M’ɔkɔngɔ wɔ Adama nya Eva mposa má bedji dj’Ɛdɛna, wawotaka wana efula. Wɔnawɔ wɔ ntondo Kayina, akomaka onkambi w’awedji, edjinge Abɛlɛ, wɔna w’ape, akoma onami w’ɛnkɔkɔ.

Lofu lɔmɔtshi, Kayina nya Abɛlɛ walambolaka Yehova elambo. Wɛ ndjewaka olambo oyɛnde nge? Olambo nde opapɛyɛ ɔmɔtshi wɔ ntshina efula. Yehova asasangaka l’olambo wɔ Abɛlɛ, koko atásasangá la wɔ Kayina. Nkambo djɛsɔ mpɛyɛka Kayina nkɛlɛ efula. Ko Yehova ewolaka Kayina ante nkɛlɛ kɛnde nkoka ndootshinda djɛ nangha nyɛtshi. Koko Kayina atakɔpa ndjoka.

L’edjena kɛ ndjoka dako, Kayina ashimelaka Abɛlɛ ante: ‘Tokontshike lá bedji.’ Winá wɔ yayalaka ngo yape toko lá bedji, Kayina akfusaka ankfunɛnde ko ooyakaka. Yehova ndananghe mo lá nkambo djɛsɔ? Yehova apɛyɛka Kayina dilanyɛ má ndowangoyɛ otale efula la nkfumbo kɛnde. Kayina atákoká nkalɔ lonkina lotshinda lotshinda.

Olakanyelo wɔkɔnge w’owaso m’ɔkɔndɔ wɔsɔ? Iso nkoka ndjoka nkɛlɛ ntsha akambo wapananghemisa wopo wɔ sákombolaká. Koko ntsha nkɛlɛ kɛkɔ ketaafule, kana ntsha onto ɔmɔtshi ambotɔpɛyɛ dako ladjikɛnde ambɛna ante tolekɔ la nkɛlɛ, iso ladjɛ nangha la wolo djɛ nyimɛ nkɛlɛ dj’ipa iso ndonangha nyɛtshi.

Ladjikɛnde Abɛlɛ akɔpaki Yehova edjinge ananghaki akambo wa wɔlɔ, Yehova apoovungɛki kaanga ndambo daambi. Nde angookfundola winá wɔ ndongokadjimola looko paradiso.

M’ɔkɔngɔ w’ɛnɔnyi, anto wakomaka efula lá looko. Efula kɛwɔ wayalaki anto wa pɔlɔ. Kaanga andjelo amɔtshi l’olongo wakomaka anto nyɛtshi. Iwɔ watshikaka edjena kɛwɔ l’olongo ko wakitaka lanɛ lá looko. Ewa ladjikɛnge yananghe nghɔsɔ? Dj’iwɔ ndɔta alemba w’anto ole ntshuka wadji.

Andjelo wakɔ wawotaka wana la wadji w’iyɔshi. Wana wakɔ wafulaka, wakomaka ekowo edjinge lopango l’efula. Wɛnyɛki anto ndjolo efula. Yehova atákoká ntshika dj’akambo nkindjɛ ngo nghɔsɔ. Djɛko ndeke nde ɔsaka nkano djɛ ndjaka anto wa pɔlɔ la mvula k’elola.

Koko onto ɔmɔtshi atshikitanaki l’anto wa pɔlɔ wasɔ. Nde akɔpaki Yehova. Djiina djɛnde nde Nowe. Nde ayalaki la wadji ole wana asato w’ampame, Shɛmɛ, Hamɛ, la Jafɛtɛ; y’asato kɛkɔ wáyalaki la wadji. Yehova ashimelaka Nowe djɛ nde nangha wato w’ekekete wɔ mvulu djɛ nde nya nkfumbo kɛnde mbika lá Mvula k’elola. Wato wɔsɔ woyalaka ete ngo onsete w’ekekete wokokaki ntenda lá washi. Yehova ashimelaka Nowe lonkina djɛ nde ndjingeyɛ anyama efula lá wato djɛ anyama yɛkɔ mbika ole iwɔ.

Mbala kɛkɔ kɛmɔ, Nowe awangaka nangha wato. Olemo wɔ nangha wato wɔsɔ wɔsɛlaka Nowe nya nkfumbo kɛnde ɛnɔnyi ete ngo 50. Iwɔ wananghaka wato wɔsɔ ngo wopo wɔ Yehova ndaashimela. Nowe ewolaki edjinge anto ante Mvula k’elola kɛngɔtɔnga. Koko lako kaanga onto wowokelisá.

Ekomo ekomo, lofu lɔ ndjingela lá wato lokokaka. Ntshɔ tolende kɛnɛ kehetisá masɔ.