Elangala l’eseka, yopo yɛkɔnge yɛ lowiko y’okombolanyo ndjala la yɛkɔ?

1. Ekakasano wɛkɔnge wepomanisá la Jɛhɔyashɛ, Uziya edjinge Josiya?

KƆƆSA djɛ omboyala nkfumi k’enkambi wɛ Ndjambe winá w’oyɛ olongala kana ilɛngɛ! Wopo wɔkɔnge ngongokamba la nkfulu edjinge la lowandji lɔko? Bible ntoshimelaka nkambo dj’elangala efula wekomisá ankfumi lá Juda. Ndjɔmbɔmba, Jɛhɔyashɛ ayalaki l’ɛnɔnyi 7, Uziya l’ɛnɔnyi 16, edjinge Josiya l’ɛnɔnyi 8. Nkambo djɛsɔ nkokaka ndjala okakasano w’efula lewɔ! Kaanga yayale okakasano, yankfumɔ wawaka okotshɔ wɔ yayale la djonyi djɛ ndonga ekakasano wɛsɔ la djɛ ndjala la lowiko l’osasa.

2. Ladjikɛnge oyɛso ladjɛ ndjila yimba lá ndjɔmbɔmba kɛ Jɛhɔyashɛ, Uziya edjinge Josiya?

² Iso topalekɔ ankfumi y’ampame kana y’amato, koko tokoka mba elakanyelo wɛ djonyi me anto asato w’otepelawɔ lá Bible wasɔ. Iwɔ wɔsaka akano wa wɔlɔ, koko wɔsaka lonkina akano wa nyɛtshi. Má nshishima ndjɔmbɔmba yɛwɔ, tɔngɛna lamo oyɛwɔ djonyi nsɔna tolongo tɔ wɔlɔ, ndjala l’okitshakitshɛ edjinge nkindjɛ mpona Yehova.

SƆNA TOLONGO TƆ WƆLƆ

3. Wopo wɔkɔnge Nkfumi Jɛhɔyashɛ ndelola lá okfumbelo wɔ Nkfundji k’Ekekete Jɛhɔyada?

³ Okola Jɛhɔyashɛ má ndɔsaka akano wa wɔlɔ. Winá wɔ ndayalaka olangala, Nkfumi Jɛhɔyashɛ ɔsaka nkano djɛ balo efula. Etengo ndayalaka wɔna etshike, nde akilikaka ɛlɔndjɛlɔ kɛ Nkfundji k’Ekekete kɛ nkɔmano Jɛhɔyada. Nkfundji kɛsɔ alakanyɛki Jɛhɔyashɛ ngo ngete ndayalaká nde wɔnande. Má nkilika ndjɔmbɔmba kɛ Jɛhɔyada, Jɛhɔyashɛ ɔsaka nkano djɛ nkambela Yehova la djɛ nkotshɛ́ owila dj’iwɔ nkambela Yehova edjinge iwɔ. Jɛhɔyashɛ alonghanyɛka lonkina djɛ ndɔngɔsɔla tɛmpɛlɔ kɛ Yehova.—2 Ɛk. 24:​1, 2, 4, 13, 14.

4. Wopo wɔkɔnge w’okokaso mba wapɔ má ndɔsa ɛlɛmbɛ wɛ Yehova la ntshina? (Woongo 2:1, 10-12)

⁴ Ntsha wangokolakanyɛke djɛ nkɔpa Yehova la mbika lá yopo yokana l’ɛlɛmbɛ wɛnde, mbɔ koko ɔkɔpɛyɛwɔ nde opapɛyɛ wɔ ntshina efula. (Wala Woongo 2:1, 10-12.) Ambotshi nkoka mpɛyɛ okfumbelo lá topo efula. Tokolenda wopo wɔ papa kɛ nkaana k’etawɔ ambɔ Katya ndookotshɛ́ djɛ ndɔsa akano wa wɔlɔ. Mfu inkfumɔ, winá wɔ papa kɛnde ndɔɔtɔlaka tá nkalasa, nde asawolaki nyande vɛrse djɛ lofu la lofu. Nde atepela ante: “Asawo wasɔ wankotshɛki djɛ ndongela ekakasano wepomanaki la lemi lá lofu.” Iya ntsha ɛlɔndjɛlɔ kɛkɔpɛyɛ ambotshi wako má Bible kɛnama etengo kekopekala lotshungɔ lɔko? Kɛkɔnge kekoka nkokotshɛ́ djɛ ndjawola ɛlɔndjɛlɔ kɛwɔ? Nkaana kɛmɔtshi k’etawɔ Anastasia avungɔ ante ambotshi wande wɔsaki winá djɛ ndoopakisola ladjikɛnge iyowilelaká ɛlɛmbɛ ɛmɔtshi. Nde atepela ante: “Kɛsɔ kankotshɛ́ki djɛ nsipisoyɛ ente iwɔ watandjeelaki ɛlɛmbɛ djɛ mpekala lemi lotshungɔ lɔmi, koko djɛ nama lemi má ngandji k’ondjokawɔ.”

5. Wopo wɔkɔnge nanghendji djɛko okokawɔ nsasangɛ Yehova la ambotshi wako? (Woongo 22:6; 23:15, 24, 25)

⁵ Winá w’okambɛ l’alako wemá Afunelo, w’ɔkɔpɛyɛwɔ ongosasangɛ ambotshi wako. Nkambo deka djonyi nde, ongosasangɛ Ndjambe edjinge ongoyala la djokanelo djɛ wolo nyande. (Wala Woongo 22:6; 23:15, 24, 25.) Ape ɔsɔ alekɔ elonga kɛ wɔlɔ kɛ ndjokola ndjɔmbɔmba kɛ Jɛhɔyashɛ winá wɔ ndayalaka ilɛngɛ?

6. Alako wana Jɛhɔyashɛ ndawange ndjekameyɛ m’ɔkɔngɔ wɔ nyɔyi kɛ Jɛhɔyada, iya eposelo wɛkɔnge weyalisá? (2 Ɛkɔndɔ 24:17, 18)

⁶ Waka olakanyelo má akano wa nyɛtshi w’ɔsisá Jɛhɔyashɛ. M’ɔkɔngɔ wɔ nyɔyi kɛ Jɛhɔyada, Jɛhɔyashɛ asɔnaka ntombe yɛpɔlɔ. (Wala 2 Ɛkɔndɔ 24:17, 18.) Nde ɔsaka nkano djɛ ndjekameyɛ alako wa wana w’ankfumi y’ase Juda yetakɔpaki Yehova. Mbala imɔtshi ongawola ente Jɛhɔyashɛ ayalaka ladjɛ ndota ase ofutano wasɔ. (Woo. 1:10) L’edjena kɛ nangha nghɔsɔ, nde ekameyɛka ntombe yɛnde yɛ nyɛtshi yɛsɔ. Lá nsɔsɔlɔ, winá wɔ wɔna isomoto kɛnde Zekariya ndahone ndɔpɛyɛ dako, Jɛhɔyashɛ oyakaka. (2 Ɛk. 24:20, 21; Mat. 23:35) Ɔsɔngo nkambo djɛ nyɛtshi la dj’enkesa djɛ ndananghe! Jɛhɔyashɛ awangaka lowiko lɔnde wɔlɔ, koko nkambo djɛ yɛnyi nde ayɛka ndokoma apɔsta edjinge ondjaki. Ekomo ekomo, enkambi wɛnde woyakaka. (2 Ɛk. 24:22-25) Ɔsɔngo lowiko lɔnde otakokawɔ ntshikitana otakindjɛnde ndjekameyɛ Yehova l’anto wɔkɔpa! Olakanyelo wɔkɔnge w’okokɛ mba má ndjɔmbɔmba kɛsɔ?

7. Anto wakɔna w’oyɛ ladjɛ nsɔna etengo tolongo? (Lenda edjinge ntshango.)

⁷ Olakanyelo ɔmɔtshi w’okokaso mba má akano wa nyɛtshi w’ɔsisá Jɛhɔyashɛ nde, iso ladjɛ nsɔna ntombe yetotshinda tá akambo wa wɔlɔ ntepela ente ntombe yɛkɔpa Yehova la yɛkɔpa ndosasangɛ. Topakoke ndjala lotombe ngo l’anto walekɔ laso lɔsɔkɛ lɔmɔ toko. Tovungɔ ente, Jɛhɔyashɛ ayalaki ilɛngɛ efula lá ntondo k’ilongo yɛnde Jɛhɔyada. Koyawopola lá kɛnɛ kelendana l’ɔsɔnɛlɔ wɔ tolongo ente: ‘Iwɔ wangonkotshɛ́ke djɛ nkembɛ djawo djɛmi te Yehova? Wangonkembɛke djɛ nkilika ɛlɛmbɛ wɛ Ndjambe? Wangotepelake akambo walendana la Yehova edjinge akambo wande wa nsɔsɔlɔ wa djonyi? Wangɔlɛmɛyeke ɛlɛmbɛ wɛ Ndjambe? Wangonshimelake ngo kɛnɛ k’okombolami ndjoka ndo koko wangoyalake l’oloko wolo wɔ mpɛyɛ lemi dako ntsha lambovunga?’ (Woo. 27:5, 6, 17) Lá nsɔsɔlɔ, ntsha tolongo tɔko wapakɔpɛ Yehova, mbɔ koko lako djonyi nkɛnda lawɔ. Koko ntsha tolongo tɔko wangɔkɔpake Yehova, malemawɔ, wangokokotshɛka winá enkfumɔ!—Woo. 13:20.

8. Ntsha tongokambake la rɛzo sosio, lá nkambo djɛkɔnge dj’oyɛso ladjɛ ntɔnɔla?

⁸ Rɛzo sosio nkoka ndjala yopo yɛ wɔlɔ yɛ nsawola l’ase nkfumbo edjinge la tolongo. Koko, anto efula nkambaka l’epeko kɛ nsawola kɛsɔ djɛ nkamoyɛ anto ankina, má ndjila afoto la avideo wa nkete dj’osombawɔ kana dj’onanghawɔ. Ntsha ongokambake la rɛzo sosio, koyawopola ente: ‘Ikanyi yɛmi oyalakawɔ nde yɛ nkamoyɛ anto ankina? Okoma w’ilakami nkete l’Ɛntɛrnɛtɛ oyɛwɔnde djɛ nkembɛ anto ankina, ndokoko dj’iwɔ mpɛyɛ lemi lomo? Langawolake djɛ anto wakamba l’epeko kɛsɔ nkfumbola tokanyi tɔmi, etepela la nanghedji djɛmi lá yopo yɛ nyɛtshi?’ Wɔnanyɔ Nathan Knorr, kanga lokambaki etengo wɔnanyɔ w’ose Iloyi yɛ lɔndjɛ, apɛyɛka dako djɛnɛ: “Tohonake nsasangɛ anto. Ntsha wɛ nangha nghɔsɔ opangosasangɛ kaanga onto ɔmɔ. Sasangɛ Yehova ko ongosasangɛ anto ankfumɔ wɔkɔpa.”

DJONYI DJƐ NKINDJƐ NDJALA L’OKITSHAKITSHƐ

9. Yehova ndakotshɛ́ Uziya djɛ nangha nge? (2 Ɛkɔndɔ 26:1-5)

⁹ Okola Uziya má ndɔsaka akano wa wɔlɔ. Winá wɔ ndayalaka olangala, Nkfumi Uziya ayala l’okitshakitshɛ. Nde ekaka djɛ ‘ndjoka Ndjambe kɛ nsɔsɔlɔ wɔma.’ Nde awikaka ɛnɔnyi 68 edjinge Yehova ɔtshɔkɔlaka nsuke la lowiko lɔnde l’otondo. (Wala 2 Ɛkɔndɔ 26:1-5.) Uziya alongaka ewila efula w’antonyi, akembɛka angala la mpele djɛ Jerusalɛmɛ. (2 Ɛk. 26:6-15) Uziya ayalaka nsɔsɔlɔ l’osasa lá kɛnɛ kɛ Ndjambe ndokotshɛ́ djɛ nangha.—Los. 3:12, 13.

10. Kɛkɔnge kekomelisá Uziya?

¹⁰ Waka olakanyelo má akano wa nyɛtshi wa Uziya ndɔshi. Nkfumi Uziya ekelaka ngo nde ndeke loshimela anto kɛnɛ k’oyɛwɔ ladjɛ nangha. Kɛsɔ ndeke lonanghisá djɛ nde nkanela ante nde nkoka nangha kenkfumɔ k’ɔkɔpande? Lofu lɔmɔtshi, Uziya ingelaka lá tɛmpɛlɔ kɛ Yehova edjinge la lotamanyɛ lonkfumɔ asɛsaka djɛ ntshumba mbele lá etshumbelo, kɛ ankfumi yotayalaki la lotshungɔ lɔ nangha. (2 Ɛk. 26:16-18) Nkfundji k’Ekekete Azariya ahonaka ndɔpɛyɛ ikako, koko Uziya omalaka. Yɛnyi nde, Uziya atshitaka nkɔmano djeyalaki lande te Yehova l’ilá k’ɛnɔnyi efula edjinge awaka iluku yɛ olando w’anghɛnyi. (2 Ɛk. 26:19-21) Ɔsɔngo lowiko lɔnde otalekawɔ ndjala wɔlɔ otakindjɛnde ndjala l’okitshakitshɛ!

11. Kɛkɔnge kekoka ntokotshɛ́ djɛ ndjala l’okitshakitshɛ? (Lenda edjinge ntshango.)

¹¹ Winá wɔ Uziya ndoyalaka la nkfulu, nde avungɛka ante Yehova ndeke Ikɔkɔ yɛ wolo la okfudji wɔnde. Olakanyelo wɔkɔnge w’owaso? Angoyala wɔlɔ iso mvungɔka ente ɛtshɔkɔ wɛso la edjito wɛso oyɛwɔ nde me Yehova. L’edjena kɛ ndawandjɛ má kɛnɛ k’onanghaso, iso ladjɛ mpɛyɛ Yehova lomo lá kɛnɛ k’oyɛso l’akoka wa nangha.b (1 Kɔ. 4:7) Iso ladjɛ nsipisoyɛ l’okitshakitshɛ onkfumɔ ente tolekɔ anto wa ntshamba djɛ djɔ la tolekɔ la djonyi djɛ mba iluku. Wɔnanyɔ ɔmɔtshi wolekɔ́ l’ɛnɔnyi 60 afunaka ante: “Ndjekaka dj’ipa ndeka ndawɔsa la ntshina efula. Winá wɔ mawaka iluku m’evunga ɛmɔtshi wɛ mananghaka m’ɔlɛngɛ, lananghaki la wolo djɛ ndáwɔngɛ la nkindjɛ ndápɛyɛ l’olemo wɔ Yehova.” Kɛnɛ kelekɔ́ nsɔsɔlɔ nde, winá w’okindjɛso nɛmɛyɛ Yehova la w’okindjɛso ndjala l’okitshakitshɛ tongoyala nsɔsɔlɔ la lowiko l’osasa.—Woo. 22:4.

KINDJƐ MPONA YEHOVA

12. Winá wɔ ndayalaka ilɛngɛ, wopo wɔkɔnge Josiya ndahone Yehova? (2 Ɛkɔndɔ 34:1-3)

¹² Okola Josiya má ndɔsaka akano wa wɔlɔ. Josiya ayalaki olangala winá wɔ ndawange mpona Yehova. Nde akɔpaki ndjeka akambo walendana la Yehova la nangha ɛkɔpa kɛ Nde. Koko, lowiko lotayalaki wɔdju le nkfumi k’olangala kɛsɔ. L’etsho wɛsɔ, efula k’anto watɛmɔlaki tondjandjambe t’engolo, djɛkondeke alɔmbamaka djɛ Josiya ndjala l’oloko wolo dj’ipa nangha nkambo djɛsɔ. Edjinge ndananghe ngo nghɔsɔ! Lá ntondo kɛ Josiya mba ɛnɔnyi 20, nde awangaka nyimɛ ɔtɛmwɛlɔ w’ongolo m’owila.—Wala 2 Ɛkɔndɔ 34:1-3.

13. Le wɛ, kɛkɔnge kesakisola ndálambola le Yehova?

¹³ Kaanga ntsha oyɛnde ilɛngɛ efula, okoka ndɔsa nkano djɛ ndjokola Josiya má mpona Yehova la má ndjeka djɛ nsasanga la wekeka wande. Nangha nghɔsɔ angokotshinda djɛ wɛ ndalambola tende. Ndalambola te Yehova ɔkɔpande nsakisola nge lá lowiko lɔko lɔ lofu la lofu? Luke, kanga lolongolisá batisimo l’ɛnɔnyi 14, atepela ante: “Ngo má win’ɔsɔ, langilaka olemo wɔ Yehova l’edjena kɛ ntondo lá lowiko lɔmi edjinge langonanghaka la wolo djɛ ndoosasangɛ.” (Mar. 12:30) Ɔsɔngo nkambo djɛsɔ yongoyala ɔtshɔkɔ le wɛ ntsha okombola nangha wopo wɔk’ɔmɔ!

14. Kɔpɛyɛ ndjɔmbɔmba yɛnyɛ wopo wɔ elangala l’eseka ɛmɔtshi okolawɔ Nkfumi Josiya.

¹⁴ Ekakasano wɛkɔnge wekoka mpomana l’olangala kana oseka wokambela Yehova? Johan, kanga lolongolisá batisimo l’ɛnɔnyi 12, atepela lɛdji lɔ tolongo tɔnde telá nkalasa yotshindaka djɛ nnɔ ikaya. Djɛ mba wolo wɔ mpikama lá ntondo kɛ lodjimbo lɔsɔ, Johan avungɔka ante nnɔ ikaya angotshita demba djɛnde la djokanelo djɛnde nya Yehova. Rachel, kanga lolongolisá batisimo l’ɛnɔnyi 14, apakisola kɛnɛ k’okotshisá djɛ nde ndongela ekakasano wepomanisá lande lá nkalasa. Nde atepela ante: “Langhonanghake la wolo djɛ ndjokanyɛ kɛnɛ kɛnami la nkambo mɔtshi djɛ nyuma. Ndjɔmbɔmba, ɔkɔndɔ ɔmɔtshi w’olakanyelo nkoka mvungola lemi ɔkɔndɔ wemá Bible kana prɔfɛsi kɛmɔtshi. Kana djamba mɔtshi nkoka mvungola lemi vɛrse mɔtshi djɛ djonyi dj’okokami mbalela anto wasawola la lemi.” Ekakasano wepomana la wɛ nkoka ntshikitana la wepomanisá la Nkfumi Josiya, koko wɛ nkoka ndjala la balo edjinge ntshikala la nkɔmano etengo nde. Ekakasano wopomanɛ m’ɔlɛngɛ nkoka kɔlɔngɔsɔla djɛ ndokfulumeyɛ ekakasano enkina l’etsho weyaye.

15. Kɛkɔnge kekotshisá Josiya djɛ nkambela Yehova la nkɔmano nkfumɔ? (2 Ɛkɔndɔ 34:14, 18-21)

¹⁵ Winá wɔ ndakome ekokolo, Nkfumi Josiya awangaka ndɔngɔsɔla tɛmpɛlɔ. Lá winá wɔ yakambaka elemo wɛsɔ, wisolaka ‘onkanda w’Ɛlɛmbɛ wɛ Yehova ndapɛyɛ má lotshimbo lɔ Mɔsɛ.’ Winá wɔ nkfumi ndoke kɛnɛ kɛ yafune l’eteyi, nde ananghaka etshikitano mbala kɛkɔ kɛmɔ djɛ nɛmɛyɛ akambo wambofunamá l’eteyi. (Wala 2 Ɛkɔndɔ 34:14, 18-21.) Ɔngɔkɔpake mbala Bible mbala la mbala? Ntsha omboshiyɛka nsɛsa, yotahete ngete mo? Ongofunake avɛrse wakoka nkokotshɛ́? Luke kanga sotepelaki má djiko, angofunake l’ikalupɛ yɛnde avɛrse amɔtshi wa djonyi w’isolakande. Opakoke nangha nkambo mɔtshi djɛ wopo wɔk’ɔmɔ djengokokotshɛ́ djɛ mvungɔka avɛrse kana elakanyelo ɛmɔtshi? Winá wɔ ngotaleke ndjewa la nkɔpa Bible, ndeke ngongoleka nkɔpa djɛ nkambela Yehova. Ngo ngete Nkfumi Josiya, Otepela wɔ Ndjambe wongokokotshɛ́ djɛ nangha kɛnɛ kelekɔ́ wɔlɔ.

16. Lamo Josiya ndoonanghaka ovunga w’ekekete, iya olakanyelo wɔkɔnge w’owaso?

¹⁶ Waka olakanyelo má akano wa nyɛtshi wɔsisá Josiya. Winá wɔ Josiya ndawa ɛnɔnyi 39, nde ananghaka ovunga wɔɔtɔlisa tii tá nyɔyi. Nde ayawɛkɛka le nde nyɔmɛlɛ l’edjena kɛ mpona ɛlɔndjɛlɔ kɛ Yehova. (2 Ɛk. 35:20-25) Tokoka mba olakanyelo ɔmɔtshi má nkambo djɛsɔ. Ayale ɛnɔnyi wɛkɔnge welekɔ́ laso, kana ilá kɛ ngetenge kɛ sombeka Bible, iso ladjɛ nkindjɛ mpona Yehova. Kɛsɔ nsakisolaka ndɔmba ɛlɔndjɛlɔ kɛnde mbala la mbala, ndjekaka Otepela wɔnde edjinge nkamba l’alako w’Akristo wambotshunda lá nyuma. Má nanghaka nghɔsɔ topangoleka nangha evunga wɛ nkekete edjinge tongoleka ndjala l’osasa.—Dja. 1:25.

ELANGALA L’ESEKA, NYOKOKA NDJALA L’OSASA LÁ MBIKO YƐNYO

17. Elakanyelo wɛkɔnge wɛ sombowa me ankfumi isato yɛ Juda?

¹⁷ Akambo wa wɔlɔ efula walekɔ w’okokanyo nangha winá w’oyɛnyo elangala kana eseka. Ɔkɔndɔ wɔ Jɛhɔyashɛ, Uziya, la Josiya wɛnyɛ ente elangala l’eseka nkoka ndɔsa akano wa balo edjinge nkilika mboka kesasangɛ Yehova. Lá nsɔsɔlɔ, etengo sɛnaki, elangala wɛsɔ wananghaka evunga wayakalisá eposelo wɛ nyɛtshi. Koko, ntsha ombokola akambo wa wɔlɔ wa yananghe, la ombowadjɛ dj’ipa nangha evunga w’iyananghe, okoka ndjala la lowiko l’osasa.

18. Ndjɔmbɔmba yɛkɔnge yel’Afunelo yɛnyɛ ente okoka ndjala la lowiko l’osasa? (Lenda edjinge ntshango.)

¹⁸ Afunelo walekɔ l’ɛkɔndɔ enkina wɛ elengala l’eseka weyasukanisá la Yehova, wawolamisá me nde la weyalisá la mbiko y’osasa. Davidɛ alekɔ ɔmɔtshi l’anteyi kɛwɔ. Ngo m’ɔlɛmgɛ wɔnde, nde asɔnaka djɛ nkoma ilongo yɛ Ndjambe ko m’ɔkɔngɔ ayɛka ndokoma nkfumi kɛ nkɔmano efula. Kaanga yayale nghɔsɔ, nde ananghaka evunga lá mbamba kɛmɔtshi, koko Ndjambe akindjɛka ndɔwɔsa etengo onto wɔ nkɔmano. (1 Nk. 3:6; 9:4, 5; 14:8) Okoka mba lokembo la ndjala la mposɛ kɛ nkambela Yehova má ndjeka lowiko lɔ Davidɛ la olemo wɔnde wɔ nkɔmano. Kana okoka nonghanyɛ djɛ ndjeka ndjɔmbɔmba kɛ Marko kana kɛ Timɔte. Ɔngɛna ente iwɔ wakambelaka Yehova ngo m’ɔlɛngɛ wɔwɔ la wakindjɛka ndokambela la nkɔmano. Nkano djɛwɔ djɛ nkambela Yehova la djɛ ndosasangɛ djayakalaka osasa.

19. Yopo yɛkɔnge yɛ lowiko y’okokɛ ndjala la yɛkɔ?

¹⁹ Wopo w’okambɛ la lowiko lɔko má winá wɔsɔ, ndeke lɛnyɛ wopo wɔ lowiko lɔko okokawɔ ndoyala l’etsho weyaye. Ntsha omboyawɛkɛ te Yehova, koko ape tá loka lɔko nghɔmɛlɛ nde angokokotshɛ djɛ ndɔsa akano wa wɔlɔ. (Woo. 20:24) Okoka ndjala la lowiko l’osasa lombolola kfu la wɛlɔ. Vungɔ ente, Yehova ndɔsaka kɛnɛ konanghɛ l’olemo wɔnde la ntshina. Yopo yɛkɔnge yɛ wɔlɔ y’okokɛ nkamba la lowiko lɔko ko ndeka nkambela Papa kɛso kɛ ngandji kel’olongo?