Elakanyelo w’okokaso mba m’enkanda epe wɛ Pɛtɛlɔ

1. Ndambo lá ntondo kɛ nyɔyi kɛnde, kɛkɔnge kɛ ɔpɔstɔlɔ Pɛtɛlɔ ndatshindama djɛ nangha má wolo wɔ nyuma k’ekina?

ƆPƆSTƆLƆ Pɛtɛlɔ ewaki ante lowiko lɔnde lokoma lako ilá. L’ilá k’ɛnɔnyi efula w’olemo wɔnde wɔ nkɔmano, nde aheetaka la Yeso, adjipolaka ntatshi djɛ looko djɛ bango l’olemo w’ipoposanyɛ, la akambaka etengo ose iloyi yɛ lɔndjɛ. Koko olemo wɔ Pɛtɛlɔ wotakoma ngo lasɔ. Lá ɔnɔnyi 62-64 D.D., Yehova akambaka lande djɛ mfuna enkanda epe, enkanda wɛ Bible w’etawɔ ambɔ Pɛtɛlɔ kɛ 1 la 2. Nde ayalaka la nkongi ante enkanda wɛsɔ wengokotshɛ́ Akristo m’ɔkɔngɔ wɔ nyɔyi kɛnde.—2 Pɛ. 1:12-15.

2. Ladjikɛnge enkanda wɛ Pɛtɛlɔ ndafune oyɛwɔ la djonyi efula?

² Pɛtɛlɔ afunaka enkanda wɛ ndatshindama má nyuma k’ekina wɛsɔ winá wɔ winande andjawodji ‘yɛnaka ndjolo l’ehemba wɛ wepo la wepo.’ (1 Pɛ. 1:6) Anto wapɔlɔ wahonaki djɛ ndjingeyɛ lá otshumano elakanyelo w’ongolo la nanghedji djɛ mbindo. (2 Pɛ. 2:1, 2, 14) Akristo wawikaki lá Jerusalɛmɛ wayalaka entshupa la nkoma ‘l’ekomo k’akambo ankfumɔ,’ ntepela ente l’etshitanelo kɛ ngando kɛsɔ la kɛ nkfumbo dj’akambo dj’ase Juda me angala w’ase Ɔrɔma. (1 Pɛ. 4:7) Ape l’ehamo, enkanda wɛ Pɛtɛlɔ wekotshɛ́ka Akristo djɛ nyɛna kɛnɛ kɛ yakoke nangha djɛ nkfulumeyɛ ehemba wɛsɔ la djɛ ndjala entshupa djɛ nkfulumeyɛ ehemba weyaye.b

3. Ladjikɛnge oyɛwɔ djonyi efula nshishima enkanda wɛ pɛtɛlɔ ndafune ma wolo wɔ nyuma k’ekina?

³ Kaanga Pɛtɛlɔ ndafunela enkanda wɛsɔ nde Akristo wa l’ɛtɛndɔ kɛ ntondo, Yehova ilaka enkanda wɛsɔ l’Otepela Wɔnde. Djɛkondeke tokoka mba wapɔ lɔɔko kɛnɛ m’enkanda wɛsɔ. (Ɔrɔ. 15:4) Ladjikɛnde towika l’andja wambolola la nanghedji djɛ mbindo, ole iso koko topomana l’ehemba wekoka ntila l’okakasano djɛ nkambela Yehova. Nkambo djeleka nde, lako ilá tokoma lá ndjolo k’ekekete keleka kaanga ekomo kɛ nkfumbo dj’akambo dj’ase Juda. Totana mvungo imɔtshi yɛ djonyi l’enkanda epe wɛ Pɛtɛlɔ. Mvungo yɛsɔ ingotokotshɛ djɛ nkindjɛ nkongela lofu lɔ Yehova, ndongela wɔma w’onto edjinge ndjala la ngandji k’efula l’anteyi kɛso. Yekoka nkotshɛ́ lonkina tokokolo djɛ nyɛna wopo w’okokawɔ nkotshɛ ehomba w’ɛnkɔkɔ lá yopo yɛ wɔlɔ.

KINDJƐ NKONGA

4. Etengo yɔmbɛnyɛ lá 2 Pɛtɛlɔ 3:3, 4, kɛkɔnge kekoka nsásokɛ djawo djɛso?

⁴ Tombodjingamá l’anto wapalekɔ la djawo lá prɔfɛsi yɛ Bible. Antonyi nkoka ntɔsɔka ladjikɛnde tombotepelá ilá efula ente ekomo kemboyala entshupa. Anto amɔtshi watɔnyɔlaká ntepelaka ambɔ ekomo kepayɛki lotshinda. (Wala 2 Pɛtɛlɔ 3:3, 4.) Ntsha iso ndjoka etepela wɛ nghɔsɔ le anto w’opoposanyɛso, kana me ose nkfumbo kɛso, djawo djɛso nkoka nsasoka. Pɛtɛlɔ apakisolaka kɛnɛ kekoka ntokotshɛ́.

5. Kɛkɔnge kekoka ntokotshɛ́ djɛ ndjala l’ikanyi yɛ wɔlɔ lá kɛnɛ kelendana l’ekomo k’andja wanɛ? (2 Pɛtɛlɔ 3:8, 9)

⁵ Akoka nyɛnama etengo Yehova alekɔ ɔkɔkɛ djɛ ndjakala ekomo k’andja wa nyɛtshi wanɛ. Etepela wɛ Pɛtɛlɔ nkoka ntokotshɛ́ djɛ nama ikanyi yɛ wɔlɔ la ntovungola ente ikanyi yɛ Yehova itshikitana otale la y’anto. (Wala 2 Pɛtɛlɔ 3:8, 9.) Le Yehova ɛnɔnyi kinunu welekɔ etengo lofu lɔmɔ. Yehova alekɔ la balentshitshi, apakɔpɛ kaanga onto ɔmɔ ntshitana. Koko, winá wɔ lofu lɔ ndashikikɛ yongokoka, nde angoyakala ekomo k’andja wanɛ. Ɔsɔngo mpeyi k’okotshɛso kɛ nkamba la winá wombotshikala djɛ mpɛyɛ owakɛ le anto welá ewila enkfumɔ.

6. Wopo wɔkɔnge w’okokaso ‘nkindjɛ nama’ lofu lɔ Yehova lá yimba? (2 Pɛtɛlɔ 3:11, 12)

⁶ Pɛtɛlɔ atokembɛka djɛ ‘namaka lá yimba’ yɛso lofu lɔ Yehova. (Wala 2 Pɛtɛlɔ 3:11, 12.) Lá wopo wɔkɔnge? Má ntɔnɔlaka mfu inkfumɔ, ntsha nkokaka, lá ɛtshɔkɔ wetokongela l’andja wa bango. Koyawɛna nghɔmɛlɛ ohomola impompopo yɛ wɔlɔ, ɔlɛ nkete djɛ wɔlɔ efula, olongola anto wako wa ngandji winá wɔ yongokfundɔ edjinge olakanyɛ anto wawikisá nkama y’ɛnɔnyi lá ntondo kɛ ekotshamelo kɛ prɔfɛsi yɛ Bible. Ntɔnɔla nghɔsɔ angokokotshɛ́ djɛ nkindjɛ nkonga edjinge djɛ ndashikikɛ ente ekomo kemboyala entshupa. Má ‘ndjewa akambo wasɔ lá ntondo,’ ntepela ente akambo walendana l’etsho wɛso weyaye, ‘topangodjimbama’ má elakanyelo w’engolo.—2 Pɛ. 3:17.

TOYALAKE LA WƆMA W’ONTO

7. Eposelo wɛkɔnge wekoka ndjala la wɔma w’onto leso?

⁷ Winá w’okindjɛso nama lofu lɔ Yehova lá yimba, iso ntshindamaka djɛ mpoposanyɛ losango lɔ wɔlɔ le anto ankina. Koko, lá mbamba imɔtshi tokoka nkakanda djɛ mpoposanyɛ. Lamo? Tokoka ndoyala la wɔma w’onto. Kɛsɔ ndeke lokomelisá Pɛtɛlɔ. L’otsho wɔ yalomboyɛka Yeso, Pɛtɛlɔ okaka wɔma djɛ ndawewanyɛ etengo ombeki wɔ Yeso edjinge owanghanaka mbala efula. (Mat. 26:69-75) Koko, ngo ɔpɔstɔlɔ wɔk’ɔmɔ wɔsɔ ayɛka ndotepela l’eshikikelo ante: ‘Nyotokake wɔma lá kɛnɛ kɛ anto okokawɔ ndjoka wɔma, edjinge nyotatshimbake yimba.’ (1 Pɛ. 3:14) Etepela wɛ Pɛtɛlɔ wɛsɔ ntoshikikɛka ente iso nkoka ndongela wɔma w’onto.

8. Kɛkɔnge kekoka ntokotshɛ́ djɛ ndongela wɔma w’onto? (1 Pɛtɛlɔ 3:15)

⁸ Kɛkɔnge kekoka ntokotshɛ́ djɛ ndongela wɔma w’onto? Pɛtɛlɔ atoshimela ante: ‘Nyawole lá eloko wɛnyo djɛ Kristo alekɔ Nkfumi.’ (Wala 1 Pɛtɛlɔ 3:15.) Kɛsɔ nsakisolaka ntɔnɔla lá mpipo edjinge lá nkfulu kelekɔ́ la Nkfumi la Owandji wɔso Kristo Yeso. Ntsha ongotshimbake yimba kana ongoyalake la wɔma winá w’owɛ mbamba kɛ mpoposanyɛ losango lɔ wɔlɔ le anto ankina, vungɔka Owandji wɔso. Ɛnande alɔndjɛ l’olongo ambodjingama la miliyɔ y’andjelo. Vungɔ ente nde alekɔ la ‘lowandji l’onkfumɔ . . . l’olongo edjinge lá looko’ la ente nde angoyala ‘esanga la wɛ tii lá winá w’ekomo kɛ nkfumbo dj’akambo djɛnɛ.’ (Mat. 28:18-20) Pɛtɛlɔ atokembɛka djɛ ndjalaka ‘winá enkfumɔ entshupa’ djɛ nseela djawo djɛso. Ɔngɔkɔpa mpoposanyɛ le onto ɔmɔtshi welá olemo, lá nkalasa kana lá ipoma mboka? Tɔnɔla lá winá w’okokɛ ntonangha nkambo djɛsɔ, masɔ lɔngɔsɔla kɛnɛ kɛ ngongototepela. Lɔmba djɛ ndjala l’oloko wolo, edjinge yala l’eshikikelo ente Yehova angokokotshɛ́ djɛ wɛ ndonga wɔma w’onto.—Ele. 4:29.

‘YALA LA NGANDJI K’EFULA’

9. Lá mbamba kɛmɔtshi, wopo wɔkɔnge Pɛtɛlɔ ndasambe nyɛnyɛ ngandji? (Lenda edjinge ntshango.)

⁹ Pɛtɛlɔ ekaka wopo wɔ nyɛnyɛ anto ankina ngandji. Nde ayalaka l’eteyi winá wɔ Yeso ndatepela ante: ‘Lambɔnyɔpɛyɛ ɔlɛmbɛ wɔ bango djɛ nyo ndjokanaka ngandji, nyokane ngandji l’anteyi kɛnyo; etengo manyoke ngandji.’ (Dj. 13:34) Kaanga yayale nghɔsɔ, m’ɔkɔngɔ Pɛtɛlɔ avundamaka la wɔma w’onto edjinge atonaka ndɛ nya wananyɔ l’ankaana y’ase Engidji. Ɔpɔstɔlɔ Poolo etaka kɛnɛ kɛ ndananghe kɛsɔ ante ‘lokeso,’ kana enanghedji kɛ dongi mpe. (Nga. 2:11-14) Pɛtɛlɔ awolaka ikako yɛ yɔpɛyɛ edjinge awaka olakanyelo m’eteyi. L’enkanda wɛnde wɛkɔ epe, nde apikaka nghɔmɔ ɛnsɔsɔ ante topakoke ndjoka wananyɔ l’ankaana yɛso ngandji toko koko lonkina iso ladjɛ ndawɛnyɛ ngandji kɛkɔ.

10. Kɛkɔnge kekoka ntokotshɛ́ djɛ ndjala la ‘ngandji k’onto la wɔna nyɛnghɛnde kepalekɔ́ kɛ dongi mpe?’ Pakisola. (1 Pɛtɛlɔ 1:22)

¹⁰ Pɛtɛlɔ atepelaka lonkina ante iso ladjɛ ndjala la ‘ngandji k’onto la wɔnanyɔ kepalekɔ́ kɛ dongi mpe’ te winaso andjawodji. (Wala 1 Pɛtɛlɔ 1:22.) Ngandji kɛ nghɔsɔ ndjɛka má ‘dilɛmɛlɔ l’akambo wa nsɔsɔlɔ.’ Nkambo mɔtshi djelekɔ́ l’anteyi k’akambo wa nsɔsɔlɔ wasɔ nde olakanyelo w’ente ‘Ndjambe apasɔnaka dongi.’ (Ele. 10:34, 35) Topakoke nɛmɛyɛ ɔlɛmbɛ wɔ Yeso wolendana la ngandji ntsha tɛnyɛ ngandji kɛso ngo le anto amɔtshi wel’otshumano toko. Lá nsɔsɔlɔ, tokoka ndeka ndjala imama l’anto amɔtshi ndeka wopo w’oyɛso l’anto ankina, ngo ngete Yeso ndananghe. (Dj. 13:23; 20:2) Koko Pɛtɛlɔ atovungolaka ante iso ladjɛ ndjala la ‘ngandji kɛ nsɔsɔlɔ k’onto la wɔna nyɛnghɛnde,’ ntepela ente wopo wɔ djokanelo djɛ wolo djeyalaka l’anteyi k’ase nkfumbo, te wananyɔ l’ankaana yɛso inkfumɔ.—1 Pɛ. 2:17.

11. Kɛkɔnge kɛkɔpa nsakisola ndjoka anto ankina ‘ngandji kɛ m’anse k’oloko’?

¹¹ Pɛtɛlɔ atokembɛka djɛ ‘ndjokana ngandji k’efula kɛm’anse oloko l’anteyi kɛso.’ Lá nkilika ikanyi ilekɔ́ lanɛ, ndjala la ngandji ‘k’efula’ nsakisolaka nkɔpa onto ɔmɔtshi kaanga ntsha alekɔ wolo ndɔwɛnyɛ ngandji. Ndjɔmbɔmba, otepelaso mo ntsha wɔnanyɔ ɔmɔtshi atomadjɛka kana atokiyanyɛka lá lɛdji lɔmɔtshi? Ikanyi yɛso yɛ ntondo nkoka ndjala yɛ nsɔmbɔla koko ape yɛ ndɔwɛnyɛ ngandji. Koko, Pɛtɛlɔ ekaka me Yeso ante nsɔmbɔla apasasangɛ Ndjambe. (Dj. 18:10, 11) Pɛtɛlɔ afunaka nghɔnɛ: ‘Nyotakawoyɛke nyɛtshi tá nyɛtshi kana ntoyi tá ntoyi. Koko nyaasakole.’ (1 Pɛ. 3:9) Awola djɛ ngandji k’efula nkotshinda djɛ nanghela kaanga anto wambokomadjɛ wɔlɔ la ndawɔsa l’odjito.

12. a) Nkambo nkina djɛkɔnge ngandji kɛ m’anse k’oloko ototshindande djɛ nangha? b) Kɛkɔnge k’okombolɛ ndjila weelo djɛ nangha, etengo ɛnyɛwɔ lá video djelekɔ́ l’ɔtɛ wɔ djoyi ante: Tokoke woshasha aso wa nɛmɔ wa kaamɛ?

¹² L’onkanda wɔnde wɔ ntondo, Pɛtɛlɔ akambaka l’itepela ‘ngandji k’efula.’ Ngandji kɛ nghɔsɔ kepadjimbisanyɛ ngo evunga wɛ daambi toko, koko ‘edjinge evunga wɛ nkekete.’ (1 Pɛ. 4:8) Mbala imɔtshi Pɛtɛlɔ avungɔka olakanyelo wolendana la imeyelo wɔ Yeso ndolakanyɛ ɛnɔnyi efula lá ntondo. Mbala imɔtshi Pɛtɛlɔ akanelaki ante nde ayalaki onto wɔ wɔlɔ efula winá wɔ ndopola ntsha akoka nyimeyɛ wɔnanyɔ wɔnde ‘mbala esambele.’ Koko Yeso olakanyɛnyɛka la atolakanyɛ edjinge iso djɛ nyimeyɛ winaso ‘mbala 77,’ ntepela ente ipa l’ekomo. (Mat. 18:​21, 22) Ntsha ongoyalake l’okakasano wɔ nkamba la dako djɛsɔ, mbɔ koko tɔlɛmbake! Enkambi wɛ Yehova enkfumɔ walekɔ anto wa tshamba djɛ djɔ edjinge wangoyalake l’okakasano wɔ nyimeyɛ lá winá ɛmɔtshi. Nkambo djeleka djonyi winá wɔsɔ lewɛ nde nangha kenkfumɔ k’okokɛ nangha djɛ nyimeyɛ wɔnanyɔ wɔko la ndjila vu l’anteyi kɛnyo.c

TOKOKOLO, NYOLAME OLOYI W’ƐNKƆKƆ

13. Okakasano wɔkɔnge wopomana la tokokolo djɛ nama wananyɔ la ankaana yɛwɔ?

¹³ Lá nsɔsɔlɔ Pɛtɛlɔ atavungɛ kaanga ndambo daambi kɛnɛ kɛ Yeso ndoshimela m’ɔkɔngɔ wɔ ekfundwelo kɛnde ante: ‘Ongolamake ɛnkɔkɔ wɛmi wɛ daambi.’ (Dj. 21:16) Ntsha oyɛ nde ikokolo, mbɔ koko ewa ente ɛlɛmbɛ wɛsɔ ndendanaka edjinge lawɛ. Koko akoka ndjala okakasano le ikokolo djɛ mba winá wɔ nkotshɛ odjito wɔ djonyi wɔsɔ. Tokokolo ladjɛ nkotshɛ ntondo ntondo edjito wel’ankfumbo yɛwɔ welá demba, welá yimba la welá nyuma. Iwɔ ndɔndjɛka lonkina olemo w’ipoposanyɛ edjinge ndɔngɔsɔlaka la mpɛyɛka wamba lá nsanghanyɛ y’otshumano, lá nsanghanyɛ yɛ nkekete la lá nsanghanyɛ yɛ rɛjɔ. Wamɔtshi walekɔ lonkina l’edjito lá Kɔmite kɛ djokanelo la tofulume kana wakotshɛ́ lá Departɛma djelonghanyɛ la djepika amvulu yɛ teokrasi l’ewila (LDC). Lá nsɔsɔlɔ, tokokolo walekɔ l’elemo efula!

14. Kɛkɔnge kekoka ntshinda tokokolo djɛ nama ɛnkɔkɔ? (1 Pɛtɛlɔ 5:1-4)

¹⁴ Pɛtɛlɔ akembɛka winande tokokolo ante: ‘Nyolamake ɛnkɔkɔ wɛ Ndjambe.’ (Wala 1 Pɛtɛlɔ 5:1-4.) Ntsha oyɛ nde ikokolo, iso ndjewaka ente wɛ nkɔpaka wananyɔ l’ankaana yɛko edjinge wɛ nkombolaka ndalama. Koko winá ɛmɔtshi, okoka ndawoka ente opalekɔ la winá kana ɔmbɔtɛka djɛ nkotshɛ odjito wɔsɔ. Ntsha oyɛwɔ nde nghɔsɔ, okokɛ nangha nge? Shimela Yehova ekiyano wɛko la wopo wɔkɔpɛ nkotshɛ́ wananyɔ wako. Pɛtɛlɔ afunaka ante: ‘Ntsha onto akotshɛ́ anto ankina, nde ananghe nkambo djɛsɔ etengo onto wokongela wolo wɔ Ndjambe ɔpɛyɛnde.’ (1 Pɛ. 4:11) Mbala imɔtshi wananyɔ l’ankaana yɛko wapomana l’ekakasano wɛ yopakoke mba nkando l’andja wanɛ. Koko vungɔ ente ‘owandji w’anami w’ɛnkɔkɔ,’ Yeso Kristo, nkoka ndakotshɛ́ ndeka ledji l’okokɛ nangha. Nde nkoka nangha nkambo djɛsɔ má lɔɔkɔ edjinge l’andja wa bango. Ndjambe ndɔmbaka tokokolo ngo dj’iwɔ nkɔpa la nama wananyɔ wawɔ la dj’iwɔ ndjala ‘ndjɔmbɔmba yɛ wɔlɔ le ɛnkɔkɔ.’

15. Wopo wɔkɔnge ikokolo imɔtshi ndálame ɛnkɔkɔ? (Lenda edjinge ntshango.)

¹⁵ William, ikokolo imɔtshi imbokamba ilá, ashipisoyɛka djonyi djɛ nama ɛnkɔkɔ. Winá w’opela wɔ COVID-19 yawange, nde nya winande tokokolo wayawilelaka okoma wɔ nsawolaka la onto l’onto wɔ l’iloyi yɛwɔ y’olemo w’ipoposanyɛ mbengo inkfumɔ. Nde apakisola lamo yananghe nghɔsɔ: “Wananyɔ efula wayalaki ngo yɔmɛlɛ lá amvulu edjinge tokanyi tɔwɔ takokaki ntshɔ mbala kɛmɔ ta nyɛtshi.” Winá wɔ winande ondjawodji ndapomanaka l’okakasano, William owekameyɛki la nkɔmɛ nkfumɔ djɛ nsipisoyɛ ehomba kana mposɛ yɛnde. Masɔ, nde ananghaki la wolo djɛ mba enkanda kana avideo má sitɛ kɛso, w’okokande nkamba la wakɔ djɛ nkotshɛ́ winande andjawodji. Nde atepelaka ante: “Winá wɔsɔ ndeke nama ɛnkɔkɔ yomboleka ndjala djonyi. Iso ndjilaka weelo efula djɛ nkotshɛ́ anto djɛ ndjeka akambo walendana la Yehova, iso ladjɛ ndjila weelo wɛkɔ ɛmɔ djɛ nama la nkotshɛ́ ɛnkɔkɔ wɛ Yɛhova djɛ ntshikala lá mboka kɛ nsɔsɔlɔ.”

NTSHIKELA YEHOVA MBAMBA KƐ NSHIYƐ OKFUMBELO WƆKO

16. Lá topo tɔkɔnge t’okokaso nkamba la elakanyelo wɛ sombowa m’enkanda wɛ Pɛtɛlɔ?

¹⁶ Tombotepela ngo djɛ elakanyelo emangha toko má enkanda epe wɛ Pɛtɛlɔ ndafune má wolo wɔ nyuma kɛ Ndjambe. Mbala imɔtshi ombisolaka nkambo mɔtshi dj’oyɛ ladjɛ ndɔngɔsɔla. Ndjɔmbɔmba, ɔmbɔkɔpa ndeka ntɔnɔla lá nkambo djɛ ɛtshɔkɔ wetokongela l’andja wa bango? Omboyawilela okoma wɔ mpoposanyɛ le onto ɔmɔtshi wɔ l’olemo, lá nkalasa kana lá djena nkina? Ombisolaka topo tɔmɔtshi t’okokɛ ndeka nyɛnyɛ wananyɔ la ankaana yɛko ngandji k’efula? Tokokolo nyɔmbɔsa nkano djɛ nama ɛnkɔkɔ wɛ Yehova l’ɛkɔpa kɛnyo edjinge la mposɛ k’efula? Ntsha wɛ ndashishima wɔlɔ wɔlɔ, okoka ndjisola wɛdju ɛmɔtshi, koko tɔlɛmbake. ‘Nkfumi alekɔ onto wɔlɔ,’ edjinge angokokotshɛ́ djɛ wɛ ndálɔngɔsɔla. (1 Pɛ. 2:3) Pɛtɛlɔ atoshikikɛ ante: ‘Ndjambe nyɔmɛlɛ . . . angoshiyɛ okfumbelo wɔnyo. Angonyokotshɛ́ djɛ nyo ntshikala ndii la angonyokembɛ, nde angonyoshikimadjɛ ndii.’—1 Pɛ. 5:10.

17. Ntsha iso ndjala l’entete edjinge nkfumbama me Yehova, lɔɔla lɔkɔnge songowa?

¹⁷ Má bango Pɛtɛlɔ ayawokaki ante apɛlama djɛnde nyemala lá ntondo kɛ Wɔna Ndjambe. (Luka 5:8) Koko m’okotshɔ la ngandji kɛ Yehova la Yeso, Pɛtɛlɔ akindjɛka ndjala ombeki wɔ Kristo. Djɛkondeke, Pɛtɛlɔ awolamaka djɛ ‘ndjingela lá Onkfumi wɔ lotshinda wɔ Nkfumi kɛso la Nseedji kɛso Yeso Kristo.’ (2 Pɛ. 1:11) Ɔsɔngo l’ofuto wɔlɔ! Ntsha wɛ ndjala l’entete kɛ ngete kɛ Pɛtɛlɔ la ndjawola nkfumbama me Yehova, mbɔ koko edjinge wɛ ongowa lofuto lɔ lowiko l’etshinda. Wɛ ‘ongokotshɛ okoma wɔ djawo djɛko ntepela ente ewiko kɛko.’—1 Pɛ. 1:9.