Wopo wɔ Yehova okadjimolande lá ndɔmbɔ yɛso

1-2. Kɛkɔnge k’okokaso ndawopola lá nkambo djɛ ndɔmbɔ yɛso?

OMBOYAWOPOLÁKÁ ntsha Yehova nkadjimolaka lá ndɔmbɔ yɛko? Ntsha oyɛwɔnde nghɔsɔ, mbɔ koko opalekɔ nghɔmɛlɛ. Efula kɛ wananyɔ l’ankaana wangokanelake nghɔsɔ, pekapeka winá w’opomanawɔ l’ekakasano. Edjinge iso nkoka ndjala l’okakasano wɔ nyɛna wopo wɔ Yehova okadjimolande lá ndɔmbɔ yɛso, wina wɛnaso ndjolo.

² Nyontshɔ tokokalɔ nshishima donga dj’okokaso ndjala l’eshikikelo ente Yehova nkadjimolaka ndɔmbɔ y’antɛmɔdji wande. (1 Dj. 5:15) Lonkina tongoshishima weepó wɛnɛ: Lamo okokaso nyɛna lá winá ɛmɔtshi entengo Yehova apakadjimolaka lá ndɔmbɔ yɛso? Lá topo tɔkɔnge Yehova okadjimolande lá ndɔmbɔ lɔɔko kɛnɛ?

YEHOVA NKOKA KADJIMOLA LÁ YOPO YƐ SOTAKANELAKA

3. Lamo Yehova ɔkɔpande iso ndɔɔlɔmbaka?

³ Afunelo ntoshikikɛka ambɔ Yehova ntɔkɔpaka efula edjinge tolekɔ la ntshina efula lende. (Ang. 2:7; 1 Dj. 4:10) Djɛkondeke otetande dj’iso ndɔɔlɔmba okotshɔ má lɔlɔmbɔ. (1 Pɛ. 5:6, 7) Nde nkombolaka ntokotshɛ́ dj’iso ndjala entshupa lande edjinge nkfulumeyɛ ekakasano wɛso lá yopo yɛ wɔlɔ.

4. Wopo wɔkɔnge w’ewaso ente Yehova nkadjimolaka ndɔmbɔ y’enkambi wɛnde? (Lenda edjinge ntshango.)

⁴ Tongowalake mbala efula lá Bible ente, Yehova akadjimolaki ndɔmbɔ y’enkambi wɛnde. Ovungɔ ndjɔmbɔmba kɛmɔtshi? Ndjɔmbɔmba kɛmɔtshi nde kɛ Nkfumi Davidɛ. Lá lowiko lɔnde l’otondo nde ayalaki l’antonyi wa nyɛtshi efula, edjinge mbala efula nde ahonaki okotshɔ wɔ Yehova má lɔlɔmbɔ. Lá mbamba kɛmɔtshi, nde awɔndaka Yehova ante: ‘Ee Yehova, oka lɔlɔmbɔ lɔmi; ekameyɛ lɔlɔmbɔ lɔmi lohonami okotshɔ. Onkadjimole, má nkɔmano la má sii kɛko.’ (Yee. 143:1) Yehova akadjimolaka lɔlɔmbɔ lɔ Davidɛ lɔ ndowikɛ. (1 Sa. 19:10, 18-20; 2 Sa. 5:17-25) Davidɛ akokaka ntepela l’eshikikelo k’enkfumɔ ante: ‘Yehova alekɔ entshupa l’anto ankfumɔ wowetaka.’ Edjinge iso tokoka ndjala l’eshikikelo kɛ nghɔsɔ.—Yee. 145:18.

5. Ndɔmbɔ y’enkambi wɛ Yehova wel’etsho wɛ ntondo yakadjimwamaki ngo lá yopo yɛ yakongelaka? Pɛyɛ ndjɔmbɔmba. (Lenda edjinge ntshango.)

⁵ Yehova apakoke nkadjimola ndɔmbɔ yɛso ngo lá yopo yokanelaso. Nghɔsɔ ndeke yayale lá nkambo djɛ ɔpɔstɔlɔ Poolo. Nde alɔmbaka Ndjambe djɛ ndowimɛ ‘ɔnsɛsɛ má demba.’ Poolo alɔmbaka nkambo djɛsɔ mbala isato y’etondo. Yehova akadjimolaka ndɔmbɔ yɛsɔ? Ee, koko apalekɔ lá lɛdji lɔ Poolo ndakongelaka. L’edjena kɛ ndoowimeyɛ okakasano wɔsɔ, Yehova ɔpɛyɛka ngo nkfulu kɛ ndayalaka la djonyi djɛ nde nkindjɛ ndookambela la nkɔmano.—2 Kɔ. 12:7-10.

6. Lá winá ɛmɔtshi, lamo okokawɔ nyɛnama etengo Yehova apakadjimola lá ndɔmbɔ yɛso?

⁶ Lá winá ɛmɔtshi edjinge iso nkoka mba ekadjimwelo wetshikitanyi la kɛnɛ kokanelaso. Koko, toyale l’eshikikelo ente Yehova ndjewaka nsɔsɔlɔ wopo woleká wɔlɔ wɔ ntokotshɛ́. Nde nkoka nangha ‘akambo efula ndeka kɛnɛ kɔɔlɔmbaso kana kokanelaso.’ (Ɛfɛ. 3:20) Djɛkondeke, nde nkoka nkadjimola ndɔmbɔ yɛso lá winá kana lá wopo wɔ sotakanelaki.

7. Lamo okokaso ndjala la djonyi djɛ ntshikitanyɛ kɛnɛ k’ɔlɔmbaso? Pɛyɛ ndjɔmbɔmba.

⁷ Iso nkoka ndjala la djonyi djɛ ntshikitanyɛ kɛnɛ kɔlɔmbaso winá wolekaso nsipisoyɛ ɛkɔpa kɛ Yehova wɔlɔwɔlɔ. Tokolenda ndjɔmbɔmba kɛ Martin Poetzinger. Ndambo daambi m’ɔkɔngɔ wɔ nde ntshukana, wɔnanyɔ Poetzinger avundamaka lá lokando l’ekekete l’ase Nazi. Má bango, nde álɔmbaki Yehova djɛ ndoposɛ má lokando l’ekekete lɔsɔ djɛ nde ntowongola wadjɛnde la ntokamba olemo wɔnde w’ipoposanyɛ. Koko, m’ɔkɔngɔ wɔ mbengo ipe, nde ɛnaka ante lako kaanga ilembetelo imɔ yɛnyɛ ente Yehova angoodjipwela mboka kɛnde mposa. Ko nde atateyɛka ndɔmba ante: “Yehova, lambɔkɔwɔnda ɔnyɛnyɛ kɛnɛ k’ɔkɔpɛ lemi nangha.” Ko masɔ nde awangaka nkanela ekakasano wɛ wananyɔ ankina wayalaki lá lokando lɔsɔ yakfulumeyɛka. Efula l’anteyi kɛwɔ wayalaki l’okiyano efula lá nkambo djɛ wadji la wana wawɔ. Masɔ wɔnanyɔ Poetzinger alɔmbaka ante: “Yehova, lokasa lá odjito wɔ bango wɔ nghɔmɔmpɛyɛ. Onkotshɛ́ djɛ lemi nkembɛ la nsuka wananyɔ wami.” Nde ahetshɛka ɛnɔnyi djuwa enkina lá lokando lɔsɔ ngo la nanghaka nghɔsɔ!

8. Nkambo djɛkɔnge djɛ djonyi djoyɛso ladjɛ nama lá yimba winá wɔlɔmbaso?

⁸ Iso ladjɛ mvungɔka ente Yehova alakaka daka mɔtshi, edjinge nde angokotshɛ daka djɛkɔ lá winá wɔ ndombóshikikɛ. Daka djɛkɔnde djɛ nyimɛ lotshinda lotshinda akambo ankfumɔ waposɛ ndjolo lɔɔko kɛnɛ, ndjɔmbɔmba, mbalaka yeyɛ má nkete djetongamisá, elando edjinge nyɔyi. Yehova angokotshɛ daka djɛnde má lotshimbo l’Onkfumi wɔnde. (Dan. 2:44; Ndj. 21:3, 4) Koko, tii winá wɔkɔ wɔsɔ, Yehova apɛyɛ Satana lotshungɔ lɔnde ndɔndjɛ andja.b (Dj. 12:31; Ndj. 12:9) Ntsha Yehova nkandola ekakasano wɛnyɛ wana w’anto ndjolo winá wɔsɔ, angɛnama etengo ɛlɔndjɛlɔ kɛ Satana kelekɔ wɔlɔ. Djɛkondeke kaanga oyɛso ladjɛ nkonga Yehova nkotshɛ alaka amɔtshi, kɛsɔ kepasakisola ente nde angototshika ipa l’okotshɔ. Nyontshɔ tokoshishima topo tɔmɔtshi tɔ Yehova otokotshɛ́kande.

TOPO TƆ YEHOVA OKADJIMOLANDE LÁ NDƆMBƆ LƆƆKO KƐNƐ

9. Wopo wɔkɔnge Yehova okokande ntokotshɛ́ winá w’oyɛso la djonyi djɛ ndɔsa akano? Kɔpɛyɛ ndjɔmbɔmba.

⁹ Nde ntɔpɛyɛka balo. Yehova ntolakaka ante angɔtɔpɛyɛ balo dj’oyɛso la djonyi djɛ ndɔsa akano wa wɔlɔ. Tolekɔ la djonyi djɛ balo dj’ime Ndjambe pekapeka winá w’ɔsaso akano walekɔ l’eposelo lá lowiko lɔso, ndjɔmbɔmba ntshikala epolo kana ntshukana. (Dj. 1:5) Tokolenda kɛnɛ kekomelisa nkaana k’epolo k’etawɔ Maria.c Nde akambaki l’osasa onkfumɔ etengo yat’ekalo yɛ lotshinda winá wɔ ndapomana nya wɔnanyɔ ɔmɔtshi. Nde atepela ante: “Winá wɔ djokanelo djɛso yotafulaka, ndeke ngandji kɛ sokanaka koko yotafulaka. Lewaki ente ndekɔ ladjɛ ndɔsa nkano mɔtshi. Ndɔmbaka efula edjinge l’entete lá nkambo djɛsɔ. Layalaki la djonyi djɛ ɛlɔndjɛlɔ kɛ Yehova, koko lewaki lonkina ente Yehova apɔngɔndɔsɛla nkano.” Nde ɛnaka ante Yehova ambokadjimola lɔlɔmbɔ lɔnde má ndɔpɛyɛ balo. Lá wopo wɔkɔnge? Winá wɔ ndananghaka ehonelo l’enkanda wɛso, nde isolaka wamba wa kɔɔ w’okotshisá djɛ mba nsakiso lá weepó wɛnde. Nde akambaka lonkina l’alako wa balo wa nyɔ kɛnde kɛ nkɔmano ndɔpɛyɛ. Dako djɛsɔ djekotshɛ́ka Maria djɛ nshishima mposɛ yɛnde. L’ekomo, nde ayalaka l’akoka wa ndɔsa nkano djɛ balo.

10. Lá nkilika Filipɛ 4:13, kɛkɔnge kɛ Yehova ndongonangha djɛ nkotshɛ́ enkambi wɛnde? Pɛyɛ ndjɔmbɔmba. (Lenda edjinge ntshango.)

¹⁰ Nde ntɔpɛyɛka wolo wɔ nkfulumeyɛ. Etengo ndananghela ɔpɔstɔlɔ Poolo, Yehova angɔtɔpɛyɛ wolo w’oyɛso la djonyi djɛ nkfulumeyɛ ekakasano wɛso. (Wala Filipɛ 4:13.) Tokolenda wopo wɔ Yehova ndakotshɛ́ wɔnanyɔ w’etawɔ Benjamin djɛ nkfulumeyɛ okakasano ɔmɔtshi wɔ wolo. Lá ɔlɛngɛ wɔnde, Benjamin nya nkfumbo kɛnde wahetshɛka ɛnɔnyi efula lá ká k’ase olotshi l’Afrikɛ. Benjamin atepela ante: “Lalɔmbaki Yehova winá enkfumɔ, l’ɔlɔmbaki djɛ nde mpɛyɛ lemi nkfulu kɛ nangha kɛnɛ kelekɔ wɔlɔ lá wiso wande. Yehova akadjimolaka ndɔmbɔ yɛmi má mpɛyɛ vu djɛ yimba, oloko wolo wɔ nkindjɛ mpoposanyɛ, edjinge enkanda wɛ lemi ntshikala la lonyuma lɔ wolo.” Nde akfɛ ante: “Mbala kɛnɛ kekomelisá winaso Ewakɛ la ndjewa wopo wɔ Yehova ndaakotshɛ́ djɛ nkfulumeyɛ, akembɛka nkano djɛmi djɛ ntshikala la nkɔmano.”

11-12. Wopo wɔkɔnge Yehova okambande la nkfumbo kɛso kelá nyuma djɛ nkadjimola lá ndɔmbɔ yɛso? (Lenda edjinge ntshango.)

¹¹ Nde akamba la nkfumbo kɛso kelá nyuma. L’otsho wɔ lá ntondo kɛ nde ndambola lowiko lɔnde, Yeso alɔmbaka l’oloko ɔmɔ. Nde awɔndaka Yehova djɛ ndoseela dj’ipa anto ndɔwɔsa etengo onto wɔ nyɛtshi. L’edjena kɛ nde nangha nghɔsɔ, Yehova akotshɛ́ka Yeso má ndotomela ɔmɔtshi l’anteyi kɛ wananyɔ wande, ntepela ente ondjelo djɛ ndookembɛ. (Luka 22:42, 43) Yehova nkoka ntokotshɛ́ lonkina má lotshimbo lɔ leeta lɔ telefɔnɛ lokembɛ kana má mbembo kɛ wɔnanyɔ kana nkaana kɛmɔtshi. Isankfumɔ nkoka mpona mbamba yɛ nshimela winaso andjawodji ‘itepela yɛ wɔlɔ’.—Woo. 12:25.

¹² Tokolenda kɛnɛ kekomelisá nkaana kɛmɔtshi k’etawɔ Miriam. Mbengo imangha m’ɔkɔngɔ wɔ womɛnde mvɔ, Miriam atshikalaka nyɔmɛlɛ la yɛnyi y’efula edjinge ayawokaki etengo onto wombosamba nkongi. Nde akindjɛki ngo ndela edjinge ayalaki la djonyi djɛ onto ɔmɔtshi wokokande nshimela wopo woyawokande. Nde atepela ante: “Ntawaki wolo wɔ ndjeta kaanga onto ɔmɔ, djɛkondeke malɔmbaka ngo Yehova. Winá wɔ malelaka la malɔmbaka, telefɔnɛ kɛmi yombolela. Yayale nde ikokolo imɔtshi, ntepela ente ilongo yɛ ngandji.” Miriam awaka lokembo me ikokolo yɛsɔ nya wadjɛnde. Nde ayalaka l’eshikikelo ante Yehova ndeke lotshindisa wɔnanyɔ wɔsɔ djɛ ndoweta.

13. Pɛyɛ ndjɔmbɔmba kɛmɔtshi kɛ wopo wɔ Yehova okokande nkamba l’anto wapɔtɛmɔla djɛ nkadjimola lá ndɔmbɔ yɛso.

¹³ Nde nkoka nkamba l’anto wapɔtɛmɔla. (Woo. 21:1) Lá winá ɛmɔtshi, Yehova nkadjimolaka lá ndɔmbɔ y’enkambi wɛnde má ntshinda anto wapokambela djɛ nangha nkambo mɔtshi lá wapɔ wɔwɔ. Ndjɔmbɔmba, nde atshindaka Nkfumi Aratashasha djɛ ndjawola lɔlɔmbɔ lɔ Nɛhɛmiya lɔ nkalɔ ta Jerusalɛmɛ djɛ ntokotshɛ́ l’opikelo wɔ ngando. (Nɛh. 2:3-6) Edjinge lɔɔko kɛnɛ, Yehova nkoka ntshinda anto wapɔtɛmɔla djɛ ntosela winá woyɛso la djonyi.

14. Wopo wɔkɔnge nkambo djekomelisá Soo Hing yombokokembɛ? (Lenda edjinge ntshango.)

¹⁴ Nkaana kɛmɔtshi k’etawɔ Soo Hing ɛnaka ante Yehova okotshɛ́ka má lotshimbo lɔ dɔktɛrɛ djɛnde. Wɔnande wɔ mpame atataki olando wɔ wolo efula l’ɔtɛ. Wina wɔ ndananghe aksida wa wolo, nkaana kɛsɔ nya womɛnde wimaka m’olemo wɔwɔ djɛ ndolama wɔnawɔ. Eposelo weyalisa má nkambo djɛsɔ nde, wayalaka l’okakasano l’akambo wa mfalanga. Soo Hing atepelaka ante ayawokaki etengo apangokoka nkfulumeyɛ lonkina. Nde adjipwelaka Yehova oloko wɔnde, má ndɔlɔmba okotshɔ. Dɔktɛrɛ djenanghelaki wɔnande ekanga ɔsaka nkano djɛ mpona wopo wɔ ndokotshɛ́ nde nya nkfumbo kɛnde. Kɛsɔ k’apɛyɛka mbamba k’iwɔ mba okotshɔ m’ewandji wɛ lɛɛta edjinge mba mvulu kɛ wɔlɔ kɛ ndjala. Masɔ, Soo Hing atepelaka ante: “Tɛnaka lɔwɔ lɔ Yehova lá nkambo djɛsɔ. Nde alekɔ nsɔsɔlɔ ‘kanga lokaka lɔlɔmbɔ.’”—Yee. 65:2.

DJƐ MPONA LA NDJAWOLA EKADJIMWELO WƐ YEHOVA, NGO NDJALA LA DJAWO

15. Kɛkɔnge kekotshisa nkaana kɛmɔtshi djɛ nsipisoyɛ ante ndɔmbɔ yɛnde ingokadjimwamake?

¹⁵ Mbala efula ndɔmbɔ yɛso ipakadjimwamaka lá yopo yɛ nkamɔ. Koko ekadjimwelo w’owakaso oyɛwɔ ngo w’oyɛso la djonyi djɛ ntshikala la nkɔmano te Papa kɛso kel’olongo. Djɛkondeke toyale la balo djɛ nyɛna ekadjimwelo wɛ Yehova la ndɔmbɔ yɛso. Nkaana kɛmɔtshi k’etawɔ Yoko ɛnaki etengo Yehova apakadjimolaka lá ndɔmbɔ yɛnde, ko masɔ nde awangaka mfuna kenkfumɔ kɔlɔmbande Yehova. M’ɔkɔngɔ w’etsho ɛmɔtshi, nde ayɛka ndolenda l’ikalupɛ yɛ ndafunaka ko ɛnaka ante Yehova ambókadjimóla ndɔmbɔ yɛnde efula kaanga imɔtshi yɛ ndombovungɛ. Mbala la mbala, iso ladjɛ ndɔsaka winá djɛ ntɔnɔla lá wopo wɔ Yehova okadjimolakande lá ndɔmbɔ yɛso.—Yee. 66:19, 20.

16. Wopo wɔkɔnge w’okokaso nyɛnyɛ djawo la kɛnɛ kelendana la ndɔmbɔ yɛso (Hebero 11:6)

¹⁶ Tɔngɛnyɛke ente tolekɔ la djawo ape ngo ma ndɔmba Yehova toko, koko edjinge má ndjawola nsakiso yɛnde lá ndɔmbɔ yɛso ayale wopo wɔkɔnge w’oyɛwɔ. (Wala Hebero 11:6.) Tokolenda ndjɔmbɔmba kɛ Mike nya wadjɛnde, Chrissy. Wayawilelaka okoma wɔ ntokamba lá Betɛlɛ. Mike atepela ante: “Tokambaka etengo antshukami l’ilá k’ɛnɔnyi efula edjinge tɔlɔmbaka Yehova mbala la mbala lá nkambo djɛ okoma wɔsɔ, koko watateta.” Mike nya Chrissy watshikalaka l’eshikikelo ambɔ Yehova ndjewaka yopo yɛ wɔlɔ yokokande nkamba lawɔ l’olemo wɔnde. Iwɔ wakindjɛka nangha kenkfumɔ k’okokawɔ nangha má nkamba etengo tat’ekalo tɔ lotshinda lá djena dj’oyɛwɔ la djonyi dj’okotshɔ edjinge má nsuka olemo w’opikelo wɔ mvulu yɛ teokrasi. Lɔɔko kɛnɛ wakamba l’olemo w’edjingadjinga. Mike atepela ante: “Yehova atakadjimola ndɔmbɔ yɛso lá wopo wɔ sakongelaka, koko nde akadjimolaka lá wopo wolekisá wɔlɔ ndeka kaanga wopo w’isafɛnyɛka.”

17-18. Lá nkilika Yeembo 86:6, 7, eshikikelo kɛkɔnge k’ekoka ndjala laso?

¹⁷ Wala Yeembo 86:6, 7. Ondjombe Davidɛ ayalaki l’eshikikelo ante Yehova okaki edjinge akadjimolaki lá ndɔmbɔ yɛnde. Iso nkoka ndjala l’eshikikelo kɛ nghɔsɔ. Ndjɔmbɔmba yɛ somboshishima lá djamba djɛnɛ itoshikikɛ ente Yehova nkoka ntɔpɛyɛ balo edjinge nkfulu k’oyɛso la kɛkɔ djonyi dj’iso nkfulumeyɛ. Nde nkoka nkamba la nkfumbo kɛso kɛ nyuma edjinge l’anto wap’ɔtɛmɔla lá winá wɔsɔ djɛ ntokotshɛ́ lá topo tɔmɔtshi.

¹⁸ Kaanga Yehova ndopakadjimolaka winá enkfumɔ lá ndɔmbɔ yɛso lá lɛdji lokombolaso, iso ndjewaka ente nde angokadjimola. Nde angotɔpɛyɛ ngo kɛnɛ k’oyɛso la djonyi edjinge lá winá w’oyɛso la djonyi. Djɛkondeke kindjɛ ndɔmba la djawo nkfumɔ, l’eshikikelo ente Yehova angokokoseyɛ ehomba wɛko má winá wɔsɔ edjinge ‘angokotshɛ mposɛ k’ekete kenkfumɔ kelekɔ́ la lowiko’ l’andja wa bango wayaye.—Yee. 145:16.