WEKELO 34
Wopo w’okokaso nyɛnyɛ ente iso ndjokaka Yehova ngandji?
Ɔmbɛna ente omboleka nkɔpa Yehova ndeka winá wɔ ngawange ndjeka Bible? Wɛ ɔngɔkɔpa ndeka nkomɛ djokanelo djɛko nyape wolo? Ntsha oyɛwɔnde nghɔsɔ, tovungɛke ente ntsha Yehova ambɛna ante wɛ ndɔɔkɔpaka efula, edjinge nde koko angoleka nkɔkɔpa la angokolama. Wopo wɔkɔnge w’okokɛ nyɛnyɛ Yehova ente wɛ ndɔɔkɔpaka?
1. Wopo wɔkɔnge w’okokaso nyɛnyɛ ente iso nkɔpaka Yehova?
Tɔngɛnyɛke ente iso nkɔpaka Yehova winá w’ɔlɛmɛyɛso. (Wala 1 Djɔanɛ 5:3.) Yehova apatshinde onto la wolo djɛ ndɔɔlɛmɛyɛ. Koko nde mpɛyɛka onto onkfumɔ wel’anteyi kɛso mbamba kɛ nsɔna djɛ ndɔɔlɛmɛyɛ kana lako. Ladjikɛnge? Ladjikɛnde, Yehova nkɔpaka dj’iso ‘ndɔɔlɛmɛyɛ l’oloko ɔmɔ.’ (Ɔrɔma 6:17) L’etepela enkina, Yehova nkɔpaka dj’iso ndɔɔlɛmɛyɛ má ngandji k’owokaso koko ape etengo ɔlɛmbɛ. Etenyi 3 edjinge 4 k’onkanda wɔnɛ kengokokotshɛ́ djɛ nyɛnyɛ Yehova ente wɛ ndowokaka ngandji má nangha ɛkɔpa kɛnde la ntona akambo w’otonande.
2. Lamo okokawɔ ndjalá okakasano djɛ nyɛnyɛ Yehova ente iso ndɔɔkɔpaka?
Bible ntepelaka ante: ‘Ndjolo y’onto wɔ wɔlɔ ndjalaka efula.’ (Yeembo 34:19) Isankfumɔ tonana la enanghedji kɛso kɛ ntshamba djɛ djɔ. Edjinge topomana l’ekakasano welendana la mfalanga, ntshamba djɛ sii edjinge akambo ankina. Winá wopomanaso l’ekakasano, ndjalaka winá ɛmɔtshi wolo nɛmɛyɛ Yehova l’akambo ankfumɔ w’ɔtɔlɔmbande. Ladjikɛnde nkoka ndjalá wɔdju nkilika mboka kɛ nyɛtshi. Koko winá wɔlɛmɛyɛ Yehova kaanga l’anteyi k’ekakasano, wɛ ndɔɔwɛnyɛka ente ɔngɔɔkɔpake ndeka nkete nkfumɔ. Edjinge ɔngɛnyɛ ente olekɔ la nkɔmano te nde. Lá wendji onkina, nde koko angoyala la nkɔmano te wɛ. Nde apangokokadjɛ.—Wala Yeembo 4:3.
TSHIMOLA
Toshishima ladjikɛnge nkɔmano djɛso te Yehova oyɛwɔ djonyi la akambo watokotshɛ́ djɛ ntshikala la nkɔmano te nde.
3. Nkambo mɔtshi djekolenda edjinge wɛ
Lá nkilika onkanda wɔ Djɔbɔ, Satana atamamanyɛ ngo Djɔbɔ toko akambo, koko edjinge anto ankfumɔ wakɔpa nkambela Yehova. Wala Djɔbɔ 1:1, 6–2:10, ko kadjimola lá weepó wɛnɛ:
Lá nkilika ikanyi yɛ Satana, ladjikɛnge Djɔbɔ ndayalaka la ntshunamo te Yehova?—Lenda Djɔbɔ 1:9-11.
Kɛkɔnge kɛ Satana ndatepela lá nkambo dj’anto ankfumɔ ndjila edjinge wɛ?—Lenda Djɔbɔ 2:4.
Wala Djɔbɔ 27:5b, ko kadjimola lá woopó wɔnɛ:
Wopo wɔkɔnge Djɔbɔ ndɛnyɛ ngandji kɛ ndokaka Yehova?
Djɔbɔ ɛnyɛka djɛ nde okaki Yehova ngandji winá wɔ ndatshikala la nkɔmano tende
Tɔngɛnyɛke ente iso ndjokaka Yehova ngandji winá wotshikalaso la nkɔmano tende
4. Sasangɛ oloko wɔ Yehova
Wala Woongo 27:11, ko kadjimola lá weepó wɛnɛ:
Yehova okakande ngete mo winá w’onanghaso akambo la balo edjinge ɔ́lɛmɛyɛso? Lamo?
5. Wɛ nkoka ndjalá la nkɔmano te Yehova
Ngandji k’okaso Yehova ntotshindaka djɛ nshimela anto ankina akambo wande. Nkɔmano djɛso te Yehova ntotshindaka dj’iso nshimela anto akambo wa Yehova kaanga nkambo ntshɔ iyopalekɔ́ wɔdju. Lenda VIDEO, ko kadjimola lá weepó wel’anse.
Ongokake wolo nshimela anto akambo wa Yehova?
Lá video djɛnɛ, kɛkɔnge kekotshisá Grayson djɛ nshiyɛ wɔma?
Alekɔ wɔdju ntshikala la nkɔmano te Yehova ntsha tɔkɔpa akambo wa Yehova ɔkɔpande la totona akambo w’otonande. Wala Yeembo 97:10, ko kadjimola lá weepó wɛnɛ:
Lá nkilika kɛnɛ kɛ sɔmbɛna, akambo wakɔnge amɔtshi wa Yehova ɔkɔpande? Akambo amɔtshi wakɔnge w’otonakande?
Wopo wɔkɔnge w’okokɛ ndjeka djɛ nkɔpa akambo wa wɔlɔ ko ntona akambo wa nyɛtshi?
6. Iso mbaka ɛtshɔkɔ winá w’ɔlɛmɛyɛso Yehova
Nɛmɛyɛ Yehova alekɔ nkambo djɛ wɔlɔ lombombe. Wala Izaya 48:17, 18, ko kadjimola lá weepó wɛnɛ:
Okanelɛ ente mo, iso ndjawolaka ente Yehova angewake winá enkfumɔ akambo walekɔ́ wɔlɔ le so? Lamo?
Wɛlɔ wɛkɔnge wɛ ngombowa ntateyɛ má winá wɔ ngeke djɛ ndjewa Yehova Ndjambe kɛ nsɔsɔlɔ?
ANTO EFULA NTEPELAKA AMBƆ: “Ndjambe apile akambo wonanghami yimba.”
Vɛrse djɛkɔnge dj’okokɛ nkamba djɛnyɛ ente akambo wonanghaso nkoka nsasangɛ Yehova kana ndokiyanyɛ?
LÁ YOPASƐ
Tɔngɛnyɛ Yehova ente iso ndowokaka ngandji winá w’isɔngɔlɛmɛyɛka edjinge w’isongotshikalaka la nkɔmano te nde kaanga l’anteyi k’ekakasano.
Mvungo
Olakanyelo wɔkɔnge wɔ ngombowa má ndjɔmbɔmba kɛ Djɔbɔ?
Wopo wɔkɔnge w’okokɛ nyɛnyɛ Yehova ente wɛ ndowokaka ngandji?
Kɛkɔnge kekoka nkokotshɛ́ djɛ ntshikala la nkɔmano te Yehova?
TOKANYI TONKINA
Lenda wopo w’okokɛ ndjalá la nkɔmano te Yehova la t’otshumano.
“Te onto wɔ nkɔmano wɛ ndonanghelaka akambo la nkamano” (16:49)
Eka akambo ankina walendana la wopo wɔ Satana ndatonghanyɛ anto akambo.
“Djɔbɔ aseelaka nkɔmano djɛnde” (Bible: Losango lɔkɔnge lolekɔ́ l’eteyi? etenyi 6)
Lenda wopo wɔ dɛngɛ ɛnyɛwɔ ngandji k’okawɔ Yehova.
Wopo wɔkɔnge olangala kana oseka okokande nyɛnyɛ nkɔmano djɛnde te Yehova winá wɔ winande ɔ́lɔmbawɔ djɛ nangha nkambo djɛ nyɛtshi?
Pika bongo lá ntondo kɛ tokanyi tɔ nyɛtshi time winako! (3:59)