Kindjɛ nkembɛ nkongi djɛko dj’Okristo

1. Nkongi djɛkɔnge djɛtɔpɛyisá Yehova?

YEHOVA atɔpɛyɛka nkongi djɛ wɔlɔ lombombe djɛ lowiko l’etshinda. Wamɔtshi walekɔ la nkongi djɛ ntowika lotshinda lotshinda l’olongo etengo ntongami djɛ nyuma djepavɔ́ki lonkina. (1 Kɔ. 15:50, 53) Koko, anto efula walekɔ la nkongi djɛ mbika lotshinda lotshinda lanɛ lá looko l’alemba wa djɔ edjinge l’osasa. (Ndj. 21:3, 4) Ayale kaanga okongelaso nde djɛ ntowika l’olongo kana lá looko, nkongi djɛso ndekɔ lá ntshina efula leso.

2. Nkongi djɛso yombopikama lampe edjinge lamo okokaso ntepela nghɔsɔ?

² Itepela ‘nkongi,’ y’okambawɔ la yɛkɔ lá Bible nkoka nsakisola “nkongela ente akambo wa wɔlɔ wanghomanghema.” Nkongi djɛso djelendana l’etsho weyaye ndekɔ nsɔsɔlɔ ladjikɛnde yayende me Yehova. (Ɔrɔ. 15:13) Iso ndjewaka akambo wandalake, edjinge iso ndjewaka ente nde angokotshɛke etepela wɛnde enkfumɔ. (Ew. 23:19) Tolekɔ l’eshikikelo ente Yehova alekɔ lá mposɛ edjinge la nkfulu kɛ nkotshɛ kekfumɔ kɛ ndatepela ante anghonangha. Djɛkondeke, nkongi djɛso mpalekɔ ngo nkakanyi kana akambo w’anto okombolawɔ toko, koko oyɛwɔnde akambo wa nsɔsɔlɔ.

3. Kɛkɔnge kɛ songoshishima lá djamba djɛnɛ? (Yeembo 27:14)

³ Papa kɛso kel’olongo ntɔkɔpaka edjinge nde nkɔpaka dj’iso ndoowilela oloko. (Wala Yeembo 27:14.) Ntsha nkongi djɛso te Yehova dekɔ ndii, tongoyala l’akoka wa nkfulumeyɛ ehemba la nkongela etsho weyaye l’oloko wolo edjinge l’osasa. Nyontshɔ tokoshishima wopo wɔ nkongi djɛso otolamawɔ. Djɛ kotshɛ okoma wɔsɔ, tokowanga nshishima wopo wɔ nkongi djɛso ɛlamande la loongo lɔ masuwa edjinge la itombo. Masɔ tongoshishima wopo w’okokaso nkembɛ nkongi djɛso.

NKONGI DJƐSO NDEKƆ ETENGO LOONGO LƆ MASUWA

4. Lá wopo wɔkɔnge kongi oyɛnde etengo loongo? (Hebero 6:19)

⁴ Lá onkanda wɔnde te ase Hebero, ɔpɔstɔlɔ Poolo ɛdjɛka nkongi djɛso la loongo lɔ masuwa. (Wala Hebero 6:19.) Poolo ananghaki nkɛndɔ efula lá masuwa, djɛkondeke nde ewaki ante wangokambake la loongo djɛ nyemadjɛ masuwa dj’ipa nkɛlɛmɔ. Lá mbamba kɛmɔtshi, nde atatshɔki lɔkɛndɔ lá masuwa winá wɔ lompopo lɔ wolo yapopaka. Winá wɔ lompopo lɔsɔ yapopapaka, nde ɛnaka waatakɛndjɛki masuwa wapika loongo lɔ masuwa lá washi djɛ nyemandjɛ masuwa dj’ipa ntohelá lá awanga. (Ele. 27:29, 39-41) Ngo ngete loongo lɔ masuwa okotshɛkande masuwa djɛ mpikama, nkongi djɛso ntokotshɛka djɛ mpikama dj’ipa iso mbangɔ otale la Yehova winá w’opomanaso l’ekakasano wɛ wolo. Nkongi djɛso djelekɔ́ ndii ntokotshɛka djɛ ntshikala vu winá w’opomanso l’ekakasano, ladjikɛnde tolekɔ l’eshikikelo ente lako ilá akambo wangɔwɔnga. Tovungɔ ente, Yeso atewolaka ante tongopomana l’ekakasano. (Dj. 15:20) Djɛkondeke ntɔnɔlaka lá lofuto lɔso lokongelaso l’etsho weyaye, angotokotshɛ dj’iso nkindjɛ nkambela Yehova.

5. Wopo wɔkɔnge nkongi yakotshɛ́ Yeso winá wɔ ndayale entshupa la nyɔyi?

⁵ Tokoshishima wopo wɔ nkongi yakotshɛ́ Yeso djɛ ntshikala ndii kaanga ndewaka ante akɔpa mvɔ nyɔyi kɛ ndjolo efula. Lá lofu lɔ Patekotɛ 33 D.D., ɔpɔstɔlɔ Pɛtɛlɔ awalaka etepela wɛ prɔfɛsi kel’onkanda wɔ Yeembo k’ɛnyɛki vu edjinge eshikikelo keyalaki la Yeso ante: ‘Lemi langoyalaka la nkongi ladjikɛnde opangontshika lá nketa la opangawola djɛ onkambi wɔko wɔ nkɔmano nyɛna ɛpɔndɛlɔ. . . . Wɛ ongondodjɛ l’osasa lá ntondo kɛko.’ (Ele. 2:25-28; Yee. 16:8-11) Kaanga Yeso ndewaka ante angovɔ, nde ayalaki la nkongi djɛ wolo ante Ndjambe angookfundola edjinge angóyala l’osasa wɔ ndoyala esanga lonkina nya Papa kɛnde l’olongo.​—Heb. 12:2, 3.

6. Kɛkɔnge kɛ wɔnanyɔ ɔmɔtshi ndatepela lá nkambo djɛ nkongi?

⁶ Nkongi djɛso dj’Okristo mbokotshɛ́ka wananyɔ l’ankaana yɛso efula djɛ nkfulumeyɛ. Tokoshishima ndjɔmbɔmba kɛ Leonard Chinn, wɔnanyɔ ɔmɔtshi wɔ nkɔmano wowikaki l’Anglɛtɛrɛ. Lá mbandji kɛ ntondo kel’Andja w’otondo, wovundaka lá lokando ladjikɛnde atonaka ndjingela l’olemo w’angala. Wowangoyɛka l’anto ankina l’ilá kɛ ngɔndɔ ipe, ko masɔ iwɔ ndotateyɛ ndootshinda la wolo djɛ nkamba elemo wɛ wolo efula. M’ɔkɔngɔ nde ayɛka ndofuna ante: “Nkambo djenkomelisá djenkotshɛka djɛ nsipisoyɛ wopo wɔ nkongi otokotshɛwɔ djɛ nkfulumeyɛ. Tolekɔ la ndjɔmbɔmba kɛ Yeso, k’apɔstɔlɔ, la k’aprɔfɛtɛ edjinge tolekɔ l’alaka wa nsɔsɔlɔ w’otanaso lá Bible. Nkete nkfumɔ djɛsɔ ntɔpɛyɛka nkongi djelendana l’etsho weyaye la ntɔpɛyɛka nkfulu kɛ nkfulumeyɛ.” Nkongi ndjalaka etengo loongo lɔ masuwa le Leonard, edjinge djekoka ndjala etengo loongo lɔ masuwa kaanga leso.

7. Wopo wɔkɔnge ehemba okembɛwɔ nkongi djɛso? (Ɔrɔma 5:3-5; Djakɔbɔ 1:12)

⁷ Nkongi djɛso nkembaka m’ɔkɔngɔ w’iso nkfulumeyɛ ehemba, wɔ nyɛna wopo wɔ Yehova otokotshɛnde la wɔ nsipisoyɛ ente iso ndjawolamaka me nde. (Wala Ɔrɔma 5:3-5; Djakɔbɔ 1:12.) Djɛkondeke nkongi djɛso mboleka nkemba ndeka l’etsho wɛ sawola losango lɔ wɔlɔ. Satana nkombolaka dj’ehemba ntɔlɔmbɛ, koko m’okotshɔ́ wɔ Yehova iso nkoka nkfulumeyɛ ohemba onkfumɔ.

NKONGI DJƐSO DEKƆ ETENGO ITOMBO

8. Lá wopo wɔkɔnge nkongi oyɛwɔ etengo itombo? (1 Tesalɔnikɛ 5:8)

⁸ Bible ndjɛdjɛka nkongi djɛso lonkina la itombo. (Wala 1 Tesalɔnikɛ 5:8.) Ongala ndɔtaka itombo djɛ nama ɔtɛ wɔnde má ankfula w’antonyi wande. Lá mbandji kɛso kelá nyuma, iso ladjɛ nama yimba yɛso má onanyelo wɔ Satana. Nde ntoyakalaka ehemba efula la tokanyi tɔ pɔlɔ tokoka ntshita tokanyi tɔso. Ngo ngete itombo olamakawɔ ɔtɛ w’ongala, ndeke nkongi djɛso olamakawɔ yimba yɛso dj’iso ndjewa ntshikala la nkɔmano te Yehova.

9. Kɛkɔnge kenanghaka waapalekɔ́ la nkongi?

⁹ Nkongi djɛso djɛ lowiko l’etshinda ngotokotshɛ́ djɛ nangha akambo la balo edjinge la ntɔnɔ. L’onkoko onkina, ntsha nkongi djɛso mboyala wɔdju la ntsha tombowola djɛ ndodjɛ yimba yɛso la tokanyi tɔ demba, tokoka ndotshutshɛ nkongi djɛso djɛ lowiko l’etshinda. Tokoshishima kɛnɛ kekomelisá Akristo amɔtshi wawikaki lá Kɔrɛtɔ l’etsho wɛ ntondo. Iwɔ watshutshɛka djawo djɛwɔ ta daka mɔtshi djɛ djonyi efula djɛ Ndjambe, ntepala ente nkongi dj’ekfundwelo. (1 Kɔ. 15:12) Poolo atepelaka ante waapalekɔ́ la nkongi dj’ekfundwelo mponaka ngo djɛ nkotshɛ mposɛ yɛwɔ yɛ demba. (1 Kɔ. 15:32) Lɔɔko kɛnɛ, efula k’anto wapalekɔ́ la nkongi t’alaka wa Ndjambe, ndjilaka yimba ngo l’akambo wa lɔɔko kɛnɛ, edjinge iwɔ ndapɛyɛka ngo lá esasa wel’etsho wɛnɛ. Koko, iso ndaawɛkɛka tá alaka wa Ndjambe, wel’etsho weyaye. Nkongi djɛso dekɔ etengo itombo yɛ djidjingi yelanama yimba yɛso la yetolama dj’ipa iso nsɔna yopo yɛ lowiko yekoka ntshita djokanelo djɛso la Yehova.​—1 Kɔ. 15:33, 34.

10. Wopo wɔkɔnge nkongi okokawɔ ntolama má tokanyi tɔ nyɛtshi?

¹⁰ Itombo yɛso yɛ nkongi ntolamaka má tokanyi t’ente lako wapɔ woyɛká má nsasangɛ Yehova. Ndjɔmbɔmba, anto amɔtshi nkoka ntepela ambɔ: ‘Mpayalaki l’anteyi k’anto wangowika lotshinda lotshinda. Mpalekɔ onto wɔ wɔlɔ. Mpayalakí l’akoka wa nɛmɛyɛ ɛlɛmbɛ wɛ Ndjambe.’ Tovungɔ ente ilongo yɛ nyɛtshi yɛ Djɔbɔ, Elifazɛ akambaka lá ekanedji kɛ nyɛtshi kɛ nghɔsɔ te Djɔbɔ. Elifazɛ atepelaka ante: ‘Onto wongovɔ́ oyɛnde na djɛ ndjala piyɔɔ?’ Masɔ, nde atepelaka lá nkambo djɛ Ndjambe ante: ‘Lenda! Nde apalekɔ la djawo te ankinami wande, kaanga olongo wopalekɔ piyɔɔ lá wiso wande.’ (Djɔ. 15:14, 15) Ɔsɔ ngo ongolo! Vungɔ ente Satana ndeke lɔkɔpa djɛ wɛ ndjala la tokanyi tɔ nghɔsɔ. Nde ndjewaka ante ntsha iso nkindjɛ nkanela nghɔsɔ, tongotshutshɛ nkongi djɛso. Djɛkondeke, tona engolo wɛ nghɔsɔ edjinge ilá yimba yɛko ngo l’alaka wa Yehova. Toyalake l’ehamo ente nde nkɔpaka djɛ wɛ mbika lotshinda lotshinda edjinge angokokotshɛ djɛ wɛ nkotshɛ okoma wɔsɔ.​—1 Ti. 2:3, 4.

KINDJƐ NKEMBƐ NKONGI DJƐKO

11. Lamo oyɛso ladjɛ ndjala la balentshitshi winá w’okongaso djɛ nkongi djɛso nkotshama?

¹¹ Apangoyalaka winá enkfumɔ wɔdju djɛ nkindjɛ ndjala la nkongi djɛ wolo. Iso nkoka ndotshutshɛ balentshitshi winá w’okongelaso Ndjambe. Koko, Yehova agoyalake lotshinda lotshinda edjinge wopo w’owalande winá ntshikitana laso. (2 Pɛ. 3:8, 9) Nde angokotshɛ ikanyi yɛnde lá wopo woleka wɔlɔ, koko mbala imɔtshi nde apanghonangha nkambo djɛsɔ lá winá w’okongelaso djɛ nde nangha. Kɛkɔnge kekoka ntokotshɛ́ djɛ nkindjɛ ndjala la nkongi djɛ wolo winá w’okongelaso la balentshitshi nkfumɔ djɛ Ndjambe nkotshɛ alaka wande?​—Dja. 5:7, 8.

12. Lá nkilika Hebero 11:1, 6, wopo wɔkɔnge nkongi oyɛwɔ la djokanelo la djawo?

¹² Tongokindjɛ ndjala la nkongi djɛ wolo ntsha iso ntshikala entshupa la Yehova, ladjikɛnde nde ndeke longhonangha djɛ nkongi djɛso nkotshama. Lá nsɔsɔlɔ, Bible nyɛnyɛka ante dj’iso ndjala la nkongi, iso ladjɛ ndjala la djawo ente Yehova alekɔ edjinge nde ndeke ‘omfutshi wɔ woohonaká l’oloko ɔmɔ.’ (Wala Hebero 11:1, 6.) Winá wɔ sotaleke ndjawola ente Yehova alekɔ onto wɔ nsɔsɔlɔ, ndeke songoleka ndjala l’eshikikelo ente nde anghonangha kenkfumɔ kɛ ndatolake. Nyontshɔ tokoshishima topo tɔmɔtshi tɔ kɔɔ tokokaso nkembɛ djokanelo djɛso la Yehova la nkindjɛ ndjala la nkongi djɛ wolo.

13. Wopo wɔkɔnge w’okokaso ndasukanyɛ la Ndjambe?

¹³ Lɔmbaka Yehova la walaka Otepela wɔnde. Kaanga sopakoke nyɛna Yehova, iso nkoka ndasukanyɛ lande. Iso nkoka nsawola lande má lɔlɔmbɔ l’eshikikelo kenkfumɔ ente, nde angotoka. (Jɛr. 29:11, 12) Iso nkoka ndjekameyɛ Ndjambe má mbalaka Otepela wɔnde la ntɔnɔlaka m’eteyi. Winá w’owalaso akambo w’ɛnyɛ wopo wɔ Yehova ndayakiyanyɛka lá nkambo djɛ waayalisá la nkɔmano tende l’etsho wemboheta, nkongi djɛso djengotalekaka nkemba. Akambo ankfumɔ wafunamisá l’Otepela wɔ Ndjambe ‘wafunamaka djɛ ntɔpɛyɛ olakanyelo, djɛ má okfulumelo wɔso la má osukɔ wɔ má Afunelo, iso ndjala la nkongi.’​—Ɔrɔ. 15:4.

14. Lamo oyɛso ladjɛ ntɔnɔlaka lá kɛnɛ kɛ Yehova ndananghela anto ankina?

¹⁴ Tɔnɔlaka lá wopo wɔ Yehova okotshɛkande alaka wande. Tokoshishima kɛnɛ kɛ Ndjambe ndananghela Abrahama nya Sara. Iwɔ wakomaka l’ɛnɔnyi wɛ yotakoka mbota wana lonkina. Koko Ndjambe álakaka ante wangowota wɔna mpame. (Ewa. 18:10) Wopo wɔkɔnge Abrahama ndelola? Bible ntepelaka ante: ‘Nde ayalaka la djawo ante angoyala papa k’ewila efula.’ (Ɔrɔ. 4:18) Kaanga nkambo djɛsɔ yɛnamaká etengo mpakoke nanghema lá nkilika ikanyi y’anto, Abrahama ayalaka l’eshikikelo ante Yehova angokotshɛ daka djɛnde. Mpame kɛ nkɔmano kɛsɔ atɔsa nsɔnyi. (Ɔrɔ. 4:19-21) Ɛkɔndɔ wɛ nghɔsɔ ntolakanyɛka djɛ ndjilelaka Yehova oloko winá enkfumɔ ente nde angokotshɛ alaka wande kaanga winá wɔ nkambo djɛsɔ ɛnamawɔ etengo mpananghemaki lotshinda.

15. Lamo oyɛso ladjɛ ntɔnɔlaka lá kɛnɛ kɛ Ndjambe ndombotonanghela?

¹⁵ Kanelaka lá kɛnɛ kɛ Yehova ndomboshiyɛká nkonanghela. Kanelaka wɛlɔ wɛ nghomboshiyɛka mba má ekotshamelo k’alaka walekɔ́ l’Otepela wɔ Ndjambe. Ndjɔmbɔmba, Yeso alakaka ante Papa kɛnde angɔkɔpɛyɛka kɛnɛ k’oyɛ la djonyi djɛ mbika. (Mat. 6:32, 33) Yeso akoshikikɛka lonkina ante Yehova angɔkɔpɛyɛ nyuma kɛnde k’ekina ntsha wɛ ndɔɔlɔmbaka. (Luka 11:13) Yehova amboshiyɛká nkotshɛ́ alaka wasɔ. Lonkina, wɛ nkoka nkanela alaka ankina wa ndakotshɛ lá wapɔ wɔko. Ndjɔmbɔmba, nde alakaka djɛ nkimeyɛka, nkosukaka, la nkolesɛka lá nyuma. (Mat. 6:14; 24:45; 2 Kɔ. 1:3) Ntsha wɛ ntɔnɔlaka lá akambo wa Ndjambe ndomboshiyɛká nkonanghela, ongokembɛ djawo djɛko tá alaka wokolakande djɛ nkonanghela l’etsho weyaye.

NSASANGA LÁ NKONGI

16. Lamo nkongi oyɛwɔ opapɛyɛ wɔ ntshina?

¹⁶ Nkongi djɛso djɛ lowiko l’etshinda oyɛwɔnde opapɛyɛ wɔ ntshó wɔ me Ndjambe. Tokongela l’oloko lukuluku etsho weyaye wɛ wɔlɔ efula la tolekɔ l’eshikikelo ente nkongi djɛso djɛsɔ ngokotshama nsɔsɔlɔ. Nkongi djɛsɔ dekɔ etengo loongo lɔ masuwa leso, djengɔtɔpɛyɛke wolo wɔ nkfulumeyɛ ekakasano, mpikama lá ntondo k’onanyelo la kaanga lá ntondo kɛ nyɔyi. Djelekɔ etengo itombo le so, má wopo wolamande yimba yɛso dj’iso ndjala l’akoka wa ntona tokanyi tɔ nyɛtshi la nangha kɛnɛ kelekɔ́ wɔlɔ. Nkongi djɛso djembopikama lá Bible ntokotshɛka dj’iso ndjala entshupa la Ndjambe la ntɛnyɛka ekekete kɛ ngandji k’otokande. Iso mbaka wapɔ efula winá w’okindjɛso nkembɛ nkongi djɛso.

17. Lamo nkongi djɛso ɔtɔpɛyɛwɔ osasa?

¹⁷ Ɔpɔstɔlɔ Poolo atokembɛka lá onkanda wɔnde te ase Ɔrɔma ante: ‘Nyosasange lá nkongi djɛnyo.’ (Ɔrɔ. 12:12) Poolo akokaki nsasanga ladjikɛnde nde ayalaki l’eshikikelo ante, ntsha nde nama nkɔmano djɛnde, nde angowa lowiko l’etshinda l’olongo. Edjinge iso nkoka nsasanga lá nkongi djɛso ladjikɛnde tolekɔ l’eshikikelo ente Yehova angokotshɛ alaka wande. Ngo ngete ontshumbi yeembo ndafune: ‘Osasa le onto . . . wokongelá me Yehova Ndjambe kɛnde, . . . onto wotshikalaka mfu ikfumɔ la nkɔmano.’​—Yee. 146:5, 6.