Lofu l’anɛyi, Ngɔndɔ kɛ djomi 30
Ayale lá lɛdji lɔkɔnge lɔ sombofula, nyontshɔ tokindjɛ ntshɔ tá ntondo lá lɛdji lɔ wɔlɔ lá nkilika lokolo lɔkɔ lɔmɔ.—Flp. 3:16.
Yehova apangɔkɔsa ete ngo etshumbe l’ɔtɛ wɔ ngopakotshisa okoma wopalekɔ́ l’akoka wako. (2 Kɔ. 8:12) Waka olakanyelo má ekakasano wepomana la wɛ. Tovungɛke ekoma wɛ ngomboshiyɛka nkotshɛ. Bible ntepelaka ante ‘Ndjambe apalekɔ kanga ntshamba djɛ sii djɛ vungɛ olemo wɔnyo.’ (Heb. 6:10) Djɛko ndeke tovungɛke kaanga ndambo daambi ekoma wɛ ngomboshiyɛka nkotshɛ. Ekoma wɛ ngomboshiyɛka nkotshɛ wɛsɔ, nkoka ndjala djokanelo djɛ wɔlɔ nya Yehova, nshimela anto ankina akambo walendana lande, kana ndongola batisimo. Ete ngo ngananghe efulelo la ngakotshɛ ekoma welá nyuma l’etsho wɛ ntondo, okoka nkotshɛ edjinge ekoma wɛ bango wɛ ngomboyawilela winá wɔsɔ. Má okotshɔ wɔ Yehova, wɛ nkoka nkotshɛ okoma wɔko. Nanghaka la wolo djɛ nyɛna wopo wɔ Yehova ɔkɔtshɔkɔlande, ko kɛsɔ kengokokotshɛ djɛ wɛ ndjala l’osasa winá wɔ ngotakindjɛ ndjila welo djɛ nkotshɛ okoma wɔko welá nyuma. (2 Kɔ. 4:7) Ntsha opapekwisa, ongowa ɛtshɔkɔ efula.—Nga. 6:9. w23.05 31 ite. 16-18
Lofu l’atano, Ngɔndɔ kɛ djomi 31
Papa nyɔmɛlɛ nyɔkɔpaka, ladjikɛnde nyo nyɔnkɔpaka la nyawolaka ente lemi ndjɛka ete ngo ntomɔ kɛ Ndjambe.—Dj. 16:27.
Yehova nkɔpaka nyɛnyɛ enkambi wɛnde ante nde nsasangaka lawɔ la ndakɔpaka. Afunelo watepela mbala ipe yɛ ndashimela Yeso ante nde alekɔ Wɔnande wɔ ngandji, wawolande. (Mat. 3:17; 17:5) Ɔkɔpa Yehova nkoshikikɛ ante nde nkɔkɔpaka? Yehova apatepela laso m’olongo, koko nde ntepelaka laso má Otepela wɔnde, Bible. Tokoka ‘ndjoka’ djoyi djɛ Yehova ntoshimela ante nde ndɔkɔpaka winá w’owalaso etepela wɛ Yeso welá Evanjiliyo. Yeso okolaka lonto lɔ Papa kɛnde lá lɛdji lɔ djɔ. Djɛko ndeke winá w’owalaso ente Yeso ashimelaki ambeki wande wa ntshamba djɛ djɔ koko wa nkɔmano ante nde ndaakɔpaka, tokoka nyɛna ente Yehova ndeke lotoshimela etepela wɛsɔ. (Dj. 15:9, 15) Ntsha tombopomana l’ekakasano, kɛsɔ kɛpɛnyɛ ente topawolama me Ndjambe. Koko wɛtɔpɛyɛ mbamba kɛ nyɛnyɛ ngandji k’efula k’okaso Yehova la wɛkamo wɔso te nde.—Dja. 1:12. w24.03 28 ite. 10-11
Lofu lɔ mpɔsɔ, Ngɔndɔ kɛ djomi l’ɔmɔ 1
Onanghaka djɛ lomo mposa má ɛlɔmɔ wɛ dɛngɛ la wɛ wana.—Mat. 21:16.
Ntsha oyalɛ nde ombotshi, kotshɛ́ wana wako dj’iwɔ ndɔngɔsɔla kɔmantɛrɛ yɛlama l’ɛnɔnyi wɛwɔ. Mbala efula, tongekake akambo wa nkekete, ndjɔmbɔmba, ekakasano wɛ bala, kana welendaná la nanghedji, koko apasambaka itenyi imɔ kana tope tɔ wana okokawɔ nkadjimola. La lonkina, kotshɛ́ wana wako dj’iwɔ nsipisoyɛ lamo yopangasɔnaka winá enkfumɔ wemɛwɔ ɛwɔ dj’iwɔ ntepela. Ndapakisola nghɔsɔ nkoka ndakotshɛ́ dj’ipa iwɔ nyomala winá wɔsɔnawɔ anto ankina l’edjena kɛwɔ. (1 Ti. 6:18) Isankfumɔ nkoka ndɔngɔsɔla kɔmantɛrɛ yɛ wɔlɔ yɛ pɛyɛ Yehova lomo la yekembɛ winaso Akristo. (Woo. 25:11) Winá wɔkɔpaso ntepela kambo mɔtshi ntokomelisá lá lowiko, iso ladjɛ mbadjɛ dj’ipa ndeka ntepela efula lá nkambo djɛso isɔmɛlɛ. (Woo. 27:2; 2 Kɔ. 10:18) L’edjena k’iso nangha nghɔsɔ, iso ladjɛ nsepa ikanyi y’anto te Yehova, Otepela wɔnde la te enkambi wɛnde enkfumɔ.—Ndj. 4:11. w23.04 24-25 ite. 17-18