Longola batisimo ipa ntshatshimba

1. Donga mɔtshi djɛ wɔlɔ djɛkɔnge djɛ ndongola batisimo?

WƐ ƆNGƆKƆPAKE Yehova Ndjambe, kanga lɔkɔpɛyisá opapɛyɛ onkfumɔ wɔ wɔlɔ, ndjila ole lowiko? Ɔkɔpa ndɔwɛnyɛ ngandji kɛko? Yopo yɛ wɔlɔ yɛ nangha nghɔsɔ nde ndálambola le nde la ndongola batisimo djɛ washi djɛ nyɛnyɛ olambo wɔko. Má nangha nghɔsɔ, ongingela lá nkfumbo kɛ Yehova. Eposelo wengoyala nde, Papa la Ilongo yɛko angɔkɔlɔndjɛ la angokowakela mande ongokoma onto wɔnde. (Yee. 73:24; Iza. 43:1, 2) Ndálambola la batisimo angɔkɔpɛyɛ kankina nkongi djɛ lowiko l’etshinda—1 Pɛ. 3:21.

2. Ɛnaso lɔ la djamba djɛnɛ nge?

² Ekete kɛmɔtshi kekoshimba djɛ ndongola batisimo? Ntsha nghɔsɔ opalekɔ nghɔmɛlɛ. Anto miliyɔ lá ntondo kɛko wayalaka ladjɛ nangha etshikitano lá djalelo djɛwɔ la lá wopo wɔwɔ wɔ nkanela djɛ nkotshɛ akambo walɔmbama djɛ ndongola batisimo. Wakambela Yehova winá wɔsɔ l’osasa ole l’osasalo. Okokɛ mba olakanyelo wɔkɔnge m’anto amɔtshi walongolisá l’ɛtɛndɔ kɛ ntondo? Nyontshɔ tokolenda ekakasano ɛmɔtshi wɛ yapomana la elakanyelo wokokaso mba má ndjɔmbɔmba yɛwɔ.

ASE SAMARIYA WAMBOLONGOLA BATISIMO

3. Enkeka wɛkɔnge w’ase Samariya yayale ladjɛ ntamba djɛ ndongola batisimo?

³ Ase Samariya w’etsho wɛ Yeso yayalaka nde ɔtɛmwɛlɔ ɔmɔtshi watɔnisá woyalaki entshupa lá ngando kɛ Shɛkɛmɛ la kɛ Samariya, lá nɔrɔ kɛ Judeya. Lá ntondo k’ase Samariya ndongola batisimo, wayalaka ladjɛ mba djewo djɛ djɔ dj’Otepela wɔ Ndjambe. Ase Samariya wawolaki ambɔ ngo enkanda etano wɛ ntondo wɛ Bible, má Ewangelo tii Mvungo k’ɛlɛmbɛ, ndeke lofunamisá má nyuma kɛ Ndjambe, la nkoka ndjala l’onkanda wɔ Yosua. Koko wakongaki ambɔ Mesiya angoyɛ lá nkilika daka djɛ Ndjambe dekɔ́ lá Mvungo k’ɛlɛmbɛ 18:18, 19. (Dj. 4:25) Dj’iwɔ ndongola, wayalaka ladjɛ ndjawola Yeso ngete Mesiya kelakemisá. ‘Ase Samariya efula’ wawolaka Yeso. (Dj. 4:39) Amɔtshi wayalaka ladjɛ ntshika ndjala la tokanyi tɔ nyɛtshi te ase Juda.—Luka 9:52-54.

4. Lá nkilika Elemo 8:5, 6, 14, wopo wɔkɔnge ase Samariya yelola lá kɛnɛ kepoposanyɛki Filipɛ?

⁴ Ekete kɛkɔnge kekotshisá ase Samariya djɛ ndongola batisimo? Mpoposanyi Filipɛ apoposanyɛka ase Samariya akambo walendana ‘la Kristo’ ko amɔtshi ‘wawolaka otepela wɔ Ndjambe.’ (Wala Elemo 8:​5, 6, 14.) Filipɛ ndayalaka nde ose Juda, koko watatona. Mbala imɔtshi wavungɔka avɛrse wa enkanda 5 wɛ ntondo wɛ Bible wɛnyɛki ente Ndjambe apasɔnɛ dongi. (Mvu. 10:17-19) Ayale nghɔsɔ kana lako, iwɔ ‘Wilaki yimba lá kɛnɛ ketepelaki Filipɛ’ lá nkambo djɛ Kristo, la wawolaka ilembetelo yɛnamaki papoo ente Ndjambe ayalaki nya Filipɛ. Filipɛ ananghaka ansese efula, asadjɛka ase elando la akilikaka ɛdjɛngɛ.—Ele. 8:7.

5. Olakanyelo wɔkɔnge nghombowa me ase Samariya?

⁵ Ase Samariya wasɔ wakokaka ntona olakanyelo wɔ Filipɛ mande ndayalaka nde ose Juda kana mande watokaka olakanyelo wɔsɔ ntondo. Koko watawola nkambo djɛsɔ nanghema. Ase Samariya watatshatshimba djɛ ndongola m’ɔkɔngɔ w’iwɔ ndjawola ambɔ Filipɛ alakanyɛki nsɔsɔlɔ. Bible mpakisola nghɔkɔnɛ: ‘Winá wɔ Filipɛ ndewoyɛka losango lɔ wɔlɔ l’Onkfumi wɔ Ndjambe la lolendana la djiina djɛ Yeso Kristo, iwɔ wawolaka ko ampame la amato walongolaka batisimo.’ (Ele. 8:12). Awola ente Otepela wɔ Ndjambe wolekɔ nsɔsɔlɔ la ente Ewakɛ wɛ Yehova wapayalaka la tokanyi tɔ nyɛtshi te anto ankina la wangonanghake la wolo djɛ nyɛnyɛ ngandji kelekɔ́ ilembetelo yɛ Akristo wa nsɔsɔlɔ? (Dj. 13:35) Ko manyi totshatshimbake, yala la eshikikelo ente Yehova angokosakola.

6. Wapɔ wɔkɔnge wokokɛ mba má ndjɔmbɔmba kɛ Ruben?

⁶ Ruben, má Allemagne afulaka lá nkfumbo kɛ Ewakɛ. Koko winá wɔ ndayalaka ilɛngɛ ilaki ehamo ante Yehova apalekɔ. Ehamo wɛnde yashile ngete mo? Winá wɔ ndɛnyi ante apalekɔ la djewo dj’efula, ɔsaka nkano djɛ nangha nkambo mɔtshi. Atepela ante: “Nanghaka wekelo wɔ Bible djɛ ndjewa nsɔsɔlɔ. Ndjalaka ladjɛ ndjeka tɔtɛ tɔ wayi tolendana l’opilwelo mbala efula.” Nde awalaka onkanda Y a-t-il un Créateur qui se soucie de vous ? Onkanda wɔsɔ wokotshɛka Ruben djɛ ndjala la djawo le Ndjambe. Akamɔka ante: ‘We nyɔ! Yehova alekɔ ngo nsɔsɔlɔ.’ Lá winá wɔ ndawembolaka Biro dj’ekekete dj’Ewakɛ wɛ Yehova, Ruben ɛnyɛka djedjɛ lá nsese djɛ osanga wolekɔ́ l’anteyi kɛ wananyɔ l’ankaana y’andja w’otondo. Winá wɔ ndakalɔ lá Allemagne, Ruben alongolaka batisimo l’ɛnɔnyi 17. Ntsha ohama kɛnɛ kekɛ, nangha ehonelo lá enkanda wɛso djɛ nshiyɛ ehamo wɛko. Ehamo nkoka nshiya má ndjala la ‘djewo djɛ djɔ.’ (Ɛfɛ. 4:13, 14) La winá wokɛ nsango yɛ ngandji la y’osanga wolekɔ́ l’anteyi k’Ewakɛ wɛ Yehova l’atshuku ankina wa looko, ole winá wɛnɛ ngandji l’osanga wɔsɔ lá otshumano wɔko, ongoyala la djedjɛ efula le wananyɔ l’ankaana yɛko y’andja w’otondo.

SAOLO KƐ TARSƐ AMBOLONGOLA BATISIMO

7. Saolo ndayale ladjɛ ntshikitanyɛ ekanedji kɛkɔnge?

⁷ Tokolenda ndjɔmbɔmba kɛ Saolo kɛ Tarsɛ. Ingelaka ankalasa yɛ nkekete efula djɛ ndjewa Ɛlɛmbɛ w’ase Juda la ayalaki onto w’ekekete efula l’anteyi kɛwɔ. (Nga. 1:13, 14; Flp. 3:5) Lá winá wɔ ase Juda efula yɔsaka Akristo ete ngo wa apɔsta, Saolo ányɔkɔlaka la nkɛlɛ k’efula. Afɛnyɛki lá nyɛtshi ante anangha ɛkɔpa kɛ Ndjambe. (Ele. 8:3; 9:1, 2; 26:9-11) Djɛ nde ndjawola Yeso la ndongola batisimo ete ngo Okristo, Saolo awolaka la ayalaka entshupa djɛ nyɔkwama.

8. a) Ekete kɛkɔnge kekotshisá Saolo djɛ ndongola batisimo? b) Lá nkilika Elemo 22:12-16, Ananiya ndakotshɛ́ Saolo ngete mo? (Lenda ntshango.)

⁸ Kɛkɔnge kekotshisá Saolo djɛ ndongola batisimo? Winá wɔ Yeso, Nkfumi kɛ lomo ndaposela le nde, Saolo awodjɛka wiso. (Ele. 9:3-9) Ape la ehamo nde ananghaka etsho esato, ipa ndɛ la atɔnɔlaka lá kɛnɛ kembokomela. Ɛwo, Saolo awolaka ante Yeso ayalaki Mesiya la ante ambeki wande wayalaki lá ɔtɛmwɛlɔ wɔ nsɔsɔlɔ. Saolo ayalaka ladjɛ nkfulunghana la yɛnyi y’efula m’ɔtɛ wɔ nyɔyi kɛ Stefano! (Ele. 22:20) Lá ekomo k’etsho esato, ombeki wɔ yetaka ambɔ Ananiya asawolaka nya Saolo, odjipolaka wiso, la okembɛka djɛ ndongola batisimo ipa ntshatshimba. (Wala Elemo 22:​12-16.) Saolo awolaka okotshɔ wɔnde la okitshakitshɛ edjinge awolaka yopo inkina yɛ lowiko.—Ele. 9:17, 18.

9. Owaso elakanyelo wɛkɔnge me Saolo?

⁹ Towa elakanyelo ɛmɔtshi me Saolo. Akokaka ntshika ofuno kana wɔma w’onto ndoshimba djɛ ndongola batisimo. Atawola nkambo djɛsɔ nanghema. Saolo atshikitanyɛka lowiko lɔnde l’okitshakitshɛ onkfumɔ winá wɔ ndawola nsɔsɔlɔ lá nkambo djɛ Kristo. (Ele. 26:14, 19) Saolo ayalaka entshupa djɛ nkoma Okristo kaanga ndewaka ante wangɔnyɔkɔla. (Ele. 9:15, 16; 20:22, 23) M’ɔkɔngɔ wɔ batisimo djɛnde, akindjɛka ndawɛkɛ le Yehova djɛ nde ndokotshɛ́ djɛ nkfulumeyɛ ekakasano etshikitanyi. (2 Kɔ. 4:7-10) Ndongola batisimo ete ngo Owakɛ wɔ Yehova nkoka nkokomɛ lá ekakasano kana l’ehemba, koko ongowa okotshɔ. Okoka ndjala l’eshikikelo ente ongowa winá enkfumɔ okotshɔ wɔ Ndjambe la wɔ Kristo.—Flp. 4:13.

10. Wopo wɔkɔnge wokokɛ mba wapɔ má ndjɔmbɔmba kɛ Anna?

¹⁰ Anna afulaka lá nkfumbo k’ase Kurde, lá ɛste kɛ Europe. M’ɔkɔngɔ wɔ nyɛnghɛnde ndongola, isɛkɛ Anna awolaka nde mbanga ndjeka Bible l’ɛnɔnyi 9. Koko, kɛsɔ keposɛka ekakasano efula l’anteyi kɛ nkfumbo kɛ Anna la otonga wɔwɔ, mande iyintasɛka ngo esanga. Boto djɛwɔ wɛnaka ambɔ ɔsɔ alekɔ nkambo djɛ nsɔnyi efula djɛ nde nyima má ɔtɛmwɛlɔ w’andoyi yɛwɔ. Winá wɔ Anna ndawa ɛnɔnyi 12, alɔmbaka isɛkɛnde djɛ nde ndongola batisimo. Isɛkɛnde akɔpaka ndjewa ntsha oyɛwɔ ngo nkano djɛnde nyɔmɛlɛ kana onto onkina ndeke lotshinda. Akadjimolaka ante: “Lemi nkɔpa Yehova.” Isɛkɛnde awolaka nde ndongola batisimo. Kaanga nghɔsɔ wanyɔkɔlaki Anna la wɔpɛyɛki nsɔnyi efula. Ewoto kɛnde kɛmɔtshi oshimelaka ante: “Ndeka wɔlɔ kfumba loseka kana nɔka kaanga ikaya koko ape ndjala Owakɛ wɔ Yehova.” Anna ndananghe mo? Atepela ante: “Yehova ankotshɛka djɛ ndjala la wolo, ole mama la papa kɛmi wansukaka efula.” Anna afunaki lá nkishi winá onkfumɔ wɔ ndɛnaka lɔwɔ lɔ wolo lɔ Yehova lá lowiko lɔnde. Alendaki nkishi djɛsɔ mbala la mbala ko atavungɛka wopo wɔ Yehova ndokotshɛ́ka. Ntsha oka ekakasano wɔma, vungɔ ente Yehova angokokotshɛ́ ole wɛ.—Heb. 13:6.

KƆRNƐLIYO AMBOLONGOLA BATISIMO

11. Enkeka wɛkɔnge wepomanisá la Kɔrnɛliyo djɛ ndongola?

¹¹ Tokoka mba elakanyelo wɛ djonyi má ndjɔmbɔmba kɛ Kɔrnɛliyo. Nde ayalaki ‘owandji,’ wɔlɔndjɛki angala 100 w’ase Ɔrɔma. (Ele. 10:1, nɔtɛ.) Ete ngo owandji, nde ayalaki la mpipo k’ekekete efula l’owila la le angala. Nde ‘apɛyɛki anto efula epapɛyɛ wɛ djandji.’ (Ele. 10:2) Yehova atomaka ɔpɔstɔlɔ Pɛtɛlɔ djɛ ntooshimela losango lɔ wɔlɔ. Kɔrnɛliyo atshatshimbaka djɛ ndongola batisimo m’ɔtɛ wɔ mpipo yɛnde?

12. Kɛkɔnge kekotshisá Kɔrnɛliyo djɛ ndongola?

¹² Kɛkɔnge kekotshisá Kɔrnɛliyo djɛ ndongola batisimo? Towala ente ‘alapɛyɛki le Ndjambe nya ase mvulu kɛnde ankfumɔ.’ La Kɔrnɛliyo akindjɛki ndɔmba Ndjambe. (Ele. 10:2) Winá wɔ Pɛtɛlɔ ndashimela Kɔrnɛliyo losango lɔ wɔlɔ, nde nya nkfumbo kɛnde wawolaka Kristo ko mbala kɛkɔ kɛmɔ walongolaka batisimo. (Ele. 10:47, 48) Ape la ehamo Kɔrnɛliyo ayalaka entshupa djɛ nangha etshikitano enkfumɔ weyalisá djonyi djɛ nde nya nkfumbo kɛnde ntɛmɔla Yehova.—Yos. 24:15; Ele. 10:24, 33.

13. Olakanyelo wɔkɔnge wokokaso mba me Kɔrnɛliyo?

¹³ Ete ngo Saolo, Kɔrnɛliyo akokaka ntshika mpipo kana lowandji lɔnde ndoshimba djɛ nkoma Okristo. Koko atawola nkambo djɛsɔ nanghema. Alɔmbama wɛ nangha etshikitano lá lowiko lɔko djɛ ndjawola nsɔsɔlɔ? Ntsha ee, Yehova angokokotshɛ́. Angosakola nkano djɛko djɛ ndokambela lá nkilika tɔkfɔ tɔ Bible.

14. Wopo wɔkɔnge wokokɛ mba wapɔ má ndjɔmbɔmba kɛ Tsuyoshi?

¹⁴ Tsuyoshi, má Japon, ayalaka ladjɛ nangha otshikitano lá olemo wɔnde djɛ nkotshɛ akambo walɔmbama djɛ ndongola batisimo. Nde akambaki lá nkalasa kɛ Ikenobo, k’olakanyɛwɔ wopo wɔ nkona ansoso. Ko ayalaki onto w’ape, me owandji ngo nde. Winá wɔ owandji ndotakokaka ntshɔ ta ntshaka kana winá wokfudjɛwɔ onto ɔmɔtshi, atomaki mbala efula Tsuyoshi djɛ ntonangha wopo wɔ nkfumbo djɛ Buda yalɔmbaka djɛ nangha lá ntondo kɛ nkfundjɛ onto. Koko, winá wɔ Tsuyoshi ndeke nsɔsɔlɔ lá nkambo dj’edjo, nangha nghɔsɔ ayalaka okakasano w’ekekete efula djɛ nde ndongola. Ɔsaka nkano dj’ipa nangha nkfumbo dj’ase Buda yonanghaka lá ntondo kɛ nkfundjɛ odjo. (2 Kɔ. 6:15, 16) Tsuyoshi ashimelaka owandji wɔnde nkambo djɛsɔ. Eposelo wɛkɔnge wɔdjisá? Tsuyoshi atatshutshɛ olemo wɔnde la atananghaka nkfumbo djɛsɔ lonkina. Ɔnɔnyi ɔmɔ m’ɔkɔngɔ wɔnde ndjeka Bible, alongolaka batisimo.a Ntsha wɛ ladjɛ nangha etshikitano lá olemo wɔko djɛ nsasangɛ Ndjambe, yala la eshikikelo ente angɔkɔpɛyɛ wɛ nya nkfumbo kɛko kɛnɛ k’oyɛnyo la djonyi.—Yee. 127:2; Mat. 6:33.

ASE KƆRƐTƆ WAMBOLONGOLA BATISIMO

15. Onkeka wɔkɔnge wopomanisá l’ase Kɔrɛtɔ djɛ ndongola?

¹⁵ Ase ngando kɛ Kɔrɛtɔ kɛ ntondo wayalaki la ngandji kɛ looto la kɛ mfalanga, la wakɔpaki wayi wa ntshɛngi lombombe. Anto efula wayalaki la yopo yɛ lowiko yɛ Ndjambe ndotakɔpaki kaanga nsolo. Okama papoo ente mbika lá idjena yɛ nghɔsɔ ayalaki wolo efula le onto onkfumɔ wotakoka ndjawola losango lɔ wɔlɔ. Koko, winá wɔ Poolo ndaye lá ngando la ndapoposanyɛ losango lɔ wɔlɔ lá nkambo djɛ Kristo, ‘ase Kɔrɛtɔ efula wokisá wawangaka ndjawola ko walongolaka batisimo.’ (Ele. 18:7-11) Manyi Nkfumi Yeso Kristo aposelaka le Poolo lá ɛnɛlɔ ko oshimelaka ante: ‘Ndekɔ l’anto efula la ngando kɛnɛ.’ Ko Poolo akindjɛka mpoposanyɛ l’eteyi ɔnɔnyi la etenyi.

16. Kɛkɔnge kekotshisá ase Kɔrɛtɔ djɛ ntamba enkeka wɛsɔ djɛ ndongola batisimo? (2 Kɔrɛtɔ 10:4, 5)

¹⁶ Kɛkɔnge kekotshisá ase Kɔrɛtɔ djɛ ndongola batisimo? (Wala 2 Kɔrɛtɔ 10:​4, 5.) Otepela wɔ Ndjambe la nyuma kɛnde k’ekina kɛ nkfulu kaakotshɛ́ka djɛ nangha etshikitano wɛ nkekete lá mbiko yɛwɔ. (Heb. 4:12) Anto wayalaki lá Kɔrɛtɔ wawolisá losango lɔ wɔlɔ lá nkambo djɛ Kristo wayalaka ladjɛ ntshika nkfumbo la nanghedji djɛ widjima ete ngo, wibi la djewanelo djɛ ampame l’ampame.—1 Kɔ. 6:9-11.b

17. Olakanyelo wɔkɔnge wowaso me ase Kɔrɛtɔ?

¹⁷ Kaanga ase Kɔrɛtɔ amɔtshi yayale ladjɛ ntshika nkfumbo mbopika edjo, watatepela ambɔ angoyala wolo efula dj’iwɔ nkoma Akristo. Wilaka welo djɛ nkɛnda lá mboka kɛ nkaka kɛtɔla tá lowiko l’etshinda. (Mat. 7:13, 14) Olekɔ l’okakasano djɛ ntshika ɛkɔmɔ kana enanghedji kɛmɔtshi djɛ ndongola batisimo? Topekɔke nana! Lɔmba Yehova akokotshɛ́ djɛ nde nkɔpɛyɛ nyuma kɛnde k’ekina djɛ nkokotshɛ́ djɛ mpikama lá ntondo kɛ kɛnɛ kelekɔ́ nyɛtshi.

18. Wapɔ wɔkɔnge wokokaso mba má ndjɔmbɔmba kɛ Monika?

¹⁸ Monika, má ngando kɛ Georgie, ananghaka la wolo djɛ ntshika etepela wɛ nyɛtshi la etombo wɛ mbindo djɛ mfula tii lá batisimo. Atepela ante: “Winá wɔ mayalaka la ɛnɔnyi djomi la ndjape, wolo wɔmi yayalaka nde lɔlɔmbɔ. Yehova ewaki kɛnɛ kelekɔ́ wɔlɔ kɛ makombolaka nangha, ko ankotshɛki la andɔndjɛki winá enkfumɔ.” Monika alongolaka batisimo lá ɛnɔnyi 16. Nkfumbo mɔtshi dekɔ dj’oyɛ la djɛ ntshika djɛ nkambela Yehova lá wopo wawolande? Kindjɛ ndɔlɔmba djɛnde nkɔpɛyɛ nkfulu kɛ nangha etshikitano. Yehova mpɛyɛka la lokapo lonkfumɔ nyuma kɛnde k’ekina.—Dj. 3:34.

DJAWO DJƐKO NKOKA NSƐKƆLA ENKÓKÓ

19. Ekete kɛkɔnge kekoka nkokotshɛ́ djɛ ndonga ekakasano welekɔ́ ete ngo enkókó? (Lenda ntshango.)

¹⁹ Yala l’eshikikelo ente Yehova akɔkɔpa la akombola wɛ ndjingela lá nkfumbo kɛnde. Nkambo djɛsɔ dekɔ nsɔsɔlɔ ayale onkeka wɔkɔnge wokoka nkoshimba djɛ ndongola batisimo. Yeso ashimelaka oloyi w’ambeki wande w’ɛtɛndɔ kɛ ntondo ante: ‘Ntsha nyomboyala la djawo dj’ekekete ete ngo lowambo lɔ mutardɛ, ete koko nyongoshimela onkókó wɔnɛ ente: “Ima manɛ, tshɔka tahanyi,” ko onkókó wɔngɔsɛkɔ, la lako nkambo djɛ nyopakoke nangha.’ (Mat. 17:20) Anto wokisá etepela wɛ Yeso wɛsɔ yananghe la nde ngo ɛnɔnyi emangha toko, koko djawo djɛwɔ ntafulaki ngo ntafule. Koko Yeso áshikikɛka ante ntsha wamboyala la djawo nkoka, Yehova angakotshɛ́ djɛ nsɛkɔla ekakasano welekɔ́ ete ngo enkókó. La Yehova angokokotshɛ́ djɛ nangha wopo wɔkɔ ɔmɔ!

20. Ndjɔmbɔmba yɛ Akristo w’ɛtɛndɔ kɛ ntondo la w’etsho wɛnɛ okotshindawɔ djɛ nangha nge?

²⁰ Ntsha ewa enkeka wekoshimba djɛ ndongola batisimo, ɔsa nkano djɛ ntamba ipa la ntshatshimba. Waka lokembo má ndjɔmbɔmba yɛ nkfulu yɛ Akristo w’ɛtɛndɔ kɛ ntondo la w’etsho wɛnɛ. Ndjɔmbɔmba yɛwɔ ingokokembɛ la ingokotshinda djɛ ndálambola le Yehova la ndongola batisimo. Ɔsɔ ndeke nkano deka wɔlɔ djɛ nghɔngɔsa!