Yehova ambɔsɔna Yosua

M’ɔkɔngɔ wɔnde ndɔndjɛ owila w’Isariyɛlɛ, Mɔsɛ akomaka t’ekomo kɛ lowiko lɔnde. Yehova oshimelaka ante: ‘Ape wɛ ndeke longingeyɛ ase Isariyɛlɛ lá Looko lɔ Daka. Koko, langɔkɛnyɛ looko lɔkɔ.’ Ko Mɔsɛ alɔmbaka Yehova djɛ nde nsɔna ilɔndjɛ yɛ bango yekokisá nama owila wɔnde. Yehova oshimelaka ante: ‘Tshɔka te Yosua tokooshimele ente nde ndeke mɔmɔsɔna.’

Mɔsɛ ashimelaka ase Isariyɛlɛ ante ovɔ lako ilá edjinge Yehova ambɔsɔna Yosua djɛ ndaalɔndjɛ tá Looko lɔ Daka. Masɔ Mɔsɛ ashimelaka Yosua ante: ‘Tokake wɔma. Yehova angokokotshɛ.’ Lako mpeta ilá masɔ, Mɔsɛ ahandaka t’isɔdji y’Onkókó wɔ Nebo, lá Yehova ndɔtɔwɛnyɛ looko lɔ ndalake Abrahama, Isaka la Djakɔbɔ. Mɔsɛ avɔka l’ɛnɔnyi 120.

Yehova ashimelaka Yosua ante: ‘Tepɔ Ndjale kɛ Jɔrdanɛ, ndeke ingila l’owila wɔ Kanana. Langokokotshɛ ngo ngete makotshɛ́ Mɔsɛ. Wɛ ladjɛ mbalaka Ɛlɛmbɛ wɛmi lofu la lofu. Tokake wɔma. Yala l’oloko wolo. Tshɔka edjinge nangha kɛnɛ k’ɔkɔlɔmbami djɛ nangha.’

Yosua atomaka tɔtɔmbi tope tá ngando kɛ Jeriko. L’ɔkɔndɔ wɔwɔlama, tongeka akambo efula lá kɛnɛ kaakomelisá l’eteyi. Winá wɔ yakalɔ, walotepelaka ambɔ ɔnɛ alekɔ winá wɔ wɔlɔ w’iwɔ ntshɔ tá Kanana. Lofu lɔwɔlamisá, Yosua ashimelaka owila w’Isariyɛlɛ dj’iwɔ nkanda nkete edjinge ngandjola lɔkɛndɔ. Masɔ, nde ashimelaka ankfundji itawɛmbaki onsete w’iseke dj’iwɔ mpeta ntondo lá Ndjale kɛ Jɔrdanɛ. Elola keyalaka lá ndjale. Koko, ngo winá wɔ ankfundji yile ekolo lá washi, washi wakɔmbaka nkɛla edjinge womaka! Ankfundji wakɛndaka tii l’anteyi kɛ ndjale ko wemalaka ngo lanyi, tii winá wɔ owila w’Isariyɛlɛ yashiyɛ ntepɔ tá wedji onkina. Ape nsese ntshɔ dj’avungolaka kɛnɛ kɛ Yehova ndananghe lá Ndjale kɛ Nkola nkola?

Ekomo ekomo, m’ɔkɔngɔ w’ɛnɔnyi enkfumɔ wɛsɔ, ase Isariyɛlɛ w’ingelaka lá Looko lɔ Daka. Wapikaka amvulu ole angando. Wakambaka awedji, wakonaka vinyɔ ole mbambo inkina. Looko lɔkɔ loyalaka looko lɔkɛlaki abɛlɛ l’ove.