‘Osasa le waalamá nkɔmano’ djɛwɔ te Yehova

1-2. a) Akambo wakɔnge ewandji ɛmɔtshi wɛ lɛɛta onanghelawɔ enkambi wɛ Yehova, ko wopo wɔkɔnge enkambi wɛnde elolawɔ? b) Lamo okokaso ndjala l’osasa kaanga ntsha watɛnyɛ ndjolo? (Pakisola edjinge ntshango djelá loposo.)

LƆƆKO kɛnɛ, ewila ndekana 30 wamboshimba olemo wɔso kana wayi wamɔtshi walendana l’olemo wɔsɔ. L’ewila ɛmɔtshi wɛsɔ, ewandji wambovundaká wananyɔ l’ankaana yɛso l’ankando. Nyɛtshi kɛkɔnge k’iyananghe? Lá nkilika ikanyi yɛ Yehova watananghá kaanga nkambo djɛ nyɛtshi. Otondo wɔ nkambo dj’iyananghe nde mbala la ndjeka Bible, nshimela anto ankina akambo walendana la djawo djɛwɔ, la nsanghana lá nsanghanyɛ esanga la wináwɔ andjawodji. Lonkina watakɔpá ndjingela lá wayi wa pɔlitikɛ. Kaanga opomanawɔ l’onanyelo wɔ wolo, enkambi wɛ Ndjambe wɛsɔ wakindjɛka nama nkɔmano djɛwɔ,b ntepela ente wɛnyɛka ambɔ wamboyalambola ngo te Yehova. Edjinge nkambo djɛsɔ ndapɛyɛka osasa!

² Mbala imɔtshi, ɔmbɛnaka foto yɛ Ewakɛ ɛmɔtshi wɛ nkɔmano wɛsɔ la ɛnaka ente iwɔ wayalaki la dongi dj’omonghamongho. Iwɔ walekɔ l’osasa ladjikɛnde wewa ambɔ Yehova nsasangaka wopo w’olamawɔ nkɔmano djɛwɔ tende. (1 Ɛk. 29:17a) Yeso atepelaka ante: ‘Osasa le anto wɛnyɛwɔ ndjolo m’ɔtɛ wonanghawɔ kɛnɛ kelekɔ́ wɔlɔ . . . Nyosasange, nyoyale l’osasa efula ladjikɛnde lofuto lɔnyo lolekɔ ekekete.’​—Mat. 5:10-12.

NDJƆMBƆMBA LESO

3. Etengo otepelawɔ lá Elemo 4:19, 20, wopo wɔkɔnge apɔstɔlɔ iyelola lá onanyelo wopomanisa lawɔ l’ɛtɛndɔ kɛ ntondo, ko lamo yananghe nghɔsɔ?

³ Ekakasano wepomana la wananyɔ l’ankaana yɛso lɔɔko kɛnɛ mfɛnaka la w’epomanisá l’apɔstɔlɔ wa Yeso winá w’iyapoposanyɛka akambo walendana la Yeso. Mbala efula, tosushi tɔ tominanyi t’ase Juda ‘wawilelaka ɔlɛmbɛ dj’iwɔ ntshika ntepela lá djiina djɛ Yeso.’ (Ele. 4:18; 5:27, 28, 40) Apɔstɔlɔ yananghe mo? (Wala Elemo 4:19, 20.) Iwɔ wewaki ambɔ onto ɔmɔtshi wolekɔ́ la lowandji l’ekekete ndaaleka ‘awilelaka ɔlɛmbɛ wɔ mpoposanyɛ la nshimela anto ankina’ akambo walendana la Kristo. (Ele. 10:42) Djɛkondeke antomami wawɔ, ntepela ente Pɛtɛlɔ nya Djɔanɛ, watepelaka l’oloko wolo onkfumɔ ambɔ iwɔ ladjɛ nɛmɛyɛ Ndjambe ledjena kɛ nɛmɛyɛ tosushi tɔsɔ edjinge watepelaka lonkina ambɔ wapangotshika ntepela lá nkambo djɛ Yeso. Lá nsɔsɔlɔ ayalaka etengo woopólaka ewandji wɛsɔ ambɔ ‘ɔkɔpanyo nde ntepela ente lowandji lɔnyo ndeka lɔ Ndjambe?’

4. Etengo iyɔmbɛnyɛ lá Elemo 5:27-29, Ndjɔmbɔmba kɛkɔnge apɔstɔlɔ iyatshikela Akristo ankfumɔ wa nsɔsɔlɔ, ko wopo wɔkɔnge w’okokaso ndawokola?

⁴ Apɔstɔlɔ watshikaka ndjɔmbɔmba kɛ wɔlɔ k’Akristo ankfumɔ oyɛwɔ ladjɛ nkilika ntateyɛ masɔ, ndjɔmbɔmba kɛkɔ nde, ‘nɛmɛyɛ Ndjambe etengo oyɛnde owandji l’edjena kɛ nɛmɛyɛ anto.’ (Wala Elemo 5:27-29.) M’ɔkɔngɔ w’iwɔ nkfusamá m’ɔtɛ wɔ nkɔmano djɛwɔ, apɔstɔlɔ waposaka má tominanyi telá djiko t’ase Juda, ‘watasasangá ladjikɛnde wawɔsaka etengo anto w’okokawɔ mpɛyɛ nsɔnyi lá nkambo djɛ djiina djɛ Yeso,’ la wakindjɛka mpoposanyɛ!​—Ele. 5:40-42.

5. Weepó wɛkɔnge w’oyɛso ladjɛ nkadjimola?

⁵ Ndjombɔmba k’apɔstɔlɔ iyatshike ntotshindaka djɛ ndjopola weepó ɛmɔtshi. Ndjɔmbɔmba, wopo wɔkɔnge nkano djɛwɔ djɛ nɛmɛyɛ Ndjambe l’edjena kɛ nɛmɛyɛ anto okanawɔ la ɔlɛmbɛ welá Afunelo w’otepela djɛ ‘ndakakitshɛ l’anse kɛ ewandji welá djiko’? (Ɔrɔ. 13:1) Wopo wɔkɔnge w’okokaso ‘nɛmɛyɛ ankfumi la ewandji,’ etengo ɔpɔstɔlɔ Poolo ndatepela, ko lá winá wɔk’ɔmɔ nkindjɛ nama nkɔmano djɛso te Ndjambe kanga lolekɔ́ Nkfumi kɛso k’apamela?​—Tito 3:1.

‘EWANDJI WELÁ DJIKO’

6. a) Anto wakɔna walekɔ ‘ewandji welá djiko’ w’otepelawɔ lá Ɔrɔma 13:1, ko akambo wakɔnge walɔmbamá dj’iso ndananghela? b) Kɛkɔnge kelekɔ́ nsɔsɔlɔ lá nkambo dj’ewandji enkfumɔ wɛ wana w’anto?

⁶ Wala Ɔrɔma 13:1. Lá vɛrse djɛnɛ, itepela ‘ewandji welá djiko’ ndendanaka la ewandji wɛ wana w’anto welekɔ́ la nkfulu la wɛlɔndjɛ lá djiko dj’anto ankina. Akristo ladjɛ nɛmɛyɛ ewandji wɛ wana w’anto wasɔ. Ɛlɛmbɛ wɛwɔ wɛsɔ ndjilaka akambo l’ɔnɔnghɔ, nanghaka djɛ anto nkilika ɛlɛmbɛ, edjinge lá winá ɛmɔtshi wangoseelake kaanga enkambi wɛ Yehova. (Ndj. 12:16) Djɛkondeke, iso ndɔmbamaka djɛ mfuta elambo wɛwɔ, mpɛyɛ ɛwɛkɔ wɛwɔ, ndawoka wɔma, la ndapɛyɛ lomo lohonawɔ. (Ɔrɔ. 13:7) Koko ewandji wɛ wana w’anto wasɔ walekɔ la lowandji ngo ladjikɛnde Yehova ndeke lapɛyɛ. Yeso apakisolaka nkambo djɛsɔ winá wɔ Guvɛrnɛrɛ dj’ose Ɔrɔma Pɔsɔ-Pilatɛ ndowopolaka weepó. Winá wɔ Pilatɛ ndatepela ante nde alekɔ la lowandji lɔ mbikɛ lowiko lɔ Yeso kana ndɔtɔla tá nyɔyi, Yeso okadjimolaka ante: ‘Otasamba ndjala la lowandji lɔsɔ le lemi ótasambawɔ nkɔpɛyɛ m’olongo.’ (Dj. 19:11) Etengo yayale lá nkambo djɛ Pilatɛ, lowandji lolekɔ́ la wana w’anto ankfumɔ, la ewandji wɛ pɔlitikɛ lɔɔko kɛnɛ lolekɔ l’elelo.

7. Lá akambo wakɔna wa sopakoke nɛmɛyɛ ewandji wɛ wana w’anto, ko lá nkambo djɛkɔnge dj’oyɛwɔ ladjɛ mbadjɛka?

⁷ Akristo nɛmɛyɛka enkfumi wɛ wana w’anto winá wɔ ɛlɛmbɛ wɛwɔ wepatshite ɛlɛmbɛ wɛ Ndjambe. Koko topakoke nɛmɛyɛ anto winá w’ɔtɔlɔmbawɔ djɛ nangha kɛnɛ kɛ Ndjambe otonande kana winá wotonawɔ kɛnɛ kɛ Ndjambe ɔtɔlɔmbande djɛ nangha. Ndjɔmbɔmba, iwɔ nkoka ndɔmba olangala djɛ ntonana mbandji lá nkambo dj’owila.c Kana iwɔ nkoka nshimba Bible djɛso kana enkanda wɛso wesakisola Bible la ntoshimba djɛ mpoposanyɛ la dj’iso ntɛmɔla Ndjambe esanga. Winá wɔ ewandji okambawɔ la lowandji lɔwɔ lá yopo yɛ nyɛtshi, ndjɔmbɔmba djɛ nyɛnyɛ ambeki wa Kristo ndjolo, iwɔ wangóseeyɛ la Ndjambe. Yehova átokomela!​—Los. 5:8.

8. Otshikitano wɔkɔnge wolekɔ́ lantenyɛ itepela ‘lá djiko’ la itepela ‘lápamela,’ ko lamo oyɛwɔ djonyi ndjewa akambo wasɔ?

⁸ Itepela ‘lá djiko’ nsakisolaka ekete ‘kelekɔ́ wɔlɔ efula, ekekete efula, otale efula l’ɔnɔnghɔ wɔ nkete.’ Koko kɛsɔ kepasakisola ‘ekete keleka wɔlɔ, keleka ekekete, la keleka otale l’ɔnɔnghɔ wɔ nkete.’ L’etepela enkina totepela tɔsɔ nsakisolaka, ‘Lápamela.’ Kaanga ewandji wɛ wana w’anto etamawɔ ambɔ ‘ewandji welá djiko,’ owandji onkina wapamela l’ɔnɔnghɔ wɔsɔ alekɔ, oyɛnde nde, lápamela. Mbala inɛyi y’etondo lá Bible, wangetake Yehova Ndjambe ambɔ ‘Lápamela.’​—Dan. 7:18, 22, 25, 27.

‘LÁPAMELA’

9. Kɛkɔnge kɛ ɔprɔfɛtɛ Danyɛlɛ ndɛnyi lá ɛnɛlɔ?

⁹ Ɔprɔfɛtɛ Danyɛlɛ ɛnaka ɛnɛlɔ kɛnyɛki papoo ente Yehova alekɔ la lowandji loleka mbandji inkina. Danyɛlɛ ɛnaka ntondo nyama inɛyi yɛ nkekete yeyalaki djingingi dj’enkfumi wemboheta la wɛlɔndjɛ́ andja w’otondo lɔɔko kɛnɛ—enkfumi wɛkɔ nde Babilɔnɛ, Mediya la Pɛrɛsiya, Ngirika la Ɔrɔma edjinge lowandji lelá looko lɔlɔndjɛ́ lɔɔko kɛnɛ l’ase Amérique l’Angleterre. (Dan. 7:1-3, 17) Másɔ Danyɛlɛ ɛnaka Yehova Ndjambe ambintasɛ lá yɛkɔ yɛ lowandji l’olongo. (Dan. 7:9, 10) Kɛnɛ kɛ ɔprɔfɛtɛ wɔsɔ ndɛnyi m’ɔkɔngɔ nkoka ndjala itondo yɛ ndjewo le ewandji wɛ wana w’anto wɛ lɔɔko kɛnɛ.

10. Lá nkilika Danyɛlɛ 7:13, 14, 27, anto wakɔna Yehova ɔpɛyɛnde lowandji lá djiko djɛ looko, ko djoyi djɛsɔ otoshikikɛwɔ nge lá nkambo djɛ Nde?

¹⁰ Wala Danyɛlɛ 7:13, 14, 27. Ndjambe ɔsaka nkfulu la lowandji lonkfumɔ me ewandji wɛ wana w’anto ko apɛyɛka anto ankina wɛlamá la walekɔ́ la nkfulu ndaaleka. Anto wakɔna wasɔ? Ndapɛyɛnde ‘onto ɔmɔtshi wolekɔ́ etengo wɔna onto,’ Yeso Kristo, la ‘ankinami wa Lápamela,’ ntepela ente anto 144 000 wangɔlɔndjɛ́ ‘lotshinda lotshinda.’ (Dan. 7:18) Ndjokakamaka papoo ente, Yehova ndeke ‘Lápamela,’ ladjikɛnde ngo nde ndeke lolekɔ́ la lowandji lɔ nangha nkambo djɛ nghɔsɔ.

11. Nkambo nkina djɛkɔnge djɛ Danyɛlɛ ndafune djɛnyɛ ente Yehova ndeke lápamela lá djiko djɛ ewila?

¹¹ Akambo wa Danyɛlɛ ndɛnyi lá ɛnɛlɔ kɛsɔ, nshikikɛka akambo amɔtshi wandafune ntondo. Danyɛlɛ atepelaka ante, ‘Ndjambe kel’olongo’ ‘nyimɛka nkfumi yɛ nkanga la ndjilaka nkfumi yɛ nkanga.’ Nde akotshɛka ante: ‘Kanga-Lolekɔ́ lá Djiko djɛ Kenkfumɔ alekɔ Nkfumi l’onkfumi wɔ wana w’anto edjinge nde mpɛyɛka onkfumi wɔkɔ le onto onkfumɔ w’ɔkɔpande.’ (Dan. 2:19-21; 4:17) Mbamba imɔtshi ilekɔ yɛ Yehova ndimɛ la ndile ewandji? Ee ape l’ehamo!

12. Kɔpɛyɛ ndjɔmbɔmba yɛnyɛ wopo wɔ Yehova ndimɛ nkfumi yɛ nkanga imɔtshi má tɛɛkɔ tɔwɔ tɔ lowandji l’etsho wembohetá. (Lenda ntshango.)

¹² Yehova amboshiyɛka nyɛnyɛ papoo ante ‘nde ndeke lápamela ewandji welá djiko.’ Tokoshishima ndjɔmbɔmba isato. Farawɔ owandji welá Edjipito ɔsaka enkambi wɛ Yehova lá lomfumbe edjinge mbala la mbala atonaka ndaatshungola. Koko Ndjambe átshungolaka ko awokelaka Faraɔ tá Ndjale kɛ nkola nkola. (Epo. 14:26-28; Yee. 136:15) Nkfumi kelá Babilɔnɛ Bɛlɛshaza ananghaka fɛtɛ ko ‘ayahandjɛka djɛ [nana] nya Nkfumi kel’olongo’ la ‘alumɛka tondjandjambe tɔ mfɛsa la tɔ paonyi’ l’edjena kɛ numɛ Yehova. (Dan. 5:22, 23) Koko Ndjambe akitshakitshɛka mpame k’otako kɛsɔ. Ngo ‘l’otsho wɔkɔ,’ Belɛshaza ayakemaka ko wapɛyɛka onkfumi wɔnde l’ɛwɔ wɛ ase Midiya la Pɛrsiya. (Dan. 5:28, 30, 31) Nkfumi Herodɛ Angiripa I kelá Palɛstinɛ ayakaka ɔpɔstɔlɔ Djakɔbɔ ko masɔ avundaka ɔpɔstɔlɔ Pɛtɛlɔ lá lokando l’ikanyi yɛ ndoyaka edjinge nde. Koko Yehova atawola djɛ Herodɛ nkotshɛ ikanyi yɛ nde. ‘Ondjelo wɔ Yehova okfusaka,’ ko avɔka.​—Ele. 12:1-5, 21-23.

13. Pɛyɛ ndjɔmbɔmba kɛnyɛ wopo wɔ Yehova ndalonge osanga w’ewandji.

¹³ Yehova ɛnyɛka lonkina ante nde alekɔ lápamela kaanga lá djiko dj’osanga w’ewandji. Nde ananelaka ase Isariyɛlɛ mbandji má ndaakotshɛ́ dj’iwɔ ndongela nkfumi yɛ nkanga 31 y’ase Kanana yesanghanisá djɛ ndaananyɛ edjinge ákotshɛka djɛ ndɔsa Looko lɔ Daka. (Yos. 11:4-6, 20; 12:1, 7, 24) Yehova akotshɛ́ka ase Isariyɛlɛ lonkina djɛ ntshita Nkfumi Bɛnɛ-hadada nya ewandji 32 w’ase Suriya weyisá ndonanyɛ ase Isariyɛlɛ.​—1 Nk. 20:1, 26-29.

14-15. a) Kɛkɔnge kɛ Nkfumi Nebukadinɛza nya Dariyo yatepela lá nkambo djɛ Yehova? b) Ontshumbi yeembo ndatepela nge lá nkambo djɛ Yehova la dj’owila wɔ Nde?

¹⁴ Mbala la mbala, Yehova ɛnyɛka djɛ nde alekɔ Lápamela! Winá wɔ Nkfumi Nebukadinɛza kɛ Babilɔnɛ ndoyalumɛka m’ɔtɛ wɔ ‘wolo wɔnde la nkfulu kɛnde edjinge lomo l’onkfumi wɔnde’ l’edjena kɛ ndjawola l’okitshakitshɛ onkfumɔ ante Yehova ndeke lɛlama ndongola lomo, Ndjambe otatshɛka okadji. M’ɔkɔngɔ wɔ nde nkɔnɔ, Nebukadinɛza ‘alumɛka Kanga-Lápemela lá djiko djɛ tshɛ’ la awolaka ante ‘lowandji lɔ Yehova lolekɔ́ lɔ lotshinda.’ Nde akotshɛka ante: ‘Lako onto wokoka ndoshimba.’ (Dan. 4:30, 33-35) M’ɔkɔngɔ wɔ nkɔmano djɛ Danyɛlɛ te Ndjambe ndjingela l’ohemba la wɔ Yehova ndowikɛ má mpeku djɛ wa kimbwe, Nkfumi Dariyo atepelaka ante: ‘Anto ladjɛ ndjidjima lokomba la wɔma lá ntondo kɛ Ndjambe kɛ Danyɛlɛ. Ladjikɛnde nde alekɔ Ndjambe kewika la nde ntshikalaka lotshinda. Onkfumi wɔnde wopatshitanaki lotshinda, edjinge lowandji lɔnde lolekɔ lɔ lotshinda.’​—Dan. 6:7-10, 19-22, 26, 27, nɔtɛ.

¹⁵ Ontshumbi yeembo atepelaka ante: ‘Yehova afutanyɛka toseke t’ewila, nde atshitaka elonghanyelo wɛ wana w’anto.’ Nde akotshɛka ante: ‘Osasa le owila wɔ Yehova ndeke Ndjambe kɛwɔ, anto wa ndasɔnɛ dj’iwɔ ndjala etengo Opiko wɔnde.’ (Yee. 33:10, 12) Ɔsɔngo elonga kɛ wɔlɔ k’oyɛso ladjɛ nama nkɔmano djɛso te Yehova!

MBANDJI K’EKOMO

16. Eshikikelo kɛkɔnge kekoka ndjala laso lá nkambo djɛ ‘ndjolo k’ekekete,’ ko lamo? (Lenda ntshango.)

¹⁶ Tombowala kɛnɛ kɛ Yehova ndananghe l’etsho wemboheta. Iya kɛkɔnge k’okokaso nkongela l’etsho weyaye? Iso nkoka ndashikikɛ ente Yehova angowikɛ enkambi wɛnde wɛ nkɔmano lá winá wɔ ‘ndjolo k’ekekete keyaye.’ (Mat. 24:21; Dan. 12:1) Nde angonangha nkambo djɛsɔ winá w’osanga w’ewila w’etawɔ ambɔ, Ngɔngɔ kelá Mangɔngɔ, ndongonanyɛ waalekɔ́ la nkɔmano te Yehova la nkɛlɛ kenkfumɔ l’andja w’otondo. Kaanga ntsha osanga w’ewila wɔsɔ yongoyalande la ewila enkfumɔ 193 wekfumba Nations-Unies, wopangoyala la wolo ndeka Lápamela nde nya angala wande wel’olongo! Yehova alakaka ante: ‘Lemi langoyalumɛ, langoyakinyɛ, edjinge langoyawewanyɛ lá wiso w’ewila efula; ko iwɔ wangewa ambɔ lemi ndeke Yehova.’​—Ezk. 38:14-16, 23; Yee. 46:10.

17. Etsho weyaye wɛ ngetemo Bible olakande ewandji wɛ looko l’otondo la anto walamá nkɔmano djɛwɔ te Yehova?

¹⁷ Onanyelo wɔ Ngɔngɔ kelá Mangɔngɔ wɔsɔ angotshinda Yehova djɛ nde ntateyɛ mbandji k’ekomo kɛ Armagɛdɔ kɛ ndongotshita ‘ewandji wɛ looko l’otondo.’ (Ndj. 16:14, 16; 19:19-21) Lá lɛdji lotshikitanyi l’ewandji wɛsɔ, ngo ‘anto wa sii ndeke longintasɛ lá looko, la onto wolama nkɔmano djɛnde ndeke longotshikala l’eteyi.’​—Woo. 2:21, nɔtɛ.

ISO LADJƐ NAMA NKƆMANO DJƐSO

18. Nkano djɛkɔnge efula k’Akristo wa nsɔsɔlɔ iyɔmbɔsá, ko lamo? (Danyɛlɛ 3:28)

¹⁸ L’ilá kɛ deko efula, Akristo wa nsɔsɔlɔ efula wambohandaka ntshutshɛ́ lotshungɔ lɔwɔ edjinge kaanga mbiko yɛwɔ má ngandji k’okawɔ Yehova Owandji wɔwɔ w’andja w’otondo. Akristo wa nsɔsɔlɔ wasɔ, wɔsaka nkano djɛ nama nkɔmano djɛwɔ te Yehova. Iwɔ walekɔ etengo ase Hebero asato watshikalisá la nkɔmano te Lapamela kanga lawikisá má mpoku djɛ lombe l’iyɛ.​—Wala Danyɛlɛ 3:28.

19. Lá nkilika nkambo djɛkɔnge Yehova ndongolomboyɛ enkambi wɛnde, ko nkambo djɛsɔ ototshindawɔ djɛ nangha nge má winá wɔsɔ?

¹⁹ Ontshumbi yeembo Davidɛ afunaka lá nkambo djɛ djonyi djɛ nama nkɔmano te Ndjambe ante: ‘Yehova angolomboyɛ anto. Ee, Yehova, óndomboyɛ lá nkilika sii kɛmi edjinge lá nkilika nkɔmano djɛmi.’ (Yee. 7:8) Davidɛ afunaka lonkina ante: ‘Nkɔmano la sii kɛmi kename.’ (Yee. 25:21) Yopo yɛ lowiko yeleka wɔlɔ nde ntshikala la nkɔmano te Yehova, namaka nkɔmano djɛso tende, kaanga akambo wakɔnge wangotokomela! Má nangha nghɔsɔ, tongoyala l’akoka wa ntepela etengo otshumbi yeembo w’ofunisá ante: ‘Osasa le anto walama nkɔmano djɛwɔ . . .  waakɛnda lá ɛlɛmbɛ wɛ Yehova.’​—Yee. 119:1, nɔtɛ.