Mpunda kɛ Balamɛ kembotepela

Ase Isariyɛlɛ watshikalaka l’osowe wɔ lɔsɛkɛ l’ilá k’ɛnɔnyi ete ngo 40. Walongaka angando efula yɛ wolo. Winá wɔsɔ, mande wapikaka ká kɛwɔ lá looko lombálemá papoo lɔ Mɔabɛ lá ɛstɛ kɛ Ndjale kɛ Jɔrdanɛ, winá wokokaka wɔ iwɔ ndjingela lá Looko lɔ Daka. Balakɛ, nkfumi k’ase Mɔabɛ okaka wɔma ante wangoopapola ngando kɛnde. Djɛko ndeke, nde etaka mpame kɛmɔtshi kɛ yetaka ambɔ Balamɛ djɛ nde ndjɛ lá Mɔabɛ ndɔlɔka ase Isariyɛlɛ.

Koko Yehova ashimelaka Balamɛ ante: ‘Tɔlɔkake ase Isariyɛlɛ.’ Djɛko ndeke, Balamɛ atonaka ntshɔ. Nkfumi Balakɛ owetaka mbala k’ape edjinge olakaka djɛ ndɔɔpɛyɛ kenkfumɔ k’ɔkɔpande. Koko, Balamɛ atonaka ngo ntona. Ko Ndjambe atepalaka ante: ‘Wɛ nkoka ntshɔ, koko ongototepele ngo kɛnɛ k’okokoshimelami djɛ ntepela.’

Balamɛ apemaka lá mpunda kɛnde ko atshɔka tá sidɛ kɛ Mɔabɛ. Nde alonghanyɛka djɛ ntɔlɔka ase Isariyɛlɛ kaanga Yehova ndoshimbe dj’ipa nde ndaalɔka. Ondjelo wɔ Yehova ooposelaka mbala isato lá mboka. Balamɛ atɛnaki ondjelo, koko mpunda kɛnde ndeke lɔwɛnaki. Mbala kɛ ntondo, mpunda atshikaka mboka ko ingelaka t’osowe. Mbala k’ape, mpunda ahandaka lá ve ko asakanyɛka lokolo lɔ Balamɛ lá ve djɛkɔ. Mbala k’ekomo, mpunda awosamaka l’anteyi kɛ mboka. Mbala yɛkɔ inkfumɔ, Balamɛ adjupolaki mpunda kɛnde ewambo.

M’ɔkɔngɔ wɔ mbala k’asato, Yehova ananghaka djɛ mpunda ntepela. Mpunda opolaka Balamɛ ante: ‘Ladjikɛnge okindjɛ nkfusá lemi?’ Balamɛ atepelaka ante: ‘Ɔmbɔndɔsa ete ngo enkesa. Otayalami nde ndekɔ la lokfula, ntshimi lambokoyaka.’ Mpunda atepelaka ante: ‘Ombóheetá la lemi ɛnɔnyi efula. Ɔmbɛná nkonanghela nghɔnɛ lofu lɔmɔtshi?’

Masɔ Yehova ananghaka djɛ Balamɛ nyɛna ondjelo. Ondjelo atepelaka ante: ‘Yehova akoshimelaka dj’ipa wɛ ndɔka ase Isariyɛlɛ.’ Balamɛ atepelaka ante: ‘Lambonangha nyɛtshi. Lokalɔ tá mbandja.’ Koko ondjelo atepelaka ante: ‘Wɛ nkoka ntshɔ tá Mɔabɛ, koko tokotepele ngo kɛnɛ kɛ Yehova okoshimelande djɛ ntepela.’

Balamɛ awaka olakanyelo? Lako. M’ɔkɔngɔ wɔ lasɔ, Balamɛ ahonaka ndɔka ase Isariyɛlɛ mbala isato y’etondo, koko mbala yɛkɔ inkfumɔ Yehova aasakolaki l’edjena kɛ ndaalɔka. Ekomo ekomo, ase Isariyɛlɛ wayɛka ndonanyɛ ase Mɔabɛ, ko Balamɛ ayakemaka. Ape ataleka wɔlɔ ntsha Balamɛ otokelande Yehova ngo má bango?