Winá wɔ ndakome ekokolo, Nkfumi Josiya awangaka ndɔngɔsɔla tɛmpɛlɔ. Lá winá wɔ yakambaka elemo wɛsɔ, wisolaka ‘onkanda w’Ɛlɛmbɛ wɛ Yehova ndapɛyɛ má lotshimbo lɔ Mɔsɛ.’ Winá wɔ nkfumi ndoke kɛnɛ kɛ yafune l’eteyi, nde ananghaka etshikitano mbala kɛkɔ kɛmɔ djɛ nɛmɛyɛ akambo wambofunamá l’eteyi. (2 Ɛk. 34:14, 19-21) Ɔngɔkɔpake mbala Bible mbala la mbala? Ntsha omboshiyɛka nsɛsa, yotahete ngete mo? Ongofunake avɛrse wakoka nkokotshɛ́? Winá wɔ Josiya ndawa ɛnɔnyi 39, nde ananghaka ovunga wɔɔtɔlisa tii tá nyɔyi. Nde ayawɛkɛka le nde nyɔmɛlɛ l’edjena kɛ mpona ɛlɔndjɛlɔ kɛ Yehova. (2 Ɛk. 35:20-25) Tokoka mba olakanyelo ɔmɔtshi má nkambo djɛsɔ. Ayale ɛnɔnyi wɛkɔnge welekɔ́ laso, kana ilá kɛ ngetenge kɛ sombeka Bible, iso ladjɛ nkindjɛ mpona Yehova. Kɛsɔ nsakisolaka ndɔmba ɛlɔndjɛlɔ kɛnde mbala la mbala, ndjekaka Otepela wɔnde edjinge nkamba l’alako w’Akristo wambotshunda lá nyuma. Má nanghaka nghɔsɔ topangoleka nangha evunga wɛ nkekete edjinge tongoleka ndjala l’osasa.—Dja. 1:25. w23.09 12 ite. 15-16

Bible ntepelaka djɛ amato efula wakɔpaki Yehova la w’okambelaki. Iwɔ wayalaki ‘anto wanangha akambo la wɛdjimo, la walekɔ́ la nkɔmano l’akambo ankfumɔ.’ (1 Ti. 3:11) Lá djiko djɛ lasɔ, ankaana nkoka ntana ndjɔmbɔmba y’Akristo amɔtshi w’amato wambotshunda lá nyuma w’okokawɔ ndjokola l’otshumano wɔwɔ. Ankaana y’eseka, nyo ndjewaka amato amɔtshi w’Akristo wambotshunda lá nyuma wapɛyɛ ndjɔmbɔmba yɛ wɔlɔ y’okokanyo ndjokola? Nyopike wiso lá wekeka wawɔ wa wɔlɔ, makɔ nyeke wopo w’okokanyo nyɛnyɛ wekeka wakɔ. Okitshakitshɛ alekɔ djekeka djɛ djonyi efula djɛ nkoma Okristo w’ombotshunda. Ntsha omoto alekɔ l’okitshakitshɛ, angoyala la djokanelo djɛ wɔlɔ la Yehova edjinge l’anto ankina. Ndjɔmbɔmba, omoto wɔkɔpa Yehova nsɔnaka djɛ nsuka l’okitshakitshɛ onkfumɔ ikfɔ yɛ lowandji yɛ Papa kɛnde kel’olongo ndile. (1 Kɔ. 11:3) Ikfɔ yɛsɔ ingokambemake pekapeka l’otshumano la lá nkfumbo. w23.12 18-19 ite. 3-5

Yehova nkongelaka djɛ wome nkɔpa wadjɛnde la ndoseyɛ ehomba wɛnde wɛ demba, wɛ yimba la wɛ nyuma. Mfudjɛ nkoka djɛ ekanedji kɛ yimba, ndɔsa amato l’odjito, ndjala onto w’okokawɔ ndawɛkɛ te nde, angokokotshɛ djɛ ndjala wome wɔ wɔlɔ. M’ɔkɔngɔ wɔ wɛ ntshuka wadji, okoka nkoma papa. Elakanyelo wɛkɔnge w’okokɛ mba me Yehova djɛ wɛ ndjala papa kɛ wɔlɔ? (Ɛfɛ. 6:4) Yehova ashimelaka wɔnande Yeso Kristo papoo ante nde ndɔkɔpaka la ndowawolaka. (Mat. 3:17) Ntsha ombokoma papa, nangha la wolo djɛ nshimela wana wako mbala la mbala ente wɛ ndakɔpaka. Edjɛwɔ l’osasa onkfumɔ winá w’onanghawɔ nkambo djɛ wɔlɔ. Papa yokola ndjɔmbɔmba kɛ Yehova nkotshɛ́ka wana wawɔ djɛ nkoma Akristo w’ampame l’amato wambotshunda. Okoka ndálɔngɔsɔla má winá wɔsɔ djɛ odjito wɔsɔ, má mbakela la ngandji kenkfumɔ anto ankina welá nkfumbo la wal’otshumano wɔko la má ndjeka djɛ ndaawedjɛ la ndaashimela ente wɛ ndakɔpaka.—Dj. 15:9. w23.12 28-29 ite. 17-18