Kui Bena Loma
9 Nakula bia binyibinyi mu Nkidishitu; ntshikuete kudimba nya, nka bi kondo kande k’eshimba akatuusha bukamonyi ku bukuashi bua kikudi kiselele’shi, 2 ne na kinyongua kikata na busungu bushabupu muishimba diande. 3 Muanda ne kukumiina’shi bangabuule kui Nkidishitu bu muntu muedibue mulua pa muanda wa bakuetu, bena kifuko kiande kia ku mbidi, 4 abo bekale bena Isalele. Babaadi basangudibue buabadia kuikala bu bana b’Efile Mukulu. Efile Mukulu bebalesheshe ntumbo yaye ebapa bilombeno, Muiya, milayilo na kinemo kia kumukitshina mufubo wa kishila. 5 Abo, mbekale bekulu ba ba nshetu-kulu na kuabadi nyi kutukile Nkidishitu ku mbidi. Efile Mukulu e kunundu kua bioso atumbishibue bua loso. Amene.
6 Muanda tabi bu’shi eyi di’Efile Mukulu dibaadi dikutue kulombana. Muanda ta mboso bena “Isalele” bekale bena Isalele ba binyibinyi. 7 boso ba kuabadi, ta mbekale bana ba binyibinyi penda muanda wa’shi mbekulu ba Abalahama; muanda Efile Mukulu baadi mulungule Abalahama’shi, Yawa abetanyina bu kekulu kobe akatuukila kui Isaake. 8 Nkuamba’shi, bana ba ku mbidi ta mbekale binyibinyi bana b’Efile Mukulu nya, anka bana batandikue pa muanda wa mulayilo w’Efile Mukulu, ngi bekale lutandua lua binyibinyi. 9 Muanda eyi dia mulayilo dibaadi bino’shi: “Mu kino kipungo nankaluka, na Sara akekala na muana.” 10 Tabibaadi bikitshikie penda mu kiakia kipungo nya, bibakitshikile dingi pabaadi Rebeka mutande mpasa kukiila kui nkambu’etu Isaake; 11 muanda kumpala kua’shi batandikue na kuabadia kukita muanda wibuwa sunga wibubi, Efile Mukulu balesheshe’shi mpango yaye ya kusangula ibaadi na kia kulombana, kushi muyile mifubo, anka muyile Yawa ayitanyina. 12 Efile Mukulu balunguile Rebeka’shi: “Mukulu ekala mpika a mukinga.” 13 Anka bu biabidi bifundibue’shi: “Naadi mufule Yakobo, kadi nashikua Esau.”
14 Biabia, tui kuamba kinyi? Efile Mukulu mmukutue kululama su? Nya, ta mbiabia! 15 Muanda balunguile Moyise’shi: “Nakalesha lusa kui yawa oso ankumiina kulesha lusa, na nakalesha kalolo kui yawa oso ankumiina kulesha kalolo.” 16 Biabia, bino tabikitshika muyile kukumiina kua muntu nabene sunga mu kuitatshisha kuaye, anka mu kukumiina ku’Efile Mukulu, e na lusa. 17 Muanda bifundue abilungula Faraone’shi: “Ne mukulekie na muwa bua kulesha bukome buande kukiila kodi na bua’shi batumbishe eshina diande mu nsenga ishima.” 18 Biabia, Efile Mukulu aleshaa lusa kui yawa oso akumiina, anka alekaa yawa oso aadi mukumiine kulekieelela buadia kupapisha eshimba.
19 Pangi nui kungipusha’shi: “Buakinyi Efile Mukulu kiatungunuka nka na kuitutopeka? Muanda nnanyi mulombene kupela kikiebe ki’eshimba diaye?” 20 Biabia obe we nnanyi akiebe kuelesha Efile Mukulu mpaka? Kintu kiabadi babumbe, ki kuipusha bekimbumbu’shi: “Buakinyi bombumbu mu uno mushindo?” 21 Tui kuamba kinyi? Mbuufi te na matalua panundu pa ema bua kukita kipulu kia kinemo na kingi namu kishi kia kinemo na diadia ema dimune su? 22 Biabia, tui kuamba kinyi, su Efile Mukulu baatshile kitshibilo kia kulesha nsungu na bukome buaye, na su baadi mukumiine kulesha luishinko kui bantu babaadi balombene kubutudibua, tabaadi na matalua a kuibikita su? 23 Na su baadi mukite bino bua kulesha bukata bua ntumbo yaye kui bipulu bia lusa, bibaadi mubadiile kulumbuula bua ntumbo, 24 kuamba’shi, atue babaadi muitanyine kushi penda munkatshi mua bena Yunda, kadi mpa na munkatshi mua ingi miilo, tui kuamba dingi kinyi? 25 Anka bu biakula dingi mu mukanda wa Oseya’shi: “Baaba bashi bu muilo wande, nankebetanyina bu ‘muilo wande,’ na baaba bashi bafudibue, bu ‘bafudibue;’ 26 na mu mbalo mubaabadi bebalungule’shi, ‘Tanui muilo wande,’ abakebetanyina bu ‘bana b’Efile Mukulu e na muwa.’”
27 Yeshaya edidi pabitale Isalele’shi: “Sunga bungi bua bana ba Isalele buekala bu lusenga lua ku kiese kia kalunga ka mema, nka penda abakashala nyi abakapanda. 28 Muanda Yehowa akatshibila nsenga kiimu, kiimu kilombane na bukidibukidi.” 29 Dingi, nka bibaadi Yeshaya mutemukie’shi: “Su Yehowa Efile a biluilo ta muitulekiele kekulu,* tubadia kuikala bafikie nka bu Sodome na tubadia kuifuanena na Gomore.”
30 Biabia tui kuamba kinyi? Bantu ba ingi miilo abaadi baleshe lukumiino na abo nkubadibua bu bantu balulame, sunga mbiabashibaadi abalondo bululame; 31 kadi, sunga mbibaadi Isalele alondo muiya wa kululama, ta mobeshe kukookiela wawa muiya. 32 Bua kabingilo kinyi? Muanda babaadi abeulondo kushi muyile lukumiino, kadi muyile bikitshino. Babaadi bakokole “kuibue dia kikokoshi”; 33 Nka bu biabidi bifundibue’shi: “Tala! Natuulu mu Siyona ebue dia kikokoshi na lubuebue aluponesheena, anka yawa atuulu lukumiino luaye muadidi, takakuatshishibua buufu nya.”