nkambo djɛsɔ la dilɛmɛlɔ nkfumɔ?
Wopo wɔkɔnge w’okokɛ nyimɛ wɔma wɔ mpoposanyɛ?
TOKANYI TONKINA
Tokolenda topo tɔnɛyi tɔ wɔdju tokokaso mpoposanyɛ losango lɔ wɔlɔ má nkamba la kartɛ k’ɛnyɛ anto wopo wɔ ndjingela lá jw.org.
Hona djɛ ndjewa wekeka anɛyi wakoka nkokotshɛ́ djɛ nshimela anto ankina losango lɔ wɔlɔ.
‘Olekɔ entshupa djɛ ndjala onsaki w’anto?’ (Etange k’Olami, Ngɔndɔ kɛ djuwa 2020)
Lenda ndjɔmbɔmba kɛmɔtshi kelá Bible kekoka ntɔpɛyɛ oloko wolo wɔ mpoposanyɛ losango lɔ wɔlɔ kaanga tolekɔ dɛngɛ.
Lenda wopo w’okokɛ nangha djɛ nsawola akambo wa Bible nya ase nkfumbo kɛko watoke akambo walendana la Yehova kaanga lofu.