Nyokindjɛ ‘nkembɛna l’anteyi kɛnyo’

1. Lá nkilika 1 Tesalɔnikɛ 5:11, olemo wɔkɔnge wɔpɛyɛso lɔwɔ isankfumɔ?

OTSHUMANO wɔnyo wombopikaka kana wɔmbɔwɔngɛka Mvulu k’Onkfumi lufu lɔmɔtshi? Ntsha oyɛwɔnde nghɔsɔ, mbɔ ovungɔ mbala kɛko kɛ ntondo kɛ ngingela lá Mvulu k’Onkfumi kɛ bango kɛsɔ. Oyalaka la djedjɛ efula te Yehova. Lá nsɔsɔlɔ, mbala imɔtshi ɔkɛdjɛka wisɔyi w’osasa la oyalaka l’okakasano djɛ ntshumba kantikɛ k’ewangelo. Mvulu yɛso y’Onkfumi yepikamá wɔlɔ efula numɛka Yehova. Koko iso ndekaka ndolumɛ efula winá wɔpɛyɛso lɔwɔ lá yopo imɔtshi y’opikelo. Opikelo wɔsɔ ndekaka kaanga opikelo wɔ nsɔsɔlɔ djonyi. Opikelo wɔsɔ nde, nkembɛ anto w’ingela lá djena djɛso dj’ɔtɛmwɛlɔ djɛsɔ. Nkambo dj’opikelo wɔ djingingi wɔsɔ ndeke ɔpɔstɔlɔ Poolo ndakanelaka winá wɔ ndafune etepela w’otanaso lá 1 Tesalɔnikɛ 5:11, vɛrse dj’ɔsamisa ɔtɛ wɔso wɔ djamba.​—Wala.

2. Kɛkɔnge kɛ songoshishima lá djamba djɛnɛ?

² Ɔpɔstɔlɔ Poolo ayalaka ndjɔmbɔmba kɛ wɔlɔ efula k’onto wewaki nkembɛ winande andjawodji. Nde ayalaki la nkɛtshi tewɔ. Lá djamba djɛnɛ, tongoshishima wopo wɔ ndakotshɛ́ wananyɔ l’ankaana yɛnde, 1) dj’iwɔ nkfulumeyɛ ehemba, 2) dj’iwɔ ndjala vu l’anteyi kɛwɔ, la 3) dj’iwɔ nkembɛ djawo djɛwɔ te Yehova. Nyontshɔ tolende wopo w’okokaso ndowokola la wopo wɔ nkembɛ wananyɔ l’ankaana yeso lɔɔko kɛnɛ.​—1 Kɔ. 11:1.

POOLO AKOTSHƐ́KA WANANYƆ L’AKAANA YƐNDE DJƐ NKFULUMEYƐ EHEMBA

3. Ikanyi yɛkɔnge yɛ wɛdjimo yeyalaki la Poolo?

³ Poolo akɔpaki wananyɔ wande efula. Nde nyɔmɛlɛ apomanaki l’ekakasano, djɛkondeke ndakokaka ndawoka nkɛtshi la ndawila l’edjena kɛ wananyɔ l’akaana yɛnde winá w’iyapomanaka l’ekakasano. Lá mbamba kɛmɔtshi, Poolo atayalá la mfalanga edjinge ayalaka ladjɛ mpona olemo djɛ ndakotshɛ́ nyɔmɛlɛ la nkotshɛ́ wananyɔ wande. (Ele. 20:34) Ndananghaka nde tovuvulu t’ampɛma. Winá wɔ ndakome lá Kɔrɛtɔ, nde atateyɛka nkamba esanga nya winande wakfumbaki tovuvulu t’ampɛma Akila nya Priskila. Koko ‘mfu inkfumɔ yɛ saba’ nde apoposanyɛki le ase Juda la le ase Ngirika. Masɔ, winá wɔ Silasɛ nya Timɔte iyokomaka, ‘Poolo atateyɛka ndapɛyɛ tshɛ l’Otepela wɔ Ndjambe.’ (Ele. 18:2-5) Poolo atavungɛki kaanga ndambo daambi nkambo djeleka djonyi lá lowiko lɔnde, ntepela ente nkambela Yehova. Ladjikɛnde Poolo apɛyɛka ndjɔmbɔmba kɛ wɔlɔ lá kɛnɛ kelendana la ndapɛyɛ l’olemo w’ipoposanyɛ la nkotshɛ ehomba wɛnde welá demba, nde ayalaka l’akoka wa nkembɛ wananyɔ l’akaana yɛnde. Nde ávungolaka dj’ipa iwɔ ndjawola dj’ekakasano welá lowiko la mposɛ kɛ nkotshɛ ehomba w’ase nkfumbo yɛwɔ ndaatshinda djɛ ‘nyimɛ yimba má akambo waleka djonyi,’ ntepela ente akambo ankfumɔ walendana l’ɔtɛmwɛlɔ wɔ Yehova.​—Flp. 1:10.

4. Wopo wɔkɔnge Poolo nya Timɔte yakotshɛ́ wananyɔ l’ankaana yɛwɔ djɛ ndongela ɛhɛnyɔhɛnyɔ?

⁴ Lako mpeta ilá m’ɔkɔngɔ w’otshumano wɔ Tesalɔnikɛ nkfumbamá, wananyɔ wa bango wel’eteyi wapomanaka l’onanyelo wɔ wolo efula. Winá wɔ oloyi w’antonyi yotisolá Poolo nya Silasɛ, iwɔ ‘wavundaka wananyɔ amɔtshi ko watɔlaka te ewandji welá ngando,’ ko watepelaka la djoyi djɛ wolo ambɔ: ‘Anto ankfumɔ wanɛ wananyɛ ɛlɛmbɛ wɛ Kayisa.’ (Ele. 17:6, 7) Okoka nkanela wopo wɔ Akristo wa bango wasɔ yakoke ndawoka winá w’anto welá ngando iyatateyɛ ndananyɛ? Osasalo wɔwɔ t’olemo wɔ Yehova w’okokaka nkakita, koko Poolo atawola djɛ nkambo djɛsɔ ndakomela. Kaanga nde nya Silasɛ iyime má ngando kɛkɔ, iwɔ wayashikikɛki djɛ ehomba w’otshumano wɔ bango wɔsɔ wakotshamaki. Poolo avungolaka ase Tesalɔnikɛ ante: ‘Tonyotomelaka Timɔte, wɔnanyɔ wɔso . . . , djɛ nde ndonyokembɛ la ndonyosuka lá kɛnɛ kelendana la djawo djɛnyo, dj’ipa kaanga onto ɔmɔ l’anteyi kɛnyo nsasoka m’ɔtɛ wɔ ndjolo yɛsɔ.’ (1 Te. 3:2, 3) Timɔte akokaka mpomana la ɛhɛnyɔhɛnyɔ efula lá Lustɛra owila wɔwɔ wɔ lowotshɔ. Nde akokaka nyɛna wopo wɔ Poolo ndakembɛka wananyɔ wel’eteyi. Etengo ndɛnyi wopo wɔ Yehova ndatshɔkɔlá, Timɔte akokaka nshikikɛ wananyɔ l’ankaana yɛ bango yɛsɔ ante akambo ankfumɔ wangoheta ngo wɔlɔ kaanga lewɔ.​—Ele. 14:8, 19-22; Heb. 12:2.

5. Wopo wɔkɔnge wɔnanyɔ w’etawɔ Bryant ndawa wapɔ m’okotshɔ w’ikokolo imɔtshi?

⁵ Lá yopo inkina yɛkɔnge Poolo ndakembɛ wananyɔ l’ankaana yɛnde? Winá w’iyakalɔ towembola wananyɔ welá Lustɛra, l’Ikoniyo, la Antiyɔka, Poolo nya Barnabasɛ ‘wasɔnaka tokokolo lá ntshumano nkfumɔ.’ (Ele. 14:21-23) Ape l’ehamo ampame yɛsɔnamisa yɛsɔ, wayalaka ikɔkɔ y’osukɔ te ntshumano etengo tokokolo onanghawɔ lɔɔko kɛnɛ. Kolenda kɔmantɛrɛ kɛ wɔnanyɔ Bryant ndapɛyɛ, nde ntepelaka ante: “Winá wɔ mawa ɛnɔnyi 15, papa kɛmi alotaka má mvulu edjinge nyɔ kɛmi aposaka m’otshumano. Ndawokaka etengo etshike edjinge ndɛmbaka.” Kɛkɔnge kekotshisá Bryant djɛ nkfulumeyɛ l’eleko k’ekakasano kɛsɔ? Nde ntepelaka ante: “Tony, ikokolo yel’otshumano wɔso, asawolaki la lemi lá nsanghanyɛ la lámbamba inkina. Nde anshimelaka anto amɔtshi wapomanisa l’ehemba koko walamaka osasa wɔwɔ. Nde ambalelaka Yeembo 27:10 la mbala efula anshimelaki nkambo dj’Ezekiyɛlɛ, kanga lokambelaki Yehova la nkɔmano kaanga ambotshi wande yotapɛyɛ ndjɔmbɔmba kɛ wɔlɔ.” Eposelo wɛkɔnge weyalisá la okotshɔ wɛnama papoo wɔsɔ te Bryant? Bryant ntepelaka ante: “Má ekeketshelo kɛ Tony, ntateyɛka nkamba olemo wɔ winá enkfumɔ.” Tokokolo, nyile yimba djɛ nkotshɛ́ wanɛ walekɔ la djonyi djɛ ‘itepela yɛ wɔlɔ’ yekembɛ, etengo Bryant.​—Woo. 12:25.

6. Wopo wɔkɔnge Poolo ndakambe l’ɛkɔndɔ wɛ lowiko djɛ nkembɛ wananyɔ l’ankaana yɛnde?

⁶ Poolo avungolaka wananyɔ l’ankaana yɛnde ante m’okotshɔ wɔ Yehova, ‘oloyi w’ekekete w’ewakɛ’ wakfulumeyɛka ekakasano. (Heb. 12:1) Poolo asipisoyɛka ante ɔkɔndɔ wɔ mbiko yɛ wanɛ wakfulumeyisa wepo w’ekakasano enkfumɔ l’etsho wemboheta nkoka mpɛyɛ wananyɔ l’ankaana yɛnde oloko wolo la ndakotshɛ́ dj’iwɔ ndjila yimba lá ‘ngando kɛ Ndjambe kewika.’ (Heb. 12:22) Nkambo djɛsɔ dekɔ nsɔsɔlɔ kaanga lɔɔko kɛnɛ. Onto wɔkɔna wopawaka lokembo winá w’owalande ɛkɔndɔ wɛnyɛ wopo wɔ Yehova ndakotshɛ́ Ngidiyɔnɛ, Barakɛ, Davidɛ, Samwɛlɛ, la anto ankina efula? (Heb. 11:32-35) Ya otepelaso mo lá nkambo djɛ ndjɔmbɔmba yɛ djawo y’anto w’etsho wɛso wɛnɛ? Lá waa filialɛ yel’andja w’otondo, iso ndongolaka mbala efula enkanda me wananyɔ l’ankaana yɛso yɛ djawo djɛwɔ nkembaka m’ɔkɔngɔ wɔ mbala ɔkɔndɔ wɔ lowiko wɔ onkambi wɔ Yehova ɔmɔtshi wɔ nkɔmano wɔ l’etsho wɛso wɛnɛ.

POOLO ƐNYƐKA WANANYƆ L’ANKAANA YƐNDE WOPO WƆ NDJILA VU L’ANTEYI KƐWƆ

7. Olakanyelo wɔkɔnge wɔ ngombowa má dako djɛ Poolo dj’otanaso lá Ɔrɔma 14:19-21?

⁷ Iso nkembɛka wananyɔ l’ankaana yɛso winá w’otepelaso kana wonanghaso akambo wila vu l’otshumano. Topakoke ndjawola djɛ tokanyi tɔso totshikitanyi ntokapola. Edjinge iso topapikamá ngo l’ikanyi yɛso kana lá wayi woyɛso la lotshungɔ lɔ nangha ntsha lako ikfɔ y’Afunelo y’ɔnwyamá. Tokoshishima ndjɔmbɔmba kɛmɔtshi. Otshumano welá Ɔrɔma wayalaki l’Akristo w’ase Juda edjinge l’Akristo ankina w’ase Ewila. Winá w’iyimɛ Ɛlɛmbɛ wɛ Mɔsɛ, antɛmɔdji yɛ Yehova watakokaki lonkina nɛmɛyɛ ɔlɛmbɛ wolendana la nkete dj’oyɛwɔ ladjɛ ndɛ la dj’iyopakoke ndɛ. (Mar. 7:19) Lá mbamba kɛsɔ, Akristo w’ase Juda amɔtshi, wokaka djɛ wambowa lotshungɔ lɔ ndɛ kɛnkfumɔ k’okombolawɔ ndɛ. Koko Akristo ankina w’ase Juda, watawolaki nangha nghɔsɔ. Mɔtɛ wɔ nkambo ntshɔ otshumano wokapɔnaka. Poolo awɛnyɛka djonyi djɛ nkindjɛ nama vu ko ashimelaka ante: ‘Ndeka wɔlɔ nsamba ndɛ onkamba kana nnɔ waná kana nangha nkambo nkina nkfumɔ djekoka ntakanyɛ wɔnanyɔ w’ɔko.’ (Wala Ɔrɔma 14:19-21.) Má nangha nghɔsɔ, Poolo akotshɛ́ka winande Akristo djɛ nyɛna eposelo wɛ nyɛtshi wekokisá ndjala l’ekakasano wɛsɔ tewɔ iyɔmɛlɛ la te otshumano w’otondo. Nde ayalaka l’onkina entshupa djɛ ntshikitanyɛ ikanyi yɛnde dj’ipa ntakanyɛ anto ankina. (1 Kɔ. 9:19-22) Kaanga iso nkoka nkembɛ anto ankina la nama vu l’ateyi kɛso ntsha iso ndjawola djɛ mpetshɛ mposɛ y’anto ankina lá ntondo kɛ yɛso.

8. Poolo ndananghe mo winá wɔ nkambo mɔtshi djeyalaki djonyi yakɔpɛ ntshita vu djel’otshumano?

⁸ Poolo atotshikelaka ndjɔmbɔmba kɛ wɔlɔ lá kɛnɛ kelendana la ndjila vu iso la wanɛ wapalekɔ́ laso ikanyi imɔ lá akambo amɔtshi wa djonyi. Ndjɔmbɔmba, anto amɔtshi wal’otshumano wel’ɛtɛndɔ kɛ ntondo, watepelaki ambɔ ngo Akristo w’ase Ewila nyimɛ ntɛtɔ, mbala imɔtshi dj’ipa anto welá bandja ndawɔnyɔla. (Nga. 6:12) Poolo atakɔpaki ikanyi yɛsɔ kaanga ndambo daambi, koko l’edjena kɛ mpona ngo anto wakilike ikanyi yɛnde, nde ahonako alako me apɔstɔlɔ la tokokolo telá Jerusalɛmɛ l’okitshakitshɛ onkfumɔ. (Ele. 15:1, 2) Eposelo weyalisa la nkambo djɛsɔ nde, enanghedji kɛnde kekotshɛ́ka Akristo wasɔ djɛ nkindjɛ nama osasa la vu dj’otshumano.​—Ele. 15:30, 31.

9. Wopo wɔkɔnge w’okokaso nkilika ndjɔmbɔmba kɛ Poolo?

⁹ Ntsha okakasano ɔmɔtshi wɔ wolo w’omboposa, iso ndjilaka vu má mpona ɛlɔndjɛlɔ mé wanɛ wasɔnamisá me Yehova djɛ nama otshumano. Mbala efula, alako w’imá Bible nkoka ntanema l’enkanda wɛso kana l’ɛlɔndjɛlɔ kɛtɔpɛyɛ olonghanyelo. Tongokotshɛ́ djɛ vu ndjala l’otshumano má nkilika alako wasɔ koko ape má mpetshɛ tokanyi tɔsɔ l’edjena kɛ ntondo.

10. Nkambo nkina djɛkɔnge Poolo ndananghaka djɛ ndjila vu l’otshumano?

¹⁰ Poolo akotshɛka djɛ vu ndjala l’otshumano má ndjilaka yimba lá wekeka wa wɔlɔ wa wananyɔ l’ankaana yɛnde, koko ape l’evunga wɛwɔ. Ndjɔmbɔmba, l’ekomo k’onkanda wɔ ndafunela ase Ɔrɔma, Poolo alumolaka wiina w’anto efula edjinge mbala efula nde atepelaka akambo wa wɔlɔ w’iyananghaka. Iso nkoka ndjokola Poolo má numolaka mbala la mbala wekeka wa wɔlɔ wa wananyɔ l’ankaana yɛso. Má nangha nghɔsɔ, iso mpɛyɛka wananyɔ l’ankaana yɛso donga djɛ wɔlɔ djɛ ndjala la djokanelo djɛ wɔlɔ l’anteyi kɛwɔ, edjinge nkambo djɛsɔ nkotshɛ́ka djɛ ngandji mfula l’otshumano.

11. Wopo wɔkɔnge w’okokaso ndjilá vu winá w’oposa ekakasanaso l’anto ankina?

¹¹ Lá mbamba imɔtshi, kaanga Akristo wambotshunda lá nyuma nkoka ndjala la tokakasano l’anteyi kɛwɔ. Kɛsɔ kekomelaka Poolo nya ilongo yɛnde yɛ ma ma Barnabasɛ. Ampame ipe yɛsɔ wakakatanaka wolo lá kɛnɛ kelendana l’otshwelo wɔ Marko tá lɔkɛndɔ lɔwɔ l’ape lɔ misiɔnɛrɛ. Iwɔ ‘womalaka nkɛlɛ’ k’efula, wakakatanaka wolo efula ko wakapwanaka. (Ele. 15:37-39) Koko Poolo, Barnabasɛ, la Marko walɔngɔsɔlaka djokanelo djɛwɔ djɛ nyɛnyɛ ente, iwɔ wɔsaki vu l’osanga w’otshumano la ntshina efula. L’ɔkɔngɔ, Poolo atepelaka wɔlɔ lá nkambo djɛ Barnabasɛ nya Marko. (1 Kɔ. 9:6; Kɔl. 4:10) Edjinge iso ladjɛ nkandola ekakasano enkfumɔ welekɔ́ l’antenyɛ iso l’anto ankina wa l’otshumano ko masɔ nkindjɛ ndjila yimba ngo lá wekeka wawɔ wa wɔlɔ. Mánangha nghɔsɔ, tongokotshɛ́ djɛ vu l’osanga ndjala.​—Ɛfɛ. 4:3.

POOLO AKEMBƐKA DJAWO DJƐ WANANYƆ L’ANKAANA YƐNDE

12. Ekakasano ɛmɔtshi wɛkɔnge wepomana la wanayɔ l’ankaana yɛso?

¹² Iso nkembɛka wananyɔ l’ankaana yɛso winá w’okembɛso djawo djɛwɔ te Yehova. Amɔtshi wawɛnɛla me boto djɛwɔ djepalekɔ Ewakɛ wɛ Yehova, winawɔ wel’elemo kana welá nkalasa. Ankina wɛna ndjolo l’elando wɛ nkekete kana la tokanyi tɔ nyɛtshi. Amɔtshi lonkina wambolongolaka batisimo l’ilá k’ɛnɔnyi efula edjinge wambokonga ekomo kɛ nkfumbo dj’akambo wanɛ ilá efula. Akambo wasɔ nkoka ndjila djawo dj’Akristo l’ohemba lɔɔko kɛnɛ. Wananyɔ wayalaki l’otshumano wel’ɛtɛndɔ kɛ ntondo wapomanaka l’ekakasano wɛ nghɔsɔ. Poolo ndananghe nge djɛ nkembɛ wananyɔ l’ankaana yɛnde yɛsɔ?

13. Wopo wɔkɔnge Poolo ndakotshɛ́ anto wiyɔnyɔlaka m’ɔtɛ wɔ djawo djɛwɔ?

¹³ Poolo akambaki l’Afunelo djɛ nkembɛ djawo djɛ wananyɔ l’ankaana yɛnde. Ndjɔmbɔmba, Akristo wase Juda wakokaki nsamba kɛnɛ kɛ nkadjimola boto djɛwɔ djepalekɔ andjawodji djetepelaki ambɔ nkfumbo dj’ase Juda ndeka nkfumbo dj’Akristo ntshina. Ape l’ehamo Onkanda wɔ Poolo te ase Hebero w’okembɛka Akristo wasɔ efula. (Heb. 1:5, 6; 2:2, 3; 9:24, 25) Ekanedji kɛnde kɛ yimba kɛ nkfulu kekokaka ndjakotshɛ djɛ ndjipa ɛlɔmɔ w’antonyi wawɔ. Lɔɔko kɛnɛ iso nkoka nkotshɛ́ winaso Akristo wapomana la lɔsɔkɔ djɛ ndjewa wopo wɔ nkamba l’enkanda wɛso wesakisola Bible djɛ nsipisoyɛ anto donga djɛ djawo djɛwɔ. Lonkina ntsha wasɔka wananyɔ l’ankaana yɛso yɛ dangala má wopo w’awolawɔ olakanyelo wolendana l’etongelo, iso nkoka ndakotshɛ́ dj’iwɔ mba tokanyi má tonkakanda tɔnɛ La vie a-t-elle été créée? la Cinq questions à se poser sur l’origine de la vie, dj’iwɔ nsipisoyɛ anto donga dj’awolawɔ ambɔ lowiko lotongamaka.

14. Kaanga Poolo ndayalaka l’olemo efula wɔ mpoposanyɛ la wɔ ndakanyɛ, kɛkɔnge k’indananghaka lonkina?

¹⁴ Poolo akembɛka wananyɔ l’akaana yɛnde dj’iwɔ nyɛnyɛ ngandji má ‘elemo wɛ wɔlɔ.’ (Heb. 10:24) Nde akotshɛ́ka wananyɔ l’ankaana yɛnde apengo má kɛnɛ kɛ ndatepelaka toko, koko edjinge má kɛnɛ kɛ ndananghaka. Ndjɔmbɔmba, winá wɔ winande Akristo welá Judeya iyɛnaka ndjolo la ndjala kɛ nkasa, Poolo awɛmbɛlaka ndambo kɛ nkete mɔtshi dj’iyayalaka la djonyi. (Ele. 11:27-30) Lá nsɔsɔlɔ, kaanga Poolo ndayalaka l’olemo efula wɔ mpoposanyɛ la wɔ ndakanyɛ, nde ahonaki winá enkfumɔ topo tɔ nkotshɛ́ wanɛ walekɔ́ la djonyi dj’okotshɔ welá demba. (Nga. 2:10) Má nangha nghɔsɔ, nde akotshɛ́ka winande Akristo djɛ nkindjɛ ndjala l’eshikikelo ambɔ Yehova angaseyɛka ehomba wɛwɔ. Lɔɔko kɛnɛ winá w’okambaso la winá wɛso, welo wɛso, edjinge akoka waso l’ɛkɔpa djɛ mpɛyɛ okotshɔ lá winá w’oposa mbalaka yeyɛ má nkete dj’etongamisá, iso nkembɛka djawo djɛ wananyɔ l’ankaana yɛso. Iso nanghaka nghɔsɔ lonkina má mpɛyɛ mbala la mbala epapɛyɛ wɛ l’ɛkɔpa djɛ nsuka olemo welá andja w’otondo. Má yopo yɛsɔ la tonkina, iso nkotshɛka wananyɔ l’ankaana yɛso ndjɛ ndashikikɛ ambɔ Yehova apakadjɛki kaanga ndambo daambi.

15-16. Wopo wɔkɔnge w’okokaso nanghela wananyɔ wambɔhɔla lá djawo akambo?

¹⁵ Poolo atapekɔ́ nkembɛ wanɛ wahɔlisá lá djawo. Nde awokaki nkɛtshi la asawolaki nyawɔ la ngandji kenkfumɔ edjinge lá yopo yekembɛ. (Heb. 6:9; 10:39) Ndjɔmbɔmba, l’otondo w’onkanda wɔ ndafunela ase Hebero, nde akambaki la itepela ‘iso’ djɛ nyɛnyɛ ente kaanga nde ladjɛ nkamba l’alako w’indapɛyɛka. (Heb. 2:1, 3) Ngo ngete Poolo, topakoke mpekɔ wanɛ wambɔhɔla lá djawo. L’edjena kɛ nangha nghɔsɔ, iso ndakembɛka má ndawɛnyɛ ente iso ndakiyanyɛka lá nkambo djɛwɔ. Má lɛdji lɔsɔ, iso ndawɛnyɛka ngandji kɛso. Osasalo wɔso la yopo yɛso yɛ ntepela nkoka ndakembɛ ndeka kenfumɔ kokokaso ntepela.

¹⁶ Poolo ashikikɛka wananyɔ l’ankaana yɛnde ante, Yehova nyɛnaka elemo wɛwɔ wɛ wɔlɔ. (Heb. 10:32-34) Iso nkoka nangha wopo wɔk’ɔmɔ winá w’okotshɛso winaso Okristo wɔmbɔhɔla lá nyuma. Iso nkoka ndowopola djɛ ntoshimela wopo wɔ ndewe akambo wa nsɔsɔlɔ kana ndokembɛ djɛ nde nkanela mbamba yɛndɛnyi osukɔ wɔ Yehova. Iso nkoka nkamba la mbamba kɛsɔ djɛ ndoshikikɛ ente Yehova apavungɛki ngandji kɛndɔwɛnyɛ l’etsho wemboheta edjinge apangokadjɛ kaanga l’etsho weyaye. (Heb. 6:10; 13:5, 6) Asawo wa nghɔsɔ nkoka mpɛyɛ wananyɔ wasɔ mposɛ k’iwɔ nkindjɛ nkambela Yehova.

‘NYOKINDJƐ NKEMBƐNA L’ANTEYI KƐNYO’

17. Akoka wakɔnge w’oyɛso ladjɛ nkindjɛ mfudjɛ?

¹⁷ Ngo ngete ompiki w’amvulu ofudjɛkande balo djɛnde l’ilá kenkfumɔ k’okambande olemo wɔnde, iso nkoka mfudjɛ akoka waso má nkembɛnaka mbala la mbala l’anteyi kɛso. Iso nkoka nkotshɛ́ anto ankina djɛ mba lokembo lɔ nkfulumeyɛ ehemba má nsawolaka lawɔ ndjɔmbɔmba y’anto wakfulumeyisá l’etsho wemboheta. Iso nkokaka ndjila vu má ntepelaka wekeka wa wɔlɔ wɛnaso le anto ankina, nama vu winá woposa akambo wakoka ntshita vu djɛso, la ndjila vu winá w’oposa ekakasano. Edjinge iso nkoka nkindjɛ nkembɛ djawo djɛ wananyɔ l’ankaana yɛso má nkanaka yimba isawɔ lá akambo wa nsɔsɔlɔ wemá Bible, má ndapɛyɛka okotshɔ wɛnama, la má nsuka wanɛ walekɔ wɔdju lá nyuma.

18. Kɛkɔnge kɛ ngombokana djɛ nangha?

¹⁸ Wanɛ wakamba l’olemo w’opikelo w’amvulu yɛ teokrasi mbaka osasa efula. Iso nkoka ndjala l’osasa winá w’okembɛso djawo djɛ wananyɔ l’ankaana yɛso yel’otshumano. Otshikitanyi l’olemo w’opikelo w’amvulu yɛ nsɔsɔlɔ yekoka ndotshitaná m’ɔkɔngɔ, eposelo w’imá olemo wɔso nkoka ntshikala lotshinda! Nyontshɔ tɔshi nkano djɛ ‘nkindjɛ nkembɛnaka l’anteyi kɛso.’​—1 Te. 5:11.