WEKELO 07
Yehova oyɛnde ngete mo?
Ongokanelake ente Yehova Ndjambe oyɛnde ngete mo? Oyɛnde nde onto ɔmɔtshi wɔ lomo efula wɔ ngopakoke ndasukanyɛ lande? Ndo koko ɔngɔwɔsake etengo ekete kɛmɔtshi kɛ nkfulu efula, ngo ngete lompopo kana ndadji? Yehova oyɛnde nsɔsɔlɔ ngete mo? Má Otepela wɔnde Bible, Yehova ntɛnyɛka wekeka wande amɔtshi, ndjɔmbɔmba wopo w’okilande yimba.
1. Ladjikɛnge sopakoke nyɛna Ndjambe?
‘Ndjambe alekɔ nyuma.’ (Djɔanɛ 4:24) Yehova apalekɔ la demba dj’ankfunda. Koko oyɛnde nde Nyuma edjinge angintasɛke l’olongo, l’edjena kɛ sopakoke ndɔɔwɛna.
2. Wekeka wakɔnge amɔtshi walekɔ la Yehova?
Topakoke nyɛna Yehova, koko winá w’ekaso djɛ ndolembetela, tɔngɔɔkɔpa, la tɔngɛna ente alekɔ onto wɔ nsɔsɔlɔ wolekɔ́ la wekeka wa wɔlɔ lombombe. Bible ntepelaka ante: ‘Yehova nkɔpaka sii la nde apangokadjɛ enkambi wɛnde wɛ nkɔmano.’ (Yeembo 37:28) Nde alekɔ lonkina la ‘ngandji edjinge ndjokanaka djandji,’ pekapeka te anto wɛna ndjolo. (Djakɔbɔ 5:11) ‘Yehova alekɔ entshupa l’anto w’eloko wembatshɛ; nde mbikɛka anto wambɔlɛmbá.’ (Yeembo 34:18, nɔtɛ) Ongewake ente iso nkoka nsasangɛ Yehova kana ndootshutshumadjɛ? Onto wɔsɔna djɛ nangha akambo wa nyɛtshi, ndookiyanyɛka edjinge ndɔɔpɛyɛka paa efula l’oloko. (Yeembo 78:40, 41) Koko onto wɔsɔna djɛ nangha akambo wa wɔlɔ, nde ndoosasangɛka.—Wala Woongo 27:11.
3. Wopo wɔkɔnge Yehova ɛnyɛnde djɛ nde ntɔkɔpaka?
Djekeka djɛ Yehova djeleka wekeka ankina nde ngandji. Kaanga Bible ntepelaka ante: ‘Ndjambe alekɔ ngandji.’ (1 Djɔanɛ 4:8) Yehova ntɛnyɛka ngandji kɛnde apengo má lotshimba lɔ Bible, koko edjinge má nkete djɛ ndatonge. (Wala Elemo 14:17.) Ndjɔmbɔmba, tokokanela lá wopo wɔ ndototonge. Nde atɔpɛyɛka nkoka djɛ nyɛna akulɛrɛ yɛ wɔlɔ, djɛ ndjekameyɛ mizikɛ yɛ wɔlɔ edjinge djɛ ndɛta nkete djɛ ndɛ djɛ wɔlɔ. Nde nkɔpaka dj’iso nsasanga la lowiko.
TSHIMOLA
Tokohona djɛ ndjewa kɛnɛ kɛ Yehova onanghakande djɛ nangha akambo wakamoyɛ. Ko masɔ, lenda wopo wɔ Yehova ɔtɛnyɛkande wekeka wande wa wɔlɔ efula.
4. Nyuma k’ekina kelekɔ wolo wɔ Ndjambe w’okambande olemo.
Etengo sokambaka l’ɛwɔ wɛso djɛ nkamba olemo, ndeke Yehova ndookambaka la nyuma kɛnde k’ekina. Bible nyɛnyɛka djɛ nyuma k’ekina kepalekɔ onto, koko wolo wokamba la Ndjambe djɛ nangha akambo. Wala Luka 11:13 edjinge Elemo 2:17, ko kadjimola lá weepó wɛnɛ:
Yehova mpɛyɛka nyuma k’ekina le anto ankfumɔ wɔɔlɔmbá. Kokanela lasɔ, nyuma k’ekina oyɛwɔnde onto, kana wolo wɔ Ndjambe ndonanghaka akambo? Lamo otepelɛ nghɔsɔ?
Yehova angokambake la nyuma kɛnde djɛ nangha akambo wa nkekete. Wala Yeembo 33:6 edjinge 2 Pɛtɛlɔ 1:20, 21, ko kadjimola lá woopó wɔnɛ:
Topo tɔmɔtshi tɔkɔnge tɔ Yehova ndokambaka la nyuma kɛnde k’ekina?
5. Yehova alekɔ la wekeka wa wɔlɔ efula
Mɔsɛ ayalaki onkambi wɔ Ndjambe ɔmɔtshi wɔ nkɔmano, wɔkɔpaki ndjewa Ontongi wɔnde wɔlɔwɔlɔ. Djɛkondeke, Mɔsɛ ndɔɔlɔmbɛ ante: Ondakanyɛ mboka yɛko djɛ lemi nkewa.’ (Eposelo 33:13) M’eteyi, Yehova ndɔmbɛnyɛ Mɔsɛ wopo w’onto w’oyɛnde. Wala Eposelo 34:4-6, ko kadjimola lá weepó wɛnɛ:
Wekeka wakɔnge wa Yehova ndisola le Mɔsɛ?
Wekeka wakɔnge wa Yehova wolekɛ nkɔpa?
6. Yehova ndjilaka anto yimba
Enkambi wɛ Ndjambe, ntepela ente ase Hebero, wayalaki amfumbe lá Edjipito. Wopo wɔkɔnge Yehova ndokaka winá wɔ enkambi wɛnde yɛnaka ndjolo? Kekameyɛ ODIO ko nyotakilikaka kana Wala Eposelo 3:1-10. Ko kadjimola lá woopó wɔnɛ.
Ɔkɔndɔ wɔnɛ yombokoshimela nge lá kɛnɛ kelendana la wopo wɔ Yehova oyawokande winá wɔ anto ɛnawɔ ndjolo?—Wala vɛrsɛ 7 edjinge 8.
Ngete le wɛ, Yehova nkɔpaka nkotshɛ́ anto edjinge nde nkoka nangha nkambo djɛsɔ? Ladjikɛnge?
7. Nkete djetongamisá ntosipisoyɛka wekeka wa Yehova
Wekeka wa Yehova nyɛnamaka má nkete djɛ ndatonge. Lenda VIDEO. Ko m’ɔkɔngɔ wala Ɔrɔma 1:20, ko kadjimola lá woopó wɔ l’anse wɔnɛ.
Wekeka wa Yehova wakɔnge w’ɛnɛ lá nkete djɛ ndatonge?
ANTO EFULA NTEPELAKA AMBƆ: “Ndjambe apalekɔ onto, koko oyɛnde nde wolo ɔmɔtshi wolekɔ́ lá djena nkfumɔ.”
Iya wɛ, otepelɛ ente mo?
Ladjikɛnge otepelɛ nghɔsɔ?
LÁ YOPASƐ
Yehova alekɔ onto wɔ sopakoke ndɔɔwɛna edjinge ambololá la wekeka wa wɔlɔ lombombe, pekapeka ngandji.
Mvungo
Lamo sopakoke nyɛna Yehova?
Etawɔ nyuma k’ekina nge?
Kowala wekeka amɔtshi wa Yehova.
TOKANYI TONKINA
Hona djɛ ndjewa wayi ankina walendana la wekeka anɛyi wa Yehova waleka nkekete.
“Wekeka wakɔnge walekɔ́ la Ndjambe?” (Etange k’Olami No. 1 2019, lá Otetela)
Tokoshishima ilembetelo yɛnyɛ djɛ Yehova apalekɔ lá djena nkfumɔ.
“Ndjambe alekɔ lá djena nkfumɔ, la winá enkfumɔ?” (Djamba djelá jw.org)
Lenda ladjikɛnge Bible ɛdjɛnde nyuma k’ekina l’ɛwɔ wɛ Ndjambe.
Mpame kɛmɔtshi kembowodjɛ wiso ayalaka l’okakasano djɛ ndjawola ante Ndjambe ndowilaka yimba. Nyontshɔ tokisola kɛnɛ kookotshisá djɛ ntshikitanyɛ ikanyi yɛnde.