Yeshaya

39 Mu aa mafuku, nfumu a Babilone Merodake-baladane muana a Baladane nkutumina Ezekiya mikanda na kia buntu, muanda bapushishe’shi ekeele mukumbe na bapanda. 2 Ezekiya nkuibakukila na muloo na nkuibalesha mbalo yaye ya kulamina bintu bia muulo bia nshibo yaye—kiamo kia arja, ôlo, muimu wa bome na ungi muimu ukile buwa, bi na ngoshi biaye bioso na bintu bioso bibaadi mu ma mbalo aaye a kulamina bintu bia muulo. Takui kintu kishibaadi Ezekiya mukutue kuibalesha mu nshibo* yaye na mu bufumu buaye boso.

3 Kunyima kua biabia, mutemuki Yeshaya nkutuela mui Nfumu Ezekiya na nkumuipusha’shi: “Bano bantu abakula kinyi na abafiki kunyi?” Nyi Ezekiya nkualula’shi: “Abafiki kuiumbo di kula, ku Babilone.” 4 Akupu aye nkumuipusha’shi: “Babamono kinyi mu nshibo mobe?” Ezekiya nkualula’shi: “Babamono bintu bioso bi mu nshibo* muande. Takui kintu su nkimune kianshi muibaleshe mu ma mbalo ande a kulamina bintu bia muulo.”

5 Biabia Yeshaya nkulungula Ezekiya’shi: “Pusha eyi dia Yehowa a biluilo, 6 ‘Tala! Mafuku aafiki, na bioso bi mu nshibo* mobe na bioso bibaadi bamashobe kulu balame mpa na lelo abende nabio mu Babilone. T’akushala kintu su nkimune,’ nyi bibakula Yehowa. 7 ‘Na bangi ba ku bana bobe bokatanda abakebakuata bende nabo, na abakekala bafubi ba muibalasa dia nfumu a Babilone.’”

8 Nyi Ezekiya nkulungula Yeshaya’shi: “Eyi dia Yehowa dibuakula di buwa.” Akupu aye nkulombasha’shi: “Muanda akuikala butaale na kufukama* mu mafuku a muwa wande.”