Ufundibue kui Mateo
1 Mukanda aulondo mulongo wa ba nkambua* ba Yesu Nkidishitu,* muana a Davide, muana a Abalahama:
2 Abalahama batandile Isaake;
Isaake nkutanda Yakobo;
Yakobo nkutanda Yunda na bakuabo balume;
3 Yunda nkutanda Pereze na Zera, nyinabo baadi Tamare;
Pereze nkutanda Esrone;
Esrone nkutanda Arame;
4 Arame nkutanda Aminadabe;
Aminadabe nkutanda Nasone;
Nasone nkutanda Salemone;
5 Salemone nkutanda Boaze, nyinaye baadi Rahabe;
Boaze nkutanda Obede, nyinaye baadi Luta;
Obede nkutanda Yesee;
6 Yesee nkutanda nfumu Davide;
Davide nkutanda Salomone, bamutandile na mukashi a Uriya;
7 Salomone nkutanda Roboame;
Roboame nkutanda Abiya;
Abiya nkutanda Asa;
8 Asa nkutanda Yeoshafate;
Yeoshafate nkutanda Yorame;
Yorame nkutanda Oziase;
9 Oziase nkutanda Yotame;
Yotame nkutanda Akaze;
Akaze nkutanda Ezekiya;
10 Ezekiya nkutanda Manasee;
Manasee nkutanda Amone;
Amone nkutanda Yoziase;
11 Yoziase nkutanda Yekonyase na bakuabo mafuku ababayile nabo mu Babilone.
12 Kunyima ku’abo kuenda nabo mu Babilone, Yekonyase batandile Salatiele;
Salatiele nkutanda Zorobabele;
13 Zorobabele nkutanda Abiude;
Abiude nkutanda Eliyakime;
Eliyakime nkutanda Azore;
14 Azore nkutanda Zadoke;
Zadoke nkutanda Akime;
Akime nkutanda Eliude;
15 Eliude nkutanda Eleazare;
Eleazare nkutanda Matane;
Matane nkutanda Yakobo;
16 Yakobo nkutanda Yosefe mulume a Mariya, nyinaye na Yesu, abetanyina bu Nkidishitu.
17 Biabia, bipungo bia bantu boso kubanga ku Abalahama mpa na ku Davide, bibaadi bipungo 14; kubanga ku Davide mpa na mu mafuku ababayile nabo mu Babilone, bibaadi bipungo 14; kubanga pababayile nabo mu Babilone mpa na ku Nkidishitu, bibaadi bipungo 14.
18 Anka, kutandikua kua Yesu Nkidishitu kubaadi bino: Mu kipungo kibaadi nyinaye Mariya abamubangila kui Yosefe, Mariya baadi muimite ku bukome bua kikudi kiselele* kumpala kua’shi beyibakishene. 19 Anka bu bibaadi mulume aaye Yosefe muntu mululame na bu bibaadi apele kumukuatshisha bufu kui bantu, baadi akimbi kumupela mu bufiefie. 20 Anka kunyima ku’aye kuela bino binangu, Muikeyilu a Yehowa* bamumuenekiele mu kilotua, amulungula’shi: “Yosefe muana a Davide, totshinanga bua kuibakila mukashi oobe Mariya, muanda mupete eyimi ku bukome bua kikudi kiselele. 21 Akatanda muana mulume, na okamuudikie bu Yesu,* muanda akapaasha muilo waye ku miluisho yao.” 22 Bino bioso bibaadi bikitshikie bua kukumbasha bibaadi Yehowa muakule kukidila kui mutemuki aye’shi: 23 “Talayi! Nsonguakashi kamame akayimita na akatanda muana mulume, abakamudika bu Emanuele,” abipatuula’shi, “Efile Mukulu e netu.”
24 Akupu Yosefe babuukile, aye nkukita bibaabadi bamulungule kui muikeyilu a Yehowa na aye nkuata mukashi aaye, nkumutula ku’aye ku nshibo. 25 Anka tabaadi mulale naye bu mukashi mpa na pabaadi Mariya mutande muana mulume, na Yosefe nkumudika bu Yesu.