Wapɛyɛka tovavɔ tɔmi wa biskwiti
NICK kanga l’intasɛ lá Oregon, lá États-Unis afunaka ante: “Má bango djɛ 2014, ntateyɛka mpeeta la tovavɔ tɔmi tope l’anteyi kɛ ngando kɛ mayalaka.” “L’eteyi, Ewakɛ wɛ Yehova wayalaki l’ekfumbo kɛ nyemalaka la wa prezantwarɛ yɛwɔ. Iwɔ walɔtaki wɔlɔ, la wapɛyɛki onto onkfumɔ w’ohetaki djemo l’omonghamongho onkfumɔ.
“Ewakɛ wɛ Yehova watayalaki la lɔkɛwɔ lɔ wɔlɔ ngo te anto toko koko edjinge te tovavɔ tɔmi. Lofu lɔmɔtshi, Elaine, kanga lemalaki entshupa la prezantwarɛ kɛnde, apɛyɛka tovavɔ tɔmi tope biskwiti. Ntateyɛ masɔ, winá enkfumɔ wɛ sahetaka entshupa la prezantwarɛ tovavɔ walotaki djɛ ‘ntɔsa biskwiti.’
“M’ɔkɔngɔ wɔ angɔndɔ efula, amvɔ yɛmi wásasangaki la biskwiti yɛwɔ, edjinge lemi lásasangaki l’asawo wa totenyi isa Ewakɛ wɛ Yehova. Koko ntakɔpaki nsawola isawɔ efula. Láyalaki l’ɛnɔnyi 70, koko ntewaki kɛnɛ kɛ Ewakɛ wɛ Yehova yawolaka. Mande Akristo w’ase nkɛlɛsiya wa nkiyanyɛka, nkanelaka ente angoyala wɔlɔ lemi ndjekaka Bible mɔmɛlɛ.
“Lá mbamba kɛsɔ, nyɛnaka Ewakɛ wɛ Yehova enkina lá todjena totshikitanyi telá ngando, wambemala la prezantwarɛ yɛwɔ. Edjinge iwɔ wewaki ndjila anto lá demba winá enkfumɔ. Winá enkfumɔ iwɔ wampɛyɛki nsakiso ye má Bible lá weepó wɛmi, ko kɛsɔ kentshindaka djɛ lemi ndawɛkɛ tewɔ.
“Lofu lɔmɔtshi Elaine andjopolaka ante: ‘Ongewake ente anyama oyɛwɔnde opapɛyɛ wɔ me Ndjambe?’ Ndookadjimolaka ente: ‘Ee, langakɔpake efula!’ Masɔ Elaine ambalelaka Izaya 11:6-9. Nkambo djɛsɔ, djetshikitanyɛka ekanedji kɛmi kɛ yimba, koko kaanga yayale nghɔsɔ ntakɔpaki enkanda wɛ wɔ.
“Lá mfu yɛwɔlamisá, tosawolaka ntshawo dj’itenyi koko djɛ wɔlɔ efula isa Elaine la womɛnde, Brent. Iwɔ wanshimelaka djɛ mbala má onkanda wɔ Mateo tii t’onkanda w’Elemo djɛ nsipisoyɛ kɛnɛ kesakisola ndjala Okristo wɔ nsɔsɔlɔ. Ko nanghaka nghɔsɔ. Ataheta ilá, ndjawolaka ndjeka Bible isa Brent la wadjɛnde Elaine. Isayalende l’antanteyi k’ɔnɔnyi wɔ 2016.
“Lákongelaki wekelo wɔmi wɔ Bible wɔ lobengo la lobengo la wingelo wɔ nsanghanyɛ lá Mvulu k’Onkfumi l’oloko lukuluku. Ndawokaka ente lambɔtshɔkwama edjinge ndjalaka l’osasa efula wɔ ndjeka kɛnɛ kɛ Bible otepelande nsɔsɔlɔ. Ndambo m’ɔkɔngɔ w’ɔnɔnyi ɔmɔ, nkomaka Owakɛ wɔ Yehova wombolongola batisimo. Winá wɔsɔ ndekɔ l’ɛnɔnyi 79, edjinge ndekɔ la djedjɛ lombombe lá wopo wɔ m’isola etolo kɛ nsɔsɔlɔ. Yehova antshɔkɔlaka má ndjawola lemi lá nkfumbo k’enkambi wɛnde wel’andja w’otondo.”