Dangala, nyokindjɛ mfula m’ɔkɔngɔ wɔ batisimo

1. Akambo amɔtshi wa wɔlɔ wakɔnge dangala yomboshiyɛká nangha?

ƆNƆNYI onkfumɔ, nunu djɛ dangala dj’Akristo ndongolaka batisimo. Wɛ omboshiyɛka ntapola djina djɛsɔ? Ntsha ombotapola, Yehova edjinge wananyɔ l’ankaana yɛko yelá nyuma walekɔ l’osasa lá nkambo djɛko! (Woo. 27:11) Kokanela ndambo l’efula k’akambo wa wɔlɔ wa ngomboshiyɛká nangha. Ndjɔmbɔmba, wɛ ekaka Bible la nkɔmɛ nkfumɔ, mbala imɔtshi l’ilá k’ɛnɔnyi efula. Wekelo wɔko wokawoyɛka djɛ Bible dekɔ Otepela wɔ Ndjambe. Koko, nkambo deka djonyi nde, wɛ ewaka la ɔkɔpaka Ikɔkɔ y’onkanda w’ekina wɔsɔ. Ngandji kɛko te Yehova kefulaka ko winá wɔsɔ ombokoma onkambi wɔnde womboyalambola, la wombolongola batisimo. Wɛ ɔsaka nkano djɛ wɔlɔ lombombe!

2. Kɛkɔnge k’ɔkɔpaso nshishima lá djamba djɛnɛ?

² Ape l’ehamo, opomanaka l’ekakasano efula wilisá djawo djɛko l’ohemba lá ntondo kɛ wɛ ndongola batisimo. Koko winá wɔ ngotafule, ongopomana l’ehemba enkina efula. Satana angohona nkitshakitshɛ ngandji kɛko te Yehova la nkoshimba djɛ wɛ ndokambela. (Ɛfɛ. 4:14) Tawolake nkambo djɛsɔ nkokomela. Kɛkɔnge kekoka nkokotshɛ́ djɛ wɛ ntshikala la nkɔmano te Yehova edjinge nkotshɛ elako kɛko kɛ ngananghe? Wɛ ladjɛ nkindjɛ nangha la wolo djɛ mfula, djɛ ‘nkoma’ Okristo w’ombotshunda. (Heb. 6:1) Ko, wopo wɔkɔnge w’okokɛ nangha nkambo djɛsɔ? Kɛsɔ ndeke ɔkɔpaso nshishima lá djamba djɛnɛ.

WOPO WƆKƆNGE W’OKOKƐ NKOMA OKRISTO WOMBOTSHUNDA?

3. Kɛkɔnge kɛ Okristo onkfumɔ oyɛnde ladjɛ nangha m’ɔkɔngɔ wɔ batisimo djɛnde?

³ M’ɔkɔngɔ wɔ batisimo, isankfumɔ ladjɛ nkamba la dako djɛ ɔpɔstɔlɔ Poolo ndapɛyɛ winande Akristo w’ase Ɛfɛsɛ. Nde ákembɛka djɛ nkoma Akristo ‘wambotshunda.’ (Ɛfɛ. 4:13) Ndakɔpɛ nde ntepela ante: Iwɔ ladjɛ ‘Nkindjɛ mfula.’ Iso nkoka nsipisoyɛ kɛnɛ kɛ Poolo ndakɔpɛ ntepela winá wɔ ndɛdjɛ ofulelo welá nyuma la ofulelo w’ilɛngɛ. Wɔna w’ilɛngɛ nkɔpamaka efula me ambotshi wande edjinge iwɔ ndjalaka l’ofuno lá nkambo djɛ nde. Koko nde apangotshikala ilɛngɛ lotshinda lotshinda. L’ilá k’etsho, nde angootshika ‘akambo wa m’ɔlɛngɛ.’ (1 Kɔ. 13:11) Oyɛwɔ ngo nghɔsɔ edjinge le Akristo. M’ɔkɔngɔ wɔ batisimo, iso ladjɛ nkindjɛ mfula. Nyontshɔ tokoshishima akambo amɔtshi wangotokotshɛ́ djɛ nangha nghɔsɔ.

4. Djekeka djɛkɔnge djekoka ntokotshɛ́ dj’iso mfula lá nyuma? Pakisola. (Filipɛ 1:9)

⁴ Fudjɛ ngandji kɛko te Yehova. Wɛ omboshiyɛká nkɔpa Yehova efula. Koko ngandji k’owokɛ nkoka ndeka mfula. Lá wopo wɔkɔnge? Ɔpɔstɔlɔ Poolo atepelaka yopo imɔtshi, lá Filipɛ 1:9. (Wala.) Poolo alɔmbaka djɛ ngandji kɛ ase Filipɛ ‘ntakindjɛka ngo mfula.’ Djɛkondeke iso nkoka mfudjɛ ngandji kɛso te Yehova. Iso nkoka nangha nghɔsɔ má ‘mba balo djɛ djɔ la ntɔnɔ dj’efula.’ Winá wɔ sotaleke ndjewa Yehova, ndeke sotaleke ndɔɔkɔpa edjinge sotaleke ndembetela lonto lɔnde la yopo yɛnde yɛ nangha akambo. Iso mfudjɛka mposɛ kɛso kɛ ndosasangɛ, la topakombola nangha kaanga nkambo mmɔ djekoka ndookiyanyɛ. Iso ndjilaka welo djɛ nsipisoyɛ ɛkɔpa kɛnde la wopo wɔ nangha ɛkɔpa kɛkɔ.

5-6. Wopo wɔkɔnge w’okokaso mfudjɛ ngandji kɛso te Yehova? Pakisola.

⁵ Yeso okolaka wekeka wa Papa kɛnde lá lɛdji lɔ djɔ, djɛkondeke ntsha iso ndjewa Yeso wɔlɔwɔlɔ, ngandji kɛso te Yehova kengofula. (Heb. 1:3) Yopo yeleka wɔlɔ yɛ ndjewa Yeso nde, ndjeka Evanjiliyo ɛnɛyi wɛkɔndɔla lowiko lɔnde. Ntsha opalekɔ l’ekfumbo kɛ mbalaka Bible mfu inkfumɔ, lamo ngopatateyɛ má winá wɔsɔ? Winá w’owalɛ ɛkɔndɔ welendana la Yeso, ila yimba efula lá wekeka wande. Nde ewaki ndjila anto lá demba, edjinge awɛmbaki wana wa dɛngɛ la ngandji kenkfumɔ. (Mar. 10:13-16) Nde ayalaki l’oloko wɔlɔ, la ananghelaki ambeki wande akambo etengo tolongo, edjinge watayalaki la wɔma djɛ ndooshimela wopo woyawokawɔ. (Mat. 16:22) Lá nkambo djɛsɔ, Yeso okolaka Papa kɛnde kel’olongo. Kaanga Yehova ndjewaka ndjila anto lá demba. Iso nkoka ndasukanyɛ lande lá lɔlɔmbɔ. Winá w’ɔlɔmbaso, iso nkoka ndoodjipola oloko wɔso. Tolekɔ l’eshikikelo ente nde apangotopangola. Nde ntɔkɔpaka, edjinge ndakiyanyɛka lá nkambo djɛso.​—1 Pɛ. 5:7.

⁶ Yeso okaki anto nkɛtshi. Ɔpɔstɔlɔ Mateo afunaka ante: ‘Winá wɔ ndɛnyi eloyi w’anto, nde awokaka nkɛtshi, ladjikɛnde wawɛnyɛki ndjolo la watayala l’okotshɔ ngo ngete ɛnkɔkɔ wepalekɔ l’onami.’ (Mat. 9:36) Ko Yehova oyawokande ngete mo? Yeso atepelaka ante: ‘Papa kel’olongo apasasanga djɛ kaanga onto ɔmɔ wɔ l’anteyi k’anto wa daambi wanɛ ntshɔ.’ (Mat. 18:14) Ɔsɔngo etepela wɛsɔ okotawɔ eloko wɛso! Winá w’ewaso Yeso wɔlɔwɔlɔ, ngandji kɛso te Yehova mfulaka.

7. Wopo wɔkɔnge Akristo wambotshunda lá nyuma okokawɔ nkokotshɛ?

⁷ Wɛ nkoka lonkina ndjeka djɛ ndjala la ngandji k’efula te Yehova la nkoma Okristo wombotshunda má ndjekesanelaka la wananyɔ l’ankaana yembotshunda lá nyuma yel’otshumano wɔko. Ɔngɛna wopo w’oyɛwɔ l’osasa efula. Iwɔ wapakiyana kaanga ndambo daambi má nkano dj’iyɔshi djɛ nkambela Yehova. Lɔmbawɔ wakoshimele akambo amɔtshi wapomanisá lawɔ l’olemo wɔ Yehova. Winá w’ɔkɔpɛ djɛ wɛ ndɔsa nkano mɔtshi djɛ djonyi, hona ikanyi mewɔ. Vungɔ ente, ‘nkambo mbɔngaka l’anteyi k’andaki efula.’​—Woo. 11:14.

8. Kɛkɔnge k’okokɛ nangha ntsha lofu lɔmɔtshi ombooyala l’ehamo lá kɛnɛ kɛ Bible otepelande?

⁸ Imɛ ehamo welekɔ́ lawɛ. Etengo iyotepelaki lá itenyi 2, Satana angohona nkoshimba djɛ wɛ mfula lá nyuma. Yopo imɔtshi y’okokande nangha nkambo djɛsɔ nde, nkotshinda djɛ wɛ ndjala l’ehamo lá yimba yɛko lá kɛnɛ kelendana l’elakanyelo ɛmɔtshi welá Bible. Ndjɔmbɔmba, anto amɔtshi nkoka mpona djɛ nkaawoyɛ ente Ndjambe atatotonga, koko isapilɔ nde mpilɔ. Mbala imɔtshi winá wɔ ngayalaka ilɛngɛ, otakanela kaanga ndambo daambi lá nkambo djɛsɔ, koko winá wɔsɔ wɔ ngombofula okoka nteka olakanyelo wɔsɔ lá nkalasa. Kɛnɛ kɛ wetsha wɛko otepelawɔ lá nkambo djɛ opilwelo nkoka nyɛnama etengo nsɔsɔlɔ edjinge ndjokamaka. Koko, mbala imɔtshi iwɔ wapashishimaka la nkɔmɛ nkfumɔ, tolembetelo tɛnyɛ ente Ontongi alekɔ. Vungɔ ikfɔ y’otanaso lá Woongo 18:17: ‘Onto wotepela ntondo lá dombo nyɛnamaka etengo nde ndeke l’elonga, tii winá wongoyɛ onto onkina ko ndowopola weepó efula.’ L’edjena kɛ wɛ ndjawola elakanyelo wɛ ngongotoka lá nkalasa etengo onto wombowodjɛ wiso, shishima la nkɔmɛ nkfumɔ akambo wa nsɔsɔlɔ w’otanaso l’Otepela wɔ Ndjambe, Bible. Nangha ehonelo l’enkanda wɛso. Sawola nya wananyɔ wawolaki ntondo olakanyelo w’ente nkete mposaka eposaposa. Opolawɔ kɛnɛ k’ashikikɛ ente Ontongi wotoka ngandji alekɔ. Asawo wakembɛ wa nghɔsɔ, nkoka nkotshɛ́ onto onkfumɔ wɔ l’anteyi kɛso djɛ ndjila yimba lá tolembetelo.

9. Olakanyelo wɔkɔnge ngombowa má ndjɔmbɔmba kɛ Melissa?

⁹ Nkaana kɛmɔtshi k’etawɔ Melissa awaka wapɔ efula má ehonelo w’indananghe lá kɛnɛ kelendana l’etongelo.b Nde atepela ante: “Lá nkalasa, wetsha ndakanyɛka olakanyele w’ente nkete mposaka eposaposa lá yopo yetshinda anto djɛ ndjawola ambɔ wolekɔ nsɔsɔlɔ. Má bango, ndjalaka l’okakasono djɛ nyimɛ ehamo wɛmi. Ntakɔpa nangha ehonelo ladjikɛnde ndjalaka la wɔma ente ntisola djɛ olakanyelo wɔsɔ wolekɔ nsɔsɔlɔ. Koko ndjɛka ndokanela ente Yehova apangɔkɔpa iso ndokambela etengo anto wambowodjɛ wiso. Djɛkondeke mbangaka nangha ehonelo. Mbalaka onkanda Y a-t-il un Créateur qui se soucie de vous? la inkankanda La vie a-t-elle été créée ? edjinge Cinq questions à se poser sur lʼorigine de la vie. Ɔsɔ ayalaka ngo kɛnɛ k’imayalaka la djonyi. Nkiyanaka lá wopo wɔ motanangha ehonelo lankeke.”

10-11. Kɛkɔnge kekoka nkokotshɛ́ djɛ wɛ mpikama lá ntondo kɛ mposɛ yɛ nyɛtshi? (1 Tesalɔnikɛ 4:3, 4)

¹⁰ Tona nanghedji djɛ pɔlɔ. L’etsho w’oyɛ olangala kana oseka, mposɛ kɛ wayi wa nsanga mbeto nkoka ndjala efula lewɛ, edjinge lá winá ɛmɔtshi anto nkoka nkotshinda djɛ wɛ nangha akambo wa mbindo wa nsanga mbeto. Kɛsɔ ndeke Satana okombolande wɛ nangha. Kɛkɔnge kekoka nkokotshɛ́ djɛ wɛ mpikama l’ohemba wɔsɔ? (Wala 1 Tesalɔnikɛ 4:3, 4.) Lá alɔmbɛlɔ wako nghɔmɛlɛ, shimelaka Yehova mposɛ yɛko. Shimelande wopo w’oyawokɛ, la lɔmbande akɔpɛyɛ wolo. (Mat. 6:13) Vungɔ ente Yehova nkɔpaka nkokotshɛ́ koko ape nkolomboyɛ. (Yee. 103:13, 14) Wɛ nkoka lonkina mpona okotshɔ m’Otepela wɔ Ndjambe. Melissa, kanga sotepelaki má djiko, ayalaka l’okakasano wɔ mpikama lá ntondo kɛ tokanyi tɔpɔlɔ. Nde ntepelaka ante: “Mbala Bible mfu inkfumɔ nkotshɛka lemi dj’ipa mpekɔ. Badji djɛsɔ mvungolaka lemi ente oyɛmi nde onto wɔ Yehova edjinge ente lemi nkombolaka ndokambela lá lowiko lɔmi.”​—Yee. 119:9.

¹¹ Tohonake nshiyɛ ekakasano wɛko nghɔmɛlɛ. Shimela ambotshi wako ekakasano wopomanɛ la wɛkɔ. Apalekɔ wɔdju nsawola akambo wa nghɔsɔ l’anto ankina, koko lá nsɔsɔlɔ, alekɔ djonyi nangha nkambo djɛsɔ. Melissa ntepelaka ante: “Ndɔmbaka Yehova djɛ mba oloko wolo ko masɔ nsawolaka isa papa kɛmi lá nkambo dj’okakasano wɔmi. M’ɔkɔngɔ wɔ masɔ, ndawokaka wɔlɔ efula. Ndjewaka ente Yehova ayalaka l’ofuno lá nkambo djɛmi.”

12. Wopo wɔkɔnge w’okokɛ ndɔsaka akano wa wɔlɔ?

¹² Tshika tɔkfɔ telá Bible tɔkɔlɔndjɛ. Winá wɔ ngotafule ambotshi wako wangotakɔpɛyɛka lotshungɔ ndambo ndambo djɛ wɛ ndɔsa akano wako nghɔmɛlɛ. Koko winá wɔsɔ otewe akambo efula lá lowiko. Ko wopo wɔkɔnge w’okokɛ ndjewɔ nangha evunga wekoka ndotshitá djokanelo djɛko nya Yehova? (Woo. 22:3) Nkaana kɛmɔtshi ketawɔ Kari asipisoyɛka kɛnɛ k’okotshisá djɛ ndɔsa akano wa wɔlɔ. Nde asipisoyɛka ante Akristo wambotshunda lá nyuma wapalekɔ la djonyi djɛ ɛlɛmbɛ lá nkambo nkfumɔ. Nde ntepelaka ante: “Ndjalaka la djonyi djɛ nsipisoyɛ tɔkfɔ telá Bible ndeka ɛlɛmbɛ.” Winá w’owalɛ Bible, yawopola ente: ‘Vɛrse djɛnɛ onshimelawɔ nge lá kɛnɛ kelendana l’ikanyi yɛ Yehova? Dekɔ la tɔkfɔ tokoka nkotshɛ́ lemi djɛ nangha kɛnɛ kelekɔ́ wɔlɔ? Ntsha nghɔsɔ, wapɔ wɛkɔnge mongowa ntsha lambokamba la tɔkfɔ tɔkɔ?’ (Yee. 19:7; Iza. 48:17, 18) Má mbalaka Bible la ntɔnɔlaka lá tɔkfɔ tel’eteyi, opangoyala l’okakasano djɛ ndɔsa akano wasasangɛ Yehova. Winá wɔ ngotakindjɛ mfula lá nyuma ɔngɛna ente, opalekɔ la djonyi dj’ɛlɛmbɛ lá nkambo nkfumɔ ladjikɛnde osipisoyɛ ikanyi yɛ Yehova lá akambo ankfumɔ.

13. Wopo wɔkɔnge tolongo tɔ wɔlɔ okokawɔ nkokotshɛ́? (Woongo 13:20)

¹³ Sɔna tolongo toka Yehova ngandji. Etengo sotepelaki má djiko, tolongo tɔsɔnɛ nkoka nkokotshɛ djɛ wɛ nkoma Okristo wombotshunda. (Wala Woongo 13:20.) Nkaana kɛmɔtshi ketawɔ Sara atshutshɛka osasa wɔndɛ. Masɔ nkambo mɔtshi nanghemaka dj’okotshisá djɛ nde nkalɔ ndjala l’osasa. Sara atepela ante: “Mbaka tolongo tɔ wɔlɔ ngo winá wɔ mayalaka la djonyi djɛwɔ. Lemi isa nkaana kɛmɔtshi k’oseka tekaki Etange k’Olami mbengo inkfumɔ. Ilongo yɛmi inkina ankotshɛka djɛ lemi ntateyɛ mpɛyɛ kɔmantɛrɛ lá nsanghanyɛ. M’okotshɔ wɔ tolongo tɔmi, ntateyɛka ndɔsa wekelo w’onto nyɔmɛlɛ la dɔmbɛlɔ la ntshina efula. Ntateyɛka ndjala la djokanelo djɛ wolo isa Yehova la ntateyɛka ndjala l’osasa efula l’onkina.”

14. Wopo wɔkɔnge Julien ndoowa tolongo tɔ wɔlɔ?

¹⁴ Wopo wɔkɔnge w’okokɛ ndjala ilongo nya anto wakoka ndjala l’eposelo wɛ wɔlɔ te wɛ? Julien, kanga lokamba winá wɔsɔ etengo ikokolo, ntepelaka ante: “Winá wɔ mayalaka olangala, mbaka tolongo tɔ wɔlɔ má mpoposanyɛka isawɔ. Tolongo tɔsɔ wayalaki l’entete l’olemo w’ipoposanyɛ, ko wankotshɛka djɛ lemi nyɛna wopo w’olemo w’ipoposanyɛ ɔpɛyɛkande osasa. Ntateyɛka ndawilela okoma wɔ nkamba etengo yat’ekalo yɛ lotshinda. Nsipisoyɛka lonkina ente elonga kɛ motawaki tolongo tɔ wɔlɔ nde ndapɛyɛki ngo te tolongo tɔ lɔsɔkɛ lɔmi. M’ɔkɔngɔ, ndjɛka lonkina ndoyala la tolongo tɔ wɔlɔ lá Betɛlɛ. Ndjɔmbɔmba kɛwɔ kenkotshɛka djɛ lemi ndjewa nsɔna etombo wɛ wɔlɔ, ko kɛsɔ kenkotshɛka djɛ ndasukanyɛ isa Yehova.”

15. Ndjewo kɛkɔnge kɛ Poolo ndapɛyɛ Timɔte lá kɛnɛ kelendana la tolongo? (2 Timɔte 2:20-22)

¹⁵ Okokɛ nangha mo ntsha ombosipisoyɛ ente ndjala ilongo ny’onto ɔmɔtshi welá otshumano nkoka ntshita djokanelo djɛko nya Yehova? Poolo ewaki ante anto amɔtshi wal’otshumano w’Akristo wa l’ɛtɛndɔ kɛ ntondo, watayalaki la lonyuma lɔ wɔlɔ djɛkondeke ndewolá Timɔte djɛ ndaawewɔ. (Wala 2 Timɔte 2:20-22.) Djokanelo djɛso la Yehova dekɔ djonyi efula. Tilaka welo efula djɛ ndasukanyɛ la Yehova djɛkondeke totawolake kaanga onto ntotshitela djokanelo djɛso la Papa kɛso kel’olongo.—Yee. 26:4.

WOPO WƆKƆNGE W’OKOKƐ NDAWILELA EKOMA WEKOKA NKOKOTSHƐ́ DJƐ WƐ MFULA LÁ NYUMA?

16. Wepo w’ekoma wɛkɔnge woyɛ ladjɛ ndawilela?

¹⁶ Yawilela ekoma wɛ wɔlɔ. Sɔna ekoma wengokokotshɛ́ djɛ wɛ nkembɛ djawo djɛko la ndjala Okristo wombotshunda lá nyuma. (Ɛfɛ. 3:16) Ndjɔmbɔmba, wɛ nkoka ndɔsa nkano djɛ mbɔngɛ nonghanyi kɛko kɛ wekelo w’onto nyɔmɛlɛ la kɛ mbalaka Bible. (Yee. 1:2, 3) Kana wɛ nkoka nsɛsa djɛ ndɔmbaka efula la djɛ alɔmbɛlɔ wakɔ mposaka m’anse k’oloko. Mbala imɔtshi wɛ nkoka ndjala la djonyi djɛ ndakota k’efula lá kɛnɛ kelendana l’ɛsɔnwɛlɔ w’etombo wɛko la okambelo wɔ la winá wɛko. (Ɛfɛ. 5:15, 16) Winá wɔ Yehova ndɔngɛna ante onangha la wolo djɛ ndawɔngɛ l’akambo ankina, nde angosasanga.

17. Wapɔ wɛkɔnge ngongowa má nkotshɛ́ anto ankina?

¹⁷ Ongokoma Okristo wombotshunda lá nyuma winá w’okotshɛ́ anto ankina. Yeso atepelaka ante: ‘Osasa woyɛ má mpɛyɛ ndeka wɔ ndongola.’ (Ele. 20:35) Ongoyala l’osasa efula ntsha okamba la winá wɛko edjinge la welo wɛko djɛ nkotshɛ́ anto ankina. Ndjɔmbɔmba, wɛ nkoka ndawilela okoma wɔ nkotshɛ́ká nkokolo dj’anto l’anto walekɔ́ la nkɔmɔ wel’otshumano wɔnyo. Wɛ nkoka ndakotshɛ́ djɛ ntasombela nkete kana ndakotshɛ́ dj’iwɔ ndjewa nkamba la w’aparɛyi wawɔ. Ntsha oyɛ nde wɔnanyɔ, yawilela okoma wɔ nkoma onkambi w’okotshɛ́, l’ikanyi yɛ nkambela wananyɔ l’ankaana yɛko. (Flp. 2:4) Lonkina wɛ nkoka nyɛnyɛka anto ankina wapalekɔ́ l’otshumano ngandji má ndashimelaka losango lɔ wɔlɔ l’Onkfumi. (Mat. 9:36, 37) Lá nkilika akoka wako, yawilela okoma wɔ mpoposanyɛ má topo tonkina totshikitanyi t’olemo w’ipoposanyɛ.

18. Wopo wɔkɔnge nkamba etengo yat’ekalo yɛ lotshinda okokawɔ nkokotshɛ́ djɛ wɛ mfula lá nyuma?

¹⁸ Olemo wɔ winá enkfumɔ nkoka nkɔpɛyɛ mbamba efula yɛ wɛ mfula lá nyuma. Nkamba etengo yat’ekalo nkoka nkodjipola mboka kɛ wɛ ndjingela lá Nkalasa k’Ansakodji y’Onkfumi, kɛ ntokamba lá Betɛlɛ kana l’opikelo wɔ amvulu yɛ teokrasi. Nkaana kɛmɔtshi k’oseka kɛ yat’ekalo ketawɔ Kaitlyn atepelaka ante: “Mposaká t’olemo w’ipoposanyɛ la wananyɔ l’ankaana yelekɔ la balo efula ayalaka nkambo mɔtshi djenkotshisá djɛ mfula lá nyuma m’ɔkɔngɔ wɔ batisimo djɛmi. Ndjɔmbɔmba yɛwɔ yenkotshɛka djɛ lemi mfudjɛ balo djɛmi dj’akambo welá Bible la ndɔngɔsɔla akoka wami wa ndakanyɛ.”

19. Wapɔ wɛkɔnge wɛ ngongowa má nkindjɛ mfula lá nyuma?

¹⁹ Winá wɔ ngotakindjɛ mfula lá nyuma, ongowa ɛtshɔkɔ efula. Opangokamba la wolo wɔko djɛ mpona nkete djepalekɔ ntshina. (1 Dj. 2:17) Ongewɔ ndjolo yeyɛka má ndɔsa akano wa nyɛtshi. Koko, ongowa osasa wɔ nsɔsɔlɔ. (Woo. 16:3) Ndjɔmbɔmba kɛko kɛ wɔlɔ kengokembɛ winako andjawodji, ayale dangala kana nkokolo. (1 Ti. 4:12) La nkambo deka djonyi nde ongoyala la vu edjinge l’osasa woyɛka má nsasangɛ Yehova la má ndjala la djokanelo djɛ wɔlɔ nya nde.—Woo. 23:15, 16.