Winá wɔ tɔtɔmbi t’ase Isariyɛlɛ yatshu tá ngando kɛ Jeriko, iwɔ wingelaka lá mvulu k’omoto wɔ yetaka ambɔ Rahaba. Nkfumi kɛ Jeriko okaka nkambo ntshɔ ko atomaka angala tá mvulu kɛ Rahaba. Nde isaka tɔtɔmbi tope tɔsɔ lá nsamba kɛ mvulu ko atomaka angala tá mboka kenkina. Ashimelaka tɔtɔmbi ante: ‘Langonyokotshɛ ladjikɛnde ndjewa ente Yehova alekɔ lanyo edjinge nyongotshita owila wɔnɛ. Lambɔnyɔwɔnda, nyontshikele elaka ente nyongowikɛ nkfumbo kɛmi.’

Tɔtɔmbi washimelaka Rahaba ambɔ: ‘Tombokolaka ente lako kaanga onto ɔmɔ wɔ lá mvulu kɛko wongonanghelamá nyɛtshi.’ Wooshimelaka ambɔ: ‘Kowa ɔkɔdji wɔ nkola nkola lá dindishi djɛko, ko nkfumbo kɛko kengowika.’

Rahaba akitshɛka tɔtɔmbi tɔkɔ má dindishi l’ɔkɔdji. Watshɔka t’enkókó, ko watisamaka l’eteyi mfu isato, ko masɔ wakalɔka te Yosua. Masɔ, ase Isariyɛlɛ watepɔka Ndjale kɛ Jɔrdanɛ ko wayalonghanyɛka djɛ ndɔsa owila. Jeriko ayalaka owila wɔ ntondo wɔ yatshite. Yehova aashimelaka dj’iwɔ ndjingola owila mbala kɛmɔ lá lofu l’ilá k’etsho esamalo. Lofu l’esambele, wadjingolaka owila mbala esambele. Masɔ, ankfundji wafulaka aseke, edjinge angala watɔka ntɛɛndjɛ tɔ wolo efula. Mpele djɛ ngando mvutshɛka! Koko mvulu kɛ Rahaba, keyalaki lá epele kɛ ngando ketávutshɛ́. Rahaba nya nkfumbo kɛnde wawikaka ladjikɛnde nde ayawɛkɛka te Yehova.

Losango lɔ Jeriko lotshanghanaka l’angando inkina y’ase Kanana. Ankfumi yɛwɔ wɔsaka nkano djɛ nsanghana djɛ nanyɛ ase Isariyɛlɛ. Koko, ase Ngibiyɔnɛ wɔsaka nkano djetshikitanyi. Walɔtaka ntshendja djembatshɛ́ ko watshɔka te Yosua, woshimelaka ambɔ: ‘Somboyɛ nde m’owila w’otale. Tokaka nsango ilendana la Yehova ole kɛnɛ kɛ ndanyonanghela l’Edjipito la lá Mɔabɛ. Ototshikele ɛlɔkɔ ente opangotonanyɛ, ko tongoyala enkambi wɛko.’

Yosua aawawolaka ko ɔsaka nkano dj’ipa ndaananyɛ. Mfu isato m’ɔkɔngɔ, nde ayɛka ndewa ante wapalekɔ anto wa m’owila w’otale. Yayalaka ngo lá Kanana. Yosua opolaka ase Ngibiyɔnɛ ante: ‘Ladjikɛnge nyotodjimbe?’ Wakadjimolaka ambɔ: ‘Tokaka wɔma! Iso ndjewaka ente Yehova Ndjambe kɛnyo anyonanela. Tɔmbɔkɔwɔnda totoyakake.’ Yosua akotshɛka ɛlɔkɔ kɛnde ko atshikaka la lowiko.

Lako mpeta ilá, ankfumi itano y’ase Kanana l’angala wawɔ wanaka ase Ngibiyɔnɛ. Yosua nya angala wande wakɛndaka otsho w’otondo djɛ ntaakotshɛ́. Mbandji kewangaka la nkɛsɛ dj’efula djɛ lofu lɔwɔlamisá. Ase Kanana watshanghanaka tá ndjena nkfumɔ. Ndjena nkfumɔ djɛ yotalotaka, Yehova akfɛɛyɛki ave wa nkekete. Masɔ Yosua alɔmbaka Yehova djɛ winá nyemala. Ladjikɛnge ndalɔmbɛ Yehova djɛ nangha nkambo ntananghemaki ntondo djɛsɔ? Ladjikɛnde Yosua alawɛkɛki te Yehova. Winá wemalaka lofu l’otondo tii winá wɔ ase Isariyɛlɛ yalonge ankfumi y’ase Kanana l’angala wawɔ.