DJAMBA DJƐ WEKELO 26
YEEMBO 123 Tɔlɔndake ɛlɔndjɛlɔ kɛ teokrasi la nkɔmano nkfumɔ
Tawole l’okitshakitshɛ onkfumɔ kɛnɛ kɛ sopewe
‘Nsipisoyɛ Kanga-Nkfulu-Inkfumɔ alekɔ nkambo djɛ sopakoke ndjewa.’—DJƆ. 37:23.
IKANYI YƐ DJAMBA
Tokfulumeyɛ akambo w’isasimoyɛ wakoka ntokomelá má ndjawola la okitshakitshɛ onkfumɔ kɛnɛ kɛ sopewe, topike wiso lá kɛnɛ kewaso, la tilele Yehova oloko.
1. Yehova ndatɔpɛyɛ akoka wakɔnge, ko lamo?
YEHOVA atotongaka la akoka wa ntɔnɔla, wa ndjewa, wa ndjala la looka lɔ wɔlɔ ole la balo. Ladjikɛnge ndatotonge nghɔsɔ? Nde nkɔpaka iso ‘ndjisola djewo djɛ Ndjambe’ la ndokambela má nkamba la ntɔnɔ djɛso.—Woo. 2:1-5; Ɔrɔ. 12:1.
2. a) Olɛso la elelo wɛkɔnge? (Djɔ. 37:23, 24) (Lenda ntshango.) b) Wopo wɔkɔnge wowaso wapɔ má ndjewa elelo wɛso l’okitshakitshɛ onkfumɔ?
2 Kaanga Yehova ndatɔpɛyɛ akoka wa ndjeka, tolekɔ la nkete mɔtshi djɛ sopakoke ndjewa. (Wala Djɔbɔ 37:23, 24.) Tokolenda ndjɔmbɔmba kɛ Djɔbɔ. Yehova owopolaka weepó efula wɛnyisá ente apewe akambo efula. Nkambo djɛsɔ djokotshɛ́ka djɛ ndjala la okitshakitshɛ la ntshembolaka ikanyi yɛnde. (Djɔ. 42:3-6) Ole iso tongowa wapɔ má nsuyɛ l’okitshakitshɛ ente topewe nkambo nkfumɔ. Okitshakitshɛ wɔ nghɔsɔ wongototshinda djɛ ndjilela Yehova oloko ente angotoshimela kɛnɛ koyɛso nsɔsɔlɔ la djonyi djɛ ndjewa dj’iso ndɔsa akano wa balo.—Woo. 2:6.
Tokoka mba wapɔ má nsuyɛ ente topewe akambo amɔtshi, ete ngo Djɔbɔ (Lenda itenyi 2)
3. Ɛnaso lá djamba djɛnɛ lɔ nge?
3 Lá djamba djɛnɛ, tongotepela akambo amɔtshi wa sopewe la ekakasano ɛmɔtshi wopomanaso. Tɔnghɛna lonkina ladjikɛnge oyɛwɔ wɔlɔ iso nsamba ndjewa akambo amɔtshi. Ndjewa akambo wasɔ angokembɛ eshikikelo kɛso k’ente Yehova, ‘onto wolekɔ́ djɔ lá djewo,’ atoshimela kɛnɛ koyɛso nsɔsɔlɔ la djonyi djɛ ndjewa.—Djɔ. 37:16.
TOPEWE WINÁ W’EKOMO YONGOYƐ
4. Lá nkilika Mateo 24:36, nkambo djɛ nsɔsɔlɔ djɛkɔnge djɛ sopewe?
4 Wala Mateo 24:36. Topewe winá w’ekomo kɛ nkfumbo djɛ akambo djɛnɛ yongoyɛ. Kaanga winá wɔ Yeso ndayalaka lá looko, atewaki ‘lofu kana winá.’a M’ɔkɔngɔ aloshimelaka apɔstɔlɔ ante Yehova, Ndjambe kɛ winá, amboshikikɛ winá wongonanghema akambo amɔtshi ‘lá wolo wɔnde’ kana lá lowandji lɔnde. (Ele. 1:6, 7) Yehova amboshikikɛ winá wongoyɛ ekomo kɛ nkfumbo djɛ akambo djɛnɛ, koko iso topalekɔ la akoka wa ndjewa winá wɔkɔ kɔɔ.
5. Mande topewe winá w’ekomo yongoyɛ, eposelo wɛkɔnge wekoka ndjala?
5 Lá ndenda kɛnɛ kɛ Yeso ndatepela, topewe winá emangha wɛ songokonga djɛ ekomo ndjɛ. Eposelo wengoyala nde, tokoka nsamba bale ntshitshi kana ndɛmba, pekapeka ntsha tombokongá lofu lɔ Yehova ilá efula. Kana akoka ndjala wolo leso djɛ nkfulumeyɛ lɔsɔkɔ l’ase nkfumbo kana l’anto ankina. (2 Pɛ. 3:3, 4) Tokoka mfɛnyɛ ente ntsha tewa lofu kɔɔ lɔ ekomo yongoyɛ, tongoyala la bale ntshitshi la tongoyala l’akoka wa nkfulumeyɛ lɔsɔkɔ ipa l’okakasano.
6. Lamo oyɛwɔ wɔlɔ leso nsamba ndjewa winá wongoyɛ ekomo?
6 Lá nsɔsɔlɔ má nsamba ndjewa lofu l’ekomo yongoyɛ, Yehova atɔpɛyɛka mbamba kɛ nyɛnyɛ ente tookambela má ngandji k’owokaso la towilela oloko. Topakambela Yehova má ndjewa lofu kɔɔ lá yimba, ngo ngete djawo djɛso le nde dekɔ la lofu lɔ yongoheta lohoye. Koko l’edjena kɛ mpika wiso ntondo ntondo lá winá wɔ ‘lofu lɔ Yehova’ yongoyɛ, topike wiso nde lá kɛnɛ kɛ lofu lɔkɔ yongonangha. Má nangha nghɔsɔ tongokindjɛ malema Ndjambe kɛso, la nangha kenkfumɔ kokokaso nangha djɛ ndosasangɛ.—2 Pɛ. 3:11, 12.
7. Ewaso nkambo djɛkɔnge?
7 Angoyala wɔlɔ iso mpika wiso lá kɛnɛ kewaso—Ndjɔmbɔmba mfu y’ekomo iwangaka lá 1914. Yehova atɔpɛyɛ prɔfɛsi yɛ Bible yɛnyɛ ape ngo ɔnɔnyi toko, koko ole ikɔndɔlá ikakambo inkfumɔ ntateyɛ má ɔnɔnyi wɔsɔ. Eposelo welekɔ́ nde, tolekɔ l’eshikikelo ente ‘lofu l’ekekete lɔ Yehova lombokoma entshupa.’ (Sef. 1:14) Tewa lonkina olemo wɔ Yehova ɔkɔpande iso nangha, ntepela ente nshimela anto efula ‘losango lɔ wɔlɔ l’Onkfumi.’ (Mat. 24:14) Losango lɔsɔ lopoposanyema l’ewila ndekana 240 la lá etepela ndekana 1 000. Topalekɔ la djonyi djɛ ndjewa ‘lofu la winá’ djɛ nkamba l’osasalo olemo wowikɛ mbiko wɔsɔ.
TOPEWE WOPO WƆ YEHOVA NDONGONANGHA AKAMBO
8. ‘Olemo wɔ Ndjambe kɛ nsɔsɔlɔ’ otomawɔ ikanyi tampe? (Losanghanyɛ 11:5)
8 Topewaka winá onkfumɔ ‘olemo wɔ Ndjambe kɛ nsɔsɔlɔ.’ (Wala Losanghanyɛ 11:5.) Itepela yɛsɔ ntomaka ikanyi tá ekete kɛ Yehova onanghande ante kenangheme kana kotshikande ante kenanghame djɛ nkotshɛ ɛkɔpa kɛnde. Topewe la eshikikelo kenkfumɔ ladjikɛnge Yehova otshikande djɛ akambo amɔtshi nanghema kana wopo wɔ ndongonangha akambo lá wapɔ wɔso. (Yee. 37:5) Topakoke ndjewa kawo nkambo djɛsɔ ete ngo sopakoke ndjewa wopo wɔsɔnghama weka wɛ wɔna la ntapa djɛ nyɛnghɛnde, kaanga ase siansɛ watasipisoyɛ wɔlɔ wɔlɔ nkambo djɛsɔ.
9. Ladjikɛnde topewe wopo wɔ Yehova ndongonangha akambo lá wapɔ wɔso, okokaso mpomana l’ekakasano wɛkɔnge?
9 Nsamba ndjewa wopo wɔ Yehova ndongonangha akambo lá wapɔ wɔso nkoka ntokomɛ dj’iso nkakanyɛ. Tokoka nkakanyɛ dj’iso ndasambɛ nkete mɔtshi djɛ mfudjɛ olemo wɔso, ete ngo ndjila lowiko lɔso onghanghunya kana nsɛkɔ tá idjena ilekɔ́ la djonyi djɛ ansakodji y’Onkfumi. Kana tokoka ndawopola ntsha tawolama me Ndjambe winá wɔ sotakotshɛ ekoma wɛso wɛ teokrasi, winá wɔ sopawa eposelo wɛ wɔlɔ l’olemo wɔso w’ipoposanyɛ, kana winá wopomanaso la enkeka lá nonghanyi yɛ teokrasi.
10. Nsamba ndjewa wopo wɔ Yehova ndongonangha akambo lá wapɔ wɔso, otokotshɛwɔ djɛ nkona wekeka wakɔnge?
10 Nsamba ndjewa wopo wɔ Yehova ndongonangha akambo lá wapɔ wɔso, ntokotshɛ́ka dj’iso ndjala la wekeka wa djonyi ete ngo okitshakitshɛ la ndjewa elelo. Tongosuyɛke ente tokanyi tɔ Yehova la amboka yɛnde ileka yɛso. (Iza. 55:8, 9) Tongekake lonkina djɛ ndjilela Yehova oloko lá akambo ankfumɔ má ndáwɛkɛ le nde dj’iso ndonga. Winá wowaso eposelo wɛ wɔlɔ lá olemo w’ipoposanyɛ la lá nonghanyi yɛ teokrasi, tongolumɛke Yehova. (Yee. 127:1; 1 Kɔ. 3:7) Ntsha akambo wapananghemisa lá wopo wɔ sakongaka, tovungɔ ente Yehova ɛna akambo ankfumɔ. (Iza. 26:12) Tonanghe opiko wɔso, la tokindjɛ ndjilela Yehova oloko ente angonangha opiko wɔnde. Toyale l’eshikikelo ente angɔtɔpɛyɛ ɛlɔndjɛlɔ koyɛso la djonyi, kaanga ntsha apalekɔ lá yopo yɛ nkamɔ ete ngo ndananghaka l’etsho wɛ ntondo.—Ele. 16:6-10.
11. Ekete kɛkɔnge kewaso kekoka ntokotshɛ́?
11 Tewa winá onkfumɔ ente Yehova alekɔ ngandji, sii la balo. Tewa ente angɔsake la ntshina efula kɛnɛ konanghaso la konanghelaso winaso andjawodji. La tewa ente Yehova mfutaka winá enkfumɔ anto walekɔ́ la nkɔmano le nde.—Heb. 11:6.
TOPEWE KƐNƐ KENGONANGHEMA LOMI
12. Lá nkilika Djakɔbɔ 4:13, 14, isopewe nkambo djɛkɔnge?
12 Wala Djakɔbɔ 4:13, 14. Nkambo mɔtshi dekɔ nsɔsɔlɔ nde topewe wopo wɔ lowiko lɔso yongoyala lomi. Lá nkfumbo dj’akambo djɛnɛ, ‘winá la akambo w’isasimoyɛ ntokomelaka isankfumɔ.’ (Los. 9:11) Eposelo welekɔ́ nde topewe ntsha tokoka nkotshɛ nonghanyi yɛso kana ntsha tokoka ndjala la lowiko djɛ nshiyɛ nonghanyi yɛkɔ.
13. Akambo wangotokomela wa sopewe okokawɔ ndjala l’eposelo wɛkɔnge leso?
13 Akoka ndjala wolo nkfulumeyɛ ladjikɛnde topewe kɔɔ nkambo ngotokomela. Ngete mo? Tokoka ndjoka kɛnɛ kengotokomela wɔma, ko kɛsɔ nkoka ntosambɛ osasa. Ambalaka la akambo w’isasimoyɛ nkoka ntɔpɛyɛ yɛnyi la ntotshimbɛ yimba. La winá wopakotshama akambo wokongaso, tokoka ndjoka yɛnyi la ntɛka.—Woo. 13:12.
14. Osasa wɔso wɔ nsɔsɔlɔ oyɛwɔ mampe? (Lenda asango.)
14 Winá w’okfulumeyɛso ekakasano, toyale l’akoka wa nyɛna ente ayale nkambo djɛkɔnge ngotokomela, tokambela Papa kɛso kɛ l’olongo má ngandji koko ape má lokaki. Ɛkɔndɔ wɛ Bible wɛtɛnyɛ ente topakoke nkongela ente Yehova angotowomba má ekakasano la ente apalonghanyɛka ntondo akambo wangotokomela lá lowiko. Nde ndjewaka ante osasa wɔso wopaye má ndjewa kɛnɛ kengotokomela l’etsho weyaye. Koko oyɛwɔ nde má mpona ɛlɔndjɛlɔ kɛnde la má ndɔlɛmɛyɛ. (Jɛr. 10:23) Má mpona okotshɔ wɔnde winá wɔsaso akano, alekɔ ngo ngete otepelaso nde ente: ‘Ntsha Yehova akɔpa, tongoyala la lowiko la tongonangha nkambo djɛnɛ kana nkambo djɛnɛ.’—Dja. 4:15.
Mpona ɛlɔndjɛlɔ kɛ Yehova la ndɔlɛmɛyɛ ntowombaka (Lenda itenyi 14-15)b
15. Nkambo djɛkɔnge djewaso dendana l’etsho weyaye?
15 Winá wɔ sopewe kɛnɛ kengotokomela lofu lonkfumɔ lɔ bango, tewa ente Yehova ambotolaka lowiko l’etshinda—l’olongo kana lá looko. Tewa ente nde apadjimbaki kawo la lako ekete kengoshimba djɛ nkotshɛ alaka wande ankfumɔ. (Tito 1:2) Ngo nde toko ndeke lokoka ‘ntepela akambo wangolonanghema, la ngo má banga banga akambo watananghema.’ Nkambo djɛsɔ dekɔ nsɔsɔlɔ lá akambo wananghemaki l’etsho wemboheta, la ngoyala nsɔsɔlɔ lá akambo wangonanghema lá etsho weyaye. (Iza. 46:10) Tewa la eshikikelo kenkfumɔ ente lako nkambo ngoshimba Yehova djɛ nde ntɔkɔpa. (Ɔrɔ. 8:35-39) Nde angɔtɔpɛyɛ balo, lokembo la nkfulu koyɛso la djonyi djɛ nkfulumeyɛ ayale ekakasano wengotokomela. Toyale l’eshikikelo ente Yehova angotokotshɛ́ la angotosakola.—Jɛr. 17:7, 8.
TOPASIPISOYƐ WƆLƆ WƆLƆ WOPO WOTEWA YEHOVA
16. Ete ngo Yeembo 139:1-6 ɛnyɛwɔ, Yehova oyɛnde la djewo djɛkɔnge djɛ sopakoke nsipisoyɛ?
16 Wala Yeembo 139:1-6. Ontongi wɔso ewa wopo wɔ satongama, la ewa ekete kenkfumɔ kekfumba demba la yimba yɛso. Nde ntilaka yimba winá onkfumɔ. Nde ndjewaka kɛnɛ kotepelaso la kɔkɔpaso ntepela, kɛnɛ konanghaso la ladjikɛnge onanghaso. Ete ngo Nkfumi Davidɛ ndatepela, Yehova alekɔ winá enkfumɔ laso la ntokotshɛ́ka. Ɔsɔ ngo oyɛwɔ nkambo djɛ nkamɔ má ndjewa ente Nkfumi Lapemela l’andja w’otondo, Ontongi wɔ nkfulu inkfumɔ w’olongo la looko, ntilaka yimba efula nghɔsɔ! Davidɛ atepelaka ante: ‘Djewo djɛ nghɔsɔ linko mpakoke nsipisoyɛ. Mboleka efula le lemi djɛ nsipisoyɛ.’—Yee. 139:6, nɔtɛ.
17. Lamo okokawɔ ndjala okakasano ndjawola ente Yehova ntewaka wɔlɔ wɔlɔ?
17 Winá ɛmɔtshi, m’ɔtɛ wɔ okfumbelo wɔ sawa lá nkfumbo kɛso, nkfumbo djɛso, la djawo djɛso djɛ ntondo, akoka ndjala wolo leso djɛ nyɛna Yehova ente alekɔ Papa kɛso kɛ ngandji ketilaka yimba. Kana tokoka nyɛna ente evunga wɛ sananghe ntondo welekɔ nyɛtshi efula ko Yehova apotilaki yimba kawo la ente alekɔ otale efula laso. Kaanga Davidɛ okaka nghɔsɔ winá ɔmɔtshi. (Yee. 38:18, 21) Kaanga onto wohona djɛ ntshikitanyɛ l’oloko ɔmɔ lowiko lɔnde la mbika lá nkilika tɔkfɔ tɔ sii tɔ Yehova, nkoka ndawopola: ‘Ntsha nsɔsɔlɔ Ndjambe ndjewaka lemi, ladjikɛnge ɔndɔmbande djɛ ntshika yopo yɛ lowiko yɛnami ente ilekɔ wɔlɔ?’
18. Wapɔ wɔkɔnge wowaso má ndjewa ente Yehova ntoleka ntewa wɔlɔ wɔlɔ? (Lenda ole ntshango.)
18 Tokoka ndjeka djɛ ndjawola ente Yehova ntoleka ntewa wɔlɔ wɔlɔ la ente akoka nyɛna akambo walekɔ́ wɔlɔ leso wasopakoke nyɛna. Koko kaanga ɛnande wɛdju wɛso, la ewande ladjikɛnge okaso la onanghaso akambo amɔtshi, nde ntɔkɔpaka. (Ɔrɔ. 7:15) Winá wosipisoyɛso ente Yehova nyɛnaka winá onkfumɔ wopo w’onto w’okokaso ndjala, tongowa lokembo loyɛso la djonyi djɛ ndokambela la nkɔmano nkfumɔ la tongowa osasa.
Yehova ntokotshɛ́ka djɛ nkfulumeyɛ akambo wa sopewe watokomela lá lowiko lá nkfumbo djɛ akambo djɛnɛ má wɛkamo wɔso má ntɔnɔla deko djɛ osasa ntokonga l’andja wa bango (Lenda itenyi 18-19)c
19. Nkambo djɛkɔnge djewaso l’eshikikelo kenkfumɔ lá nkambo djɛ Yehova?
19 Tewa ente Yehova ntɔkɔpaka. Topahame kaanga ndambo daambi nkambo djɛsɔ. (1 Dj. 4:8) Tewa ente ɛlɛmbɛ wɛnde wɛ sii wɛnyɛ ngandji kotokande, la nde nkombolaka wɔlɔ wɔso winá onkfumɔ. Tewa ente Yehova nkɔpaka iso mba lowiko l’etshinda. Afutaka oshinga wɔ mbendo djɛ nkambo djɛsɔ nanghema. Opapɛyɛ w’oshinga wɔ mbendo wotoshikikɛ ente tokoka nkambela Yehova la nkɔmano kaanga oyɛso anto wa ntshamba djɛ djɔ. (Ɔrɔ. 7:24, 25) La tewa ente ‘Ndjambe ndeka eloko wɛso ekekete la ndjewaka akambo ankfumɔ.’ (1 Dj. 3:19, 20) Yehova ɛna akambo waso ankfumɔ la alekɔ l’eshikikelo ante tokoka ndonga má nangha ɛkɔpa kɛnde.
20. Ekete kɛkɔnge kengotokotshɛ́ dj’ipa ntshimba yimba lá lɛdji l’indeko?
20 Yehova atatisa kaanga nkambo mɔ djoyɛso la djonyi djɛ ndjewa. Winá wawolaso la okitshakitshɛ onkfumɔ nkambo djɛsɔ, tolawomba dj’ipa ntshimba yimba lá lɛdji l’indeko la tokoka mpika wiso lá kɛnɛ kelekɔ́ nsɔsɔlɔ djonyi. Má nangha nghɔsɔ tɛnyɛ ente tilela Yehova, ‘Onto wolekɔ́ djɔ lá djewo,’ oloko lá akambo ankfumɔ. (Djɔ. 36:4) Kaanga sopewe akambo amɔtshi winá wɔsɔ, tewa ente tongokindjɛ ndjeka etshinda etshinda akambo wa bango walendana la Ndjambe kɛso k’Ekekete.—Los. 3:11.
YEEMBO 104 Opapɛyɛ wɔ Ndjambe wɔ nyuma k’ekina
a Yeso ndeke longoyala ɛsɔngɔ lá mbandji kengonanemá la andja wa Satana, djɛko ndeke tokoka ntepela ente ewa winá wɔsɔ lofu lɔ Armagɛdɔ yongoyɛ la winá wɔ ‘ndongolonga antonyi wande.’—Ndj. 6:2, 19:11-16.
b NSAKISO KƐ ASANGO: Papa nya wɔnande wilá nkete lá mpata k’olotshi ko nkfumbo kɛwɔ kelekɔ entshupa djɛ ndota winá wongoyɛ mbalaka kɛ isasimoyɛ.
c NSAKISO KƐ NTSHANGO: Wɔnanyɔ ɔmɔtshi wopomana l’ekakasano alenda tá ntondo tá osasa wokonga l’andja wa bango.