Ase Isariyɛlɛ wimaka m’Onkókó wɔ Sinayi, wopanyɛka osowe wɔ Paranɛ, ko wakomaka l’idjena yɛ yetaka ambɔ Kadɛshɛ. L’eteyi, Yehova ashimelaka Mɔsɛ ante: ‘Toma ampame 12, mpame kɛmɔ kɛmɔ má ikɔlɛ inkfumɔ, dj’iwɔ ntɔtɔmba Kanana, owila wɔkɔpami mpɛyɛ ase Isariyɛlɛ.’ Djɛko ndeke, Mɔsɛ asɔnaka ampame 12 ko aashimelaka ante: ‘Nyotshu tá Kanana ndeke nyotolende looko lɔ l’eteyi ntsha lolekɔ ɛtɛtɔ. Nyotolende ntsha anto wa l’eteyi walekɔ la nkfulu kana lako la ntsha intasɛwɔ nde l’amvulu y’ampɛma kana l’angando.’ Tɔtɔmbi 12, ndjila ole Yosua nya Kalɛbɛ watshɔka tá Kanana.

M’ɔkɔngɔ wɔ mfu 40, tɔtɔmbi wakalɔka, wayakalaka mbambo yɛ mfingo, yɛ pomɛgranɛtɛ la ɔkɔlɔ wɔ mbambo inkina. Tɔtɔmbi watepelaka ambɔ: ‘Owila wolekɔ wɔlɔ, koko anto wa l’eteyi walekɔ la nkfulu efula edjinge angando yɛwɔ ilekɔ la mpele dj’etale.’ Ko Kalɛbɛ atepelaka ante: ‘Iso nkoka ndaalonga. Nyontshɔ totshu ngo win’ɔsɔ.’ Wɛ ndjewaka lamo Kalɛbɛ ndatepela nghɔsɔ? Ladjikɛnde nde nya Yosua walawɛkɛki te Yehova. Koko tɔtɔmbi tonkina watepelaka ambɔ: ‘Lako! Anto wa l’eteyi walekɔ akonga efula! Isɛnamaká ngo ngete apaso lá ntondo kɛwɔ.’

Ase Isariyɛlɛ wasolongɔka alemba. Watateyɛka nkiyana la ntepela l’anteyi kɛwɔ ambɔ: ‘Nyontshɔ tɔsɔnɛ owandji onkina ndeke tokalɔ t’Edjipito. Ladjikɛnge sotatshu tásɔ djɛ ntovɔ?’ Yosua nya Kalɛbɛ watepelaka ambɔ: ‘Nyotapendolake Yehova edjinge nyotokake wɔma. Yehova angotolama.’ Koko ase Isariyɛlɛ lako ndáwokela. Wakɔpaka ole ndjaka Yosua nya Kalɛbɛ!

Yehova ndananghe mo? Ashimelaka Mɔsɛ ante: ‘Ase Isariyɛlɛ wakindjɛ ngo mpendola lemi m’ɔkɔngɔ wɔ kenkfumɔ kɛ momaananghela kɛnɛ. Djɛko ndeke, wangotshikala l’osowe wɔ lɔsɛkɛ ɛnɔnyi 40, edjinge wangovɔ l’eteyi. Ngo wana wawɔ la Yosua nya Kalɛbɛ ndeke longotowika l’owila wɔ maalake djɛ ndaapɛyɛ.’

Ndambo m’ɔkɔngɔ, winá wɔ ase Isariyɛlɛ yayalaka l’osowe wɔ lɔsɛkɛ, Kɔra, Datanɛ, Abiramɛ l’anto ankina 250 watɔmbɔkɛlaka Mɔsɛ. Washimelaka Mɔsɛ ambɔ: ‘Tombonyokfupa! Ladjikɛnge okokɛ ndjala ndɔndji kɛso ko Arɔ nkfundji k’ekete? Jehova alekɔ esanga laso isankfumɔ, apalekɔ ngo lawe nya Arɔ toko.’ Jehova atákɔpá nkambo djɛsɔ. Nde ɛnaka ndaka yɔmbɔɔtɔmbɔkɛla nde nde!

Mɔsɛ ashimelaka Kɔra nya anto ankfumɔ woosukaki ante: ‘Nyoye lomi lá tabɛrnaklɛ, edjinge nyongoyakale nkete djɛnyo djɔwɛmbakanyo tɔyɛ la mbele. Yehova angɔɔtɛnyɛ onto wɔ ndɔmbɔsɔna.’

La nkɛsɛ, Kɔra nya ampame yɛnde 250 watshɔka ntopomana la Mɔsɛ lá tabɛrnaklɛ. L’eteyi, iwɔ watshumbaka mbele ete ngo yayalaká nde ankfundji. Yehova ashimelaka Mɔse l’Arɔ ante: ‘Nyowangɔ otale me Kɔra nya anto wande.’

Kaanga Kɔra ndatshu te Mɔsɛ lá tabɛrnaklɛ, Datanɛ, Abiramɛ la nkfumbo yɛwɔ watonaka ntshɔ. Yehova ashimelaka ase Isariyɛlɛ dj’iwɔ mbangɔ mvulu y’ampɛma yɛ Kɔra, Datanɛ, l’Abiramɛ. Ase Isariyɛlɛ wawangɔka ipa la ntshatshimba. Datanɛ, Abiramɛ, la nkfumbo yɛwɔ wemalaka lá bandja djɛ mvulu yɛwɔ y’ampɛma. Mbala kɛkɔ kɛmɔ, looko l’atshɛka l’ape ko l’avukumelaka! Lá tabɛrnaklɛ, iyɛ ikitaka ko itshumbaka Kɔra nya anto wande 250.

Masɔ, Yehova ashimelaka Mɔsɛ ante: ‘Ɔsa danga me owandji wɔ ikɔlɛ l’ikɔlɛ, ndeke mfuna wiina wawɔ l’eteyi. Koko lá danga djɛ ikɔlɛ yɛ Lewi, funa djiina djɛ Arɔ. Ongotshike alanga wakɔ l’eteyi kɛ tabɛrnaklɛ, ko danga dj’onto wɔ mɔnghɔsɔna, ngoposa ansoso.’

La nkɛsɛ, Mɔsɛ aposɛka alanga wakɔ ankfumɔ ko ɛnyɛka lee ewandji wɛ tɔkɔlɛ. Danga dj’Arɔ mposaka ansoso edjinge ntɔka mbambo y’amandɛ. Nghɔsɔ nde Yehova ndashikikɛ ante nde asɔnaka Arɔ ete ngo nkfundji k’ekekete.