Yeshaya
45 Yehowa alungula muedibue muimu aaye, Siruse
Andi mukuate ku mboko ibalume
Bua kumuna miilo kumpala kuaye,
Bua kuata* ba nfumu bina ngoshi,
Bua kufungula kumpala kuaye biibi bibidi,
Biabia, bibelo tabikafungibua:
2 “Nakende kumpala kobe,
Na n’akabaata tu miengie.
Nakatshokola mu bipindi bibelo bia kiamo kia munyinga,
Na nakatshokola bibao bia kiamo.
3 Nakakupa bupeta bui mu mufito
Na bupeta bufuamishue mu ma mbalo afuame,
Buashi oukie’shi nnami Yehowa,
Efile Mukulu a Isalele, akuitanyina muishina diobe.
4 Pa muanda wa mufubi ande Yakobo na bua Isalele andi musangule,
Nakuitanyina muishina diobe.
Nakupa eshina dia kinemo sunga biosh’onguuku.
5 Nami Yehowa, na takui mungi nya.
Takui mungi Efile Mukulu kukatusha penda ami.
Nakakunyingisha* sunga biosh’onguuku,
6 Buashi bantu baukie
Kukatukila kutunduka nguba mpa na kupona nguba’shi
Takui mungi kunkatusha ami.
Nnami Yehowa, na takui mungi.
7 Nakitaa etaata na napangaa mufito,
Nakitaa butaale na napangaa dikienga;
Ami Yehowa, nkuete kukita ino mianda yoso.
8 Obe eyilu nokiesha mpeshi;
Makumbi apongoole kululama.
Nsenga ibuulukie na ituushe kipandilo,
Nka mu yaya nsaa imune imeneshe kululama.
Ami Yehowa nyi muibipangie.”
9 Malua kui muntu alu* na Mupangi* aaye,
Muanda mmuikale penda kipese kia kintu kikitshibue na ema
Munkatshi mua bingi bipese bia kintu kikitshibue na ema bi paashi!
Ema di kulungula mbuufi’shi:* “Okuete kukita kinyi?”
Sunga kintu kibokitshi ki kuakula’shi: “Te na maasa nya”?*
10 Malua kui yawa alungula nshe bana’shi: “Botanda kinyi?”
Na alungula mukashi’shi: “Okuete kutanda kinyi?”*
11 Yehowa Eselele a Isalele, Yawa mukukite akula bino’shi:
“Ongele nkonko pabitale mianda ayifiki
Na ontumina eyi pabitale bana bande na mifubo ya maasa ande su?
12 Ne mukite nsenga na napanga muntu panka.
Ne molole eyilu na maasa ande,
Na natumina kiluilo kiadio kioso eyi.”
13 Yehowa a biluilo bakula’shi: “Nemulumbuule muntu mu kululama,
Na nakalulamisha mashinda aaye oso.
Aye nyi akebaka kibundi kiande
Na akapososha bantu bande babaabadi bakuate benda nabo kushi kufuta makuta sunga kutshiba milomo.”
14 Yehowa bakula bino’shi:
“Makasa* a Ejipitu na bintu bia kupaana* bia Etshopi na Bena Seba, bantu ba kisiisa kila,
Abakafiki kodi na abekala bobe.
Abakatambuka kumongo kobe bekale mu nkano.
Abakafiki na bakuinamine.
Abakakulungula na kanemo koso’shi: ‘Mbinyibinyi Efile Mukulu e nobe,
Na takui mungi; takui mungi Efile Mukulu.’”
15 Mbinyibinyi we Efile Mukulu efuamishaa,
Ô Efile Mukulu a Isalele, Mupaashi.
16 Boso abakakuatshishibua buufu na abayishiibua milongo;
Bantu abakitaa ma nkishi abakende na buufu.
17 Anka Yehowa akapaasha Isalele na kipandilo kia loso.
Tanukakuatshishibua buufu sunga kusabulushua bua ikalaika.
18 Muanda bino nyi bibakula Yehowa,
Mupangi a eyilu, Efile Mukulu a binyibinyi,
Yawa baadi mukite nsenga, Mupangi aayo baadi muiyishimikie bi bukopo,
Shi baadi muiyipangie bua bisumanga,* anka baadi muiyikite bua’shi bantu bashale panka,
“Nnami Yehowa, na takui mungi.
19 Tshinaadi muakuiile mu mbalo ifuame, mu nsenga ya mufito;
Tshinaadi mulungule lutandua* lua Yakobo’shi:
‘Nkimbeyi penda bua bisumanga.’
Nnami Yehowa, akulaa mianda ilulame na akulaa bia binyibinyi.
20 Ebungieyi pamune na nufikie.
Efubuileyi pamune, anue bapande mu miilo.
Tabauuku kintu, baba basemune ma nkishi
Na abatekie efile shi mulombene kuibapaasha.
21 Akulayi, na nutuushe bishinkamisho bia muanda wenu.
Besambe pamune mu buumune.
Nnanyi baadi muukishe bino kubanga kala
Na baadi muibiakule kubanga mu mafuku a kala?
Ta nami Yehowa su?
Takui ungi Efile Mukulu nka penda ami;
Efile Mukulu mululame, na Mupaashi, takui mungi kunkatusha nka penda ami.
22 Fikayi kuandi na nupaashibue, anue nfudiilo yoso ya nsenga,
Muanda ami ne Efile Mukulu, na takui mungi.
23 Ne muitshipe muishina diande;
Eyi dituukie mukanua muande ndia binyibinyi,
Tadikutua kulombana:
Muntu oso akankunamina,
Na muntu oso aketshipi bua kuikala na lulamato kuandi
24 Na akakula’shi: ‘Binyibinyi mui Yehowa mui kululama kua binyibinyi na bukome.
Baba boso bamukuatshile nsungu abakafiki kumpala kuaye na buufu.
25 Mui Yehowa bana* boso ba Isalele abakabingishibua,
Na abaketumbisha muadi.’”