Yehova atoshikikɛ ante angokadjimola looko Paradiso

1. Losango lɔkɔnge ɔprɔfɛtɛ Izaya ndashimela winande w’ase Isariyɛlɛ?

ƆPRƆFƐTƐ Izaya atepelaka ante Yehova alekɔ ‘Ndjambe kɛ nsɔsɔlɔ.’ Itepela yekadjimwama ‘nsɔsɔlɔ’ nsakisolaka “amɛ.” (Iza. 65:​16, nɔtɛ.) “Amɛ” nsakisolaka “ayale ngo nghɔsɔ,” kana “oyɛwɔ ngo nghɔsɔ.” Winá wɔ Bible okambande l’itepela “amɛ” lá nkambo djɛ Yehova kana djɛ Yeso, kɛsɔ nshikikɛka ente nkambo djɛkɔ oyɛwɔ ngo nsɔsɔlɔ. Djɛkondeke, losango lɔ Izaya te winande ase Isariyɛlɛ loyalaka papoo: Kɛnɛ kɛ Yehova ewoyɛnde kɛlama ndjilela oloko winá enkfumɔ. Yehova ɛnyɛka nsɔsɔlɔ kɛ nkambo djɛsɔ má nkotshɛ alaka wande ankfumɔ.

2. Lamo okokaso ndjala la wɛkamo tá alaka wa Yehova walendana l’etsho w’eyaye, weepó wɛkɔnge wɛ songoshishima lá djamba djɛnɛ?

² Tokoka ndjala l’eshikikelo kɛ wopo wɔkɔ ɔmɔ tá alaka wa Yehova walendana l’etsho w’eyaye? Nsuke l’ɛnɔnyi 800 m’ɔkɔngɔ wɔ etsho wɛ Izaya, ɔpɔstɔlɔ Poolo apakisolaka ladjikɛnge oyɛso ladjɛ ndjala l’eshikikelo ente alaka wa Ndjambe wangokotshamake winá enkfumɔ. Poolo atepelaka ante: ‘Ndjambe apakoke lotshinda ntepela ongolo.’ (Heb. 6:18) Ngo ngete nkɔkɔ kɛmɔ kɛ loshi ndopakoke mposɛ washi wa wɔlɔ la washi wa wɛfuwɛfu, Yehova Ikɔkɔ yɛ nsɔsɔlɔ apakoke ntepela ongolo. Djɛkondeke, iso nkoka ndjala la wɛkamo lá kenkfumɔ kɛ Yehova otepelande, ndjila ole alaka wande ankfumɔ walendana l’etsho w’eyaye. Lá djamba djɛnɛ, tongoshishima weepó wɛnɛ: Kɛkɔnge kɛ Yehova ndombotolaka djɛ ntɔpɛyɛ l’etsho w’eyaye? Wopo wɔkɔnge Yehova otoshikikɛnde ante daka djɛnde ngokotshama?

KƐKƆNGE KƐ YEHOVA NDOMBOLAKÁ?

3. a) Daka djɛkɔnge enkambi wɛ Yehova olekakawɔ nkɔpa? (Ndjiso 21:3, 4) b) Wopo wɔkɔnge anto amɔtshi elolakawɔ winá w’ashimelaso daka djɛkɔ?

³ Enkambi wɛ Yehova wel’andja w’otondo nkɔpaka daka djɔkɔpaso nshishima djɛnɛ lombombe. (Wala Ndjiso 21:3, 4.) Yehova ambolaká etsho wɛ ‘nyɔyi ndopangoyala lonkina, kaanga delo, kaanga yɛndjɛ, kaanga ndjolo.’ Efula l’anteyi kɛso tongokambake l’avɛrse wasɔ djɛ nkembɛ anto w’opoposanyɛso lewɔ la ndawɛnyɛ wopo wɔ lowiko yongoyala lá paradiso. Wopo wɔkɔnge anto amɔtshi elolakawɔ winá w’ashimelaso daka djɛsɔ? Mbala imɔtshi iwɔ ntepelaka ambɔ: “Ɔsɔ alekɔ alaka wa wɔlɔ lombombe, koko topawola ente wangokotshama.”

4. a) Kɛkɔnge kɛ Yehova ndewaka lá nkambo djɛ daka djɛnde? b) Lá djiko djɛ mpɛyɛ daka, kɛkɔnge kɛ Yehova ndananghe lonkina?

⁴ Lá nsɔsɔlɔ, winá wɔ ndatshinde ɔpɔstɔlɔ Djɔanɛ má wolo wɔ nyuma k’ekina djɛ mfuna daka djelendana la lowiko lelá Paradiso, Yehova ewaki ante tongoshimela anto ankina daka djɛsɔ winá w’opoposanyɛso losango l’Onkfumi lɔɔko kɛnɛ. Yehova ewaki lonkina ante efula wangoyala l’okakasano djɛ ndjawola daka djɛ nkadjimola ‘nkete bango.’ (Iza. 42:9; 60:2; 2 Kɔ. 4:3, 4) Iya wopo wɔkɔnge w’okokaso nshikikɛ anto ankina, la ndáshikikɛ isɔmɛlɛ ente esako w’otanaso lá Ndjiso 21:3, 4 wengokotshama? Yehova atapɛyɛ ngo daka djekembɛ djɛsɔ toko, koko apɛyɛka lonkina ole donga dj’okokaso ndjawola daka djɛkɔ. Donga djɛkɔnge?

JEHOVA NTOSHIKIKƐKA ANTE ANGOKOTSHƐ DAKA DJƐNDE

5. Avɛrse wakɔnge watɔpɛyɛ donga djɛ ndawɛkɛ tá daka djɛ Ndjambe djɛ Paradiso, ko otepelawɔ nge?

⁵ Iso ntanaka donga djetotshinda djɛ ndjawola daka djɛ Yehova djɛ Paradiso lá avɛrse wawɔlamá wanɛ. Towala nghɔnɛ: “Kanga l’intasisá lá yɛkɔ yɛ lowandji atepalaka ante: ‘Lenda! Lemi lokadjimola nkete nkfumɔ bango.’ Atepelaka lonkina ante: ‘Funa, ladjikɛnde etepela wɛnɛ welekɔ nkɔmano la nsɔsɔlɔ.’ Ko nde anshimelaka ante: ‘Wembokotshama! Lemi ndeke Alfa la Omega, ewangelo la ekomo.’”—Ndj. 21:5, 6a.

6. Ladjikɛnge etepela w’eshikikelo welekɔ́ lá Ndjiso 21:​5, 6 okembɛwɔ wɛkamo wɔso tá daka djɛ Ndjambe?

⁶ Lamo avɛrse wa Bible wasɔ okembɛwɔ wɛkamo wɔso tá daka djɛ Ndjambe? Onkanda La Révélation : le grand dénouement wotepela lá nkambo djɛ avɛrse wasɔ ante: “Alekɔ etengo Yehova ambofuna onkanda lá nkambo djɛ anto wa nkɔmano ko ambila itshapa, onkanda wápɛyɛ́ lotshungɔ lɔ mba esako wɛnde l’etsho w’eyaye.”b Daka djɛ Ndjambe djɛsɔ djefunamaka lá Ndjiso 21:​3, 4. Ko masɔ, lá vɛrse 5 la 6, totana itshapa yɛ Yehova yetoshikikɛ́ nsɔsɔlɔ kɛ daka djɛnde. Nyontshɔ tokoshishima la nkɔmɛ nkfumɔ etepela wɛ Yehova ndakambe la wɛkɔ etengo itshapa yɛnde.

7. Ladjikɛnge etepela w’ewangelo wɛ Ndjambe ndakambe etengo itshapa oyɛwɔ djonyi efula, ko lamo nkambo djɛsɔ oyɛwɔ ntshina efula?

⁷ Etepela wɛ Ndjambe ndakambe la wɛkɔ etengo itshapa w’ewanga nghɔnɛ: ‘Kanga l’intasisá lá yɛkɔ yɛ lowandji atepelaka ante.’ (Ndj. 21:5a) Etepela wɛsɔ welekɔ djonyi efula ladjikɛnde wetanema l’anteyi kɛ etepela wɛ Yehova ndatepela mbala kɛmɔtshi, lá mbala isato yɛ ndatepela l’onkanda wɔ Ndjiso. Djɛkondeke, eshikikelo kɛsɔ kɛpɛyamaka ape me ondjelo ɔmɔtshi wɔ nkfulu, kana me Yeso kanga lonkfundisá, koko me Yehova nyɔmɛlɛ! Nkambo djɛsɔ djɛnyɛ ente iso nkoka ndjɛkɛ oloko wɔso onkfumɔ t’etepela enkina wɛwɔlama. Ladjikɛnge? Ladjikɛnde Yehova ‘apatepalaka ongolo.’ (Tito 1:2) Etepela wɛsɔ wetoshikikɛ ente etepela w’owalaso lá Ndjiso 21:5, 6 wengokotshama ipa l’ehamo.

‘LENDA! LEMI LOKADJIMOLA NKETE NKFUMƆ BANGO’

8. Kɛkɔnge kɛ Yehova ndatepela djɛ mpika nghɔmɔ ɛnsɔsɔ ente daka djɛnde ngokotshama nsɔsɔlɔ? (Izaya 46:10)

⁸ Win’ɔsɔ, nyontshɔ toshishimake itepela ‘Lenda!’ (Ndj. 21:5) Itepela yɛ Grɛkɛ ikadjimwama ‘lenda!’ ikambemaka efula l’onkanda wɔ Ndjiso. Onkanda ɔmɔtshi w’opakisolá Bible ntepelaka ante: Itepela yɛsɔ ikambemaka etengo “Yopo yɛ nsepa ikanyi y’antangi tá etepela wɛwɔlama.” Iya etepela wɛkɔnge wɛwɔlama itepela ‘lenda!’? Etepela wɛ Ndjambe wɛnɛ: ‘Lokadjimola nkete nkfumɔ bango.’ Lá nsɔsɔlɔ, Yehova ndatepelaka nde lá nkambo djɛ etshikitano wengonanghemá l’etsho w’eyaye, koko lende daka djɛsɔ ngokotshama ipa l’ehamo, djɛkondeke otepelande ngo ngete mboshiyɛká nkotshama.—Wala Izaya 46:10.

9. a) Etepela ‘nkadjimola nkete nkfumɔ bango’ olendanawɔ l’elemo wɛ Yehova wɛkɔnge? b) Kɛkɔnge kengokomela ‘olongo’ la ‘looko’ lolekɔ́ winá wɔsɔ?

⁹ Nyontshɔ tokoshishima etepala wɛwɔlamá w’otanaso lá Ndjiso 21:5: ‘Nkadjimola nkete nkfumɔ bango.’ Lá shapitrɛ kɛnɛ, etepela wɛsɔ welendana l’elemo epe wɛ Yehova: Mpɛnyɛ la nkawoyɛ bango. Ntondontondo, kɛkɔnge kɛ Yehova ɔkɔpande mpɛnyɛ? Lá Ndjiso 21:​1, towala ente: ‘Olongo wɔ ntondo la looko lɔ ntondo lodjonghanaka.’ ‘Olongo wɔ ntondo’ nsakisolaka enkfumi wɛ pɔlitikɛ wɛlɔndjamá me Satana l’ɛdjɛngɛ wɛnde. (Mat. 4:8, 9; 1 Dj. 5:19) Etengo okambawɔ la yɛkɔ lá Bible, itepela ‘looko’ nkoka nsakisola anto welá looko. (Ewa. 11:1; Yee. 96:1) Djɛkondeke, ‘looko lɔ ntondo’ nsakisolaka anto wa pɔlɔ wawika lá looko l’etsho wɛnɛ. Yehova apangokoma ngo lá mbɔngɛ kana ndɔngɔsɔla ‘olongo’ la ‘looko’ lɔ ntondo toko, koko nde angawimɛ lotshinda lotshinda. Nde angɔhɛnyɛ olongo la looko lolekɔ́ winá wɔsɔ la ‘olongo wɔ bango la looko lɔ bango,’ ntepela ente Onkfumi wɔ bango l’anto wa bango.

10. Kɛkɔnge kɛ Yehova ndongokadjimola bango?

¹⁰ Masɔ, lá Ndjiso 21:5, towala kɛnɛ kɛ Yehova otepelande lá nkambo djɛ nkete djɛ ndongokadjimola bango. Tokote ente Yehova atatepela ante ‘Lonangha nkete nkfumɔ bango.’ Koko ndatepela nde ante: ‘Lokadjimola nkete nkfumɔ bango.’ Djɛkondeke, Yehova angokadjimola anto la nkete nkfumɔ bango má ndakomɛ djɔ. Etengo Izaya ndewoyɛ, looko l’otondo longokadjimɔ jardɛ djɛ wɔlɔ efula, ngo ngete bedji dj’Ɛdɛna. Nde angotokadjimola bango má nsadjɛ onto l’onto wɔ l’anteyi kɛso lotshinda lotshinda. Ase nkɔmɔ, waambowodjɛ wiso, la nimi wangosala, ole kaanga edjo wangokfundɔ djɛ ndowika lonkina.—Iza. 25:8; 35:​1-7.

‘ETEPELA WƐNƐ WELEKƆ NKƆMANO LA NSƆSƆLƆ . . . WEMBOKOTSHAMA!’

11. Ɔlɛmbɛ la elonga kɛkɔnge kɛ Yehova ndapɛyɛ Djɔanɛ?

¹¹ Kɛkɔnge kɛ Ndjambe otoshimelande lonkina djɛ ntoshikikɛ? Yehova ashimelaka Djɔanɛ ante: ‘Funa, ladjikɛnde etepela wɛnɛ welekɔ nkɔmano la nsɔsɔlɔ.’ (Ndj. 21:5) Yehova atapɛyɛ ngo ɔlɛmbɛ wɔ ‘mfuna’ toko. Nde apɛyɛka lonkina elonga. Nde atepelaka ante: ‘Etepela wɛsɔ welekɔ nkɔmano la nsɔsɔlɔ,’ ntepela ente, etepela wɛ Ndjambe wɛdje djɛ ndjilela oloko. Tolekɔ la djedjɛ lá wopo wɔ Djɔanɛ ndalɛmɛyɛ ɔlɛmbɛ wɔ ‘mfuna.’ Eposelo welekɔ́ lá nkambo djɛsɔ nde, iso nkoka mbala daka djɛ Ndjambe djɛ Paradiso la ntɔnɔla lá esako wɛ wɔlɔ lombombe wetokonga.

12. Lamo Yehova ndayale l’elonga kɛ ntepela ante: ‘Wembokotshama!’

¹² Kɛkɔnge kɛ Ndjambe ndatepela masɔ? ‘Wembokotshama!’ (Ndj. 21:6) Lanɛ Yehova atepela etengo akambo ankfumɔ wa ndatepela lá nkambo djɛ daka djɛnde djɛ Paradiso wamboshiyɛ nkotshama. Nde nkoka nsɔsɔlɔ ntepela nghɔsɔ ladjikɛnde lako kaanga ekete kekoka ndoshimba djɛ nkotshɛ ikanyi yɛnde. Yehova atɔpɛyɛ eshikikelo kenkina kɛ nkfulu efula lá nkambo djelendana la daka djɛnde l’etenyi kenkina kɛ etepela wɛnde welekɔ́ etengo itshapa. Eshikikelo kɛkɔnge?

‘LEMI NDEKƆ ALFA LA OMEGA’

13. Lamo Yehova ndatepela ante: ‘Lemi ndekɔ Alfa la Omega’?

¹³ Etengo sotepelaki má djiko, Yehova atepelaka mbala isato lá ɛnɛlɔ kɛ Djɔanɛ. (Ndj. 1:8; 21:​5, 6; 22:13) Lá mbala isato yɛkɔ Yehova atepelaka etepela wɛkɔ ɛmɔ wɛnɛ: ‘Lemi ndekɔ Alfa la Omega.’ Dɛta alpha ndeke lowangaki lá alfabe wa Grɛkɛ, la dɛta omega ndeke lokomɛki alfabe wakɔ. Má nkamba la ‘Alfa la Omega,’ Yehova ɛnyɛka ante winá w’owangande la nkambo mɔtshi, nde nkomeyɛka nkambo djɛkɔ tii l’ekomo lá lɛdji lɔ wɔlɔ.

14. a) Kɔpɛyɛ ndjɔmbɔmba kɛmɔtshi kɛnyɛ winá wɔ Yehova ndatepela ante: ‘Alfa’ la winá wɔ ndongotepela lá lɛdji lɔmɔtshi ante: ‘Omega.’ b) Eshikikelo kɛkɔnge k’otanaso lá Ewangelo 2:​1-3?

¹⁴ M’ɔkɔngɔ wɔ Yehova ntonga Adama la Eva, Nde ɛnyɛka ikanyi yɛnde papoo lá nkambo djɛ anto la djɛ looko. Bible ntepelaka ante: ‘Ndjambe ásakolaka, edjinge Ndjambe áshimelaka ante: ‘Nyowote, nyowotanele, nyolodjɛ looko la nyowapemele.’’ (Ewa. 1:28) Lá mbamba kɛsɔ, ayalaka ngo ngete Yehova ambotepela ante: ‘Alfa.’ Nde ɛnyɛka ikanyi yɛnde papoo ante: Ikeke ingokoka yɛ tonkanola tɔ djɔ la tɔ dilɛmɛlɔ tɔ Adama la Eva yongolodjɛ looko la yongokadjimola paradiso. Winá wɔ ndongokotshɛ daka djɛnde l’etsho w’eyaye, angoyala ngo ngete Yehova ambotepela ante: ‘Omega.’ M’ɔkɔngɔ wɔ nde nshiyɛ ntonga ‘olongo la looko la nkete nkfumɔ djel’eteyi,’ Yehova atepelaka nkambo mɔtshi djɛnyɛ ente ikanyi yɛnde ingokotshama nsɔsɔlɔ. Etepela wɛkɔ w’etanema lá Ewangelo 2:​1-3. (Wala.) Yehova atepelaka ante lofu l’esambele lolekɔ lofu l’ekina lende. Nkambo djɛsɔ osakisolawɔ nge? Yehova apɛyɛka eshikikelo ante nde angokotshɛ ape l’ehamo ikanyi yɛnde lá nkambo dj’anto la djɛ looko. Ikanyi yɛkɔ ingokotshama lotshinda lotshinda l’ekomo kɛ lofu l’esambele.

15. Lamo yakoke nyɛnama etengo Satana ambilela Ndjambe onkeka dj’ipa nde nkotshɛ ikanyi yɛnde lá nkambo dj’anto?

¹⁵ M’ɔkɔngɔ wɔ Adama la Eva ntɔmbɔkɔ, iwɔ wakomaka ananghi yɛ mpekanto la wasambeyɛka tonkanola tɔwɔ mpekanto la nyɔyi. (Ɔrɔ. 5:12) Eposelo w’eyalisá lá nkambo djɛsɔ nde, ɛnamaka etengo Satana ambilela Ndjambe onkeka dj’ipa nde nkotshɛ ikanyi yɛnde yɛ ndodjɛ looko l’anto wa djɔ la wa dilɛmɛlɔ. Ɛnamaka etengo Satana amboshimba Yehova dj’ipa nde ntepela ante: ‘Omega.’ Satana akokaka nkanela ante Yehova apangokotshɛ ikanyi yɛnde lonkina. Nde akokaka nkanela ante Ndjambe angoyaka Adama la Eva ko angotonga anto ankina wa djɔ djɛ nkotshɛ ikanyi yɛnde lá nkambo dj’anto. Koko Ndjambe otananghande nghɔsɔ, ntshimi Satana atowanda ante alekɔ kanga ongolo. Lamo? Ladjikɛnde, etengo Ewangelo 1:28 otepelande, Yehova ashimelaka Adama la Eva ante tonkanola tɔwɔ ndeke longolodjɛ looko.

16. Lamo Satana ndakoke nkanela ante angomama Yehova ante apalekɔ l’akoka wa nkotshɛ ikanyi yɛnde?

¹⁶ Nkano nkina djɛkɔnge djɛ Satana ndakoke nkanela ante Ndjambe angɔsa? Mbala imɔtshi Satana akanelaka ante Yehova angɔpɛyɛ Adama la Eva lotshungɔ lɔ mposɛ inkanola yɛ ntshamba djɛ djɔ, yepangoyala l’akoka wa nkomɛ anto ankfumɔ djɔ. (Los. 7:20; Ɔrɔ. 3:23) Otayalawɔ nghɔsɔ ntshimi, ape l’ehamo, Djabolo atatepela ante Yehova apalongisa nkotshɛ daka djɛnde. Ladjikɛnge? Ladjikɛnde nkano djɛsɔ djetasamba nkotshɛ ikanyi yɛ Ndjambe, yɛ ndodjɛ Paradiso kelá looko la tonkana la tonkanola tɔ Adama la Eva tɔ djɔ la tɔ dilɛmɛlɔ.

17. Wopo wɔkɔnge Yehova ndakandola ɔtɔmbɔkwɛlɔ wɔ Satana nya anto wa ntondo, iya eposelo wɛkɔnge wengoyala l’ekomo? (Lenda edjinge ntshango.)

¹⁷ Yehova akandolaka ɔtɔmbɔkwɛlɔ wɔ Satana la anto wa ntondo lá lɛdji loyalisá ladjɛ nkamoyɛ Satana. (Yee. 92:5) L’edjena kɛ nyɛnyɛ ante alekɔ kanga ongolo, Yehova ɛnyɛka ante alekɔ Ndjambe kɛ nsɔsɔlɔ má mpɛyɛ Adama la Eva mbamba kɛ mbota wana. La koko, l’edjena kɛ nyɛnyɛ ante apalekɔ l’akoka wa nkotshɛ daka djɛnde, Yehova ɛnyɛka ante lako ekete kekoka ndoshimba djɛ nkotshɛ ikanyi yɛnde. Nde akindjɛka ntɔla ikanyi yɛnde tá ntondo má mposɛ ‘inkanola’ ingowikɛ tonkanola tɔ Adama la Eva tolekɔ́ la dilɛmɛlɔ. (Ewa. 3:15; 22:18) Satana ayalaka ladjɛ nkamɔ má ndjoka nonghanyi kɛ Yehova ndɔshi kɛ mfuta oshinga wɔ mbendo! Lamo? Mande nonghanyi kɛsɔ kepikamaka lá ngandji kepalekɔ́ la lokaki. (Mat. 20:28; Dj. 3:16) Satana apalekɔ la djekeka djɛsɔ ladjikɛnde nde alekɔ kanga lokaki. Iya eposelo wɛkɔnge wengoposá má nonghanyi k’oshinga wɔ mbendo? Tonkanola tɔ djɔ tɔ Adama la Eva tolekɔ́ la dilɛmɛlɔ wangowika lá paradiso kelá looko, ngo ngete ikanyi yɛ Yehova yayale má bango. Lá winá wɔ Yehova ndongokotshɛ nkambo djɛsɔ, angoyala etengo ambotepela ante: ‘Omega.’

WOPO W’OKOKASO NKEMBƐ WƐKAMO WƆSO TÁ DAKA DJƐ YEHOVA DJƐ PARADISO

18. Akambo asato wakɔnge Ndjambe ɔtɔpɛyɛnde eshikikelo? (Lenda edjinge ipapango ilekɔ́ l’ɔtɛ wɔ djoyi ante: “onga ntshato dj’oyɛso ladjɛ ndawɛkɛ tá alaka wa Yehova.”)

¹⁸ Lá nkilika kɛnɛ kɛ sombeka, eshikikelo kɛkɔnge k’okokaso mpoposanyɛ le anto w’ila ehamo ambɔ daka djɛ Ndjambe djɛ Paradiso mpangokotshama? Ntondontondo, Yehova nyɔmɛlɛ ndeke lolaka daka djɛkɔ. Onkanda wɔ Ndjiso w’otepela ante: ‘Kanga l’intasisá lá yɛkɔ yɛ lowandji atepelaka ante: ‘Lenda! Lemi lokadjimola nkete nkfumɔ bango.’’ Nde alekɔ la balo, nkfulu ole mposɛ kɛ nkotshɛ daka djɛnde. Dj’ape, ekotshamelo kɛ daka djɛ Yehova kelekɔ nkambo djɛ nsɔsɔlɔ efula, ko lá wiso wa Yehova alekɔ ngo ngete mboshiyɛká nkotshama. Djɛkondeke otepelande ante: ‘Etepela wɛnɛ welekɔ nkɔmano la nsɔsɔlɔ. . . . Wembokotshama!’ Dj’asato, winá wɔ Yehova owangande nkambo mɔtshi, nde nkomeyɛke nkambo djɛkɔ tii l’ekomo, lá lɛdji lɔ wɔlɔ efula, etengo etepela wɛnɛ oshikikɛwɔ: ‘Lemi ndekɔ Alfa la Omega.’ Yehova ɛnyɛka ante Satana alekɔ kanga ongolo edjinge apalekɔ la wolo wɔ ndoshimba djɛ nkotshɛ ikanyi yɛnde.

19. Winá wɔ anto ilawɔ ehamo lá daka djɛ Ndjambe djɛ Paradiso, okokɛ nangha mo?

¹⁹ Vungɔ ente, winá enkfumɔ w’oshimelɛ anto wapomana lawɛ l’olemo w’ipoposanyɛ etepela w’eshikikelo wɛ Ndjambe, okembɛ nde wɛkamo wɔko tá alaka wa Yehova. Djɛkondeke, mbala kenkina kɛ nghongowalela onto daka djekembɛ djɛ Paradiso k’eyaye etengo ɛnyɛwɔ lá Ndjiso 21:​4, ko nde ambotepela ante: “Alaka wasɔ walekɔ wɔlɔ lombombe, koko mpafɛnyɛ ente wangokotshama,” nghongonangha mo? Lamo ngopowalela la ndopakisola vɛrse 5 la 6? Ɛnyɛnde wopo wɔ Yehova ndapɛyɛ onkanda wɔ daka djɛnde, má ndjila itshapa l’eteyi, ntepela ente itshapa yɛnde nyɔmɛlɛ.—Iza. 65:16.