Kindjɛ nkɛnda má djawo

1. Lamo ɔpɔstɔlɔ Poolo ndasasanga la lowiko lɔnde winá wɔ ndavungɔ?

LÁ WINÁ ɔmɔtshi, ɔpɔstɔlɔ Poolo ewaka ante lako ilá ovɔ, koko ayalaki la donga djɛ nsasanga la lowiko lɔnde. Winá wɔ ndavungɔ, atepelaka ante: ‘Lamboshiyɛ lowango lɔmi, lemi mbombaka djawo.’ (2 Ti. 4:6-8) Poolo ɔsaka akano wa wɔlɔ lá olemo wɔnde w’Okristo, la ayashikikɛka ante Yehova ɔkɔpaki. Ngole iso nkɔpaka ndɔsa akano wa wɔlɔ ole ndjawolama me Ndjambe. Okokaso nangha nghɔsɔ ngete mo?

2. Nkɛnda má djawo osakisolawɔ nge?

² Poolo atepelaka lá nkambo djɛnde la djɛ Akristo ankina ante: ‘Tɔkɛndɛ má djawo, koko ape má nyɛna.’ (2 Kɔ. 5:7) Poolo ndakɔpɛ ntepela nge? Lá Bible, itepela ‘nkɛnda’ nsakisolaka winá ɛmɔtshi yopo yɛ lowiko yɛ onto ɔsɔnande djɛ mbika. Onto wɔkɛnda má nyɛna ndɔsaka akano má kɛnɛ kɛnande, kokande l’atoyi la wopo wokande lá demba. Koko, onto wɔkɛnda má djawo, ndɔsaka akano má ndjilela Yehova oloko. Akambo wonanghande wɛnyɛ ente awola ante Ndjambe angofuta, la angowa wapɔ má nkilika alako wa Yehova welá Bible.—Yee. 119:66; Heb. 11:6.

3. Songowa nge má nkɛnda má djawo? (2 Kɔrɛtɔ 4:18)

³ Lá nsɔsɔlɔ, isankfumɔ ndɔsaka akano winá ɛmɔtshi má kɛnɛ kɛnaso la kokaso lá demba. Koko, tokoka mpomana l’ekakasano, ntsha tombila yimba ngo lá kɛnɛ kɛnaso la kokaso winá w’ɔsaso akano wa djonyi. Lamo? Mande kɛnɛ kɛnaso la kokaso nkoka ntɔtɔla tá nyɛtshi. Ntsha tɔmbɔkɛnda ngo má kɛnɛ kɛnaso, kokaso l’atoyi kana lá demba, ekomo ekomo tongovungɛ ɛkɔpa kɛ Ndjambe la alako wande. (Los. 11:9; Mat. 24:37-39) Koko, winá wɔkɛndaso má djawo, tɔngɔsa akano ‘wa Nkfumi awolande.’ (Ɛfɛ. 5:10) Tongowa vu djɛ l’eteyi la tongoyala la osasa ntsha tombokilika alako wa Ndjambe. (Yee. 16:8, 9; Iza. 48:17, 18) Ole ntsha tombokindjɛ nkɛnda má djawo, tongowa lowiko l’etshinda l’etsho weyaye.—Wala 2 Kɔrɛtɔ 4:18.

4. Lá wopo wɔkɔnge onto okokande ndjewa ntsha akɛnda má djawo kana má nyɛna?

⁴ Okokaso ntepela ente mo ntsha tɔkɛnda má djawo kana má nyɛna? Lá yopasɛ, tewe nkambo djɛnɛ: Akambo wakɔnge walɔndjɛ akano waso? Ɔsaso akano ngo m’akambo wɛnaso? Kana wɛkamo la alako wa Yehova ndeke lɔtɔlɔndjɛ djɛ ndɔsa akano? Nyontshɔ tokolenda wopo wokokaso nkindjɛ nkɛnda má djawo lá akambo asato wa djonyi wanɛ: Winá wɔsɔnaso olemo, wɔsɔnaso wome kana wadji, la wɔtɔpɛyɛ olonghanyelo ɛlɔndjɛlɔ. Lá nkambo nkfumɔ, tonghɛna akambo woyɛso ladjɛ nshishima djɛ ndɔsa akano wa wɔlɔ.

WINÁ WƆSƆNƐ OLEMO

5. Ekete kɛkɔnge kɛ silaka yimba efula winá wɔsɔnaso olemo?

⁵ Isankfumɔ nkɔpaka nshiyɛ ehomba wɛso la w’ase nkfumbo kɛso. (Los. 7:12; 1 Ti. 5:8) Elemo ɛmɔtshi welekɔ la lofuto lɔ wɔlɔ. Wekoka nkotshɛ́ onto djɛ nshiyɛ ehomba wɛnde wɛ lofu la lofu la mbomba itenyi yɛ nkfuta. Koko elemo ɛmɔtshi wepalekɔ la lofuto lɔ wɔlɔ, yokotshɛ́ka ngo djɛ nshiyɛ ehomba wɛ nkfumbo. Winá w’ɔsaso nkano djɛ nkamba olemo ɔmɔtshi, silaka yimba efula ngo lá lofuto lɔ songofutama. Koko, onto akoka nkɛnda ntondo ntondo má nyɛna ntsha ɔsɔ alekɔ nkambo deka djonyi le nde.

6. Wopo wɔkɔnge wokokɛ nkɛnda má djawo winá wɔsɔnɛ olemo? (Hebero 13:5)

⁶ Ntsha tɔkɛnda má djawo, tongolenda lonkina eposelo welekɔ́ la olemo wɔsɔ lá djokanelo djɛso la Yehova. Tolawopole ente: ‘Olemo wɔmi wɔ ngɔndɔmba djɛ nangha akambo wa Yehova ndopakɔpɛ?’ (Woo. 6:16-19) ‘Langosamba nsanghanyɛ la mpangowa winá efula wɔ mpoposanyɛ, ndjeka Bible la wɔ mpetshɛka la nkfumbo kɛmi?’ (Flp. 1:10) Ntsha mpɔndɔ yɛ weepó wɛsɔ nde ee, ete koko lako nkambo djɛ balo djɛ ndjawola olemo wɔ nghɔsɔ, kaanga oyɛwɔ wolo mba olemo. Mande tɔkɛnda má djawo, tɔngɔsa akano wangɛnyɛ ente tolekɔ l’eshikikelo ente Yehova angoshiyɛ ehomba wɛso.—Mat. 6:33; wala Hebero 13:5.

7-8. Wɔnanyɔ wɔ Amerique du Sud ndakɛndɛ má djawo ngete mo? (Lenda ntshango.)

⁷ Lenda wopo wɔ Javier,a wɔnanyɔ wɔ Amerique du Sud, ndɛnyi djonyi djɛ nkɛnda má djawo. Atepela ante: “Ntshɔka ntohona olemo wɔ lokumu wɔ yongomfuta ndeka lofuto lɔ ntondo la wɔngɔmpɛyɛ osasa.” Koko, Javier akombolaki ndjala yat’ekalo. Akfɛ ante: “Ntshɔka ntosawola isa owandji w’olemo. Lá ntondo kɛ ntshɔ, ndɔmbaka okotshɔ, ndjewaki ente Yehova ewa kɛnɛ kelekɔ́ wɔlɔ le lemi. Lakɔpaki ndjala l’ekopo k’ekekete l’olemo, koko okokami nkɔpa olemo wɔkɔ ngo ntsha wongonkotshɛ́ djɛ nkotshɛ ekoma wɛmi wɛ nyuma.”

⁸ Javier akɔndɔla ante: “Owandji w’olemo anshimelaka winá wɔ masawolaka isa nde ante lemi ladjɛ nkambaka mbala la mbala tii nkɔlɔ. Ndoshimelaka la okitshakitshɛ onkfumɔ ente mpakoke nkamba m’ɔtɛ w’ɔtɛmwɛlɔ wɔmi.” Ɛwo, Javier atonaka olemo. Mbengo ipe m’ɔkɔngɔ, awangaka l’olemo wɔ yat’ekalo. M’ɔkɔngɔ wɔ winá emangha, awaka olemo wɔ winá ɛmɔtshi. Atepela ante: “Yehova okaka lɔlɔmbɔ lɔmi la ampɛyɛka olemo w’okana l’olemo wɔmi wɔ yat’ekalo. Ndekɔ l’osasa djɛ mba olemo wɔmpɛyɛ winá wɔ nkambela Yehova la wananyɔ.”

9. Olakanyelo wɔkɔnge wowaso má ndjɔmbɔmba kɛ Trésor?

⁹ Iya ntsha olemo wɔso wopatɔpɛyɛ mbamba kɛ nkɛnda má djawo? Tokolenda kɛnɛ kekomelisá Trésor, má Congo. Akɔndɔla ante: “Olemo wɔmi wɔ ntato wolekɔ ekete kɛ makombolaka winá enkfumɔ. Wamfutaki mfalanga efula ndeka yɛ yamfutaka l’olemo wɔ makambaka ntondo, la anto wanɛmɛyɛki efula.” Koko, mbala efula Trésor atawaki winá wɔ ndjingela nsanghanyɛ mande akambaki tii nkɔlɔ. Mbala efula, ambayi yɛnde y’olemo wotshindaki djɛ nde ndjimba dj’ipa anto ndjisola ongolo wɔwɔ. Trésor akɔpaka nyima, koko okaki wɔma ante apangowa olemo lonkina. Kɛkɔnge kokotshisá? Atepela ante: “Abakuka 3:17-19 ankotshɛ́ka djɛ ndjoka ente kaanga ntsha lambotshutshɛ olemo wɔmi, Yehova angonkotshɛ́. Ko nyimaka mɔmɛlɛ kɛmi.” Apakisola ante: “Ewandji w’elemo efula mfɛnyɛka ambɔ djɛ mba olemo wɔ mfalanga, onto angolambola ekete kenkfumɔ, ete ngo nkfumbo kɛnde la akambo wa nyuma. Ndekɔ la osasa wɔ mbomba djokanelo djɛmi isa Yehova la isa nkfumbo kɛmi. Ɔnɔnyi ɔmɔ m’ɔkɔngɔ, Yehova ankotshɛka djɛ mba olemo wɔ wɔlɔ wokotshɛki djɛ ndjala la wɛdjimo ole la winá efula wɔ nangha akambo wa nyuma. Winá wohetshɛso Yehova lá edjena kɛ ntondo, tokoka ndjala l’ekakasano wɛ mfalanga, koko Yehova angotokotshɛ́.” Ee, ntsha tombilela alako la alaka wa Yehova oloko, tongokindjɛ nkɛnda má djawo la angotosakola efula.

WINÁ WƆSƆNASO WOME KANA WADJI

10. Ekete kɛkɔnge kengokokomɛ djɛ nkɛnda má nyɛna winá wɔsɔnɛ wome?

¹⁰ Bala dekɔ opapɛyɛ wɔ Yehova, la alekɔ wɔlɔ nkombola ntshukama. Ntsha nkaana akombola ntshukama, akoka ndenda lonto lɔ wɔnanyɔ, ɛnamelo la lukumu lɔnde, ntsha alekɔ la mfalanga, la edjito wɛ nkfumbo, la wopo wɔkɔpande ndosasangɛ.b Akambo wasɔ walekɔ djonyi. Koko, ntsha ambolenda ngo akambo wasɔ, nde angɔkɛnda má nyɛna.

11. Wopo wɔkɔnge w’okokaso nkɛnda má djawo winá wɔsɔnaso wadji kana wome? (1 Kɔrɛtɔ 7:39)

¹¹ Wole osasa w’ongoka Yehova winá wɔ wananyɔ l’ankaana okilikawɔ alako wande winá wɔsɔnawɔ wadji kana wome! Ndjɔmbɔmba, wangɔsake la ntshina dako djɛ ndekanyɛ ‘ɛnɔnyi w’ɔlɛngɛ’ lá ntondo kɛ mbembolana. (1 Kɔ. 7:36) Iwɔ ladjɛ ntshukana ngo l’anto walekɔ́ la wekeka wa Yehova ɛnande ante wangoyala wame kana wadji wa wɔlɔ. (Woo. 31:10-13, 26-28; Ɛfɛ. 5:33; 1 Ti. 5:8) Ntsha onto wopalekɔ́ Okristo akɔpa ntshukana nyawɔ, iwɔ ladjɛ nɛmɛyɛ dako djɛ bala djɛ ‘Ntshukana ngo le Nkfumi,’ dekɔ lá 1 Kɔrɛtɔ 7:39. (Wala.) Wakindjɛ nkɛnda lá djawo, l’eshikikelo ente Yehova angapɛyɛ lokembo loyɛwɔ la djonyi.—Yee. 55:22.

12. Olakanyelo wɔkɔnge wowɛ má ndjɔmbɔmba kɛ Rosa?

¹² Tokolenda kɛnɛ kekomelisá Rosa, yat’ekalo yɛ lá Colombie. Olemo wɔnde wokomɛki mbala efula djɛ nsawola nya mpame kɛmɔtshi kepalekɔ Owakɛ wɔ Yehova, ketateyisá ndowila litoyi. Rosa atateyɛka ndɔkapa. Atepela ante: “Ɛnamaki ete ngo alekɔ onto wɔ wɔlɔ. Akotshɛ́ki anto la ayalaki la yopo yɛ lowiko yɛ wɔlɔ. Lakɔpaki wopo wɔ ndananghelaka akambo. Ayalaki la akambo wa makombolaka le womɛmi, ɛpɛdji ngo atayalaki Owakɛ.” Akfɛ ante: “Ayalaka wolo efula ndoshimela ente mpakɔpɛ ladjikɛnde ndɔkɔpaki. Winá ɛmɔtshi, layalaki l’olengedji la lakɔpaki ntshukama, koko ntawaki wome woyalaki Owakɛ.” Koko, Rosa atila yimba lá kɛnɛ kɛ ndɛnaka. Akanelaka wopo wɔ nkano djɛnde okokawɔ ndjala l’eposelo lá djokanelo djɛnde nya Yehova. Djɛko ndeke, opaka djokanelo djɛnde nya mpame kɛkɔ, ko akindjɛka ndapɛyɛ l’olemo wɔ Yehova. M’ɔkɔngɔ wɔ winá emangha, wowetaka lá nkalasa k’Ansakodji y’Onkfumi, ko akamba winá wɔsɔ ete ngo yat’ekalo itshikitanyi. Rosa atepela ante: “Yehova alodjɛka oloko wɔmi kfu la osasa.” Kaanga yopalekɔ wɔdju nkɛnda má djawo la akambo l’oloko, kɛsɔ kɛlɔmba ndjila welo winá enkfumɔ.

WINÁ WOWASO ƐLƆNDJƐLƆ KƐ OLONGHANYELO

13. Kɛkɔnge kekoka ntotshinda djɛ nkɛnda má nyɛna winá wowaso ɛlɔndjɛlɔ kɛ olonghanyelo?

¹³ Winá la winá tongowake ɛlɔndjɛlɔ kɛ teokrasi kɛlɔndjɛ ɔtɛmwɛlɔ wɔso me tokokolo, elami wɛ djingadjinga, má filiyalɛ, kana me Iloyi yɛ lɔndjɛ. Iya onanghaso mo, ntsha winá ɛmɔtshi topoke donga djɛ ɛlɔndjɛlɔ kɔtɔpɛyɛwɔ kɔɔ? Tokoka ndenda ngo akambo wa nyɛtshi wakoka ntoposeyɛ ɛlɔndjɛlɔ kɛkɔ. Tokoka mpika wiso ngo lá evunga wɛ wananyɔ watɔpɛyɛ ɛlɔndjɛlɔ.

14. Kɛkɔnge kengotokotshɛ́ djɛ nkɛnda má djawo winá w’owaso ɛlɔndjɛlɔ kɛ olonghanyelo? (Hebero 13:17)

¹⁴ Winá wɔkɛndaso má djawo, tongilelake Yehova oloko ente nde ndeke lɔlɔndjɛ olonghanyelo wɔnde, la ente ewa akambo waso. Eposelo weyalaka nde, tongoyalake entshupa djɛ nɛmɛyɛ la yimba yɛ wɔlɔ. (Wala Hebero 13:17.) Tewa ente ntshunamo djɛso mfudjɛka osanga w’otshumano. (Ɛfɛ. 4:2, 3) Tewa ente kaanga wananyɔ walɔndjɛ oyɛwɔ anto wa ntshamba djɛ djɔ, Yehova nsakolaka ntshunamo djɛso. (1 Sa. 15:22) Winá wɔ ikeke yongokoka, angosembola akambo ankfumɔ.—Mika. 7:7.

15-16. Kɛkɔnge kekotshisá wɔnanyɔ ɔmɔtshi djɛ nkɛnda má djawo kaanga ndotokaka ɛlɔndjɛlɔ kiyawa kɔɔ? (Lenda ntshango.)

¹⁵ Tokolenda ndjɔmbɔmba kɛnyɛ wapɔ woyɛ má nkɛnda má djawo. Kaanga anto efula lá Pérou otepelawɔ espagnol, ewandji wɛ nkfumbo efula ntepelaka ngo etepela wɛ mbandja. Otepela ɔmɔtshi nde Quechua. Ɛnɔnyi efula wananyɔ l’ankaana itepela Quechua wahonaki anto watepela otepela wɔsɔ lá djena djɛ yayalaka. Koko, djɛ nɛmɛyɛ ɛlɛmbɛ wɛ guvɛrnɛma, otshikitano wonanghemaka lá wopo wɔ mpona anto. (Ɔrɔ. 13:1) Eposelo weyalisá nde anto amɔtshi walawopolaki ntsha olemo wɔso womboshimbama. Koko, winá wɔ wananyɔ yalɛmɛyɛ ɛlɔndjɛlɔ kɛ olonghanyelo, Yehova asakolaka welo wɛwɔ djɛ ndjisola anto efula watepela Quechua.

¹⁶ Kevin, ikokolo y’otshumano wɔ Quechua, ayalaki l’anteyi k’anto wasɔ. Apakisola ante: “Ntepelaka ente, ‘Wopo wɔkɔnge w’okokaso ndjisola anto watepela Quechua’?” Kevin ndananghe mo? Atepela ante: “Mvungɔka Woongo 3:5. Mbopɔka Mɔsɛ. Yehova ashimelaka Mɔsɛ djɛ mposɛ wana w’Isariyɛlɛ má Edjipito má ndahetshɛ má Ndjale kɛ Nkola nkola, ko ɛnamaka ete ngo wapangokfutumɔ m’ase Edjipito walakilikaki. Koko, nde alɛmɛyɛka, ko Yehova asakolaka ntshunamo djɛnde lá lɛdji lɔ nkamɔ.” (Epo. 14:1, 2, 9-11, 21, 22) Kevin ayalaka entshupa djɛ mpoposanyɛ lá topo efula. Eposelo wɛkɔnge weposisá? Atepela ante: “Nkamɔka djɛ nyɛna wopo wɔ Yehova ndatosakola. Ntondo ntondo, tatshɔki otale efula, winá ɛmɔtshi sɛnaka ngo onto ɔmɔ kana ape watepela Quechua. Winá wɔsɔ otshɔso ngo tá djena dekɔ́ anto efula watepela Quechua. Lɔla nde, tombowa anto efula wa nsawola, mbembola, la ndjeka lawɔ Bible. Anto efula wingela lá nsanghanyɛ yɛso.” Ɛwo, winá wɔkɛndaso má djawo, tongowake winá enkfumɔ esako me Yehova.

17. Sombeka nge lá djamba djɛnɛ?

¹⁷ Tɔmɛna wopo wɔ nkindjɛ nkɛnda má djawo lá akambo asato wa djonyi. Koko iso ladjɛ nkindjɛ nkɛnda má djawo lá akambo ankfumɔ wa lowiko, ete ngo ɔsɔnwɛlɔ w’etombo kana asɛkɛlɔ, ɔsɔnwɛlɔ wɔ nkalasa kana okfumbelo wɔ wana. Ayale nkano djɛkɔnge dj’ɔsaso, totakilikake ngo kɛnɛ kɛnaso toko, koko tile yimba lá djokanelo djɛso la Yehova, lá alako la alaka wande wa ntowakela. Ntsha tombonangha nghɔsɔ, tongoyala l’akoka wa ‘nkɛnda lá djiina djɛ Yehova Ndjambe kɛso etshinda etshinda.’—Mik. 4:5.