Mɔsɛ nya Arɔ watshɔka ntoshimela Farawɔ losango lɔ Ndjambe lɔnɛ: ‘Ntsha ngo opakɔpɛ ntshika anto wami, langotoma tonsala l’owila.’ Eloyi wɛ tonsala tingelaka l’amvulu y’ase Edjipito inkfumɔ, ayale ase ekfudji kana ase ɛmvɔ. Owila w’otondo wololaka kfu la tonsala. Koko, lá Gɔshɛnɛ, mbandja k’ase Isariyɛlɛ yayalaká, tonsala lako ndjala. Ntshoyi dj’anɛyi ntshɔ edjinge ankina walɔndisá, yakomaka ngo le ase Edjipito toko. Farawɔ awɔndaka ante: ‘Ɔndɔmbɛlɛ Yehova djɛ nde nyimɛ tonsala tɔnɛ. Anto wako nkokaka ntshɔ.’ Koko, winá wɔ Yehova ndimɛ tonsala, Farawɔ atshikitanyɛka ikanyi yɛnde. Farawɔ awaka olakanyelo ɔmɔtshi?

Yehova atepelaka ante: ‘Ntsha Farawɔ apawola djɛ anto wami ntshɔ, nkakɛndjɛ nkfumɔ dj’ase Edjipito ngotata olando ko ngovɔ.’ Lofu lɔwɔlamisá, nkakɛndjɛ ntateyɛka mvɔ. Koko, nkakɛndjɛ dj’ase Isariyɛlɛ ntavɔki. Farawɔ akindjɛka nkowa oloko, nde ataatshika.

Masɔ, Yehova ashimelaka Mɔsɛ djɛ nde nkalɔ ntshɔ te Farawɔ edjinge djɛ nde mfumboyɛ otoko t’olongo. Otoko wokadjimɔka ovutu, ko ovutu wɔsɔ wofumbɔka lá lohoye ko wokokanaka le ase Edjipito ankfumɔ. Ovutu wɔsɔ wokadjimɔka atshuku wɛnyisá ase Edjipito la nkakɛndjɛ djɛwɔ ndjolo efula. Kaanga yayale nghɔsɔ, Farawɔ atonaka djɛ ase Isariyɛlɛ ntshɔ.

Yehova atomaka Mɔsɛ te Farawɔ djɛ ntoshimela ante: ‘Okindjɛ ngo ntona djɛ ntshika anto wami dj’iwɔ ntshɔ? Lomi, mvula kɛ mbɔkɔ kɛngɔtɔnga l’owila.’ Lofu lɔwɔlamisá, Yehova atɔngɛka mvula kɛ mbɔkɔ, andandji la tɔyɛ. Ɔsɔ ayalaka mvula kɛ nyɛtshi efula ketatɔngaka ntondo l’Edjipito. Etamba la nkakona nkfumɔ ntshitanaka, nyimɛ ngo lá Gɔshɛnɛ. Farawɔ atepelaka ante: ‘Ɔmbɔndɛlɛ Yehova djɛ nde nyemɛ ntshoyi djɛnɛ! Masɔ, nyo nkoka ntshɔ.’ Koko ngo winá wɔ mbɔkɔ la mvula yatene, Farawɔ atshikitanyɛka ikanyi yɛnde.

Ko Mɔsɛ atepelaka ante: ‘Win’ɔsɔ apaso wangɔlɛ nkakona djetshikalisá djetatshitaná lá mvula kɛ mbɔkɔ.’ Miliyɔ yɛ apaso ilɛka nkete nkfumɔ djetshikalisá l’okonda ole nkete djɛ l’etamba. Farawɔ atepelaka ante: ‘Lambɔkɔwɔnda, lɔmba Yehova djɛ nde ntimeyɛ apaso wanɛ.’ Koko, kaanga m’ɔkɔngɔ wɔ Yehova nyimɛ apaso, Farawɔ akindjɛka ngo nkowa oloko.

Yehova ashimelaka Mɔsɛ ante: ‘Sangola lɔwɔ lɔko t’olongo.’ Mbala kɛkɔ kɛmɔ, olongo wokomaka widjima pitshii. L’ilá kɛ mfu isato, ase Edjipito watákoká nyɛna kaanga ekete kana onto. Koko, osase wawalaki l’amvulu y’ase Isariyɛlɛ.

Farawɔ ashimelaka Mɔsɛ ante: ‘Wɛ nkoka ntshɔ l’anto wako. Koko ngo nyo ntshika nkakɛndjɛ djɛnyo.’ Mɔsɛ atepelaka ante: ‘Iso ladjɛ ntshɔ la nkakɛndjɛ djɛso dj’iso ntolambola Ndjambe kɛso.’ Farawɔ omalaka efula. Nde apangɔka ante: ‘Ima mányi! Ntsha lemi nkɛna lonkina, langokoyaka.’

Mɔsɛ ashimelaka Farawɔ ante apangoyɛ ndɛnana nyande lonkina. Koko lá ntondo kɛ nde ntshɔ, ashimelaka Farawɔ ante: ‘La kati k’otsho, wɔna wɔ ntondo onkfumɔ wɔ l’Edjipito, ntateyɛ me wɔna Farawɔ wɔ ntondo tii le wɔna mfumbe wɔ ntondo, angovɔ.’

Yehova ashimelaka ase Isariyɛlɛ dj’iwɔ nangha dambo djetshikitanyi. Nde atepelaka ante: ‘Nyongoyake wɔna mbodji kana wɔna ɔnkɔkɔ w’ɔnɔnyi ɔmɔ, ko nyongokfute ndambo k’ekila wɛnde l’akodji wa wiso wa mvulu yɛnyo. Nyongofumbe nyama, edjinge nyɔngɔle la mampa w’ipa l’okanga w’ifudjɛ. Nyɔngɔlɔte ntshendja, l’asabata l’ekolo djɛ nyo ndjala entshupa djɛ ngandjɔ. Otsho wɔnɛ, ndeke onyotshungolami lɔ.’ Kokanela osasa wɔ ase Isariyɛlɛ yoke!

Lá kati k’otsho, Yehova atomaka ondjelo l’amvulu y’ase Edjipito inkfumɔ. Mvulu kenkfumɔ kétayalá l’ekiya lá akondji wa wiso, wɔna wɔ ntondo woyalaki l’eteyi ayakemaki. Koko, ondjelo atátámbaki amvulu yɛ yakfute ekiya. Nkfumbo inkfumɔ y’ase Edjipito, ayale nkfumbo y’ase ekfudji kana y’ase ɛmvɔ, ivusɛka wɔna. Koko lako kaanga wɔna ɔmɔ w’ose Isariyɛlɛ wovwisá.

Ayale kaanga wɔna Farawɔ nyɔmɛlɛ avɔka. Farawɔ atákoká nkowa oloko lonkina. Mbala kɛkɔ kɛmɔ, nde ashimelaka Mɔsɛ nya Arɔ ante: ‘Nyongandjɔ. Nyopose manɛ. Nyotshu edjinge nyɔtɔtɛmɔlɛ Ndjambe kɛnyo. Nyotshu ole la nkakɛndjɛ djɛnyo!’

Winá wɔ ngɔndɔ ndayalaka otondo, ase Isariyɛlɛ waposaka má Edjipito, watɔlɔnghanaka lá nkilika ankfumbo la tɔkɔlɛ. Wayalaka ampame 600 000 edjinge doyi doyi dj’amato la wana. Edjinge anto ankina efula watshɔka esanga lawɔ dj’iwɔ ntɔtɛmɔla Yehova. Ekomo ekomo, ase Isariyɛlɛ watshungɔka má lomfumbe!

Djɛ mvungɔka wopo wɔ Yehova ndaatshungola, iwɔ wayalaki ladjɛ nanghaka dambo djetshikitanyi djɛsɔ ɔnɔnyi onkfumɔ. Djiina djɛ dambo djɛkɔ nde, Pasaka.