Bikitshino bia Batumibua
17 Binobino, abo nkukidila ku Amfipolise na ku Apoloni na abo nkufika ku Tesalonike kubaadi kitumbuilo kia bena Yunda. 2 Biabia muyile kiubishi kiaye, Mpoolo batuelele mu kitumbuilo munda mua sabato isatu, baadi munangushene nabo pabitale Bifundue, 3 ebapatuluila na kuibashinkamisha na bifundue’shi bibaadi abitungu Nkidishitu akiengie na abuushibue ku lufu, ambanga’shi: “Uno nyi Nkidishitu Yesu ankuete kuinuukisha.” 4 Bu kipeta, bangi ba kuabadi abafikile bena kukumiina na abo nkuikumbasha kui Mpoolo na Barnabase, na bino mbibakitshine kibumbu kikata kia bena Greke babaadi abalanguila Efile Mukulu, pamune na bana bakashi ba kinemo bebungi.
5 Kadi bena Yunda, nkukuata kiutu, abo nkubunga bangi bana balume bebubi babaadi abaumbakana pa mbalo ya kisalue na kunyima ku’abo kubunga kibumbu kikata kia bantu, ababangile kutuesha kafutakanyi mu kibundi. Abo nkutuela mu nshibo ya Yasone bafu’abakimbanga Mpoolo na Silase bua kuenda nabo kui kibumbu kia bantu. 6 Pabaabakutshilue kuibapeta, abakakile Yasone na bangi bakuetu kui bakata ba kibundi belanga misaase’shi: “Bano bantu babatuesha kafutakanyi pa nsenga ishima be pano dingi, 7 na Yasone bebatambula bu benyi baye. Bano bantu boso bakuete kukita mianda mu kuikutuena na mikamiko ya Kezare, bambanga’shi kui ungi nfumu, Yesu.” 8 Pabaadi kibumbu kia bantu na bakata ba kibundi bapushe ino mianda, babaadi bakalakashue; 9 kunyima kua Yasone na bakuetu kutuusha makuta abaadi aatungu* bua’shi bebapoosole, abebalekiele benda.
10 Mususa umune, bakuetu abatumine Mpoolo na Silase ku Beree bufuku. Pabaabafikile, babatuelele mu kitumbuilo kia bena Yunda. 11 Binobino bano ba mu Beree abaadi na binangu bibuwa kukila baaba ba ku Tesalonike, muanda babaadi batambule eyi na kisumi kibungi, bataluulanga kalolo Bifundue, kuifuku n’efuku bua kuuka su mianda yabapushanga ngia binyibinyi. 12 Biabia, bebungi ba kuabadi abafikile bena kukumiina, na bino mbibakitshine bana bakashi ba kinemo bena Greke bebungi mpa na bangi bana balume. 13 Pabaadi bena Yunda ba ku Tesalonike baukie’shi Mpoolo baadi kuete kulungula dingi eyi di’Efile Mukulu mu Beree, babafikile kuakua bua kutakula na kutuesha kafutakanyi mu kibumbu kia bantu. 14 Biabia mususa umune bakuetu abatumine Mpoolo dia ku kalunga ka mema, kadi Silase na Timote abashadile. 15 Anka baaba abaadi bashindikile Mpoolo, babayile naye mpa na ku Atene, na abo nkukatuka kuakua kunyima kua Mpoolo kuibalungula’shi, abitungu Silase na Timote bafikie kuadi bukidi bukidi.
16 Pabaadi Mpoolo kuete kuibatengiela mu Atene, bafiitshile munda pa kumona’shi kibundi kibaadi kiule na ma nkishi. 17 Biabia babangile kunangushena na bena Yunda na bangi bantu abaadi abalanguila Efile Mukulu mu kitumbuilo, na efuku dioso pa mbalo ya kisalue na baaba abaadi abasanganyibua paapa. 18 Kadi bangi ba filozofe bena Epikure na bena Setoya ababangile kuikakeena naye, na bangi abaadi abakula’shi: “Uno mbalakanyi akiebe kuakula kinyi?” Bangi namu’shi: “Amueka’shi mmulungudi a b’efile benyi.” Babaadi abakula bino muanda baadi alungula mukandu wibuwa wa Yesu na lusangukilo. 19 Biabia abamukuatshile benda naye mu Aleopage, bambanga’shi: “Tui balombene kuuka dino dilongiesha dipia diokuete kuakuila? 20 Muanda okuete kuakula mianda yenyi ku matui kuetu, na atukimbi kuuka akipatuula ino mianda.” 21 Bena Atene boso na benyi babaadi bashale muamua, babaadi abakisha nsaa yabashibaadi abakitshi kintu mu kuakula sunga mu kuteemesha mianda ipia. 22 Binobino Mpoolo nkuimana munkatshi mua Aleopage na nkuamba’shi:
“Bantu ba mu Atene, namono’shi mu mianda yoso anumueneka bepaane mu kutshina kua b’efile* kukila bangi bantu. 23 Bu kileshesho, pankilanga na kutala kalolo bintu bienu bia kulanguila, napete mpa na kilambuilo pafundibue’shi: ‘Kui Efile Mukulu sh’aukibua.’ Biabia, yawa anukuete kulanguila kushi kuuka, nyi ankuete kuinuukisha. 24 Efile Mukulu mupangie nsenga na bintu bioso bi muanka, bu biadi muikale Muanana a eyilu na nsenga, t’ashalaa mu ntempelo mukitshibue na maasa; 25 sunga’shi t’abamufubilaa kui maasa a bantu bu’shi e na lukalo na kintu, muanda aye nyi apeyaa bantu boso muwa na kuyooka na bintu bioso. 26 Na ku muntu umune, mmukite miilo yoso ya bantu buayidia kushala pa nsenga yoso, na aye nkutuula bipungo bitshibibue na nkuelela bantu mikalo bua mbalo yabadia kushala, 27 bua’shi bakimbe Efile Mukulu, sunga na kukunka, na bamupete binyibinyi sunga biadi’shi, te kula na muntu oso a kuatudi. 28 Muanda kukidila kuadi, tui na muwa, atusanasana, na tui kuanka, nka bu bibakuile bangi ba ku bafundi benu’shi: ‘Muanda atue namu tui bana baye.’
29 “Biabia, bu biatudi bana b’Efile Mukulu, t’abitungu tupuandikishe’shi Efile Mukulu e bu ôlo, kiamo kia arja, sunga ebue, bu kintu kiabadi basee muyile mpuandikishi ya bantu. 30 Binyibinyi, mu mafuku a kala, Efile Mukulu baadi mutadiile kuno kukutua kuuka; kadi binobino, kuete kuukisha bantu ba mbalo yoso’shi abitungu belangie. 31 Muanda mmutuule efuku diatshibila ba pa nsenga kiimu mu kululama kukidila kui muntu aadi mutuule, na mmutuushe kishinkamiisho kui bantu boso pa kumubuusha ku lufu.”
32 Binobino pabaabapushishe bua lusangukilo lua bafue, bangi ababangile kusepa, bangi namu abaadi abakula’shi: “Atukakuteemesha dingi ungi mususa pabitale uno muanda.” 33 Biabia Mpoolo nkuibaleka, 34 kadi bangi nkumulamata na nkufika bena kukumiina. Munkatshi muabo mubaadi Dionisiuse, baadi nsushi ku tumiladi tua ku Aleopage, na ungi muana mukashi baadi n’eshina bu Damarise na bangi.