Mɔsɛ intasɛka lá Midiyanɛ l’ilá k’ɛnɔnyi 40. Atshukaka wadji ole awotaka wana. Lofu lɔmɔtshi, winá wɔ ndotalamaka ɛnkɔkɔ entshupa l’Onkókó wɔ Sinayi, nde ɛnaka djoyi mɔtshi djɛ nkamɔ efula. Itshitshiko ipɛta iyɛ, koko ipadjike! Winá wɔ Mɔsɛ ndotasɛmɛlaka djɛ ndenda, nde okaka djoyi djetepela má itshitshiko yɛkɔ ante: ‘Mɔsɛ! Tɔsɛmɛlake lanɛ. Djola sabata, ladjikɛnde idjena yɛ nghomemala ilekɔ ekina.’ Yehova ndeke lotepelaki má lotshimbo l’ondjelo.

Mɔsɛ okaka wɔma, djɛko ndeke adjipaka elongi. Djoyi djɛkɔ ntepelaka ante: ‘Lamɛna wopo wɔ ase Isariyɛlɛ ɛnawɔ ndjolo. Langaawikɛ me ase Edjipito ko langaatɔla tá owila wɔ wɔlɔ. Wɛ ndeke onto wongoposɛ owila wɔmi má Edjipito.’ Mɔsɛ ndoke ngete mo? Nde akamɔka efula!

Mɔsɛ owopolaka ante: ‘Mongotashimela ente omontoma na?’ Ndjambe okadjimolaka ante: ‘Shimelawɔ ente Yehova, Ndjambe kɛ Abrahama, Ndjambe kɛ Isaka, la Ndjambe kɛ Djakɔbɔ ndeke lombokotoma.’ Ko, Mɔsɛ atepelaka ante: ‘Monghonangha mo ntsha iwɔ wapandjawolisa?’ Yehova apɛyɛka Mɔsɛ tolembetelo tooshikikɛki ente Nde angookotshɛ́. Nde ashimelaka Mɔsɛ djɛ mbokela daanga djɛnde lá looko. Ko, daanga djepilɔka ndjɔ́! Winá wɔ Mɔsɛ ndavunde ndjɔ́ kɛkɔ lá wela, ndjɔ́ kɛkɔ yombokalɔ mpilɔ daanga. Yehova oshimelaka ante: ‘Ntsha omonangha nsese djɛnɛ, wangaawola ambɔ lemi ndeke lombokotoma.’

Ko Mɔsɛ atepelaka ante: ‘Lemi mpalekɔ ɔlɔmɔ osadju.’ Yehova ólakaka ante: ‘Langokoshimelaka akambo wa ntepela ole langotoma mama kɛko Arɔ djɛ nkokotshɛ́.’ Mande nde ewaka ante Yehova alekɔ nyande, Mɔsɛ ɔsaka wadjɛnde la wana wande, ko wakalɔka t’Edjipito.

Ase Isariyɛlɛ waatshindamaki djɛ nkamba elemo wɛ wolo ete ngo amfumbe. Yehova atomaka Mɔsɛ nya Arɔ dj’iwɔ ntoshimela Farawɔ ente: ‘Tshika anto wami watshu ndeke watɔntɛmɔlɛ l’osowe.’ Farawɔ akadjimolaka l’otako onkfumɔ ante: ‘Lemi mpewe akambo wa Yehova otepelande wasɔ edjinge mpangotshika ase Isariyɛlɛ dj’iwɔ ntshɔ.’ Masɔ, Farawɔ aawakfeyɛka elemo lonkina. Yehova akɔpaka mpɛyɛ Farawɔ olakanyelo. Wɛ ndjewaka wopo wɔ ndananghe? Nde ayakalaka Asoyi Djomi l’Edjipito. Yehova ashimelaka Mɔsɛ ante: ‘Farawɔ apakɔpɛ nɛmɛyɛ lemi. La nkɛsɛ, nde angotshɔ tá Ndjale kɛ Nilɛ. Ongotshu tende ndeke ongotoshimele ente ladjikɛnde nde apakɔpɛ ntshika anto wami, washi wa Nilɛ ankfumɔ wangokadjimɔ ekiya.’ Mɔsɛ alɛmɛyɛka edjinge atshɔka te Farawɔ. Farawɔ alendaki winá wɔ Arɔ ndadjupolaka danga djɛnde lá Ndjale kɛ Nilɛ, la wɔ washi yakadjimɔ ekiya. Washi watateyɛka ntshinda nsolo, nse ivɔka, edjinge washi wa wɔlɔ wa nnɔ lako ndjala lonkina lá Ndjale kɛ Nilɛ. Farawɔ akindjɛka ntona dj’ipa ase Isariyɛlɛ ntshɔ.

Mfu esambele m’ɔkɔngɔ, Yehova atomaka Mɔsɛ te Farawɔ djɛ ntoshimela ante: ‘Ntsha opatshike anto wami, Edjipito wongolola kfu la ekakolo.’ Arɔ asangolaka danga djɛnde ko ekakolo wewangaka ndola lá mbandja. Anto wɛnaki ekakolo lá amvulu yɛwɔ, lá ambeto yɛwɔ ole l’alɔnga l’ampoke yɛwɔ. Ekakolo weyalaki djena nkfumɔ! Farawɔ ashimelaka Mɔsɛ djɛ nde mbɔnda Yehova djɛ nkomɛ ntshoyi ntshɔ. Nde alakaka ante angotshika ase Isariyɛlɛ dj’iwɔ ntshɔ. Djɛko ndeke, Yehova ndimɛ ntshoyi djɛkɔ edjinge ase Edjipito watshumanyɛka ekakolo wembovɔ́, doyi doyi. Mbandja ketshindaka nsolo kɛ nyɛtshi efula. Koko, Farawɔ akowaka oloko lonkina, nde atátshiká ase Isariyɛlɛ dj’iwɔ ntshɔ.

M’ɔkɔngɔ, Yehova ashimelaka Mɔsɛ ante: ‘Arɔ adjupole danga djɛnde lá looko, ko ovutu wongokoma mbɛmbɛlɛ.’ Mbala kɛkɔ kɛmɔ, mbɛmbɛlɛ ilolaka lá djena nkfumɔ. Kaanga ase elemo amɔtshi wa Farawɔ woshimelaka ambɔ: ‘Ntshoyi djɛnɛ ndjɛ me Ndjambe.’ Koko, Farawɔ atonaka ngo ntshika ase Isariyɛlɛ dj’iwɔ ntshɔ.