Lowandji lolekɔ la tokokolo l’otshumano

1. L’ɔtɛ w’elonga kɛkɔnge nkfumbo kɛ Yehova oyɛwɔ l’osanga?

ISO nkɔpaka ndjala l’antenyi kɛ nkfumbo kɛ Yehova. Lamo oyɛso la vu edjinge l’osanga lá nkfumbo kɛso? Elonga kɛmɔtshi nde, isankfumɔ nanghaka kenkfumɔ k’okokaso nangha djɛ nɛmɛyɛ nonghanyi kɛ lowandji k’ilisa Yehova. Lá nsɔsɔlɔ, ntsha iso nsipisoyɛ nonghanyi kɛ lowandji k’ilisa Yehova wɔlɔ wɔlɔ, tongoleka ndjala l’osanga.

2. Weepó wɛkɔnge w’ɔkɔpaso nkadjimola lá djamba djɛnɛ?

² Lá djamba djɛnɛ, tɔkɔpa nshishima wayi walendana la lowandji l’otshumano. Masɔ, tongokadjimola la weepó wɛnɛ: Odjito wɔkɔnge wolekɔ l’ankaana yɛso? Nsɔsɔlɔ wɔnanyɔ onkfumɔ alekɔ owandji wɔ nkaana kenkfumɔ? Lowandji lolekɔ la tokokolo te wananyɔ l’ankaana, lolekɔ etengo lɔnɛ lolekɔ l’owandji wɔ nkfumbo te wadjɛnde la wana wande? Ntondontondo, nyontshɔ tokoshishima wopo w’okokaso ndɔsa ankaana yɛso.

WOPO WƆKƆNGE OYƐSO LADJƐ NDƆSAKA ANKAANA YƐSO?

3. Wopo wɔkɔnge okokaso nfudjɛ djedjɛ djɛso té ankaana yɛso l’elemo w’onanghawɔ?

³ Iso ndjedjɛka ankaana yɛso ikamba la wolo nkambo djɛ nkotshɛ ehomba wɛ ankfumbo yɛwɔ, mpoposanyɛ losango lɔ wɔlɔ edjinge djɛ nsuka otshumano. Iso nkoka nyɛnyɛ djedjɛ djɛso tewɔ má ndawɔsaka etengo Yehova nya Yeso awɔsawɔ. Má ndjɔmbɔmba kɛ ɔpɔstɔlɔ Poolo, tongeka lonkina wopo w’okokaso nanghelaka ankaana yɛso akambo.

4. Wopo wɔkɔnge Bible ɛnyɛnde djɛ Yehova ndɔsaka amato l’odjito etengo ɔsande ampame?

⁴ Bible nyɛnyɛka djɛ Yehova ndɔsaka amato l’odjito etengo ɔsande ampame. Ndjɔmbɔmba, Bible nyɛnyɛka ante Yehova apɛyɛka amato nyuma k’ekina etengo ndampɛyɛ ampame, edjinge apɛyɛka nkfulu kɛ nangha ansese, ndjɔmbɔmba, ntepela l’etepela enkina. (Ele. 2:1-4, 15-18) Amato l’ampame wasɔ, wakfutamaka avuta má nyuma k’ekina djɛ ntɔlɔndjɛ esanga la Kristo l’olongo. (Nga. 3:26-29) Ayale amato kana ampame wangowa lofuto lɔ lowiko l’itshinda lanɛ lá looko. (Ndj. 7:9, 10, 13-15) Lonkina ayale amato kana ampame, wawaka odjito wɔ mpoposanyɛ losango lɔ wɔlɔ. (Mat. 28:19, 20) Onkanda wɔ Elemo, nyɛnyɛka olemo wokambisa nkaana Priskila esanga la womɛnde Akula, djɛ nsipisoyɛ Apolo kanga loyalaki ondjewi w’onkanda akambo wa nsɔsɔlɔ wɔlɔ wɔlɔ.​—Ele. 18:24-26.

5. Kɛkɔnge kɛ Luka 10:38, 39, 42 ɔtɛnyɛnde lá kɛnɛ kelendana la eyalelo kɛ Yeso te amato?

⁵ Yeso ilaka amato lomo edjinge alɛmɛyɛka. Nde atokolaki Afarisɛ, wanɛ watɔsaki amoto l’odjito edjinge watakɔpaki ntepela lawɔ lá ntondo k’anto kana ndjamba lawɔ wayi walendana l’Afunelo. Koko Yeso asawolaki l’amato esanga l’ambeki wande akambo wa nsɔsɔlɔ wa djonyi.b (Wala Luka 10:38, 39, 42.) Nde awolaka edjinge djɛ amato ntahetaka lande l’olemo w’ipoposanyɛ. (Luka 8:1-3) Edjinge Yeso apɛyɛka odjito w’ekekete djɛ ntewoyɛ apɔstɔlɔ djɛ nde ambokfundɔ má nyɔyi.​—Dj. 20:16-18.

6. Wopo wɔkɔnge ɔpɔstɔlɔ Poolo ndɛnyɛ ante nde nɛmɛyɛka amato?

⁶ Ɔpɔstɔlɔ Poolo avungolaka Timɔte djɛ nde ndjilaka amato lomo. Poolo oshimelaka ante ɔsaka ‘amato wa nkokolo etengo wanyɔ’ edjinge ‘eseka wɛ amato etengo ankaana.’ (1 Ti. 5:1, 2) Poolo anaghaka akambo efula djɛ nkotshɛ Timɔte djɛ nde nkoma Okristo w’ombotshunda, koko nde ewaki ante nyangho Timɔte nya ndoyi kɛnde ndeke lotateyisa ndakanyɛ Timɔte ‘afunelo w’ekina.’ (2 Ti. 1:5; 3:14, 15) L’onkanda wɔnde te ase Ɔrɔma, Poolo atomelaka ankaana djemo lá ndalumola onto l’onto la djiina djɛnde. Poolo atatepela ngo elemo wekambaki ankaana toko koko awɛnyɛka djedjɛ djɛnde l’ɔtɛ w’elemo wɛkɔ.​—Ɔrɔ. 16:1-4, 6, 12; Flp. 4:3.

7. Weepó wɛkɔnge wɔkɔpaso nkadjimola win’ɔsɔ?

⁷ Etengo isɔmbɛna má totenyi t’imá djiko, lako vɛrse djesuka ikanyi y’ente, ankaana yɛso walekɔ l’anse kɛ wananyɔ. Ankaana yɛso yɛ ngandji edjinge yɛ lokapo nkotshɛka otshumano efula edjinge tokokolo ndawɛkɛka l’okotshɔ wɔpɛyɛwɔ djɛ vu endjinge osanga ndjala l’otshumano. Koko weepó ɛmɔtshi wɛlɔmbama ngo nkadjimwama. Ndjɔmbɔmba, lamo Yehova ɔlɔmbakande ankaana djɛ ndjipa ɔtɛ lá wina ɛmɔtshi? Ladjikɛnde ngo wananyɔ toko ndeke loyalaka tokokolo kana enkambi wekotshɛ, kɛsɔ nyɛnyɛka ante wɔnanyɔ onkfumɔ alekɔ owandji wɔ nkaana kenkfumɔ kel’otshumano?

WƆNANYƆ ONKFUMƆ ALEKƆ OWANDJI WƆ NKAANA KENKFUMƆ?

8. Lá nkilika Ɛfɛsɛ 5:23, wɔnanyɔ onkfumɔ alekɔ owandji wɔ nkaana kenkfumɔ kel’otshumano? Pakisola.

⁸ Nsakiso kɛ yopasɛ nde lako! Wɔnanyɔ apaleko owandji wɔ ankaana inkfumɔ yel’otshumano, owandji nde Kristo. (Wala Ɛfɛsɛ 5:23.) Lá nkfumbo, wome ndeke la lowandji lá djiko djɛ wadjɛnde. Wɔna wombolongola batisimo apalekɔ owandji wɔ nyɔ kɛnde. (Ɛfɛ. 6:1, 2) Edjinge l’otshumano tokokolo walekɔ la ndambo kɛ lowandji lolekɔ l’elelo lá djiko djɛ wananyɔ l’ankaana. (1 Te. 5:12; Heb. 13:17) Nkaana k’epolo kepayintansɛ la papa kɛnde la nyɔ kɛnde ladjɛ nkindjɛ nɛmɛyɛ ambotshi wande edjinge tokokolo. Koko, ngo ngete wananyɔ wel’otshumano, ankaana yɛsɔ walekɔ ngo l’owandji ɔmɔ, Yeso.

9. Lamo lá wina ɔmɔtshi ankaana oyɛwɔ ladjɛ ndjipa ɔtɛ?

⁹ Koko, alekɔ nsɔsɔlɔ djɛ Yehova asɔnaka ampame djɛ ndɔndjɛ wayi w’olakanyelo edjinge w’ɔtɛmwɛlɔ l’otshumano, koko atapɛyɛ amato lowandji lɔkɔ lɔmɔ. (1 Ti. 2:12) Lamo? Ngo l’ɔtɛ w’elonga kɛkɔ kɛmɔ kɛ ndasɔnɛ Yeso djɛ ndjala owandji w’ampame ntepela ente, dj’ipa ovungusano ndjingela lá nkfumbo kɛnde. Ntsha m’ɔtɛ w’akambo amɔtshi, nkaana ladjɛ nkotshɛ odjito ɔmɔtshi wɔ ngo mpame ndeke l’okoka nangha, lasɔ Yehova ndɔlɔmbaka djɛ nde ndjipa ɔtɛ.c (1 Kɔ. 11:4-7) Yehova ndɔmbaka ankaana djɛ nangha nkambo djɛsɔ ape djɛ ndawɔnyɔla koko djɛ ndapɛyɛ mbamba kiwɔ nyɛnyɛ ambɔ, iwɔ nɛmɛyɛka lowandji l’indalɔngɔsɔla. La nkambo djɛsɔ lá wɔɔngɔ, tokadjimolake win’ɔsɔ lá woopó wɔnɛ: Lowandji lɔkɔnge lolekɔ l’ewandji wɛ nkfumbo edjinge tokokolo?

ODJITO WOLEKƆ L’EWANDJI WƐ NKFUMBO EDJINGE TOKOKOLO

10. Lamo lá wina ɛmɔtshi ikokolo okokande ndokanela ante, nde nkoka djilela otshumano ɛlɛmbɛ?

¹⁰ Tokokolo nkɔpaka Kristo, edjinge iwɔ nkɔpaka ‘ɛnkɔkɔ’ wɛ Yehova nya Yeso ndapɛyɛ dj’iwɔ ndalama. (Dj. 21:15-17) L’ekoma wɛ wɔlɔ, ikokolo imɔtshi nkoka nfɛnyɛ ante nde alekɔ la lowandji l’otshumano etengo lɔnɛ l’olekɔ la papa kɛ nkfumbo. Nde nkoka nkanela ante, ntsha owandji wɔ nkfumbo alekɔ la lotshungɔ lɔ ndjila ɛlɛmbɛ djɛ nkokeyɛ ase nkfumbo kɛnde, mbɔkoko ikokolo nkoka ndjila ɛlɛmbɛ wɛnande ante, wengolama ɛnkɔkɔ wɛ Ndjambe. Edjinge wananyɔ l’ankaana imɔtshi nkoka nkembɛ tokokolo dj’iwɔ ndjala etengo ewandji wɛwɔ welá nyuma, ndjɔmbɔmba, má ndalɔmba dj’iwɔ ndawɔsɛla akano. Koko tokokolo tɔl’otshumano walekɔ la lowandji l’etengo lolekɔ la owandji wɔ nkfumbo?

11. Lamo odjito wolekɔ la tokokolo ɔfɛnawɔ la wolekɔ la ewandji wɛ nkfumbo?

¹¹ Ɔpɔstɔlɔ Poolo ɛnyɛka djɛ lowandji lolekɔ la tokokolo l’otshumano nfɔnaka ndambo la lɔnɛ l’olekɔ la ewandji wɛ nkfumbo l’akambo amɔtshi. (1 Ti. 3:4, 5) Ndjɔmbɔmba, Yehova nkɔpaka djɛ wadji la wana nɛmɛyɛ owandji wɔ nkfumbo. (Kɔl. 3:20) Nde nkɔpaka djɛ ase otshumano nɛmɛyɛ tokokolo. Yehova nkɔpaka lonkina djɛ ewandji wɛ nkfumbo la tokokolo ndashikikɛ dj’iwɔ nkotsheyɛka wanɛ walekɔ l’anse kɛ lowandji lɔwɔ ehomba wɛwɔ wɛ nyuma. Nde ndɔmbaka ewandji wɛ nkfumbo la tokokolo dj’iwɔ nkotshɛ ehomba wɛ ngandji wɛ wanɛ walekɔ l’anse kɛ lowandji lɔwɔ. Edjinge etengo owandji wɔ nkfumbo wɔ wɔlɔ, tokokolo ladjɛ ndaashikikɛ ambɔ, ase otshumano mbaka wina onkfumɔ okotshɔ woyɛwɔ la djonyi lá wina w’ekakasano. (Yos. 2:15-17) Má djiko dj’imasɔ, Yehova ndɔmbaka tokokolo l’ewandji wɛ nkfumbo dj’iwɔ ‘nsuka tɔkfɔ edjinge ipa ntamba kɛnɛ kembofunama’ lá Bible.​—1 Kɔ. 4:6.

12-13. Etengo Ɔrɔma 7:2 ɛnyɛnde, wopo wɔkɔnge odjito wolekɔ la owandji wɔ nkfumbo otshikitanande la wolekɔ la tokokolo?

¹² Koko, etshikitano wɛ nkekete welekɔ l’antenyɛ edjito welekɔ la ikokolo la welekɔ la owandji wɔ nkfumbo. Ndjɔmbɔmba, Yehova apɛyɛka tokokolo odjito wɔ ndomboyɛ edjinge mposɛ anto wanangha evunga ko wapayapɛle m’otshumano.​—1 Kɔ. 5:11-13.

¹³ Lá wedji onkina, Yehova apɛyɛka ewandji wɛ nkfumbo ndambo kɛ lowandji lɔ ndotapɛyɛ tokokolo. Ndjɔmbɔmba, nde apɛyɛka ewandji wɛ nkfumbo lotshungɔ lɔ ndjila ɛlɛmbɛ edjinge nangha djɛ ɛlɛmbɛ wɛkɔ nɛmiyɛma. (Wala Ɔrɔma 7:2.) Ndjɔmbɔmba, owandji wɔ nkfumbo alekɔ la lotshungɔ lɔ nshikikɛ wina wɔ wana wande okokawɔ nkalɔka l’etena. Nde alekɔ lonkina la lotshungɔ lɔ mpangola wana wande ntsha wambopendola ɔlɛmbɛ wɔkɔ. (Ɛfɛ. 6:1) Koko lá nsɔsɔlɔ, owandji wɔ nkfumbo wolekɔ la ngandji, ndjopolaka ikanyi yɛ wadjɛnde lá ntondo kɛ nde ndjila ɔlɛmbɛ lá nkfumbo ladjikɛnde iy’ape walekɔ ‘demba mɔ.’d​—Mat. 19:6.

LƐMƐYƐ KRISTO ETENGO OYƐNDE OWANDJI W’OTSHUMANO

14. a) Lá nkilika etepela welá Marko 10:45, lamo iyayale wɔlɔ Yehova nsɔna Yeso etengo owandji w’otshumano? b) Odjito wɔkɔnge wolekɔ la Iloyi yɛ Lɔndjɛ? (Lenda impapango “Odjito wolekɔ la Iloyi yɛ Lɔndjɛ.”)

¹⁴ Má lotshimbo l’oshinga wɔ mbendo, Yehova asombaka lowiko l’onto onkfumɔ wolekɔ l’otshumano, edjinge l’onto onkfumɔ wongoyala la djawo te Yeso. (Wala Marko 10:45; Ele. 20:28; 1 Kɔ. 15:21, 22) Djɛko ndeke ayalaka wɔlɔ djɛ nde nsɔna Yeso, kanga lɔpɛyisa lowiko lɔnde etengo oshinga wɔ mbendo djɛ nde ndjala owandji w’otshumano. Etengo oyɛnde owandji wɔso, Yeso alekɔ la lotshungɔ lɔ ndjila ɛlɛmbɛ wɛ onto onkfumɔ welá nkfumbo edjinge wel’otshumano w’otondo oyɛnde ladjɛ nkilika. (Nga. 6:2) Koko Yeso apakome ngo lá ndjila ɛlɛmbɛ toko. Nde ndesɛka edjinge nkɔpaka onto onkfumɔ l’anteyi kɛso.​—Ɛfɛ. 5:29.

15-16. Olakanyelo wɔkɔnge ngombowa má kɔmantɛrɛ kɛpɛyisa nkaana Marley edjinge wɔnanyɔ Benjamin?

¹⁵ Ankaana yɛso nyɛnyɛka dj’iwɔ nɛmɛyɛka Kristo má nkilikaka ɛlɔndjɛlɔ kɛpɛyama me ampame yɛsɔnamisa djɛ ndalama. Nkaana kɛso k’etawɔ Marley, k’intansɛ l’États-Unis ntepelaka lá yopasɛ ikanyi yelekɔ l’ankaana yɛso efula. Nde ntepelaka ante: “Lemi ndɔsaka nsɔsɔlɔ mpipo kɛmi k’etengo omoto wombotshukama edjinge etengo nkaana kel’otshumano l’odjito efula. Lemi nkindjɛka ndjala la ikanyi yɛ wɔlɔ lá kɛnɛ kelendana la nonghanyi kɛ lowandji k’ilisa Yehova. Koko womɛmi edjinge wananyɔ wel’otshumano nkomɛka djoyi djɛsɔ wɔdju le lemi, ladjikɛnde iwɔ nɛmɛyɛka lemi edjinge nyɛnyɛka lemi djedjɛ djɛwɔ l’elemo wonghami.”

¹⁶ Wananyɔ nyɛnyɛka dj’iwɔ nsipisoyɛka wɔlɔ nonghanyi kɛ lowandji má nɛmɛyɛka edjinge numɛka ankaana. Benjamin, wɔnanyɔ w’intansɛ l’Angleterre, ntepelaka ante: “Lemi mbaka olakanyelo efula má kɔmantɛrɛ yɛ pɛyɛ ankaana yɛso lá nsanghanyɛ, la má tokanyi tɔpɛyɛwɔ lá kɛnɛ kelendana la wopo wɔ ndjeka l’anto edjinge wopo wɔ ndjala ansakodji yɛ nsɔsɔlɔ. Lambolembetela ente olemo wokambawɔ, wolekɔ nsɔsɔlɔ la ntshina efula.”

17. Lamo oyɛso ladjɛ nɛmɛyɛ nonghanyi kɛ lowandji k’ilisa Yehova?

¹⁷ Ntsha onto onkfumɔ wel’otshumano, ampame, amato, ewandji wɛ nkfumbo, edjinge tokokolo nsipisoyɛ edjinge nɛmɛyɛ nonghanyi kɛ lowandji kilisa Yehova, otshumano wongoyala vu. Edjinge nkambo deka djonyi nde, tɔngɔpɛyɛ Yehova, Papa kɛso kel’olongo wómu.​—Yee. 150:6.