Ntsha oyalɛ nde ombotshi, kotshɛ́ wana wako dj’iwɔ ndɔngɔsɔla kɔmantɛrɛ yɛlama l’ɛnɔnyi wɛwɔ. Mbala efula, tongekake akambo wa nkekete, ndjɔmbɔmba, ekakasano wɛ bala, kana welendaná la nanghedji, koko apasambaka itenyi imɔ kana tope tɔ wana okokawɔ nkadjimola. La lonkina, kotshɛ́ wana wako dj’iwɔ nsipisoyɛ lamo yopangasɔnaka winá enkfumɔ wemɛwɔ ɛwɔ dj’iwɔ ntepela. Ndapakisola nghɔsɔ nkoka ndakotshɛ́ dj’ipa iwɔ nyomala winá wɔsɔnawɔ anto ankina l’edjena kɛwɔ. (1 Ti. 6:18) Isankfumɔ nkoka ndɔngɔsɔla kɔmantɛrɛ yɛ wɔlɔ yɛ pɛyɛ Yehova lomo la yekembɛ winaso Akristo. (Woo. 25:11) Winá wɔkɔpaso ntepela kambo mɔtshi ntokomelisá lá lowiko, iso ladjɛ mbadjɛ dj’ipa ndeka ntepela efula lá nkambo djɛso isɔmɛlɛ. (Woo. 27:2; 2 Kɔ. 10:18) L’edjena k’iso nangha nghɔsɔ, iso ladjɛ nsepa ikanyi y’anto te Yehova, Otepela wɔnde la te enkambi wɛnde enkfumɔ.—Ndj. 4:11. w23.04 24-25 ite. 17-18

Ngandji kelekɔ djonyi djɛ iso nkindjɛ mbadjɛ la ndjala l’ikanyi yɛ wɔlɔ. (Mat. 22:37-39) Ngandji k’okaso Ndjambe ntokotshɛ́ka djɛ nkindjɛ mpoposanyɛ ayale ekakasano wɛkɔnge wekoka ndjɛ má nkambo djɛsɔ. (2 Ti. 1:7, 8) Ladjikɛnde iso ndjokaka edjinge anto wapakambela Yehova ngandji, iso nkindjɛka mpoposanyɛ, ayale kaanga nyɛnyɛ owakɛ má tɛlɛfɔnɛ kana m’enkanda. Topatshutshɛ nkongi ente lofu lɔmɔtshi anto welá etsho wɛso wangotshikitana edjinge wangotateyɛ nangha kɛnɛ kelekɔ́ wɔlɔ. (Ezk. 18:27, 28) Iso nkɔpaka lonkina wananyɔ l’ankaana yɛso. Iso nyɛnyɛka ngandji kɛ nghɔsɔ má ‘nkembɛna la nsukana l’anteyi kɛso.’ (1 Te. 5:11) Ngo ngete angala okambakawɔ mpɛka la mpɛka lá mbandji, iso nkembɛnaka l’anteyi kɛso. Topakoke lotshinda nkiyanyɛ wananyɔ l’ankaana yɛso lonkonda kana nkawoyɛ nyɛtshi tá nyɛtshi. (1 Te. 5:13, 15) Iso nyɛnyɛka ngandji kɛso lonkina má nɛmɛyɛ wananyɔ walɔndjɛ otshumano.—1 Te. 5:12. w23.06 10 ite. 6; 11 ite. 10-11

Yopo imotshi y’okokaso nkembe djawo djɛso nde má ntɔnɔlaka l’oshinga wɔ mbendo. Oshinga wɔ mbendo alekɔ ekete ketoshikikɛ ente alaka wa Ndjambe wangoyala nsɔsɔlɔ. Winá w’ɔtɔnɔlaso lá elonga kɛ oshinga wɔ mbendo ndafutama edjinge kɛnɛ kɛ Yehova ndoyapekala djɛ nangha nkambo djɛsɔ, iso nkembɛka djawo djɛso ente daka djɛ Ndjambe djɛ lowiko l’ipa l’ekomo l’andja wa wɔlɔ djengokotshama nsɔsɔlɔ. Lamo okokaso ntepela nghɔsɔ? Kɛkɔnge kɛlɔmbamisá djɛ mfuta oshinga wɔ mbendo? Yehova atomaka Wɔnande wɔ ntondo wɔ ngandji efula, ntepela ente ilongo yɛnde yɛ ma ma, m’olongo djɛ nde ndowotshɔ lanɛ lá looko ete ngo onto wɔ djɔ. Winá wɔ ndayalaka lanɛ lá looko, Yeso akfulumeyɛka wepo w’ehemba enkfumɔ. Masɔ nde ɛnaka ndjolo edjinge avɔka nyɔyi kɛ yɛnyi efula. Ɔsɔ ngo oshinga wɔ Yehova ndafute! Ndjambe kɛso kɛ ngandji atasamba ndjawola kaanga ndambo daambi djɛ Wɔnande nyɛna ndjolo nghɔsɔ edjinge mvɔ ngo dj’iso ndjala la lowiko ngo l’ila k’etsho ɛmɔtshi. (Dj. 3:16; 1 Pɛ. 1:18, 19) Ladjikɛnde Yehova awolaka Wɔnande wɔ ntshina wɔsɔ mvɔ lá nkambo djɛso, nde angokotshɛ daka djɛ ntɔpɛyɛ lowiko l’etshinda l’andja wa bango. w23.04 27 ite. 8-9