Ndjambe atongaka mpame kɛ ntondo l’omoto wɔ ntondo

Yehova ananghaka jardɛ djɛ wɔlɔ l’idjena y’etawɔ ambɔ Ɛdɛna. Jardɛ djɛkɔ dolaka kfu l’ansoso, etamba ole anyama. Masɔ, Ndjambe atongaka mpame kɛ ntondo, Adama l’ovutu edjinge afeyɛka lohomo lá mpiso yɛ woolo wɔnde. Ewa kɛnɛ keposisá masɔ? Mpame kɛsɔ akomaka onto wowika! Yehova Ndjambe apɛyɛka Adama odjito wɔ namaka bedji dj’Ɛdɛna ole ooshimelaka djɛ nde ndjɔ anyama inkfumɔ wiina.

Yehova ilelaka Adama ɔlɛmbɛ wɔ djonyi efula. Nde ashimelaka Adama ante: ‘Wɛ nkoka ndɛ mbambo ye má etamba enkfumɔ nyimɛ ngo otamba ɔmɔ toko. Ntsha wɛ ndɛ mbambo yɛ m’otamba wɔsɔ, ongovɔ.’

M’ɔkɔngɔ, Yehova atepelaka ante: ‘Lemi lonanghela Adama okotshɔ.’ Ko Ndjambe awetshɛka Adama ilɔ y’efula, masɔ nde ɔsaka lopandju lɔ Adama djɛ ndotongela wadji. Djiina djɛnde nde Eva. Adama nya Eva wakomaka nkfumbo kɛ ntondo. Adama ndoke ngete mo winá wɔ ndɛnyi wadjɛnde wɔsɔ? Adama ayalaka l’osasa w’efula, djɛko ndeke ndatepela ante: ‘Kolenda kɛnɛ kɛ Yehova ndombonangha la lopandju lɔmi! Ɔnɛ alekɔ nsɔsɔlɔ onto ete ngo lemi.’

Yehova ashimelaka Adama nya Eva dj’iwɔ mbota wana ole ndodjɛ looko. Nde akɔpaka dj’iwɔ ndjala l’osasa má nkamba esanga djɛ nkomɛ looko l’otondo paradiso, edjena k’ɔwɔngi efula, ngo ngete bedji djɛ Ɛdɛna. Koko akambo lako mpeta nghɔsɔ. Ladjikɛnge? Tongolewa lá shapitrɛ keyaye.