Weepó w’antangi
Etepela ‘wɛ ongalama,’ welekɔ́ lá Yeembo 12:7, olendanawɔ nde la ‘anto wɛná ndjolo’ (vɛrse 5) ndo koko la ‘etepela wɛ Yehova’ (vɛrse 6)?
Akambo ankina watepelama lá shapitrɛ kɛnɛ wɛnyɛ ente vɛrse djɛnɛ olendanawɔ nde l’anto.
Towala lá Yeembo 12:1-4, nghɔnɛ: ‘Anto wa nkɔmano wambodjonghana m’anteyi kɛ wana w’anto.’ Winá wɔsɔ, tokoshishima Yeembo 12:5-7, Avɛrse walendana la woopó wɔso.
‘“Ladjikɛnde ase nkɛtshi wɛna ndjolo,
Ladjikɛnde ase ɛmvɔ wasekuma,
Lemi nkɔpa ngandjɔ djɛ nangha nkambo mɔtshi,” ndeke lotepela Yehova.
“Lemi langaseela me anto wapawɔsi la odjito.”
Etepela wɛ Yehova welekɔ piyɔɔ;
Welekɔ ete ngo mfɛsa kɛmbɛla lá nkuka kɛ iyɛ kɛ nkɛtɛ, kembosolama mbala esambele.
Ee, Yehova, wɛ ongalama;
Wɛ ongolama onto l’onto wɔ l’anteyi kɛwɔ má lɔlɔnga lɔnɛ etshinda etshinda.’
Vɛrse 5 djetepela kɛnɛ kɛ Ndjambe ndongonanghela anto wɛna nkɛtshi. Nde angawikɛ.
Vɛrse 6 djakfɛ ante ‘etepela wɛ Yehova welekɔ piyɔɔ,’ ‘ete ngo mfɛsa kɛmbɛla.’ Etepela wɛsɔ wɛnyɛ wopo w’oyawokakaso lá nkambo djɛ etepela wɛ Yehova.—Yee. 18:30; 119:140.
Winá wɔsɔ tokoshishima vɛrse djɛlɔnda, Yeembo 12:7: ‘Ee, Yehova, wɛ ongalama, wɛ ongolama onto l’onto wɔ l’anteyi kɛwɔ má lɔlɔnga lɔnɛ etshinda etshinda.’ ‘Ongalama’ ɔtɔlande ikanyi ta ekete kɛkɔnge?
Ladjikɛnde vɛrse 7 djɛwɔlama vɛrse 6 djetepela ante: ‘Etepela wɛ Yehova welekɔ́,’ anto amɔtshi nkoka mfɛnyɛ ambɔ ‘ongalama’ olendanawɔ nde la etepela wɛ Ndjambe. La koko tewa ente Ndjambe alamaka Bible kaanga antonyi iyananghe la wolo djɛ ntona la ntshita.—Iza. 40:8; 1 Pɛ. 1:25.
Koko, nkambo djɛ nsɔsɔlɔ nde Yehova namaka anto w’otepelawɔ lá vɛrse 5. Yehova akindjɛ la angokindjɛ nkotshɛ́ la mbikɛ ‘anto wɛna nkɛtshi’ la wɛna ‘ndjolo.’—Djɔ. 36:15; Yee. 6:4; 31:1, 2; 54:7; 145:20.
Ko ‘ongalama’ kɛ lá vɛrse 7 olendanawɔ la nge?
Ntsha tomboshishima Yeembo yɛnɛ wɔlɔ wɔlɔ, ɛnama papoo ente ‘ongalama’ olendanawɔ nde l’anto.
Má bango djɛ Yeembo 12:1 Davidɛ atepela lá nkambo djɛ ‘enkambi wɛ nkɔmano’ wɛ Yehova wɛ anto wa nyɛtshi iyadjimbe. Manyi, towala ente Yehova angongandjɔ djɛ nanghela anto watepela wayi wa nyɛtshi wasɔ nkambo mɔtshi djɛ nyɛtshi. Yeembo itoshikikɛ ente tokoka ndjeela Ndjambe oloko mande angonangha akambo lá wapɔ w’enkambi wɛnde ladjikɛnde etepela wɛnde welekɔ piyɔɔ.
Djɛko ndeke vɛrse 7 djetepela djɛ Yehova angawomba, kana ‘angalama,’ ntepela ente angolama anto wɛna ndjolo me anto wa nyɛtshi.
Itepela yɛ Hebero ikadjimwama ‘ongalama’ yekambemaka lá vɛrse djɛnɛ lá kɔpi yɛ Afunelo wa Hebero yɛdje ndjilela oloko. Afunelo wa Grɛkɛ wetawɔ la Septante wakambaka la itepela ‘iso’ mbala ipe lá vɛrse 7, itepela ilendana l’anto wa nkɔmano wɛna ndjolo la wɛna nkɛtshi. Ekomo ekomo, vɛrse 7 djetepela ante ‘onto l’onto wɔ l’anteyi kɛ’ anto wa nkɔmano wangolamema ‘má lɔlɔnga lɔnɛ,’ me anto wasuka eyalelo kɛ akambo wa mbindo. (Yee. 12:7, 8) Lá Afunelo wa Arameyɛ Vɛrse 7 djetepela nghɔnɛ: “Ee, NKFUMI, wɛ ongolama anto wa wɔlɔ, wɛ ongawomba má lɔlɔnga lɔ nyɛtshi lɔnɛ etshinda etshinda. Anto wa nyɛtshi waheeta lá enkókó enkfumɔ, ete ngo losundja lɔlɔma ekila wɛ wana w’anto.” Etepela wɛsɔ wɛpɛyɛ ilembetelo inkina yɛnyɛ ente Yeembo 12:7 ipatepela djɛ etepela wɛ Ndjambe.
Koko, vɛrse djenɛ djɛpɛyɛ ‘anto walekɔ́ la nkɔmano’ nkongi ente Ndjambe angonangha nkambo mɔtshi.