Mpame kɛmɔtshi kɛtɛmɔlaki Yehova awikaki lá ngando kɛ Uzɛ. Djiina djɛnde nde Djɔbɔ. Nde ayalaki l’okfudji efula ole la nkfumbo k’ekekete. Nde ayalaki onto wɔ wɔlɔ, akotshɛ́ki ase ɛmvɔ, wadji w’edjo la wana wa ntshike. Djɔbɔ asambaka mpomana l’ekakasano ngo mande ananghaki akambo wa wɔlɔ?

Djɔbɔ atewa ante Satana Djabolo ólendaki. Yehova ashimelaka Satana ante: ‘Wɛ ɔmbɛnaka onkambi wɔmi Djɔbɔ? Lako onto wolekɔ́ ete ngo nde lá looko. Nde nɛmɛyɛka lemi ole nanghaka kɛnɛ kelekɔ́ wɔlɔ.’ Satana akadjimolaka ante: ‘Nsɔsɔlɔ Djɔbɔ nkɔlɛmɛyɛka. Wɛ ndoolamaka edjinge ndoosakolaka. Wɛ ɔmbɔɔpɛyɛ etatshi kɛ looko ole anyama. Koopapola nkete nkfumɔ djɛsɔ, nkama akɔtɛmɔlaka lonkina.’ Yehova okadjimolaka ante: ‘Wɛ nkoka ndoohemba, koko, tooyakake.’ Ladjikɛnge Yehova ndawola djɛ Satana mpemba Djɔbɔ? Nde ayalaki l’eshikikelo ante Djɔbɔ apangɔkfɔ.

Satana atateyɛka mpemba Djɔbɔ la ndjolo yɛ wepo la wepo. Ntondo ntondo, nde atshindaka ase Sabe djɛ ntɔngɔla angɔmbɛ l’ampunda yɛ Djɔbɔ. Masɔ, iyɛ itshumbaka ɛnkɔkɔ enkfumɔ wɛ Djɔbɔ. Oloyi onkina w’anto, ntepela ente ase Kaladiya wɔngɔlaka akamɛlɔ yɛnde. Enkambi wɛ Djɔbɔ welamaki anyama isɔ, wayakemaka. Masɔ, mbalaka kɛ wolo efula kɛ má nkete djetongamisá kenanghemaka. Wana wa Djɔbɔ ankfumɔ wavɔka winá wɔ mvulu kɛ yananghaka fɛtɛ l’eteyi yavutshɛ. Djɔbɔ okaka paa efula, koko nde atatshika ntɛmɔla Yehova.

Satana akɔpaka nyɛnyɛ Djɔbɔ ndjolo lá lɛdji lɔ nyɛtshi, djɛko ndeke nde oposɛka atshuku lá demba dj’otondo. Djɔbɔ ayalaki la paa efula. Nde atewaki ladjikɛnge ndjolo inkfumɔ yɛsɔ yokomelaka. Koko, Djɔbɔ akindjɛka ngo ntɛmɔla Yehova. Ndjambe ɛnaki akambo ankfumɔ wasɔ ole ayalaka l’osasa w’efula má ndenda nkɔmano djɛ Djɔbɔ.

Masɔ, Satana atomaka ampame isato djɛ ndohemba Djɔbɔ. Iwɔ woshimelaka ambɔ: ‘Onanghaka mpekanto ko isaka, djɛko ndeke Ndjambe ndɔmbɔkɔpɛyɛ dilanyɛ.’ Djɔbɔ atepelaka ante: ‘Lemi ntánanghá kaanga nkambo mɔ djɛ pɔlɔ.’ Masɔ, Djɔbɔ atateyɛka mfɛnyɛ ante Yehova ndeke ikɔkɔ y’ekakasano wɛnde wɛsɔ edjinge atepelaka ante Ndjambe apoonanghela akambo la sii.

Olangala ɔmɔtshi wɔ yetaka Elihu, ekameyɛki ntshawo ipa la ntepela. Masɔ, nde atepelaka ante: ‘Kɛnɛ kɛ nyombotepela nyokakfumɔ kepalekɔ nsɔsɔlɔ. Yehova alekɔ ekekete ndeka edjinge wopo w’okokaso nsipisoyɛ. Nde apakoke nangha kɛnɛ kepalekɔ́ wɔlɔ kaanga ndambo daambi. Nde nyɛnaka akambo ankfumɔ ole nde nkotshɛ́ka anto l’ekakasano wɛwɔ.’

Masɔ, Yehova asawolaka nya Djɔbɔ. Nde oshimelaka ante: ‘Nghayalaka lampe winá wɔ matongaka olongo la looko? Ladjikɛnge otepelɛ ente lemi mpalekɔ sii? Otepela nghɔsɔ koko opewe ladjikɛnge akambo wanyi oposawɔ.’ Djɔbɔ asuyɛka ovunga wɔnde ko atepelaka ante: ‘Nanghaka nyɛtshi. Lemi ndjokaka akambo walendana la wɛ, koko winá wɔsɔ lambokewa nsɔsɔlɔ. Lako nkambo djɛ nghopakoke nangha. Lambolapɛla má kɛnɛ kɛ matepela.’

Winá wɔ ohemba yashiye, Yehova apɛyɛka Djɔbɔ demba djɛ wɔlɔ lonkina ole ɔpɛyɛka nkete efula ndeka djeyalaki lande ntondo. Djɔbɔ awikaka ilá efula edjinge ayalaka la lowiko l’osasa. Yehova asakolaka Djɔbɔ l’ɔtɛ wɔ ndɔlɛmɛyɛ kaanga lá winá wɔ nkambo ntshɔ yayale okakasano. Wɛ ongokola Djɔbɔ edjinge ongokindjɛ ntɛmɔla Yehova ayale ekakasano wɛkɔnge wekoka nkokomela?

L’Edjipito, wetaki nkfumbo kɛ Djakɔbɔ ambɔ ase Isariyɛlɛ. M’ɔkɔngɔ wɔ nyɔyi kɛ Djakɔbɔ nya Yosɛfu, Farawɔ kenkina alotateyɛka ndɔndjɛ. Nde okaka wɔma má nyɛna wopo wɔ ase Isariyɛlɛ yolalekaka ase Edjipito nkfulu. Djɛko ndeke, Farawɔ kɛsɔ ndookomɛ ase Isariyɛlɛ amfumbe. Nde aatshindaki djɛ nkfumba abrikɛ ole djɛ nkamba olemo wɔ wolo w’awedji. Koko, winá wɔ ase Edjipito yotalekaka ndaatshinda djɛ nkamba elemo wɛ wolo, ndeke ase Isariyɛlɛ yotetelaka mfula. Mande Farawɔ atakɔpaki wopo wɔ yotafulaká, nde ilaka ɔlɛmbɛ wɔ ndjakaka wana w’ampame w’ase Isariyɛlɛ ankfumɔ wawotshɔki. Kokanela wɔma woyalisá l’ase Isariyɛlɛ!

Jɔkɛbɛdɛ, omoto ɔmɔtshi w’ose Isariyɛlɛ awotaka wɔna mpame w’ɔwɔngi efula. Djɛ ndoowikɛ, nde owilaka lá esaka ko atshɔka ntowisá lá ndɛɛngɛ iyalaki l’omamo wɔ Ndjale kɛ Nilɛ. Miriyamɛ, nkaana kɛ wɔna wɔsɔ, emalaka ndambo m’otale djɛ ndendaka kɛnɛ kengoposá.

Wɔna Farawɔ w’omoto ayɛka ndɔka lá ndjale edjinge ɛnaka esaka kɛkɔ. Nde ɛnaka wɔna alela l’esaka kɛkɔ, ko oowokaka djandji. Miriyamɛ owopolaka ante: ‘Lemi nkoká ntshɔ ntokohonela omoto ɔmɔtshi wokoka ndɔkɔlɔmɛyɛka wɔna wɔnɛ?’ Winá wɔ wɔna Farawɔ wɔ omoto ndawola, Miriyamɛ atshɔka nteta ngo Jɔkɛbɛdɛ, nyangho wɔna wɔkɔ. Wɔna Farawɔ wɔ omoto oshimelaka ante: ‘Ɔsa wɔna wɔnɛ, tɔkɔɔlɔmɛ, ko lemi langookofuta.’

Winá wɔ wɔna wɔkɔ ndafule, Jɔkɛbɛdɛ ɔtɔlaka te wɔna Farawɔ w’omoto, kanga lɔdjwisá djiina djɛ Mɔsɛ, ko nde owongolaka ete ngo wɔnande. Mɔsɛ afulaka ete ngo wɔna nkfumi, edjinge nde akokaki mba ekete kenkfumɔ kɛ ndakɔpaka. Koko, Mɔsɛ atavungɛ Yehova kaanga ndambo daambi. Nde ewaki ante oyɛnde nsɔsɔlɔ nde ose Isariyɛlɛ, koko ape ose Edjipito. Edjinge nde asɔnaka djɛ nkambela Yehova.

Winá wɔ ndawa ɛnɔnyi 40, Mɔsɛ ɔsaka nkano djɛ nkotshɛ́ ase owila wɔnde. Winá wɔ ndɛnyi ose Edjipito akfusa mfumbe kɛmɔtshi k’ose Isariyɛlɛ, Mɔsɛ akfusaka ose Edjipito wɔsɔ efula ko nde avɔka. Mɔsɛ isaka odjo wɔnde l’ovutu. Winá wɔ Farawɔ ndewe nkambo djɛsɔ, akɔpaka ndjaka Mɔsɛ. Koko, Mɔsɛ alotaka t’owila wɔ Midiyanɛ. L’eteyi, Yehova olamaki.